Mateu 11:28–30

“Unë do t’ju Jap Çlodhje”

Gjatë shërbesës së Tij, Shpëtimtari dha mësim ligjin më të lartë të ungjillit dhe shëroi të sëmurët. Ndërsa pati trysni kundër Shpëtimtarit dhe mësimeve të Tij, Ai e dënoi ligësinë dhe premtoi çlodhje për të gjithë ata që vijnë tek Ai. Ky mësim mund ta rritë besimin tënd se Zoti do të të ndihmojë me sfidat dhe barrët e tua.

Përgatitja e nxënësve: Ftojini nxënësit të pyetin një pjesëtar të familjes ose një shok për mënyrën se si Shpëtimtari u ka dhënë atyre paqe ose ngushëllim.

Veprimtari të Mundshme të të Mësuarit

Barrët dhe sfidat tuaja

Veprimtaria e mëposhtme mund të bëhet në tabelë si klasë, ose nxënësit mund të ftohen të bëjnë vizatimet e tyre.

Vizato një figurë njeriu që përfaqëson një adoleshent/e. Vizato një çantë në shpinën e figurës së njeriut që përfaqëson barrët dhe streset me të cilat përballen adoleshentët sot. Shkruaj të paktën pesë prej atyre barrëve apo streseve brenda, mbi ose rreth çantës.

Ftojini nxënësit të tregojnë se çfarë kanë vizatuar.

Ftojini nxënësit t’i mbyllin sytë dhe të mendojnë për përgjigjen e tyre ndaj pyetjes së mëposhtme.

• Me një vlerësim nga një deri në pesë, ku pesa është jashtëzakonisht mirë dhe njëshi aspak mirë, sa mirë mendon se po i përballon barrët dhe ngjarjet e tua stresuese?

Nëse tashmë nuk e ke bërë, merr parasysh të gjesh një çast tani për ta ftuar Atin tënd Qiellor që të të ndihmojë të gjesh parime që mund të të ndihmojnë me barrë të caktuara që po i mban aktualisht.Lexo te Mateu 11:28–30 , duke kërkuar të vërtetat që dha mësim Shpëtimtari, që mund ta ndihmojnë dikë i cili është i rënduar nga barrët.

Mateu 11:28–30 është një fragment i zotërimit doktrinor. Merr parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi.

Merreni parasysh t’i shkruani përgjigjet e nxënësve për pyetjet e mëposhtme në tabelë pranë figurës së njeriut.

• Çfarë të vërtetash gjete?

• Si mund ta ndihmojnë këto të vërteta dikë që po kalon një kohë të vështirë?

Ndonëse nxënësit mund të përdorin fjalë të ndryshme, sigurohuni që të kuptojnë se nëse vijmë te Jezu Krishti, Ai do t’i lehtësojë barrët tona dhe do të na japë çlodhje. Pyetini nxënësit nëse kanë ndonjë pyetje në lidhje me atë që kanë mësuar.

Shiheni pjesën “Veprimtari Plotësuese të të Mësuarit” për një mënyrë alternative për t’i ndihmuar nxënësit të mësojnë rreth frazave te Mateu 11:28–30.

“Merrni mbi vete zgjedhën time”

Ndonjëherë fjalët ose frazat në shkrimet e shenjta mund të jenë të vështira për t’u kuptuar. Kur mësojmë se çfarë do të thonë fjalët dhe frazat, kjo mund të na ndihmojë të arrijmë të mësojmë atë që Shpëtimtari dëshiron që ne të dimë. Ushtroje këtë me frazën “Merrni mbi vete zgjedhën time” ( Mateu 11:29).

Nxitini nxënësit të tregojnë atë që tashmë dinë për këtë frazë duke bërë pyetjet në vijim: Çfarë është zgjedha? Çfarë është zgjedha e Jezu Krishtit? Si e marrim zgjedhën e Jezu Krishtit mbi vete?

Përdoreni cilindo ose të gjithë informacionin e mëposhtëm për të plotësuar kuptueshmërinë e nxënësve.

Paraqiteni figurën vijuese.

Zgjedha është “një mjet i vendosur rreth qafës së kafshëve ose njerëzve për t’i shfrytëzuar ata së bashku” (Udhëzuesi për Shkrimet e Shenjta, “ Zgjedhë ”, scriptures.ChurchofJesusChrist.org). Kafshët në këtë fotografi mbajnë një zgjedhë.

