Fakataukei Fakatokāteliné: Mātiu 16:15–19

Naʻe folofola ʻa Sīsū, “Te U ʻAtu kiate Koe ʻa e [Ngaahi] Kī ʻo e Puleʻangá.”

Naʻá ke ako ʻi he lēsoni kimuʻá fekauʻaki mo e mahuʻinga ʻo e ngaahi kī ʻo e lakanga fakataulaʻeikí mo e founga naʻe foaki ai ʻe he Fakamoʻuí ʻEne ngaahi kií ki he kau palōfita ʻi he māmaní. ʻE ʻoatu ʻe he lēsoni ko ʻení ʻa e faingamālie ke fakatupulaki hoʻo taukei ʻi he tokāteline ko ʻení ʻi hoʻo ako maʻuloto ʻa e fakamoʻoni fakafolofolá mo e kupuʻi lea mahuʻingá, fakamatalaʻi ʻo e tokāteliné, mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ko e mahuʻinga taimi tonu ʻo e fakataukei fakatokāteliné. ‘I heʻene lea ki he kau faiako semineli mo ʻinisititiutí fekauʻaki mo e fakataukei fakatokāteliné, naʻe akonaki ‘a Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku ueʻi fakalaumālie mo taimi lelei ʻa e meʻa ko ʻeni kuo fokotuʻu foʻoú. Te ne maʻu ha ivi tākiekina lahi ʻi hotau kakai kei talavoú. Ka, ʻe fakafalala ʻa e ola lelei ʻo e Fakataukei Fakatokāteliné, pea mo e kotoa ʻo e ngaahi polokalama ako kehe ʻa e CES ʻiate kimoutolu” (“Ko e Ngaahi Faingamālie mo e Ngaahi Fatongia ʻo e Kau Faiako ʻa e CES ʻi he Senituli 21” [efiafi mo ha Takimuʻa, Fēpueli 26, 2016], broadcasts.ChurchofJesusChrist.org).

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi founga ʻoku tāpuekina ai ʻenau moʻuí ʻe he ngaahi kī ʻo e lakanga fakataulaʻeikí.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ʻi he ʻosi ʻa e lēsoni “Mātiu 16:18–19; Mātiu 17:1–7,” ʻa ia ko e lēsoni fekauʻaki mo e potufolofola fakataukei fakatokāteline Mātiu 16:15–19 . Kapau ʻoku fie maʻu ke hiki e lēsoni fakataukei fakatokāteline ko ʻení ki ha uike kehe ke feau e taimi-tēpile ʻa e akó, fakapapauʻi ke akoʻi foki mo e lēsoni fekauʻaki mo iá lolotonga e uike ko iá.

Fakamatalaʻi

Fakakaukau ke fakaafeʻi e kau akó ke nau akoako fakamatalaʻi tautau toko ua pe fakakulupu iiki ʻa e meʻá ni.

Fakakaukauloto ki ha taha ʻokú ke ʻiloʻi naʻá ne fanongo ki he foʻi lea “ngaahi kī ʻo e lakanga fakataulaʻeikí” ka naʻe ʻikai mahino ia kiate ia. Fakaʻaongaʻi ʻa e Mātiu 16:15–19, ke fakamatalaʻi ʻa e ngaahi kī ʻo e lakanga fakataulaʻeikí mo e ʻuhinga ʻoku nau mahuʻinga aí. Kapau ʻe lava, vahevahe hoʻo fakamatalá mo ha kaungāmeʻa pe mēmipa ʻo e fāmilí. ʻE ala tokoni foki ke lau ha niʻihi ʻo e ngaahi fakamatala ʻi he vahe 3.0–3.4.1.1 ʻo e Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Níʻi he ChurchofJesusChrist.org pe ʻi he polokalama Gospel Library.

Hiki hoʻo fakamatala ki he ngaahi kī ʻo e lakanga fakataulaʻeikí. Kapau naʻá ke lava ʻo vahevahe hoʻo fakamatalá mo ha taha kehe, fakamatalaʻi nounou ʻa e meʻa naʻe hoko aí.

