Filipino women walking on the street while visiting teaching a sister.
Shpëtimtari u kritikua shpesh nga farisenjtë dhe udhëheqësit e tjerë judeas për mënyrën se si e zbatonte ditën e Shabatit. Përgjigjet e Jezusit ndaj këtyre udhëheqësve fetarë do të të ndihmojnë të kuptosh më mirë qëllimin e Shabatit dhe si t’i ftosh më plotësisht bekimet e Zotit në jetën tënde.
Përgatitja e nxënësve: Ftojini nxënësit të mendojnë për një mënyrë të parapëlqyer se si t’i afrohen më pranë Shpëtimtarit, individualisht ose me familjet e tyre, në ditën e Shabatit.
Veprimtari të Mundshme të të Mësuarit
Qëllimi i Shabatit
Për veprimtarinë e mëposhtme, merrni parasysh t’u caktoni shokë ose shoqe nxënësve dhe ta ftoni secilin shok ose shoqe të përgjigjet për një nga situatat.
Përfytyro dy situatat e mëposhtme. Në njërën situatë dikush të thotë se dita e Shabatit ka shumë rregulla mbi atë se çfarë duhet bërë dhe nuk duhet bërë dhe, se nëse nuk i zbaton të gjitha ato, ti po i thyen urdhërimet e Perëndisë. Në një situatë tjetër, dikush të thotë se e diela nuk është ndryshe nga çdo ditë tjetër dhe se mund të bësh çfarë të duash të dielave.
Sa komod ndihesh t’u përgjigjesh këtyre situatave?
Çfarë pyetjesh ke për ditën e Shabatit?
Ndërsa nxënësit lexojnë përgjigjet, merrni parasysh t’i shkruani ato në tabelë. Nëse nxënësit ndihen në siklet për t’ia lexuar pyetjet klasës, ftojini t’i shkruajnë përgjigjet në ditarët e tyre të studimit. Mos u mundoni t’u përgjigjeni pyetjeve në këtë moment, por inkurajojini nxënësit të kërkojnë përgjigje ndërsa vazhdojnë studimin e tyre.
Ndërsa studion se si Shpëtimtari e mbajti Shabatin të shenjtë, kërko përgjigje për pyetjet e tua. Kërko udhërrëfim nga Ati Qiellor për të të ndihmuar.
Ligji i Moisiut dha mësim se populli i Izraelit nuk duhej të punonte në Shabat (shih Eksodi 31:14–15). Skribët dhe farisenjtë shtuan interpretimet e tyre në ligjin e Moisiut, duke ia ndryshuar qëllimin fillestar.
Lexo vargjet e mëposhtme, duke shenjuar frazat që tregojnë se si e sheh Jezusi ditën e Shabatit.
Marku 2:23–28 – Farisenjtë vënë në dyshim përshtatshmërinë e këputjes dhe ngrënies së kallinjve në Shabat.
Marku 3:1–6 – Farisenjtë vënë në dyshim përshtatshmërinë e shërimit të dikujt në Shabat.
Merrni parasysh t’u kërkoni nxënësve të tregojnë çfarë shenjuan dhe arsyen përse.
Përvijimi për mësimet Mateu 11–12; Lluka 11 tek Eja, Më Ndiq – Për Individët dhe Familjet: Dhiata e Re 2023 diskuton për ditën e Shabatit. Nëse koha për mësimin e sotëm përputhet me përvijimin e materialit Eja, Më Ndiq, merrni parasysh t’u kërkoni nxënësve të tregojnë atë që kanë mësuar nga studimi i tyre në shtëpi. Nxënësit gjithashtu mund të inkurajohen t’i ndajnë pikëpamjet nga klasa me familjet e tyre.
Presidenti Rasëll M. Nelson paraqiti pikëpamjet e mëposhtme për qëllimet e ditës së Shabatit:
Pamja
Official portrait of President Russell M. Nelson taken January 2018
“Çfarë nënkuptoi Shpëtimtari kur Ai tha se ‘e shtuna është bërë për njeriun dhe jo njeriu për të shtunën’? [ Marku 2:27 .] Unë besoj se Ai donte që ne të kuptonim se Shabati qe dhurata e Tij për ne, duke na dhënë frymëmarrje [ose lehtësim] të vërtetë nga ashpërsitë e jetës së përditshme dhe mundësi për ripërtëritje shpirtërore e fizike. Perëndia na e dha këtë ditë të veçantë, jo për zbavitje apo punë të përditshme, por për një çlodhje nga detyra, me lehtësim fizik e shpirtëror.”
(Rasëll M. Nelson, “Shabati Është një Kënaqësi”, Ensign ose Liahona, maj 2015, f. 129.)
Çfarë mësove për qëllimet e Zotit për ditën e Shabatit?
Çfarë mund të mësojmë për Shpëtimtarin nga veprimet dhe sjellja e Tij në Shabat?
Ndihmojini nxënësit të përcaktojnë parime si në vijim: Zoti na e dha ditën e Shabatit për të bërë mirë dhe për t’u çlodhur nga ashpërsitë e jetës së përditshme.