Plaku Eduard Dubi, i Të Shtatëdhjetëve, tregoi përvojën në vijim:

“Në dhjetor të vitit 2015 në Madzivë, Zimbabve, Naumeja [gruaja ime] dhe unë pamë dikë që po punonte tokën me dy qe. Unë u habita tek pashë se njëra kafshë ishte një ka i madh ndërsa tjetri një dem i vogël. U hutova. Pyeta veten me zë të lartë: ‘Pse një fermer do ta lëronte tokën me dy kafshë të pabarabarta në zgjedhë?’

Nëna e Naumesë, që rrinte atypari, bëri me dorë nga zgjedha. Pashë më nga afër dhe vura re rripat [litarë ose zinxhirë] që lidhnin zgjedhën me demin e vogël. Kau i madh po tërhiqte të gjithë peshën, ndërsa demi i vogël thjesht po bënte hapat e parë, po mësonte si të lëronte tokën.”

(Edward Dube, “Learn of Me”, Liahona, tetor 2020, Faqet Vendore të Afrikës Juglindore, ChurchofJesusChrist.org)

• Si mund të jetë marrëdhënia jonë me Shpëtimtarin si ajo e kaut të madh dhe demit të vogël?

• Si e thellon njohja e domethënies së zgjedhës kuptueshmërinë tënde mbi atë se si ndihet Krishti për ty?

Plaku Dejvid A. Bednar, i Kuorumit të Dymbëdhjetë Apostujve, tha:

“Bërja dhe mbajtja e besëlidhjeve të shenjta na lidh te Zoti Jezu Krisht dhe na bashkon me Të”.

(Dejvid A. Bednar, “I Duronin Barrët e Tyre me Lehtësi”, Ensign ose Liahona, maj 2014, f. 88.)

• Si mendon se bërja dhe mbajtja e besëlidhjeve na lidh në zgjedhë te dhe me Shpëtimtarin?

Plaku Dubi shpjegoi:

“Kur jemi të lidhur në zgjedhë me Jezu Krishtin, Ai bart ngarkesën dhe ndajmë gëzimin e punës. Ftesa e Zotit për secilin prej nesh për të mësuar prej Tij është burimi i vetëm i sigurt që sjell paqe, gëzim dhe jep përgjigje për mendjen e trazuar.”

(Edward Dube, “Learn of Me”, Liahona, tetor 2020, Faqet Vendore të Afrikës Juglindore, ChurchofJesusChrist.org)

• Si të ka ndihmuar të mësuarit për Jezu Krishtin këtë vit që të bartësh ngarkesën tënde dhe si të ka sjellë paqe dhe gëzim?

Paraqitini në tabelë titujt e veprimtarive të mëposhtme. Merreni parasysh të pyetni se cilin nga pohimet në vijim do të parapëlqenin nxënësit për ta studiuar si klasë ose ftojini nxënësit të zgjedhin një veprimtari dhe ta studiojnë më vete, me një shok klase ose në një grup të vogël. Paraqitni udhëzimet për veprimtaritë në mënyrë që nxënësit t’u referohen ndërsa studiojnë.

Ardhja te Krishti dhe marrja e çlodhjes së Tij

Veprimtaria A: “Ejani tek unë” ( Mateu 11:28). Si mund të vij te Krishti?

Për të marrë ndihmën e Shpëtimtarit dhe çlodhjen që ofron Ai, ne duhet të vijmë tek Ai.

• Nëse dikush ju ka pyetur se çfarë do të thotë të vish te Krishti, çfarë do të thoshit?

Plaku Riçard G. Skot (1928–2015), i Kuorumit të Dymbëdhjetë Apostujve, ka përcaktuar disa mënyra se si mund të vijmë te Krishti.

“Kur ne lutemi vazhdimisht në mëngjes dhe natën, kur i studiojmë shkrimet tona të shenjta çdo ditë, kemi mbrëmje familjare të përjavshme dhe e frekuentojmë tempullin rregullisht, ne po i përgjigjemi në mënyrë aktive ftesës së Tij për të ‘ardhur tek Ai’”.

(Riçard G. Skot, “Bëjeni Ushtrimin e Besimit Përparësinë Tuaj Parësore”, Ensign ose Liahona, nëntor 2014, f. 94.)

Merrni parasysh të shikoni materialin filmik “Come unto Christ: 2014 Theme Song” [“Ejani te Krishti: Kënga e Temës për 2014-ën”] (4:48) për të parë shembuj se si dikush mund të vijë te Shpëtimtari. Ky material filmik është në dispozicion në ChurchofJesusChrist.org.