Ako Ma‘uloto

Ako maʻuloto ʻa e kupuʻi lea mahuʻinga ʻi he Mātiu 16:15–19 : “Naʻe pehē ʻe Sīsū, ʻTe u ʻatu kiate koe ʻa e [ngaahi] kī ʻo e puleʻangá.’” Kapau ʻe lava, paaki ʻa e laʻipepa tufa ko ʻení pea kosi ʻo toʻo ʻa e ngaahi kī takitaha. Kapau ʻoku ‘ikai, pea tā ha ngaahi kī ʻi ha laʻipepa pea kosiʻi ʻo toʻo. Hiki ha foʻi lea ʻe taha ʻo e kupuʻi leá ʻi he kī takitaha. Hiki foki ʻa e fakamoʻoni fakafolofola fakataukei fakatokāteliné, Mātiu 16:15–19, ʻi ha kī. Tuifio ʻa e ngaahi kií, pea feinga ke fokotuʻutuʻu kinautolu ki he hokohoko totonú. Toutou fai ʻa e ʻekitivitī ko ʻení kae ʻoua kuó ke maʻuloto ʻa e potufolofolá mo e kupuʻi leá. Mahalo te ke fiefia ʻi hoʻo taimiʻi mo feinga ke fakaleleiʻi e vave (hoʻo maʻulotó) ʻi he feinga takitaha.

Fakaʻaiʻai e kau akó ke nau tauhi ʻenau ngaahi kií ki ha ʻekitivitī fakamanatu ʻi ha lēsoni he kahaʻú.

Akoako ki hono fakaʻaongaʻí

Toe fakamanatu mo e kau akó e ngaahi tefitoʻi moʻoni ki hono maʻu ʻo e ʻilo fakalaumālié. Ko e founga ʻe taha ke fai ai ʻení ko hono fakaafeʻi ha tokotaha ako ke lau leʻolahi ha sētesi fekauʻaki mo ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié mei he palakalafi 5–12 ʻo e Fakamatala ki he ʻElito ʻo e Fakataukei Fakatokāteliné (2022). Kole ange leva ki he kalasí ke nau feinga ke ʻiloʻi ʻa e tefitoʻi moʻoni totonú. Toutou fai ʻa e ʻekitivitī ko ʻení mo ha kau ako kehekehe ke tokoni ke nau maheni ange mo e tefitoʻi moʻoni takitaha.

Tuku ha taimi ke toe vakaiʻi ai e ngaahi tefitoʻi moʻoni ʻo hono maʻu ʻo e ʻilo fakalaumālié ʻi he palakalafi 5–12 ʻo e Fakamatala ki he ʻElito ʻo e Fakataukei Fakatokāteliné (2022) kimuʻa pea hoko atu ki he ʻekitivitī akoako fakahokó.

ʻE lava ke ako fakafoʻituitui, ʻa e tūkunga ko ʻení, ʻi ha fanga kiʻi kulupu iiki, pe fakakalasi. ʻE lava ke liliu e tefito ʻo e tūkungá ke feau lelei ange e ngaahi fiemaʻu ʻa e kau akó. Hangē ko ʻení, ko e vitiō ʻoku mamata ki ai ʻa Vaniā ʻi he mītia fakasōsialé ʻe lava ke fekauʻaki ia mo ha mēmipa ʻo e Siasí ʻokú ne tala ʻokú ne ʻiloʻi ʻa e ʻaho mo e taimi ʻo e Hāʻele ʻAnga Ua Maí.

ʻOku mamata ho kaungāmeʻa ko Vaniaá ʻi ha vitiō ʻi he mītia fakasōsialé ʻa ia ʻoku fakaangaʻi ai ʻe ha mēmipa ʻo e Siasí ʻa e tokāteline ʻo e Siasí. Ko e mēmipá ni ʻoku poto mo fakalotoa pea ʻokú ne fie maʻu ke liliu ʻe he Siasí ha tokāteline pau. ʻOku nau fakaʻaongaʻi foki e folofolá ke poupouʻi ʻenau fakakaukaú. ʻOku ʻikai fakapapauʻi ʻe Vaniā pe ko e hā e fakakaukau pe founga ke tali ʻakí.

