Zotërimi Doktrinor: Mateu 22:36–39

Dy Urdhërimet e Mëdha

Jesus is shown with a group of people speaking to a scribe about the two great commandments. Outtakes: include close ups of people in the crowd. (Scene filmed at ext. the temple court of the Women)

Te Mateu 22:36–39, Shpëtimtari dha mësim dy urdhërimet e mëdha. Ky mësim do të të ndihmojë të ushtrosh përdorimin e doktrinës të dhënë mësim në këtë fragment dhe parimet e marrjes së njohurisë shpirtërore për të kuptuar se si t’u bindesh të dy urdhërimeve për të dashur Perëndinë dhe për të dashur të afërmin tënd.

Të ndihmuarit e nxënësve që të mësojnë se si të gjejnë përgjigje për pyetjet. Qëllimi i zotërimit doktrinor është t’i mësojë nxënësit “se si ta kërkojnë të vërtetën, si të mendojnë rreth informacionit të ri dhe si t’u përgjigjen pyetjeve të tyre”. Në vend që t’u jepni nxënësve përgjigje për çdo pyetje, merreni parasysh se cilat pyetje mund t’i ndihmojnë ata që t’i ushtrojnë parimet e marrjes së njohurisë shpirtërore dhe t’i drejtojnë ata nëpërmjet “procesi[t të] caktuar hyjnisht të zbulimit të së vërtetës” vetë (shihni Çad H Ueb, “Zotërimi i Doktrinave” [fjalim i dhënë në transmetimin e trajnimit vjetor për Seminaret dhe Institutet e Fesë, 14 qershor 2016], broadcasts.ChurchofJesusChrist.org).

Përgatitja e nxënësve: Ftojini nxënësit t’i përsëritin referencat e zotërimit doktrinor dhe frazat kyç në shtëpi duke i kërkuar dikujt që t’i kontrollojë ata, ose duke përdorur Programin Kompjuterik Doctrinal Mastery [Zotërimi Doktrinor]. Gjithashtu, mund t’i ftoni nxënësit të veprojnë sipas planit të tyre për t’i zbatuar të dyja urdhërimet e mëdha.

Veprimtari të Mundshme të të Mësuarit

Ky mësim është hartuar për t’u dhënë pas mësimit me titullin Mateu 22:34–40, mësimi kontekstual për këtë fragment të zotërimit doktrinor. Nëse ky mësim i zotërimit doktrinor duhet të zhvendoset në një javë tjetër për t’iu përshtatur orareve të shkollës, sigurohuni që të jepni mësimin përkatës kontekstual edhe gjatë asaj jave.

Mëso përmendsh dhe shpjego

Merreni parasysh të përdorni veprimtarinë vijuese ose një veprimtari tjetër përmbledhëse për t’i ndihmuar nxënësit ta mësojnë përmendsh referencën e zotërimit doktrinor dhe frazën kyç.

Ushtro mësimin përmendsh të frazës kyç “Duaje Zotin, Perëndinë tënde. … Duaje të afërmin tënd” për referencën Mateu 22:36–39 .

Vizato një zemër dhe shkruaj numrat 1 dhe 2 poshtë saj. Pranë numrit 1, shkruaj: “Duaje Zotin, Perëndinë tënde”;pranë numrit 2, shkruaj:“Duaje të afërmin tënd”. Trego zemrën dhe jep referencën. Më pas, tregoje me gisht çdo numër. Ndërsa e bën këtë, thuaj pjesën e frazës kyç që lidhet me numrin. Përsërite procesin disa herë.

Qëllimi i pjesës vijuese është t’i ftoni nxënësit të ushtrojnë shpjegimin e të vërtetave për të tjerët, prandaj mund të jetë e efektshme të caktoni dyshe ose grupe.

Lexo te Mateu 22:36–39 dhe kujto studimin tënd të mëparshëm të këtyre vargjeve.

Cilat janë disa mënyra se si mund ta duam Perëndinë me gjithë zemrën tonë? Si mund t’i duam të afërmit tanë si vetveten?
Si mendon, përse këto dy urdhërime janë dhënë sipas këtij rendi?