• Cilat janë disa gjëra që ke bërë për t’iu afruar më shumë Jezu Krishtit? (Kjo mund të përfshijë besëlidhjet që ke bërë dhe mbajtur.)

• Çfarë ndien se mund të bësh për të ardhur më plotësisht te Krishti dhe për të marrë ndihmën e Tij hyjnore?

Veprimtaria B: “Unë do t’ju jap çlodhje” ( Mateu 11:28). Si mund t’i heqë Krishti barrët e mia?

Një shembull i fuqishëm i lehtësimit të barrëve nga Shpëtimtari është shënuar në Librin e Mormonit. Alma dhe populli i tij u zunë robër, u detyruan të punonin dhe u përndoqën ashpër.

Lexo te Mosia 24:12–16 .

• Çfarë ke mësuar për mënyrat se si Shpëtimtari mund të të ndihmojë t’i mbash barrët e tua?

• Çfarë bëri populli i Almës për të marrë ndihmën e Shpëtimtarit?

• Si mund ta ndihmojë dikë që po përballet me sfida të kuptuarit e rolit tonë në avitjen drejt Shpëtimtarit?

Mendo për vetë përvojat e tua ose përvojat e njerëzve që njeh dhe shkruaj për një kohë kur Shpëtimtari të hoqi një barrë. Sigurohu që të përfshish atë që ke bërë ti ose dikush që e njeh, për t’iu avitur Shpëtimtarit dhe se si ndihmoi Ai.

Pasi nxënësit ta kenë përfunduar veprimtarinë që kanë zgjedhur, ftojini të tregojnë se çfarë dëshirojnë të kujtojnë. Merrni parasysh të jepni një dëshmi vetjake ose t’i ftoni nxënësit që të japin dëshmitë e tyre se si Shpëtimtari i ka ndihmuar në kohë nevoje.

Komente dhe Informacion për Rrethanat

Si na ndihmon Jezu Krishti ndërsa vijmë tek Ai?

Plaku Xhon A. Mek-Kjun, i Të Shtatëdhjetëve, i shpjegoi disa nga bekimet që mund të vijnë ndërsa vijmë te Jezu Krishti.

“Teksa e pranojmë ftesën e Shpëtimtarit ‘ejani tek unë’, Ai do të sigurojë përkrahjen, ngushëllimin dhe paqen që janë të nevojshme. … Edhe në sprovat tona më të vështira, ne mund të ndiejmë përqafimin e ngrohtë të dashurisë së Tij teksa i mirëbesojmë Atij dhe e pranojmë vullnetin e Tij.”

(Xhon A. Mek-Kjun, “Ejani te Krishti – Jetesa si Shenjtorë të Ditëve të Mëvonshme”, Ensign ose Liahona, maj 2020, f. 36.)

Veprimtari Plotësuese të të Mësuarit

Veprimtari alternative e të mësuarit

Kjo veprimtari mund të bëhet në fillim të orës mësimore. Sillni në klasë një kuti bosh ose një çantë shpine dhe objekte të rënda për t’i futur brenda, si p.sh. gurë të mëdhenj ose libra. Ftojeni një nxënës të vijë përpara klasës dhe kërkojini të mbajë kutinë bosh ose të vërë çantën e shpinës. Kërkojini klasës që t’u përgjigjet pyetjeve që gjenden në fillim të mësimit. Një nxënës tjetër mund t’i renditë përgjigjet e nxënësve në tabelë. Pas çdo përgjigjeje, vendosni një objekt të rëndë në kuti ose në çantën e shpinës derisa të jetë plot.

Të kuptuarit e frazave te Mateu 11:28–30

Nxënësit mund të lexojnë te Mateu 11:28–30 , duke kërkuar dhe shenjuar fraza të shkurtra që iu bënë përshtypje. Shembujt përfshijnë: “Ejani tek unë”, “Unë do t’ju jap çlodhje”, “Ju do të gjeni prehje për shpirtrat tuaj”, “Mësoni nga unë” dhe “Zemërbutë dhe i përulur nga zemra”.

Ftojini nxënësit të përzgjedhin një frazë dhe ta shkruajnë me fjalët e tyre. Ftojini të gjejnë një referencë kryq që i ndihmon të kuptojnë se çfarë do të thotë fraza. Për shembull, mund të kërkojnë fjalët ejani, çlodhje, mësoni ose zemërbutë tek Udhëzuesi për Shkrimet e Shenjta. Ftojini nxënësit ta tregojnë atë që gjetën dhe se si kjo mund ta ndihmojë dikë që ka vështirësi me një barrë.