Maʻake 9:14–29

“ʻEiki, ʻOku Ou Tui Ke Ke Tokoniʻi Au Telia ʻEku Taʻetuí”

ʻĪmisi

A man holding his son in his arms as he presents the boy to Jesus Christ to be healed. Christ is depicted standing and reaching with His and toward the boy’s head. The painting depicts Jesus Christ healing and casting a devil out of the boy.

Naʻe hāʻele mai ʻa Sīsū Kalaisi ki ha falukunga kakai naʻa nau fakafehuʻia ʻEne kau ākongá koeʻuhí naʻe ʻikai lava ʻe he kau ākongá ʻo kapusi ha laumālie ʻuli mei ha foha ʻo ha tangata ‘e taha. Hili hono akoʻi ʻe Sīsū Kalaisi ʻa e tamai ko ʻení fekauʻaki mo e tuí, naʻá Ne fakamoʻui ʻa e fohá. ʻE tokoniʻi koe ʻe he lēsoni ko ʻení ke ke vakavakaiʻi hoʻo tui ki he ʻEikí pea fekumi ki ha fakahā fekauʻaki mo e founga te ke lava ai ʻo fakamālohia iá.

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi aʻusia kuó ne fakamālohia ʻenau tui kia Sīsū Kalaisí. Te nau lava foki ʻo fehuʻi ki he niʻihi kehé fekauʻaki mo ʻenau ngaahi aʻusia ʻi hono langaki ‘enau tuí.

Ngaahi ʻEkitivitī Ako ʻOku Ala Fakahokó

Ko e Ngaahi Fakafeʻātungia ki he tuí

Fakakaukauloto ʻokú ke aʻusia ʻa e ngaahi fakafeʻātungia ko ʻení:

Fakakaukau ke fakaʻaliʻali ʻa e ngaahi tūkunga ko ʻení pe ngaahi tūkunga kehe ʻoku felāveʻi ange mo e kau akó.

ʻIkai ongoʻi ʻoku talitali lelei koe ʻi he SiasíLoto-mafasiaKo e mavahe ha mēmipa ʻo e fāmilí mei he SiasíMate ha kaungāmeʻa

ʻE uesia fēfē ʻe he ngaahi aʻusia ko ʻení ha tui mo ha falala ʻa ha taha kia Sīsū Kalaisi?
Ko e hā ha ngaahi aʻusia kehe te ne ala ʻahiʻahiʻi e tui ʻa ha taha taʻu hongofulu tupu kia Kalaisi?
Ko e hā ha ngaahi meʻa kuó ke aʻusia pe ko ha niʻihi kehe kuó ne fakahaaʻi atu ʻa e mahuʻinga ʻo e tui mālohi kia Sīsū Kalaisí lolotonga e ngaahi taimi faingataʻá?

Fakakaukau ke ʻoange ʻa e sivi fakaekita ko ʻení ko ha laʻipepa tufa pe fakaʻaliʻali ia ke fakaʻaongaʻi ʻe he kau akó ʻi heʻenau hiki ʻenau ngaahi talí ʻi heʻenau tohinoa akó.

ʻĪmisi

Attribute Activity Card

Fakakakato e ngaahi sivi fakaekita ko ʻení:

ʻEkitivitī ki he ʻUlungāangá: Tui

Fili ʻa e mataʻifika ʻokú ne fakamatalaʻi lelei taha ʻa e tuʻo lahi ʻo e kaunga ʻa e fakamatala takitaha kiate koé. Manatuʻi ko e tupulaki fakalaumālié ko ha founga māmālie ia pea ʻoku ʻikai ha taha ʻe haohaoa.

