Doktrinal nga Kahanas: Mateo 5:14–16

“Ipadan-ag ang Inyong Kahayag atubangan sa Mga Tawo”

A young adult Asian woman looking forward and upward.

Ang Manluluwas midapit sa Iyang mga disipulo nga magmahimong ehemplo sa uban pinaagi sa pagsunod Kaniya. Kini nga leksiyon makatabang kanimo sa paggamit sa mga baroganan sa pag-angkon og espirituhanong kahibalo aron mahimong ehemplo sa uban ug mahiduol sa Manluluwas.

Pagrebyo sa mga baroganan sa pag-angkon og espirituhanong kahibalo. Rebyohon kanunay kauban sa mga estudyante ang tulo ka baroganan sa pag-angkon og espirituhanong kahibalo: lihokon inubanan sa pagtuo, susihon ang mga konsepto ug mga pangutana inubanan sa mahangturong panglantaw, ug tinguhaon ang dugang panabot pinaagi sa balaanong gitudlo nga mga tinubdan. Niini nga leksiyon, ang pagrebyo niini nga mga baroganan makatugot sa mga estudyante nga gamiton kini sa panahon sa pagbansay sa paggamit niini.

Pag-andam sa estudyante: Dapita ang mga estudyante sa paghunahuna og usa ka tawo sa ilang kinabuhi nga usa ka maayong ehemplo kanila. Unya awhaga sila nga ikonsiderar ang pagtawag niini nga tawo o pagsulat sa tawo aron ipadayag ang ilang pagpasalamat.

Posible nga mga Kalihokan sa Pagkat-on

Imemorya ug ipasabot

Paghatag og oportunidad aron imemorya sa mga estudyante ang pakisayran ug ang importanteng hugpong sa mga pulong sa kasulatan. Ang mosunod mao ang usa ka ehemplo sa kon unsaon kini pagbuhat.

Basaha ang Mateo 5:14–16 .

Pagdrowing og ilustrasyon sa importanteng hugpong sa mga pulong sa kasulatan nga “Ipadan-ag ang inyong kahayag atubangan sa mga tawo” ug ang pakisayran niini, Mateo 5:14–16 . Samtang nagdrowing ka, paghunahuna og mga paagi aron ilakip ang pakisayran aron matabangan ka nga mahinumdoman kini.

Samtang nagtan-aw sa ilustrasyon, balika ang pakisayran ug ang importanteng hugpong sa mga pulong sa kasulatan sa pipila ka higayon. Unya ayaw tan-awa, ug sulayi sa pagbalik ang pakisayran ug ang importanteng hugpong sa mga pulong sa kasulatan gikan sa memorya.

Para sa mosunod nga kalihokan, dasiga ang mga estudyante nga gamiton ang ilang drowing aron ipasabot ang kamatuoran sa tudling sa doktrinal nga kahanas imbes nga mag-istorya lamang mahitungod sa mismong drowing.

Ipaambit ang imong drowing sa usa ka klasmeyt, ug ipasabot kon giunsa niini paghulagway ang importanteng hugpong sa mga pulong ug pakisayran sa doktrinal nga kahanas.

Kon posible, ikonsiderar ang pagbitay og pipila sa mga ilustrasyon sa palibot sa klase aron matan-aw kini sa magtutudlo ug mga estudyante sa mga leksiyon sa umaabot o mga kalihokan sa pagrebyo.

Pagbansay sa paggamit

Niini nga pagbansay sa paggamit, gamiton nimo ang mga baroganan sa pag-angkon og espirituhanong kahibalo aron matuki kon unsaon nga mahimong ehemplo sa uban ug dapita sila nga mopaduol sa Manluluwas.

Rebyoha ang mga parapo [paragraph] 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022).

Adunay mga ideya kon unsaon paggamit ang video nga makita diha sa “Dugang nga mga Kalihokan sa Pagkat-on.”

Basaha ang mosunod nga sitwasyon, ug hunahunaa kon unsaon kaha nimo pagtubag kon ikaw ang anaa sa sitwasyon ni Raul.

Si Raul, usa ka bag-ong naordinahan nga priest, anaa kauban sa usa ka grupo sa mga higala sa dihang ang pipila kanila nagsugod sa pagsulti og malaw-ay nga mga komedya ug nagsulti og dili maayo mahitungod sa usa ka tawo nga nailhan ni Raul. Dili komportable si Raul ug nakahibalo siya nga sayop ang ilang gibuhat. Samtang naghunahuna siya kon unsa ang angayng buhaton, ang iyang higala nga si Jesse, nga usa ka miyembro sa laing relihiyon ug gidayeg gayod ni Raul, miduol kang Raul ug miingon, “Uy, nganong seryoso man ka?”

Ikonsiderar ang kada usa sa mga baroganan sa pag-angkon og espirituhanong kahibalo aron matabangan ka sa pagbuhat og tubag.

Ikonsiderar ang pagdapit sa mga estudyante nga magbuhat kauban ang usa ka klasmeyt o diha sa gagmay nga mga grupo. Lagmit nga makatabang kon ipakita ang mosunod nga mga instruksiyon para sa mga estudyante.

Susihon ang mga konsepto ug mga pangutana inubanan sa mahangturong panglantaw

Pagpili og usa sa mga tawo sa sitwasyon (si Jesse o ang tawo nga gibiay-biay).

Unsa kaha sa imong hunahuna ang gibati sa Ginoo mahitungod sa tawo nga imong gipili?
Sa unsang paagi nga makaapekto sa pagtubag ni Raul sa pangutana ni Jesse ang pagtan-aw niining tawhana sama sa pagtan-aw kanila sa Ginoo?

Tinguhaon ang dugang nga panabot pinaagi sa balaanong gipili nga mga tinubdan

Sa unsang paagi makatabang para kang Raul ang paghinumdom ug paggamit sa mga baroganan diha sa Mateo 5:14–16 ?
Sa imong hunahuna, unsa ang uban pang balaanong gipili nga mga tinubdan ang makatabang kang Raul?

Lihokon inubanan sa hugot nga pagtuo

Ngano kaha nga lisod man para kang Raul ang paglihok inubanan sa hugot nga pagtuo niini nga sitwasyon?
Unsa man ang imong marekomendar nga mahimong buhaton ni Raul aron molihok inubanan sa hugot nga pagtuo?

Dapita ang pipila ka mga estudyante sa pagpakigbahin sa ilang mga tubag. Ikonsiderar ang pagtuki ug pagkomplimento sa mga estudyante sa mga baroganan sa pag-angkon og espirituhanong kahibalo nga ilang gihisgotan.

Paghuna-huna og sitwasyon nga pareho sa kang Raul nga imong giatubang karon o lagmit nga maatubang sa umaabot.

Sa unsang paagi nga makatabang kanimo ang imong nakat-onan karon nga mahimong ehemplo sa uban?

Pagrebyo

Tabangi ang mga estudyante sa pagrebyo sa pakisayran ug importanteng hugpong sa mga pulong sa kasulatan para sa Mateo 5:14–16 sa umaabot nga leksiyon. Ania ang usa ka sanglitanan.

Tan-awa ang hulagway nga imong gidrowing para sa Mateo 5:14–16 . Samtang nagtan-aw ka niini, balika ang pakisayran ug ang importanteng hugpong sa mga pulong sa kasulatan sa pipila ka higayon. Sulayi sa pagbalik niini gikan sa memorya.

Dugang nga mga Kalihokan sa Pagkat-on

A young woman standing in a dark room holding a light bulb.