Mateu 23

Shpëtimtari e Dënon Hipokrizinë

Jesus talking to Pharisees in Jerusalem. Movie still from The Life of Jesus Christ Bible Videos.

Gjatë javës së fundit të shërbesës së Shpëtimtarit në vdekshmëri, Ai e dënoi hipokrizinë e skribëve dhe të farisenjve. Ky mësim mund të të ndihmojë të shmangësh hipokrizinë dhe të jesh një ndjekës i përulur i Jezu Krishtit.

Të kuptuarit e kontekstit të shkrimeve të shenjta. Të mësuarit për kulturën dhe zakonet e kohës së Dhiatës së Re mund t’i ndihmojë nxënësit ta kuptojnë më mirë Dhiatën e Re. Të kuptuarit e kontekstit të shkrimeve të shenjta do t’i përgatitë nxënësit që t’i dallojnë mesazhet e autorëve të frymëzuar të tyre.

Përgatitja e nxënësve: Ftojini nxënësit të mendojnë për njerëz që mundohen ta ndjekin Shpëtimtarin me sinqeritet dhe qëllim të dëlirë teksa u shërbejnë të tjerëve.

Veprimtari të Mundshme të të Mësuarit

Nëse nxënësit do të përfitonin më shumë nga të mësuarit rreth mbrojtjes që Shpëtimtari na ofron sesa nga mësimet e Tij mbi hipokrizinë, merreni parasysh të jepni mësim veprimtarinë për referencën Mateu 23:37 te pjesa “Veprimtari Plotësuese të të Mësuarit”.

Çfarë është hipokrizia?

Përgatitni tri gota jo të tejdukshme. Bëjeni pis nga jashtë gotën e parë dhe nga brenda gotën e dytë dhe lëreni gotën e tretë të pastër. Paraqitini gotat dhe pyeteni klasën se nga cila do të parapëlqenin të pinin. Ftojeni një nxënës të këqyrë pjesën e brendshme të gotave dhe të shpjegojë se nga cila gotë do të parapëlqente të pinte ai apo ajo dhe arsyen përse.

Photo of three cups. One that is dirty on the inside, one that is dirty on the outside, and one that is clean

• Në çfarë mënyrash gotat e ndotura mund të përfaqësojnë hipokritët?

Ndërsa nxënësit diskutojnë për hipokrizinë, ata duhet të shohin përbrenda dhe të përqendrohen te vetvetja. Mos lejoni që nxënësit të vënë në dukje hipokrizinë e të tjerëve.

Fjala hipokrit është përkthyer nga një fjalë greke që do të thotë “aktor/e” dhe i referohet dikujt që shtiret, e zmadhon një rol ose është i/e paqëndrueshëm/me në mënyrë mashtruese në veprimet e veta. Ajo “përgjithësisht paraqet një person që shtiret sikur është besimtar kur nuk është” (Bible Dictionary [Fjalori Biblik në variantin SHDM në anglisht të Biblës]), “ Hypocrite ”). Ajo gjithashtu mund t’i referohet dikujt që shtiret sikur nuk është besimtar, kur ai ose ajo realisht është.

Ndërsa studion kapitullin Mateu 23 , kërko të vërteta që do të të ndihmojnë të shmangësh hipokrizinë dhe të bëhesh më i ngjashëm me Jezu Krishtin.

Si pjesë e mesazhit të fundit publik të Tij gjatë javës së fundit të shërbesës së Tij në vdekshmëri, Shpëtimtari e dënoi hipokrizinë e skribëve dhe të farisenjve. Ai vuri në dukje se skribët dhe farisenjtë “[uleshin] mbi katedrën e Moisiut” ( Mateu 23:2), që do të thotë se ata kishin një pozitë autoriteti për të dhënë mësim doktrinën dhe për ta interpretuar e administruar ligjin. Ata e konsideronin veten më të denjë se kushdo tjetër në sinagogë.

Lexo te Mateu 23:3–7 , duke kërkuar atë që tha Shpëtimtari për mënyrat se si skribët dhe farisenjtë po silleshin me hipokrizi. Para se ta lexosh, mund të jetë e dobishme të dish se “filateritë” ( vargu 5) ishin kuti të vogla prej lëkure që judenjtë i lidhnin në ballë dhe në krahun e majtë. Brenda filaterive kishte rrotulla të vogla pergamene që përmbanin vargje të veçanta nga shkrimet e shenjta të Dhiatës së Vjetër. Judenjtë mbanin filateri për t’i ndihmuar të kujtoheshin që të zbatonin urdhërimet e Perëndisë.

Combined image of two men wearing phylacteries and an image of the wailing wall in Jerusalem

Combined image of two men wearing phylacteries and an image of the wailing wall in Jerusalem

• Sipas vargut 5 , përse i zmadhonin filateritë e tyre dhe “thekët e rrobave të tyre” skribët dhe farisenjtë?

Zoti nuk i dënoi ata që vinin filateri, por Ai i dënoi ata që i përdornin ato në mënyrë hipokrite ose i zmadhonin ato që të tjerët të mund t’i vinin re ato ose që të bënin të dukeshin më të rëndësishëm.

