Jesus Christ sitting on a hillside preaching to a crowd of people. Mountains and sea are visible in the background. A reproduction by Grant Romney Clawson of the original “Sermon on the Mount” by Harry Anderson.
Aron sugdan ang Wali sa Bukid, gitudlo sa Manluluwas kon sa unsang paagi mahimong malipayon ug bulahan ang mga tawo. Miingon si Presidente Harold B. Lee (1899–1973) nga kini nga mga pagtulon-an “naglangkob sa katukuran sa hingpit nga kinabuhi” (Mga Pagtulon-an sa mga Presidente sa Simbahan: Harold B. Lee [2000], 246). Tabangan ka niini nga leksiyon sa pag-ila sa mga kinaiya nga sama kang Kristo ug magbuhat og plano aron mapausbaw kini samtang nagtinguha ka og kalipay ug pagkahingpit.
Ang katuyoan sa seminary. Ang katuyoan sa seminary mao ang pagtabang sa kabatan-onan nga makasabot ug mosalig sa mga pagtulon-an ug Pag-ula ni Jesukristo, mahimong sarang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban para sa kinabuhing dayon uban sa ilang Amahan sa Langit. Samtang mag-andam ka sa imong mga leksiyon, tinoa sa mainampoong paagi kon unsaon nimo pagtabang nga makab-ot kini nga tumong kada adlaw.
Pag-andam sa estudyante: Dapita ang mga estudyante nga magpili og usa sa mga hiyas sa Mateo 5:1–12 nga gusto nilang mahibaloan pa og dugang. Hangyoa sila nga makat-onan kon unsa ang buot ipasabot niini ug maghunahuna mahitungod sa kon sa unsang paagi nga kana nga hiyas mosangpot ngadto sa kalipay.
Posible nga mga Kalihokan sa Pagkat-on
Naglambo diha sa kalipay
Ikonsiderar ang pagsulat sa mosunod nga mga pangutana diha sa pisara sa atubangan sa klase.
Imahe
Tonga. Group of young men and young women eating.
Kanus-a ka nalipay pag-ayo?
Milungtad ba ang kalipay? Ngano kaha nga milungtad man kini o wala man kini molungtad?
Samtang ang Manluluwas nagsugod sa Iyang pangalagad, mihatag Siya og wali duol sa Lanaw sa Galilea. Kini nga wali kasagaran gitawag og ang Wali sa Bukid ug narekord diha sa Mateo 5–7 . Sa dihang mibisita ang Ginoo sa mga Nephite, naghatag Siya og parehong wali (tan-awa sa 3 Nephi 12–14).
Ang Mateo 5:1–12 nailhan nga Mga Tawong Bulahan, nga gikan sa Latin nga pulong nga nagpasabot nga “bulahan” o “malipayon” . Niini nga mga bersikulo, nagtuki si Jesus og mga kinaiya nga aduna Siya ug ang Iyang Amahan nga naghatag og tinuod nga kalipay niini nga kinabuhi ug sa kinabuhi nga umaabot. Ang pagpausbaw niini nga mga hiyas makatabang kanimo nga mahimong mas mahisama sa Langitnong Amahan ug ni Jesukristo.
Basaha ang Mateo 5:1–12 , ug pangitaa ug markahi ang mga hiyas nga gitudlo sa Manluluwas ug ang gisaad nga mga panalangin para sa kada hiyas.
Imahe
Tonga. Group of young men and young women eating.
Ang usa ka baroganan nga atong matuki gikan niini nga mga bersikulo mao ang samtang kita nagpalambo og mga hiyas nga sama kang Kristo, kita makakaplag og dugang nga kalipay.
Sa imong hunahuna sa unsang paagi nga ang pamaagi sa pagpakabuhi sa Manluluwas nakatampo sa Iyang kalipay?
Kon ang mga estudyante gidapit nga magkat-on mahitungod sa usa sa mga hiyas sa wala pa ang klase, dapita sila nga ipaambit ang ilang nakat-onan. Pangutan-a ang mga estudyante kon unsa nga mga tinubdan ang ilang gigamit sa pagkat-on mahitungod sa hiyas.
Pagkat-on mahitungod sa usa o labaw pa sa mosunod nga mga hiyas. Pamalandongi kon sa unsang paagi nga makatabang kanimo nga magmalipayon ang pag-angkon og hiyas ug pagdawat sa gisaad nga panalangin niini.
