Doctrinal Mastery: Mateo 16:15–19

Sinabi ni Jesus, “Ibibigay ko sa Iyo ang mga Susi ng Kaharian”

Sa nakaraang lesson, natutuhan mo ang kahalagahan ng mga susi ng priesthood at kung paano ipinagkatiwala ng Tagapagligtas ang Kanyang mga susi sa mga propeta sa lupa. Bibigyan ka ng lesson na ito ng pagkakataong madagdagan ang iyong kaalaman sa doktrinang ito habang isinasaulo mo ang reperensya at mahalagang parirala sa banal na kasulatan, ipinapaliwanag mo ang doktrina, at ginagamit mo ang mga alituntunin ng pagtatamo ng espirituwal na kaalaman sa isang makatotohanang sitwasyon.

Ang pagiging napapanahon ng doctrinal mastery. Habang nagsasalita sa mga titser ng seminary at institute tungkol sa doctrinal mastery, itinuro ni Pangulong M. Russell Ballard ng Korum ng Labindalawang Apostol: “Ang inisyatibong ito ay inspirado at napapanahon. Maganda ang magiging impluwensya nito sa ating kabataan. Gayunman, ang tagumpay ng Doctrinal Mastery, at ng lahat ng iba pang programa ng pag-aaral sa CES, ay nakasalalay nang husto sa inyo” (“Ang mga Oportunidad at Responsibilidad ng mga CES Teacher sa Ika-21 Siglo” [isang gabi kasama ang General Authority, Peb. 26, 2016], broadcasts.ChurchofJesusChrist.org).

Paghahanda ng estudyante: Sabihin sa mga estudyante na mag-isip ng mga paraan kung paano napagpapala ang kanilang buhay ng mga susi ng priesthood.

Mga Posibleng Aktibidad sa Pag-aaral

Ang doctrinal mastery passage lesson na ito ay ituturo pagkatapos ng lesson na “Mateo 16:18–19; Mateo 17:1–7,” na siyang kontekstuwal na lesson para sa doctrinal mastery passage na Mateo 16:15–19 . Kung kailangang ilipat ang doctrinal mastery passage lesson na ito sa ibang linggo, tiyaking ituro din ang kaukulang kontekstuwal na lesson sa linggo ring iyon.

Ipaliwanag

Maaari mong sabihin sa mga estudyante na magsanay na ipaliwanag ang sumusunod nang magkakapartner o sa maliliit na grupo.

Isipin kunwari na narinig ng isang taong kakilala mo ang salitang “mga susi ng priesthood” ngunit hindi ito naunawaan. Gamit ang Mateo 16:15–19 , ipaliwanag kung ano ang mga susi ng priesthood at kung bakit mahalaga ang mga ito. Kung maaari, ibahagi ang iyong paliwanag sa isang kaibigan o kapamilya. Maaari ding makatulong na basahin ang ilan sa mga pahayag sa mga bahagi 3.0–3.4.1.1 ng Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw sa ChurchofJesusChrist.org o sa Gospel Library app.

Isulat ang iyong paliwanag tungkol sa mga susi ng priesthood. Kung naibahagi mo ang iyong paliwanag sa ibang tao, magbigay ng maikling paglalarawan kung ano ang nangyari.

Isaulo

Magsanay na maisaulo ang mahahalagang parirala sa banal na kasulatan para sa Mateo 16:15–19 : “Sinabi ni Jesus, ‘Ibibigay ko sa iyo ang mga susi ng kaharian.’” Kung maaari, i-print ang sumusunod na handout at gupitin ang bawat susi. Bilang alternatibo, gumuhit ng mga susi sa isang papel, at gupitin ang mga ito. Sumulat ng isang salita ng parirala sa bawat susi. Isulat din ang reperensyang banal na kasulatan ng doctrinal mastery, Mateo 16:15–19 , sa isang susi. Paghalu-haluin ang mga susi, at subukang ibalik ang mga ito sa tamang pagkakasunud-sunod. Ulitin ang aktibidad na ito nang maraming beses hanggang sa maisaulo mo ang reperensyang banal na kasulatan at parirala. Maaari mong orasan ang iyong sarili at sikaping bumilis pa sa bawat paggawa mo nito.

Hikayatin ang mga estudyante na itabi ang kanilang mga susi para sa aktibidad sa pagrerebyu sa susunod na lesson.