Si mendon se e tregon dashurinë e Perëndisë për ne urdhërimi i Tij për ta mbajtur të shenjtë ditën e Shabatit?
Si mund ta respektoni ditën e Shabatit?
Kuptimi i qëllimeve të ditës së Shabatit dhe i bekimeve që ka Perëndia për ty mund të të motivojë ta mbash të shenjtë ditën Shabatit. Duke mësuar se si ta respektosh më mirë ditën e Shabatit, ti mëson ta ftosh më plotësisht shërimin dhe lehtësimin e Shpëtimtarit në jetën tënde.
Jepuani nxënësve informacionin e mëposhtëm në një fletushkë ose paraqiteni përpara klasës. Nxënësit mund ta studiojnë informacionin individualisht ose në grupe të vogla.
Studio burimet e mëposhtme për të mësuar më shumë për Shabatin dhe bekimet që mund të marrim duke e respektuar atë.
Presidenti Rasëll M. Nelson, dha mësim sa vijon për shfaqjen e dashurisë sonë ndaj Perëndisë në Shabat:
Pamja
Official portrait of President Russell M. Nelson taken January 2018
“Në vitet e mia më të hershme, unë studiova veprën e njerëzve të tjerë, të cilët kishin hartuar lista lidhur me gjërat që duheshin bërë dhe nuk duheshin bërë në Shabat. Kohë më vonë mësova nga shkrimet e shenjta se sjellja ime dhe qëndrimi im për Shabatin përbënte një shenjë midis meje dhe Atit tim Qiellor [shih Eksodi 31:13 ; Ezekieli 20:12, 20 ]. Me atë kuptueshmëri, unë nuk kisha më nevojë për lista të gjërave që duheshin bërë dhe nuk duheshin bërë. Kur më duhej të merrja një vendim nëse një veprimtari ishte e duhur apo jo për Shabatin, unë thjesht e pyesja veten: ‘Çfarë shenje dua t’i jap Perëndisë?’ Ajo pyetje i bënte zgjedhjet e mia për ditën e Shabatit tepër të qarta.”
(Rasëll M. Nelson, “Shabati Është një Kënaqësi”, Ensign ose Liahona, maj 2015, f. 130.)
Pyetja e mëposhtme mund t’iu japë nxënësve mundësinë për të treguar mendimet e tyre nga veprimtaria e sugjeruar e përgatitjes së nxënësve.
Cilat janë disa nga mënyrat e tua të parapëlqyera për t’iu afruar më pranë Jezu Krishtit të dielën?
Ndërsa nxënësit tregojnë, kuptoni se ata mund të kenë pikëpamje të ndryshme për atë që është ose nuk është e përshtatshme në ditën e Shabatit. Nëse është e nevojshme, kujtojuni nxënësve të jenë mirëkuptues dhe t’i respektojnë pikëpamjet e të tjerëve.
Si ju ndihmoi t’u përgjigjeni pyetjeve tuaja për ditën e Shabatit ajo që mësuat në këtë mësim?
Nëse nuk gjetët përgjigje për pyetjet tuaja, çfarë mund të bëni për ta vazhduar kërkimin për to?
Çfarë përshtypjesh keni marrë për atë që mund të bëni për t’i gëzuar më plotësisht bekimet e respektimit të Shabatit?
Merrni parasysh të jepni dëshminë tuaj mbi rëndësinë e mbajtjes së ditës së Shabatit të shenjtë. Ftojini gjithashtu nxënësit të tregojnë dëshmitë e tyre nëse do të dëshironin.
Komente dhe Informacion për Rrethanat
Përse farisenjtë i kritikuan dishepujt se “këputnin kallinj” në Shabat?
Sipas ligjit të Moisiut, një person mund të këpusë kallinj me dorë për sa kohë që nuk e kalon këtë privilegj duke marrë draprin për të korrur (shih Ligji i Përtërirë 23:25). Ligji gojor i farisenjve sidoqoftë, shkonte më tej se ligji i Moisiut dhe thoshte se këputja me dorë e kallinjve në Shabat ishte e ndaluar.
Si mund ta bekojë mirënjohja përvojën tuaj me sakramentin dhe Shabatin?
Çfarë tjetër mund të bëj për t’i ftuar bekimet e ditës së Shabatit?
Presidenti Rasëll M. Nelson dha disa pikëpamje për mënyrat e efektshme për ta ftuar frymën e ditës së Shabatit në fjalimin e tij “Shabati Është Një Kënaqësi” (Ensignose Liahona, maj 2015, f. 129–132).
Veprimtari Plotësuese e të Mësuarit
Si mund të përgatiteni për ditën e Shabatit?
Nxënësit mund të përfitojnë nga dëgjimi i ideve të njëri-tjetrit se si të përgatiten për Shabatin gjatë javës. Merrni parasysh ta pyetni klasën: “Çfarë ju ka rezultuar si përgatitje e dobishme gjatë javës për ta bërë më shumë Shabatin një bekim?”