Hatagi ang mga estudyante sa mosunod nga mga pangutana isip handout. Awhaga ang mga estudyante nga ibutang kini nga handout diin sayon nila kining ma-access para sa paggamit sa umaabot.
Kabos sa espiritu. Ang pagkamapainubsanon, o “pag-ila sa mapasalamatong paagi sa imong pagsalig diha sa Ginoo—ang pagsabot nga kita kanunay nga nanginahanglan sa Iyang suporta. Ang pagkamapainubsanon mao ang pag-ila nga ang atong mga talento ug mga abilidad mga gasa gikan sa Dios” (Gospel Topics, “Humility,” topics.ChurchofJesusChrist.org).
Magbangutan. Ang pagbati ug pagpadayag sa kasubo mahitungod sa usa ka butang. Ang tawo mahimong magmasulub-on tungod sa mga pagsulay sa pagka-mortal nga nasinati nila ug sa ubang tawo. Ang tawo mahimo sab nga magmasulub-on tungod sa kasub-anan para sa sala.
Maaghop. Ang “‘matinahuron sa Dios, matarong, mapainubsanon, matudloan, ug mapailubon ubos sa pag-antos’ [Giya ngadto sa mga Kasulatan, ‘Maagh[o]p, Pagkamaagh[o]p,’ scriptures.ChurchofJesusChrist.org]. Kadtong aduna niini nga hiyas andam nga mosunod ni Jesukristo, ug ang ilang kinaiya kalma, manunuton, matugtanon, ug masulundon” (Ulisses Soares, “Magmaaghup ug Magmapaubsanon sa Kasingkasing,” Liahona, Nob. 2013, 9).
Maloloy-on. Ang “pagkamanggiloy-on, matinahuron, mapasayloon, ligdong, ug mapailubon, bisan pa kon nakahibalo kita sa mga kasaypanan sa ubang tawo” (Gospel Topics, “Mercy,” topics.ChurchofJesusChrist.org).
Putli nga kasingkasing. Ang pagkalakip niadtong kinsa “nahigugma sa Ginoo, kinsa nagtinguha nga mosunod Kaniya ug motuman sa Iyang mga sugo, kinsa naningkamot nga magpuyo og mahiyason nga kinabuhi ug matinud-anong molahutay hangtod sa kataposan. Ang mga maputli og kasingkasing mao kadtong makapugong sa ilang mga hunahuna aron magpabiling gawasnon ang ilang kaugalingon gikan sa imoral nga mga pantasya ug mga binuhatan” (Sheldon F. Child, “Words of Jesus: Chastity,” Ensign o Liahona, Ene. 2003, 44).
Tigpasiugda sa kalinaw. “Ang pagtabang sa mga tawo sa pag-ila kon unsay komon kanila sa higayon nga ang uban nagtan-aw sa mga kalainan” (Henry B. Eyring, “Pagkat-on diha sa Priesthood,” Liahona, Mayo 2011, 63).
Gilutos tungod sa pagkamatarong. Ang pagkaandam nga motuman ug manalipod kang Jesukristo ug sa Iyang mga pagtulon-an, bisan kon pagatamayon o maltratohon kita sa pagbuhat niini.
Ikonsiderar ang paghisgot sa lainlaing mga paagi nga ang kalibotan naghulagway sa kalipay. Ikompara kini sa kalipay diha sa paagi sa Ginoo. Hisgoti kon sa unsang paagi nga ang pagpakabuhi sa Mga Tawong Bulahan tingali lahi sa mga paagi sa pagpakabuhi sa kalibotan pero mosangpot ngadto sa malungtarong kalipay diha sa paagi sa Dios.
Sa unsang paagi nga gipakita sa Manluluwas ang usa o labaw pa niini nga mga hiyas diha sa mga kasulatan o sa imong kinabuhi?
Sa imong hunahuna sa unsang paagi kaha nga ang pagpalambo sa hiyas o mga hiyas nga imong gipili makadugang sa imong kalipay? Ngano man?
Pagtuki og mga hiyas nga sama kang Kristo nganha sa imong kinabuhi
Tubagi ang mosunod nga survey. Tinguha niini nga tabangan ka sa pag-ila sa mga hiyas nga imong gipakita ug kadtong mas hingpit nimo nga mapalambo.