Pagsasabuhay

Rebyuhin kasama ng mga estudyante ang mga alituntunin ng pagtatamo ng espirituwal na kaalaman. Ang isang paraan upang magawa ito ay ipabasa nang malakas sa isang estudyante ang isang pangungusap tungkol sa isa sa mga alituntunin ng pagtatamo ng espirituwal na kaalaman mula sa mga talatang 5–12 ng Doctrinal Mastery Core Document (2022). Pagkatapos ay hilingin sa klase na tukuyin ang tamang alituntunin. Ulitin ang aktibidad na ito nang ilang beses sa iba’t ibang estudyante upang matulungan ang klase na maging mas pamilyar sa bawat alituntunin.

Maglaan ng oras upang rebyuhin ang mga alituntunin ng pagtatamo ng espirituwal na kaalaman sa mga talatang 5–12 ng Doctrinal Mastery Core Document (2022) bago magpatuloy sa aktibidad sa pagsasabuhay.

Maaaring pag-aralan ang sumusunod na sitwasyon nang mag-isa, sa maliliit na grupo, o nang magkakasama bilang isang klase. Maaaring baguhin ang paksa ng sitwasyon upang mas matugunan ang mga pangangailangan ng mga estudyante. Halimbawa, ang video na nakikita ni Vanya sa social media ay maaaring tungkol sa isang miyembro ng Simbahan na nagsasabing alam niya ang araw at oras ng Ikalawang Pagparito.

May nakikitang video sa social media ang kaibigan mong si Vanya kung saan binabatikos ng isang miyembro ng Simbahan ang doktrina ng Simbahan. Matalino at mapanghikayat ang miyembrong ito at nananawagan siya sa Simbahan na baguhin ang ilang doktrina. Ginagamit din niya ang mga banal na kasulatan upang suportahan ang kanyang mga pananaw. Hindi sigurado si Vanya kung ano ang iisipin o paano tutugon.

Ano kaya ang mga tanong o alalahanin ni Vanya?

Pinadalhan ka ni Vanya ng text message na humihingi ng tulong. Isipin kung paano ka tutugon upang malutas ang kanyang alalahanin.

Sumulat ng tatlong text message kay Vanya. Isama ang sumusunod:

Text 1: Mga katotohanan tungkol sa kung paano ginagamit ng Panginoon ang mga propeta at mga susi ng priesthood sa plano ng kaligtasan na makatutulong kay Vanya na masuri ang sitwasyong ito nang may walang-hanggang pananaw.
Text 2: Sources na itinalaga ng Diyos na magagamit ni Vanya upang matuto pa tungkol sa mga propeta at mga susi ng priesthood. (Magsama ng kahit isang partikular na banal na kasulatan o pahayag ng propeta.)
Text 3: Mga mungkahi kung paano magagawa ni Vanya na kumilos nang may pananampalataya kay Jesucristo sa kanyang pagsulong. Kung maaari, magsama ng personal na karanasan na nauugnay sa mga susi ng priesthood at kung paano nakatulong sa iyo ang paggamit ng mga susing iyon na mas mapalapit kay Jesucristo.

Habang ginagawa ng mga estudyante ang aktibidad na ito, magmasid kung may sinumang maaaring nahihirapan. Kung kinakailangan, tahimik na talakayin sa kanila kung paano sila maaaring tumugon. Kung marami sa klase ang nahihirapan, maaari mong ihinto ang aktibidad at sabihin sa mga estudyante na ibahagi ang kanilang mga ideya sa pagtugon kay Vanya. Maaari mong tapusin ang lesson sa pamamagitan ng pagpapatotoo na ipinagkatiwala ni Jesucristo ang Kanyang mga susi ng priesthood sa mga propeta at apostol sa Ang Simbahan ni Jesucristo ng mga Banal sa mga Huling Araw.

Pagrerebyu ng doctrinal mastery

Sa isang klase sa hinaharap, rebyuhin ang doctrinal mastery reference at mahahalagang parirala ng banal na kasulatan sa pamamagitan ng pag-anyaya sa mga estudyante na gamitin ang mga susing ginawa nila upang muling buuin ang reperensya at mahalagang parirala ng banal na kasulatan. Kung makatutulong, sabihin sa kanila na paghalu-haluin ang kanilang mga susi at ibalik ang mga ito sa tamang pagkakasunud-sunod nang ilang beses.