Ko e hā ha ngaahi fehuʻi pe hohaʻa ‘e maʻu ‘e Vaniā?

ʻOku ʻoatu ʻe Vaniā ha pōpoaki text ʻo kole tokoni atu. Fakakaukau ki ha founga te ke ala tali ʻaki ke tokoni ke fakaleleiʻi ʻene hohaʻá.

Hiki ha pōpoaki text ʻe tolu ʻo fai ha tali kia Vaniā. Fakakau ai e ngaahi meʻa ko ʻení:

Text 1: Ngaahi moʻoni fekauʻaki mo e founga ʻoku fakaʻaongaʻi ai ʻe he ʻEikí ʻa e kau palōfitá mo e ngaahi kī ʻo e lakanga fakataulaʻeikí ʻi he palani ʻo e fakamoʻuí ʻe lava ʻo tokoni ke vakai ʻa Vaniā ki he tūkunga ko ʻení mei ha fakakaukau ʻoku taʻengatá.
Text 2: Ngaahi maʻuʻanga tokoni kuo fokotuʻu fakalangi ʻe lava ke fakaʻaongaʻi ʻe Vaniā ke ako lahi ange fekauʻaki mo e kau palōfitá mo e ngaahi kī ʻo e lakanga fakataulaʻeikí. (Fakakau ai ha potufolofola pau ʻe taha pe lahi ange pe ha fakamatala fakaepalōfita.)
Text 3: Ngaahi fokotuʻu ki he founga ʻe lava ai ʻa Vaniā ʻo ngāue ʻi he tui kia Sīsū Kalaisi ʻi heʻene laka ki muʻá. Kapau ʻe lava, fakakau ha aʻusia fakataautaha fekauʻaki mo e ngaahi kī ʻo e lakanga fakataulaʻeikí pea mo e founga naʻe tokoniʻi ai koe ʻe hono fakaʻaongaʻi ʻo e ngaahi kī ko iá ke ke ofi ange ai kia Sīsū Kalaisí.

ʻI he ngāue ʻa e kau akó ʻi he ʻekitivitī ko ʻení, tokanga ki ha taha pē ʻe ala faingataʻaʻia. Kapau ʻe fie maʻu, aleaʻi leʻosiʻi mo kinautolu ʻa e founga te nau lava ʻo tali ki aí. Kapau ʻoku faingataʻaʻia ha tokolahi ʻi he kalasí, fakakaukau ke kiʻi taʻofi e ʻekitivitií pea kole ki he kau akó ke vahevahe ʻenau ngaahi fakakaukau ki hono tali ʻaki ʻa Vaniaá. Fakakaukau ke fakaʻosi e lēsoní ʻaki haʻo fakamoʻoni kuo foaki ʻe Sīsū Kalaisi ʻEne ngaahi kī ʻo e lakanga fakataulaʻeikí ki he kau palōfita mo e kau ʻaposetolo ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Toe Vakaiʻi ʻo e Fakataukei Fakatokāteliné

Toe vakaiʻi ʻa e fakamoʻoni fakafolofola ʻo e fakataukei fakatokāteliné mo e kupuʻi lea mahuʻingá ʻi ha kalasi ʻamui ange, ʻaki hono fakaafeʻi e kau akó ke nau fakaʻaongaʻi ʻa e ngaahi kī naʻa nau faʻú ke toe faʻu ʻaki ʻa e fakamoʻoni fakafolofolá mo e kupuʻi lea mahuʻingá. Kapau ʻe tokoni, kole ange ke nau tuifio ʻenau ngaahi kií pea toutou fakahoko hono fokotuʻutuʻu kinautolu ʻi honau hokohoko totonú.