Ushtroje vënien në zbatim

Merreni parasysh të përsëritni me nxënësit tri parimet e marrjes së njohurisë shpirtërore. Më pas ndajeni klasën në dyshe ose në grupe të vogla dhe ftojini nxënësit të thonë me radhë parimet që i dinë përmendsh. Kërkoni nga disa vullnetarë që t’i përmbledhin ato me fjalët e tyre.

Nëse është e nevojshme, përsërit paragrafët 5–12 të pjesës “Marrja e njohurisë shpirtërore” të materialit Dokumenti Bazë i Zotërimit Doktrinor (2022).Në disa situata, ne mund të hasim vështirësi për të kuptuar se si t’i ndjekim urdhërimet e Perëndisë dhe të tregojmë dashuri për ata që nuk u binden urdhërimeve të Perëndisë.

Plaku Lin G. Robins, i Të Shtatëdhjetëve, dha mësim:

“Përpjekja për t’u pëlqyer të tjerëve përpara se t’i pëlqejnë Perëndisë është ndërrim i vendit të urdhërimit të parë me të dytin (shih Mateu 22:37–39). Është të harrosh se nga cili drejtim i mbajmë sytë. Dhe prapëseprapë, ne të gjithë e kemi bërë atë gabim për shkak të frikës nga njerëzit. …

Vendime karakteri merren duke kujtuar renditjen e duhur të urdhërimit të parë dhe të dytë të madh. …

Shpëtimtari, Shembulli ynë i madh, përherë i mbante sytë të drejtuar tek Ati i Tij. Ai i donte dhe u shërbente bashkënjerëzve të Tij, por tha: ‘Unë nuk marr lavdi nga njerëzit’ ( Gjoni 5:41).”

(Lin G. Robins, “Nga Cili Drejtim i Mbani Sytë?”, Ensign ose Liahona, nëntor 2014, f. 9, 11)

Përsiati këto pyetje para se të kryesh veprimtarinë vijuese.

A ke pasur ndonjëherë frikë ta korrigjosh apo ta këshillosh me dashuri një mik/e për shkak se nuk ke dashur ta fyesh?
A je ndier ndonjëherë sikur duhet të zgjidhje ndërmjet asaj që të tjerët presin nga ti dhe asaj që Zoti pret nga ti?

Merreni parasysh të jepni letër ose fletë shënimi ku nxënësit të shkruajnë në mënyrë që t’i shkëmbejnë ato me nxënësit e tjerë.

Shkruaj një skenar në të cilin dikush mund ta ketë të vështirë të dojë Perëndinë dhe të ndjekë urdhërimet e Tij dhe gjithashtu të tregojë dashuri ndaj të tjerëve. (Shënim: Mos krijo një skenar që të tjerët të mund të dallojnë se i përket një individi apo bashkëmoshatari specifik.)

Nëse është e nevojshme, shembuj të skenarëve të mundshëm janë të përfshirë në pjesën “Veprimtaritë Plotësuese të të Mësuarit”.

Merreni parasysh të ftoni nxënës që të shkëmbejnë dhe diskutojnë skenarë me anëtarë të tjerë të klasës. Kjo gjë mund t’i ndihmojë nxënësit të lidhen me njëri-tjetrin dhe të zgjerojnë këndvështrimin e tyre. Skenarët mund të mblidhen dhe të shpërndahen përsëri në mënyrë rastësore (ruajtja e anonimatit mund t’i ndihmojë nxënësit të ndihen më rehat për të qenë të sinqertë).

Shqyrtoji konceptet dhe pyetjet me një këndvështrim të përjetshëm

Mendo për personin në skenarin tënd ndërsa përgjigjesh për pyetjet vijuese.

Çfarë supozimesh mund të ndikojnë te një person që ai të zgjedhë t’u pëlqejë të tjerëve në vend që t’i pëlqejë Perëndisë?
Si mund të të ndihmojnë të kuptuarit e planit të Atit Qiellor për shpëtimin ose mësime të tjera të ungjillit t’i zbërthesh këto supozime të rreme?
Çfarë të vërtetash për Atin Qiellor dhe Jezu Krishtin mund ta ndihmojnë personin t’i shohë të tjerët nga këndvështrimi i Tyre?