• Cilat janë disa nga rreziqet e adhurimit të Perëndisë me veprime të dukshme për shkak se do të biesh në sy të të tjerëve?

• Si mendon, përse do Perëndia që ta adhurosh Atë me sinqeritet dhe me qëllim të drejtë?

Përveç se i paralajmëroi njerëzit të mos e ndiqnin sjelljen e skribëve dhe të farisenjve, Shpëtimtari foli gjithashtu drejtpërdrejt me skribët dhe farisenjtë. Ai shpalli disa mallkime që do të binin mbi ta për hipokrizinë e tyre (shih Mateu 23:13–33). Mjerë nënkupton një gjendje mjerimi, ankthi dhe pikëllimi.

Lexo te Mateu 23:23–28 , duke kërkuar se çfarë u tha Shpëtimtari skribëve dhe farisenjve.

• Sa i shtojnë këto vargje njohuritë e tua për hipokrizinë?

Ndihmojini nxënësit të kuptojnë se një problem i hipokrizisë është që ajo nuk na lejon të bëhemi me të vërtetë të ngjashëm me Atin Qiellor dhe me Jezu Krishtin. Kur jemi hipokritë, ne përqendrohemi më shumë te mënyra se si u shfaqemi të tjerëve sesa te ajo që po bëhemi me të vërtetë.

• Çfarë do t’i thoshe dikujt që shqetësohet se mos është një hipokrit kur bën gabime ndërkohë që mundohet ta jetojë ungjillin?

Nëse nxënësit kanë nevojë për ndihmë për pyetjen e mësipërme, tregojuni thënien e Plakut Xhefri R. Holland te pjesa “Komente dhe Informacion për Rrethanat”.

Si mund ta shmangim dhe ta mposhtim hipokrizinë

Në ndryshim nga skribët dhe farisenjtë, Shpëtimtari nuk veproi asnjëherë me hipokrizi. Ai i mësoi njerëzit të mos e konsideronin veten më të mirë se të tjerët, sepse ata ishin të gjithë bij të Perëndisë, të barabartë në sytë e Tij. Ai dëshmoi se Ati Qiellor është Krijuesi ynë dhe se Ai, Krishti, qe dërguar nga Ati dhe është Mësuesi ynë i vërtetë që jep jetë (shih Përkthimi prej Joseph Smith-it, Mateu 23:6; Mateu 23:8–10).

Lexo te Mateu 23:11–12 dhe kërko mësime që mund të na ndihmojnë ta mposhtim dhe ta shmangim hipokrizinë. Te vargu 12 , fjala lartësojë do të thotë të ngrejë lart dhe poshtërohet do të thotë ulet, turpërohet, ose respektohet më pak.

• Si mendon, çfarë parimi po na jep mësim Jezu Krishti në këto vargje?

Shpëtimtari dha mësim se nëse jemi të përulur dhe u shërbejmë të tjerëve, Zoti do të na ngrejë lart. Ai do të na ndihmojë të bëhemi më të ngjashëm me Të dhe me anë të bindjes ndaj urdhërimeve të Tij dhe pendimit të vërtetë, Perëndia do të na japë ekzaltimin në mbretërinë çelestiale.

• Si është Jezu Krishti një shembull i të qenit i përulur, i shërbimit ndaj të tjerëve dhe i shmangies së hipokrizisë?

• Si mund të të ndihmojë ty të qenit i përulur dhe shërbimi ndaj të tjerëve që ta shmangësh hipokrizinë dhe të bëhesh më i ngjashëm me Shpëtimtarin?

Paraqitini thëniet vijuese dhe ftojini nxënësit të mendojnë se me cilën identifikohen më shpesh. Nxitini nxënësit të kërkojnë udhërrëfimin e Shpirtit ndërsa mendojnë. Kujtojini ata se Ati Qiellor dhe Jezu Krishti i duan ata dhe duan t’i ndihmojnë të mposhtin hipokrizinë. Nxënësit mund t’i mbajnë shënim mendimet e tyre në ditarët e tyre të studimit.

• Unë hiqem sikur jam dikush që nuk jam.

• Unë bëj mirë që të bie në sy të të tjerëve.

• Shpesh mendoj se jam më i mirë se të tjerët.

• Megjithëse bëj gabime, unë përpiqem me ndershmëri që ta jetoj ungjillin.

• Përpiqem t’u shërbej të tjerëve dhe të bëj mirë pa kërkuar të ma dinë të tjerët.

• Unë përpiqem të jem i përulur dhe të mos e shoh veten si më të mirë se të tjerët.

Kërko udhërrëfimin e Frymës së Shenjtë ndërsa përcakton ndonjë fushë tek e cila mund të përmirësohesh. Kujto që Ati Qiellor dhe Jezu Krishti të duan dhe dallojnë çdo përpjekje të sinqertë tënden për ta jetuar ungjillin. Teksa i kërkon ndihmë Atit Qiellor, Ai do të të ndihmojë të mposhtësh çdo dobësi apo hipokrizi.

