Mātiu 15–17; Maʻake 7–9

Vakai Fakalūkufuá

Naʻe valokiʻi ʻe Sīsū ʻa e kau tangata tohí mo e kau Fālesí ʻa ia naʻa nau fakaʻaongaʻi ʻa e tukufakaholó ko ha tulitonuhia ke maumauʻi ʻa e ngaahi fekau ʻa e ʻOtuá. Naʻe fai ʻe Pita ʻene fakamoʻoní kia Sīsū, ʻa ia naʻá ne maʻu ʻi he fakahā ʻo fakafou ʻi he Laumālie Māʻoniʻoní. Naʻe talaʻofa ʻe he Fakamoʻuí te Ne foaki ʻa e ngaahi kī ʻo e lakanga fakataulaʻeikí kia Pita, ʻa ia naʻá Ne foaki kimui ange kia Pita, Sēmisi, mo Sione ʻi he Moʻunga ʻo e Liliú. Naʻe fakamoʻui ʻe Sīsū ʻa e foha ʻo ha tangata naʻá ne fakahaaʻi ʻene tui ki he Fakamoʻuí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 15:1–9

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakapapauʻi ʻe he kau akó pe ko e fē ʻi heʻenau ngaahi tukufakaholó ʻokú ne tokoniʻi kinautolu ke nau hoko ʻo hangē ange ko Sīsū Kalaisí pea mahalo te ne fakamavaheʻi kinautolu meiate Ia.

Teuteu ʻa e tokotaha akó: Kole ki he kau akó ke nau fakakaukau ki heʻenau ngaahi tukufakaholó, pe ko ʻenau “ngaahi tui mo e ngaahi founga ngāue kuo tukuʻau mai mei he toʻu tangata ʻe taha ki ha toʻu tangata ʻe tahá” (Fakahinohino ki he Ngaahi Folofolá, “Talatukufakaholó, Ngaahi,” scriptures.ChurchofJesusChrist.org), mo e ʻuhinga te nau ala fai ai iá. ʻE ala tokoni ki he kau akó ke fakakau honau ngaahi fāmilí ʻi he ʻekitivitī teuteu ko ʻení.

Ngaahi naunau maʻá e kau akó: Pepa pe ngaahi tohinoa ako

Fokotuʻu ki hono akoʻi ʻi he konifelenisi vitioó:Fakakaukau ke fakaʻaongaʻi ʻa e polokalama palakipoé ke vakaiʻi fakataha ʻe he kau akó ʻa e ngaahi tukufakaholo kehekehe ʻi he kalasí kae ʻikai ʻi heʻenau tohinoá pē. Tuku ke hiki ʻe he kau akó ʻa e ngaahi tukufakaholó ʻi he palakipoé pea ke nau fakaʻilongaʻi mo fakamatala ʻi he palakipoe ko ʻení ʻi he kotoa ʻo e lēsoní.

Mātiu 16:13–18

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino mo ongoʻi ʻe he kau akó ʻa e mahuʻinga ʻo hono maʻu ha fakamoʻoni kia Sīsū Kalaisi mei he Tamai Hēvaní ʻo fakafou ʻi he Laumālie Māʻoniʻoní.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ʻa e founga ʻe lava ai ʻe hono maʻu ha fakamoʻoni kia Sīsū Kalaisí ʻo fakahoko ha liliu ʻi he moʻui ʻa ha taha.

Ngaahi naunau maʻá e kau akó: Pepa; ngaahi tatau kuo paaki ʻo e lea ‘a ʻEletā Lōnolo A. Lasipeni ko e “Fokotuʻu ha Hūfangaʻanga Fakalaumālie mo Malu” (Ensign pe Liahona, Mē 2019, 107–10) maʻá e kau ako ʻoku nau fili ke fai e ʻekitivitī F pea ʻikai lava ke nau maʻu e leá ʻi ha meʻangāue fakaʻilekitulōnika

Fokotuʻu ki hono akoʻi ʻi he konifelenisi vitioó: Fakakaukau ke kole ki ha tokotaha ako pe toko ua ke fakaafeʻi ha kaungāmeʻa ofi pe mēmipa ʻo e fāmilí ke kau atu ki ha konga ʻo e kalasí pea vahevahe e founga ne nau maʻu ai ʻenau fakamoʻoni kia Sīsū Kalaisí mo e ʻuhinga ʻoku mahuʻinga ai kiate kinautolú.

