Head and shoulder image of Jesus Christ. Christ is depicted with one arm raised as He participates in the creation of the earth. Galaxies and stars are depicted in the background.
Pagkahuman sa pagtudlo bahin sa Mga Tawong Bulahan ug sa mas taas nga balaod, naghatag ang Manluluwas og sugo mahitungod sa hiyas sa Iyang Amahan sa Langit. Tinguha niini nga leksiyon nga tabangan kang makasabot sa sugo sa Manluluwas nga “kinahanglang magmahingpit … ingon nga hingpit ang [atong] Amahan nga atua sa langit” (Mateo 5:48).
Tinguhaa sa mainampoong paagi ang tabang sa Ginoo samtang magtudlo ka. Ang pagtudlo sa ebanghelyo buhat sa Ginoo, ug gusto Niya nga magmalamposon ka niana nga buluhaton. Kon mosampit ka Kaniya sa matag adlaw, imong mabati ug mailhan ang Iyang tabang (tan-awa sa Doktrina ug mga Pakigsaad 100:5–8).
Pag-andam sa estudyante: Sa pagpangamdam para niini nga leksiyon, dapita ang mga estudyante, kon posible, nga magdala sa klase og mga litrato sa ilang kaugalingon niadtong gagmay pa sila nga mga bata. Lagmit nga mas epektibo kon buhaton kini daan sa dili mominos sa usa ka semana uban sa tabang sa mga ginikanan.
Posible nga mga Kalihokan sa Pagkat-on
Unsa ang imong kausaban?
Ikonsiderar ang paggamit sa pipila sa mosunod o parehong mga pangutana aron tabangan ang mga estudyante sa pag-ila sa paagi sa ilang pagtubo ug kausaban sukad sa gagmay pa sila nga mga bata.
Pangita og litrato niadtong bata pa ka, o paghunahuna mahitungod sa kon unsa ka niadtong gamay pa ka.
Unsa ang paagi sa imong pagtubo o kausaban sa pisikal o espirituhanong aspeto sukad niadto?
Sa imong hunahuna ngano man nga ang kausaban usa ka natural ug importanteng bahin sa plano sa atong Langitnong Amahan?
Unsa ang paagi sa imong pagtubo sa miaging pipila ka tuig aron mahimong mas mahisama sa Langitnong Amahan ug ni Jesukristo? Kon gibati nimo nga dili pa igo ang imong espirituhanong pagtubo, unsa ang nakapugong kanimo, ug unsa ang imong mabuhat aron usbon kini nga pamaagi?
Basaha ang Mateo 5:48 , ug pangitaa kon giunsa pagtapos sa Manluluwas ang Iyang mga pagtulon-an gikan sa kapitulo 5 . Hinumdomi nga ang Griyego nga pulong para sa hingpit sama sa gigamit niini nga bersikulo mahimo sab nga hubaron nga “kumpleto, nahuman na, [o] hingpit nga milambo” “[Giya ngadto sa mga Kasulatan, Hingpit]” .
Gikan sa mga pagtulon-an sa Manluluwas sa Mateo 5:48 nakat-onan nato nga gimandoan kita ni Jesukristo nga magmahimong hingpit sama sa Langitnong Amahan.
Unsa sa mga pagtulon-an sa Manluluwas gikan sa Mateo 5 nga mibati ka og kadasig nga angayng lihokon karon aron mahimong mas mahisama sa Langitnong Amahan? Unsaon?
Lagmit nga makabenepisyo ang mga estudyante gikan sa pagtagana og pipila ka minuto aron rebyohon ang mga pagtulon-an gikan sa Mateo 5 , lakip na ang bisan unsang mga sulat nga lagmit nga ilang gibuhat sa ilang mga kasulatan o mga journal sa pagtuon.
Unsa ang imong gibati mahitungod sa sugo sa Manluluwas nga magmahingpit?
Sa unsang paagi nga ang sayop nga pagsabot niini nga sugo adunay negatibong epekto sa atong relasyon sa Langitnong Amahan ug ni Jesukristo?