Komente dhe Informacion për Rrethanat

Si i konsideronte Shpëtimtari skribët dhe farisenjtë hipokritë?

Në bisedën e tij “Zëri i Paralajmërimit”, Plaku D. Tod Kristoferson, i Kuorumit të Dymbëdhjetë Apostujve, dha mësim për mënyrën se si Jezusi e dënoi hipokrizinë e skribëve dhe të farisenjve (Ensign ose Liahona, maj 2017, f. 108–111).

A jam hipokrit nëse bëj gabime teksa përpiqemtë jetoj ungjillin?

Plaku Xhefri R. Holland, i Kuorumit të Dymbëdhjetë Apostujve, dha mësim:

Official Portrait of Elder Jeffrey R. Holland. Photographed January 2018.

“Vëllezër e motra, secili prej nesh dëshiron një jetë më [shumë] si e Krishtit, sesa ajo që shpesh ia dalim të jetojmë. Nëse e pranojmë këtë gjë me ndershmëri dhe përpiqemi të përmirësohemi, nuk jemi hipokritë; jemi njerëzorë.”

(Xhefri R. Holland, “Jini, pra, të Përkryer – Përfundimisht”, Ensign ose Liahona, nëntor 2017, f. 42)

Veprimtari Plotësuese të të Mësuarit

Një mënyrë alternative për të filluar mësimin

Ndihmojini nxënësit të vlerësojnë problemin e mundshëm në secilën prej situatave vijuese. (Nëse dëshironi, merreni parasysh t’i ndryshoni situatat për të pasqyruar zakonet dhe traditat e vendit që mund të jenë më të përshtatshme për nxënësit.)

1. Dikush që frekuenton mbledhjet e kishës, por është më i shqetësuar që ta shohin të tjerët sesa të adhurojë Perëndinë

2. Një anëtar që shpall se i mbështet udhëheqësit e Kishës dhe më pas kritikon vendimet e tyre

3. Një person që publikon materiale në media shoqërore ku i zmadhon virtytet e veta

Pasi nxënësit t’i vlerësojnë këto situata, shpjegoni se çfarë është një hipokrit dhe shihni nëse nxënësit mund të përshkruajnë se si këta skenarë janë shembuj të hipokrizisë. Më pas filloni studimin e kapitullit Mateu 23 .

Fshatrat Potjomkin dhe hipokrizia

Ndërkohë që shërbente në Presidencën e Parë, Presidenti Diter F. Uhtdorf, përdori shembullin e fshatrave Potjomkin për të dhënë mësim për rreziqet e hipokrizisë. Merreni në konsideratë të shikoni materialin filmik “Mbi të Qenit të Vërtetë” [ose bisedën https://www.churchofjesuschrist.org/study/general-conference/2015/04/on-being-genuine?lang=alb], që gjendet në ChurchofJesusChrist.org, nga kodi kohor 0:00 deri në 4:59. Nxënësit mund të tregojnë më pas atë që mësuan për hipokrizinë dhe se si mund ta shmangim atë.

Mateu 23:37 . “Ashtu si i mbledh klloçka zogjtë e vet nën krahë”

Te Mateu 23:34–39 Shpëtimtari i paralajmëroi banorët e Jerusalemit që për shkak se i refuzuan profetët, ata do të liheshin të shkretë.

A mother hen and her baby chicks.

Merreni parasysh të shfaqni figurën e një pule dhe zogjve të saj dhe të bëni pyetjen: “Si i mbron klloçka zogjtë e saj?”

Ftojini nxënësit të lexojnë te Mateu 23:37–39 , duke kërkuar mënyra se si njerëzit e Jerusalemit iu përgjigjën përpjekjeve të Jezusit për t’i mbledhur ata si klloçka që mbledh zogjtë e saj.

Jezusi u dha një mesazh të ngjashëm njerëzve të Librit të Mormonit. Ata që i kishin refuzuar profetët, morën fund në shkatërrimin që pasoi vdekjen e Tij (shih te 3 Nefi 9:1–12). Atëherë Shëlbuesi u bëri një ftesë atyre që u kursyen.

Ftojini nxënësit të lexojnë te 3 Nefi 9:13–14 ; 10:4–6 , duke kërkuar ftesën e Shpëtimtarit.

Merreni parasysh të bëni pyetje si ato në vijim:

• Çfarë ju mësojnë këto vargje rreth Shpëtimtarit?

• Cilat janë disa mënyra se si Shpëtimtari mund të na mbledhë, mbrojë dhe shpëtojë?

• Si mendon se ndjekja e profetëve është një mënyrë se si ne mund të marrim mbrojtjen e Shpëtimtarit?

• Çfarë do të bëni për t’u mbledhur te Shpëtimtari, në mënyrë që të mund të vazhdoni të merrni përkujdesjen dhe mbrojtjen e Tij?

• Si ndikojnë këto vargje në mënyrën se si ndiheni ju rreth Jezu Krishtit?