1 = halaʻatā; 2 = taimi ʻe niʻihi; 3 = tuʻo lahi; 4 = meimei ʻi he taimi kotoa pē; 5 = maʻu pē

________ 1. ʻOku ou tui kia Sīsū Kalaisi mo tali Ia ko hoku Fakamoʻui. ( 2 Nīfai 25:29)________ 2. ʻOku ou maʻu ʻa e tui ʻoku fie maʻu ke tokoni ki hono fakahoko ha ngaahi meʻa lelei ʻi heʻeku moʻuí pe ʻi he moʻui ʻa e niʻihi kehé. ( ʻEta 12:12)________ 3. ʻOku feʻunga ʻeku falala ki he Fakamoʻuí ke u tali ai ʻa Hono finangaló pea fai ha meʻa pē te Ne kole mai. ( 1 Nīfai 3:7)

Fakakaukau ki he ngaahi tafaʻaki ʻokú ke mālohi aí. Ko e hā ha ngaahi aʻusia kuó ne tokoniʻi koe ke ke mālohi ʻi he ngaahi tafaʻaki ko ʻení?
Ko e fē ʻa e tafaʻaki ʻokú ke fie maʻu ke fakamālohia aí?

“Ke ke ʻalo‘ofa kiate kimautolu”

Hili ʻEne aʻusia mo Pita, Sēmisi, mo Sione ʻi he Moʻunga ʻo e Liliú, naʻe hāʻele mai ʻa Sīsū ki ha tangata naʻe holi ke fakamoʻui hono fohá mei ha laumālie ʻuli.

Lau ʻa e Maʻake 9:14–22, ʻo kumi ki he tūkunga faingataʻa naʻe fehangahangai mo e tamai mo e foha ko ʻení.

ʻOkú ke pehē naʻe ongoʻi fēfē ʻa e tamaí ʻi he taimi naʻe ʻikai lava ai ʻe he kau ākonga ʻa e Fakamoʻuí ʻo fakamoʻui hono fohá?

Tokanga ke kole ki he kau akó ke nau tali lea ki he fehuʻi hokó. Mahalo ʻe fuʻu fakataautaha ʻa e ngaahi talí ke vahevahe.

Ko e fē ha taimi kuó ke maʻu ai pe ko ha taha ʻokú ke ʻiloʻi ha ʻuhinga ke lea ai ki he ʻEikí, “Ke ke ʻalo‘ofa kiate kimautolu, ʻo tokoniʻi kimautolu”?
Ko e hā ʻokú ke ʻilo mei hoʻo ngaahi aʻusia fekauʻaki mo e finangalo lelei ʻa e ʻEikí ke fakahaaʻi ʻa e ʻaloʻofá?
Ko e hā ʻoku lava ai ʻa Sīsū Kalaisi ʻo maʻu ʻa e ʻaloʻofa kiate kitautolu takitahá?

Lau ʻa e Maʻake 9:23–27 ke vakai ki he meʻa naʻe hoko atu aí. Fakakaukau ke fakaʻilongaʻi ha ngaahi foʻi lea, kupuʻi lea, pe ngaahi moʻoni ʻokú ke ongoʻi ʻoku mahuʻinga ke ke manatuʻi.

Ko e hā naʻe folofola ʻaki ʻe he Fakamoʻuí ki he tamai ko ʻení ʻi he taimi naʻá ne kole tokoni aí?
Ko e hā ʻoku makehe kiate koe fekauʻaki mo e tali ʻa e tamaí ki he Fakamoʻuí ʻi he veesi 24 ?
Ko e hā ha ngaahi meʻa kuó ke aʻusia ne tokoni atu ke ke pehē, “ʻEiki, ʻoku ou tui”?

Naʻe fakamamafaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi moʻoniʻi meʻa mahuʻinga ʻe lava ke ako mei he fakamatalá ni:

ʻĪmisi
Official Portrait of Elder Jeffrey R. Holland. Photographed January 2018.