Mātiu 16:18–19; 17:1–7

Taumuʻa ʻo e lēsoní: ʻE lava ke tokoni atu ʻa e lēsoni ko ʻení ke mahino kiate koe ʻa e ʻuhinga ʻo e ngaahi kī ʻo e lakanga fakataulaʻeikí mo honau mahuʻinga ʻi he palani ʻo e fakamoʻui ʻa e ʻOtuá.

Teuteu ʻa e tokotaha akó: Fakaafeʻi e kau akó ke nau fakakaukau ki ha kī ʻoku nau fakaʻaongaʻi pea haʻu mateuteu ke vahevahe ʻa e meʻa ʻoku fakaʻaongaʻi ki ai ʻa e kií, ʻuhinga ʻoku mahuʻinga aí, mo e meʻa ʻe hoko kapau naʻe mole. Kapau te nau fie maʻu, ʻe lava ke ʻomi ʻe he kau akó ʻenau ngaahi kií ki he kalasí.

Fokotuʻu ki hono akoʻi ʻi e konifelenisi vitioó:Fakakaukau ke fakaafeʻi e kau akó ke nau ʻomi ha kī pe ngaahi kī ʻe taha pe lahi ange pea fakamatalaʻi e meʻa ʻoku fakaʻaongaʻi ki aí mo e ʻuhinga ʻoku nau mahuʻinga aí. ʻE lava ke fai ʻeni ʻi he kamataʻanga ʻo e lēsoní ke tokoni ke mahino lelei ange ki he kau akó ʻa e ngaahi kī ʻo e lakanga fakataulaʻeikí.

Fakataukei Fakatokāteliné: Mātiu 16:15–19

Taumuʻa ʻo e lēsoní: ʻE ʻoatu ʻe he lēsoni ko ʻení ʻa e faingamālie ke fakatupulaki hoʻo taukei ʻi he tokāteline ko ʻení ʻaki hono ako maʻuloto ʻa e fakamoʻoni fakafolofolá mo e kupuʻi lea mahuʻingá, fakamatalaʻi ʻo e tokāteliné, mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi founga ʻoku tāpuekina ai ʻenau moʻuí ʻe he ngaahi kī ʻo e lakanga fakataulaʻeikí.

Laʻipepa Tufa: Laʻipepa tufa ʻoku lahi ai e ngaahi kií. Fakakaukau ke ke ʻoange ha ʻū helekosi ki he kau akó ke nau kosi kinautolu ʻo toʻo, pe kosi ʻo toʻo ʻa e ngaahi kií kimuʻa.

Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha taki lakanga fakataulaʻeiki fakalotofonua ʻokú ne maʻu ʻa e ngaahi kī ʻo e lakanga fakataulaʻeikí ke haʻu ʻo tali e ngaahi fehuʻi fekauʻaki mo e ngaahi kī ʻo e lakanga fakataulaʻeikí mo vahevahe ha ngaahi aʻusia ʻe lava ʻo tokoni ke mahino ki he kau akó ʻa hono mahuʻinga ʻo kinautolú. ʻE lava foki ke tokoni ʻa e taki lakanga fakataulaʻeikí ki he kau akó ke nau fakahoko ʻa e founga fakaangaangá.

Maʻake 9:14–29

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau vakavakaiʻi ʻenau tui ki he ʻEikí pea fekumi ki ha fakahā fekauʻaki mo e founga te nau lava ai ʻo fakamālohia iá.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi aʻusia kuó ne fakamālohia ʻenau tui kia Sīsū Kalaisí. Te nau lava foki ʻo fehuʻi ki he niʻihi kehé fekauʻaki mo ʻenau ngaahi aʻusia ʻi hono langaki ʻenau tuí.

Vitiō: “ʻEiki, ‘Oku ou Tui” (14:43; sio mei he taimi 1:12 ki he 2:59 pea, kapau ʻe fie maʻu, mei he taimi 5:57 ki he 10:28)
Ngaahi naunau maʻá e kau akó: Pepa pe ngaahi tohinoa ako