Pagbutang og numero gikan sa 1 hangtod sa 5 sa tapad sa kada usa sa mosunod nga mga hiyas nga sama kang Kristo (ang 1 nagpasabot nga “wala gayod mapalambo” ug ang 5 nagpasabot nga “napalambo gayod kaayo”).
__ Kabos ako sa espiritu.__ Mobati ako og kasubo para sa ubang tawo kon magbangutan sila ug mobati og diosnong kasubo kon makasala ako.__ Maaghop ako.__ Gigutom ug giuhaw ako sa pagkamatarong.__ Maloloy-on ako.__ Putli ang akong kasingkasing.__ Tigpasiugda ako sa kalinaw.__ Matinuohon ako kon lutoson para sa akong mga gituohan.
Ilha ang mga hiyas nga maayo ka sa pagpalambo, ug pagpasalamat sa Dios sa pag-uswag nga imong gibuhat aron mahimong mas mahisama Kaniya ug kang Jesukristo. Hunahunaa ang mga hiyas nga gusto nimong mas hingpit nimo nga mapalambo, ug hangyoa ang Dios nga tabangan ka sa pagpalambo niini.
Hatagi og igo nga panahon ang mga estudyante aron makompleto ang survey ug pamalandongan ang ilang pag-uswag sa mga hiyas. Ang pagbuhat niini makatabang kanila nga makita nga mas tukma ang ilang mga kaugalingon ug mapalig-on ang ilang relasyon sa Langitnong Amahan.
Kon naglisod ka sa pag-ila kon unsa nga mga hiyas ang maayo ka o kinahanglang lihokon, lagmit nga makatabang kon makig-istorya sa mga ginikanan o uban pang gisaligan nga mga indibidwal. Hangyoa sila sa pag-ila kon unsa nga mga hiyas nga sama kang Kristo ang ilang naila nga anaa kanimo ug kadtong mas mapalambo pa nimo.
Ang tahas sa Manluluwas sa pagpalambo sa mga hiyas nga sama kang Kristo
Nanginahanglan kita sa tabang sa Manluluwas aron mapalambo ang mga hiyas nga sama kang Kristo. Si Elder Dieter F. Uchtdorf sa Korum sa Napulog Duha ka Apostoles mipasabot:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang mga hiyas nga sama kang Kristo mga gasa gikan sa Dios. Dili kini mapalambo nga walay panabang gikan Kaniya. Ang tabang nga gikinahanglan natong tanan gihatag kanato nga libre pinaagi sa Pag-ula ni Jesukristo. Ang pagbaton og pagtuo kang Jesukristo ug sa Iyang Pag-ula nangahulugan nga misalig sa hingpit Kaniya—mosalig sa Iyang walay kinutubang gahum, kahibalo, ug gugma. Ang mga hiyas nga sama kang Kristo moabot sa atong kinabuhi samtang kita matarong nga naggamit sa atong kabubut-on. Ang pagtuo kang Jesukristo mosangpot sa aksiyon. Kon kita dunay pagtuo ni Kristo, kita dunay igong pagsalig sa Ginoo aron mosunod sa Iyang mga sugo—bisan kon kita wala makasabot sa hingpit sa rason niini. Sa pagpaninguha nga mahimong sama sa Manluluwas, kinahanglan nga kanunay kitang motimbang-timbang sa atong kinabuhi ug mosalig, pinaagi sa dalan sa tinuod nga paghinulsol, diha sa mga katakus ni Jesukristo ug sa mga panalangin sa Iyang Pag-ula.
(Dieter F. Uchtdorf, “Mga Hiyas nga Sama Kang Kristo—ang Gahum nga Mobayaw Kanato,” Liahona, Nob. 2005, 102–3)
Unsa ang imong namatikdan niini nga pamahayag nga makatabang kanimo nga mapalambo ang mga hiyas nga sama kang Kristo?