Ko e taimi naʻe fehangahangai ai mo e pole ʻo e tuí, naʻe ʻuluaki fakamamafaʻi ʻe he tamaí hono mālohí hili ia peá ne toki tali e fakangatangata pē meʻa ʻokú ne lavá. ʻOku pau pea ʻikai momou ʻene ʻuluaki leá: “ʻEiki, ʻoku ou tui.” Te u pehē ki he taha kotoa ʻoku fie maʻu ha tui lahi angé, manatuʻi e tangata ko ʻení! ʻI he momeniti ʻo e ilifiá, veiveiuá pe taimi faingataʻá, tuʻu maʻu he tui kuó ke ʻosi maʻú, tatau ai pē kapau ko e tui ko iá ʻoku siʻisiʻi. … Pīkitai ki he meʻa kuó ke ʻosi ʻiló pea tuʻu maʻu kae ʻoua kuo maʻu ha ʻilo lahi ange. …

… Ka hoko ʻa e veiveiuá pe faingataʻá, ʻoua naʻa manavasiʻi ke kole tokoni. … ʻE ʻomi maʻu pē ʻe he ʻOtuá ha tokoni mei he ongo tafaʻaki fakatouʻosi ʻo e veilí ke fakamālohia ʻetau tuí.

(Jeffrey R. Holland, “ʻEiki, ʻOku ou Tui,” Ensign pe Liahona, Mē 2013, 93–94)

Ko e hā te tau lava ʻo ako mei he fakamatala fakafolofola ko ʻení mo e ngaahi akonaki ʻa ʻEletā Hōlaní?

Ko e moʻoni ʻe taha ʻoku tau ako mei he fakamatala ko ʻení ko e taimi ʻoku tau fili ai ke tui ki he Tamai Hēvaní mo fekumi ki Heʻene tokoní ʻi he lotú, te Ne tokoniʻi kitautolu ke fakamālohia ʻetau tui kia Sīsū Kalaisí.

ʻOkú ke pehē ʻoku ʻuhinga ki he hā ke “tuʻu maʻu ʻi he tui kuó ke ʻosi maʻú” mo “pīkitai ki he meʻa kuó ke ʻosi ʻiló”?

Ko e founga ʻe taha ke “tuʻu maʻu ʻi he tui kuó ke ʻosi maʻú” mo “pīkitai ki he meʻa kuó ke ʻosi ʻiló” ko hoʻo manatuʻi mo fakafalala ki he ngaahi aʻusia kimuʻá ʻa ia naʻá ne fakamālohia hoʻo tuí. Naʻe fakamatala mai ʻe ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ‘a e ngaahi aʻusia ko ʻení:

ʻĪmisi
Official Portrait of Elder Jeffrey R. Holland. Photographed January 2018.

ʻOku hanga ʻe he ʻOtuá, fakataha mo e fakahinohino fakanonga ʻoku tau maʻu he taimi ki he taimi mei he Laumālie Māʻoniʻoní, ʻo fakapapauʻi mālohi mo fakataautaha mai ʻokú Ne ʻafioʻi mo ʻofaʻi kitautolu pea ʻokú Ne tāpuekina pau mo tauʻatāina kitautolu. …

… ʻI he taimi ʻoku fakafeʻātungiaʻi ai hotau hala fonongá ʻe he faingataʻa fakatāutahá, veiveiuá, pe loto-foʻí, … ʻoku hoko e ngaahi manatu melie fakalaumālie fakangalongataʻa [ko ʻení]… ko ha ngaahi maka ulo ʻokú ne fakamaama e halá, ʻo fakapapauʻi mai ʻoku ʻafioʻi mo ʻofaʻi kitautolu ʻe he ʻOtuá, pea kuó Ne tuku mai Hono ʻAlo ko Sīsū Kalaisí ke tokoniʻi kitautolu ke tau foki ki ʻapi.