Kërko kuptueshmëri të mëtejshme nëpërmjet burimeve të caktuara në mënyrë hyjnore

Si munden të vërtetat te Mateu 22:36–39 ta drejtojnë këtë person?

Lexo pohimet vijuese nga profetët e ditëve të mëvonshme për të parë çfarë përshtypjesh mund të jenë të dobishme për personin në skenarin tënd.Presidenti Rasëll M. Nelson dha mësim:

“Nganjëherë ne si udhëheqës të Kishës kritikohemi ngaqë qëndrojmë të palëkundur ndaj ligjeve të Perëndisë, duke mbrojtur doktrinën e Shpëtimtarit dhe duke u bërë qëndresë trysnive shoqërore të kohës sonë. …

… Por a nuk do të ishte shumë më e pandjeshme po të mos thoshim të vërtetën – të mos e jepnim mësim atë që Perëndia ka zbuluar?”

(Russell M. Nelson, “The Love and Laws of God” [takim shpirtëror në Universitetin “Brigam Jang”, 17 shtator 2019], f. 3, speeches.byu.edu)

Presidenti Dallin H. Ouks, i Presidencës së Parë, pohoi:

“Ne duhet të përpiqemi t’i zbatojmë që të dy urdhërimet e mëdha. Që ta bëjmë këtë gjë, ne ecim nëpër një vijë të hollë ndarëse midis ligjit dhe dashurisë – zbatimit të urdhërimeve dhe ecjes në shtegun e besëlidhjeve, ndërkohë që i duam të afërmit tanë përgjatë udhës. Kjo ecje kërkon prej nesh që të kërkojmë frymëzim hyjnor se çfarë të mbështetim dhe çfarë të kundërshtojmë, dhe për mënyrën se si të duam e të dëgjojmë me respekt dhe të japim mësim në këtë proces.”

(Dallin H. Ouks, “Dy Urdhërimet e Mëdha”, Ensign ose Liahona, nëntor 2019, f. 75)

Si mundet njohja e të vërtetave që na mësojnë këto pohime, të ndihmojë personin në skenarin tënd?

Vepro me besim

Çfarë mund të bëjë personi në këtë skenar për të marrë ndihmën e Atit Qiellor që të dijë se si të veprojë?
Si mund të veprojë ai në mënyrë që t’i zbatojë të dyja urdhërimet e mëdha?

Nëse nxënësit kanë shkëmbyer skenarë, mblidhini skenarët dhe shpërndajuani përsëri nxënësve që i shkruan ato, ose vendosini mbi një tryezë dhe i lini nxënësit që t’i marrin ato.

Përsëritje e zotërimit doktrinor

Në një orë të mëvonshme mësimore, shqyrtojeni referencën e zotërimit doktrinor dhe frazën kyç të shkrimit të shenjtë duke i ftuar nxënësit të kryejnë një veprimtari si ajo në vijim:

Shkruajeni referencën dhe frazën vijuese në ditarin tuaj të studimit dhe më pas plotësoni vendet bosh. 

Mateu 22:36–39 : “ _____ _______, ____ tënde. … Duaje __ ________ tënd.”

Sipas nevojës, thuajeni referencën e shkrimit të shenjtë dhe frazën kyç të shkrimit të shenjtë. 

Veprimtari Plotësuese e të Mësuarit

Skenarë të mundshëm

Merreni parasysh një nga skenarët vijues:

Prindërit e Simonit janë të shkurorëzuar dhe ai e kalon pjesën më të madhe të fundjavave me të atin. Babait të tij nuk i pëlqen që Simoni të shkojë në kishë dhe planifikon qëllimisht gjëra në të njëjtën orë me shërbesat e Kishës. Simoni do që të kalojë kohë me babanë e tij, por ai dëshiron gjithashtu t’i bindet Zotit duke shkuar në kishë.
Sara vazhdon të ndiejë nxitje nga Fryma e Shenjtë për të ftuar shokun e saj, Gerin të lexojë Librin e Mormonit, por ajo vazhdon të shpërfillë nxitjet për shkak se ajo e di që Geri është shumë aktiv me familjen e tij në një fe tjetër dhe nuk do që ta fyejë atë.