Paghimo og plano
Pagbuhat og plano nga makatabang kanimo nga mahimong mas mahisama sa Langitnong Amahan ug ni Jesukristo. Paglakip og partikular nga aksiyon nga matuman nimo kada adlaw nga gibati nimo nga makatabang. Hinumdomi ang pagtinguha sa tabang sa Manluluwas. Ikonsiderar ang paghangyo sa gisaligang pamilya o mga higala nga suportahan ka sa imong mga paningkamot. Mahimo usab nimong irekord ang imong plano sa aksiyon sa imong Giya nga Basahon sa Kabatan-onan o diha sa journal sa pagtuon.
Komentaryo ug Background nga Impormasyon
Giunsa pagtudlo kanato sa Manluluwas ang mahitungod sa Iyang kinaiya diha sa Wali sa Bukid?
Si Presidente Harold B. Lee (1899–1973) mitudlo:
Imahe
Head and shoulders portrait of LDS Church President Harold B. Lee.
Si Kristo wala lamang moanhi sa kalibotan aron sa pag-ula alang sa mga sala sa katawhan apan sa paghatag og ehemplo sa atubangan sa kalibotan sa sumbanan sa kahingpitan sa balaod sa Dios ug sa pagkamasulundon ngadto sa Amahan. Sa iyang Wali sa Bukid ang Magtutudlo naghatag kanato ingon og usa ka pagpadayag sa iyang kaugalingong kinaiya, nga hingpit, … ug sa pagbuhat sa ingon naghatag kanato sa usa ka sundanan alang sa atong kaugalingon nga mga kinabuhi.
(Mga Pagtulon-an sa mga Presidente sa Simbahan: Harold B. Lee [2000], 246)
Unsa ang gipasabot sa pag-ingon nga kadtong giuhaw sa pagkamatarong pagatagbawon?
Sa dihang naghatag ang Manluluwas og Wali sa Bukid didto sa Amerika, gisaysay Niya nga kadtong gigutom ug giuhaw sa pagkamatarong “pagatagbawon sa Espiritu Santo” ( 3 Nephi 12:6).
Unsa ang uban pang mga hiyas nga sama kang Kristo?
Ikonsiderar ang pagtan-aw sa video nga “Christlike Attributes” (2:53), nga anaa sa ChurchofJesusChrist.org. Gituki niini nga video ang uban pang mga hiyas nga anaa sa Manluluwas ug gipakita kini sa Iyang kinabuhi.
Ikonsiderar ang pagdapit sa mga estudyante nga mag-andam og pakigpulong bahin sa usa sa Mga Tawong Bulahan. (Kini mahimong buhaton kauban ang usa ka klasmeyt.) Pagkahuman sa pag-andam sa mga estudyante sa ilang mga pakigpulong, pagdapit og pipila ka mga estudyante nga magpakigbahin sa klase. Kon ang mga estudyante nakigtambayayong sa klasmeyt, mahimo silang magdungan sa pagpaambit sa ilang pakigpulong diha sa klase.
Ang Mga Tawong Bulahan ug pagkahingpit
Naghisgot mahitungod sa Mga Tawong Bulahan, si Presidente Harold B. Lee (1899–1973) mitudlo nga “kini nga mga pamahayag sa Magtutudlo … naglangkob sa katukuran sa hingpit nga kinabuhi” (Mga Pagtul[o]n-an sa mga Presidente sa Simbahan: HaroldB. Lee [2000], 246).
Dapita ang mga estudyante nga hisgotan ang lain-laing mga paagi nga ang pagpakabuhi sa Mga Tawong Bulahan makatabang kanato nga mahimong hingpit sama sa Langitnong Amahan ug ni Jesukristo (tan-awa sa Mateo 5:48 ; 3 Nephi 12:48).
Laing mga bersyon sa Mga Tawong Bulahan
Dapita ang mga estudyante nga basahon ang Lucas 6:20–26 ug 3 Nephi 12:1–12 ug hisgotan ang dugang pang mga panabot nga nakuha gikan niini nga mga bersikulo.
Pagpraktis diha sa journal
Dapita ang mga estudyante nga maghimo og ulohan nga sama sa mosunod diha sa ilang journal sa pagtuon:
“ Mateo 5–7 : Mahimo akong mas mahisama sa Langitnong Amahan ug ni Jesukristo pinaagi sa …”
Awhaga ang mga estudyante nga magdugang niini nga entry og bisan unsang mga hunahuna ug mga impresyon nga ilang nadawat samtang nagtuon sila sa Wali sa Bukid.