(Neil L. Andersen, “Ngaahi Manatu Melie Fakalaumālie Fakangalongataʻá,” Ensign pe Liahona, Mē 2020, 19, 21)

Tā ha taha ʻo ho ongo nimá ʻi hoʻo tohinoa akó pe ʻi ha laʻipepa. ʻI loto ʻi he fakatātā ko ʻení, hiki ʻa e kupuʻi lea “ʻEiki, ʻoku ou tui” ke fakafofongaʻi ʻa e pikitai ki he meʻa kuó ke ʻosi ʻiló. Lisi takatakai ʻi he kupuʻi lea ko ʻení ha ngaahi ʻuhinga fakaikiiki ʻokú ke ʻilo pe tui ai “ʻOku ʻafioʻi mo ʻofaʻi [koe] ʻe he ʻOtuá, pea kuó Ne tuku mai Hono ʻAlo ko Sīsū Kalaisí, ke tokoniʻi [koe] ke [ke] foki ki ʻapi.”

Kapau ‘oku ‘ikai ke fakaʻilongaʻi ʻe he kau akó honau nimá, te nau lava pē ʻo hiki ʻi heʻenau tohinoá ʻa e ngaahi ʻuhinga ʻoku nau tui ai ki he Tamai Hēvaní mo Sīsū Kalaisí. ʻE lava ke kau ai ha ngaahi aʻusia fakalaumālie kuo nau maʻu. Fakakaukau ke fakaafeʻi e kau akó ke nau vahevahe e meʻa kuo nau tohí, kapau ʻoku taau, pea mo ʻenau tali ki he fehuʻi ko ʻení.

ʻE tokoni fēfē hono manatuʻi e ngaahi aʻusia kuo ʻosi foaki atu ʻe he ʻOtuá kiate koé mo e ngaahi lēsoni kuó Ne ʻosi akoʻi atú ke fakamālohia koe ʻi he ngaahi taimi faingataʻá?

Fakalaulauloto ki he meʻa te ke fai, pe hokohoko atu hono faí, ke fakaafeʻi ha ngaahi aʻusia ʻe tokoni atu ke ke ʻiloʻi ʻoku ʻafioʻi mo ʻofaʻi koe ʻe he ʻOtuá.

Fakakaukau ke fakaʻosi ʻaki hano fai ha fakamoʻoni, pe fakaafeʻi ha tokotaha ako ke fakamoʻoni, ki he founga ʻoku fakamālohia ai kitautolu ʻe he Fakamoʻuí ʻi hotau ngaahi faingataʻaʻiá mo fakapaleʻi ha faʻahinga feinga fakamātoato ke falala kiate Ia.

Fakamatala Fakamahinó mo e Puipuituʻá

Maʻake 9:29. Ko e hā e ʻuhinga ʻa e Fakamoʻuí ʻi Heʻene pehē, “ʻOku ʻikai haʻu ki tuʻa ʻa e faʻahingá ni ʻi ha meʻa, kae ʻi he lotu mo e ʻaukai”?

ʻE lava ke fakaafeʻi mai ʻe he ʻaukaí mo e lotú ha mālohi fakalaumālie lahi ange mei he ʻEikí. ʻE ala fie maʻu ʻe he ngaahi faingataʻa ʻe niʻihi ‘a e mālohi lahi ange ko iá, hangē ko e taimi naʻe feinga ai ʻa e Kau ʻAposetoló ke kapusi ki tuʻa ʻa e laumālie ʻulí. Naʻe akonaki ‘a Palesiteni Lāsolo M. Nalesoni ʻo pehē, “ʻE lava ke fakamālohia ‘a e mālohi fakafiefia ʻo e lotú ʻe he ʻaukaí … ʻi he taimi ʻe feʻunga ai ki ha fiemaʻu pau” (“Sweet Power of Prayer,” Ensign pe Liahona, Mē 2003, 7).

Ko e fē ʻa e feituʻu ʻe lava ke u ako lahi ange ai ʻo kau ki he tuí mo e veiveiuá?

Naʻe akonaki mai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi moʻoni kehe fekauʻaki mo hono fakamālohia ʻo e tuí mo e fefaʻuhi mo e veiveiuá. Ke fanongo ki ha niʻihi ʻo e ngaahi moʻoni kehe ko ʻení, fakakaukau ke mamataʻi e vitiō “ʻEiki, ʻoku ou Tui” mei he taimi 5:57 ki he 10:28.