Pagsabot kon unsay kahulogan sa pagkahimong “hingpit”
Ikonsiderar ang pagbutang sa mga estudyante diha sa gagmay nga mga grupo aron tun-an ang mga mosunod nga pamahayag ni Presidente Russell M. Nelson, Elder Jeffrey R. Holland, ug Elder Gerrit W. Gong. Mahimong mag-printa og pipila ka kopya niini nga mga pamahayag ug ibutang sa palibot sa kuwarto o ipakita sa laing paagi.
Basaha ang mosunod nga mga pamahayag ni Presidente Russell M. Nelson, Elder Jeffrey R. Holland sa Korum sa Napulog Duha ka Apostoles, ug Elder Gerrit W. Gong sa Korum sa Napulog Duha ka Apostoles, nga mangita og tabang o paghupay sa atong panaw aron mahimong hingpit sama sa Langitnong Amahan.
Imahe
Official portrait of President Russell M. Nelson taken January 2018
Sa Mateo 5:48 , ang pulong nga hingpit gihubad gikan sa Griyego nga teleios, nga nagpasabot nga “kompleto.” … Ang infinitive form sa verb mao ang teleiono, nga nagpasabot nga “sa pag-abot niana nga gilay-on, nga hingpit nga milambo, nga mahingpit, o sa paghuman.” Palihog hinumdomi nga ang pulong wala nagpasabot nga “gawasnon gikan sa pagkasayop”; kini nagpasabot sa “pagkab-ot og tumong sa umaabot.” …
… Dili kita angay nga madismaya kon ang tinuoray natong mga tinguha sa pagkahingpit karon ingon og [lisod] kaayo ug walay kahumanan. Ang pagkahingpit gilauman. Moabot kini sa hingpit human lamang sa Pagkabanhaw ug pinaagi lamang sa Ginoo. Kini nagpaabot sa tanan kinsa nahigugma kaniya ug nagsunod sa iyang mga sugo.
(Russell M. Nelson, “Perfection Pending,” Ensign, Nob. 1995, 86, 88)
Imahe
Official Portrait of Elder Jeffrey R. Holland. Photographed January 2018.
Mga kaigsoonan, ang matag usa kanato nagtinguha og mas Kristohanon nga kinabuhi kay sa kasagaran natong makab-ot sa pagpuyo. … Kon kita magpadayon, nan diha sa kahangturan ang paghashas kanato mahuman ug makumpleto—nga mao ang kahulugan sa kahingpitan diha sa Bag-ong Tugon.
Mopamatuod ko nianang maanindot nga padulngan, nga maanaa kanato pinaagi sa Pag-ula ni Ginoong Jesukristo, kinsa Mismo nakaangkon og “grasya og dugang pa nga grasya” [ Doktrina ug mga Pakigsaad 93:13 ] hangtud nga diha sa Iyang pagka-imortal nadawat Niya ang perpekto nga kahingpitan sa celestial nga himaya.
Official Portrait of Gerrit W. Gong. Photographed in 2018.
Ang pulong kahingpitan … usahay masaypan sa pagsabut nga dili gayud makahimo og sayop. Tingali kamo o inyong kaila naningkamot pag-ayo nga mahingpit niini nga paagi. Tungod kay ang maong pagkahingpit ingon og dili makab-ot, bisan ang atong pinakamaayo nga paningkamot makapabalaka, makawala sa paglaum, o makaluya. Walay kalampusang naningkamot kita sa pagkontrolar sa atong mga kahimtang ug sa mga tawo nga naglibut nato. Nabalaka kita sa mga kahuyang ug mga sayop. Sa pagkatinuod, magkadako ang atong pagpaningkamot, magkalayo ang atong bation gikan sa pagkahingpit nga atong gitinguha. …
Ang sayop nga pagsabot kon unsa ang gipasabot nga mahimong hingpit moresulta sa pagkaperpeksyonista— usa ka kinaiya o pamatasan nga nagkinahanglan og dalayegon nga tinguha nga mahimong maayo ug nahimong usa ka dili angay nga pagdahom nga mahimong hingpit karon. Ang pagkaperpeksyonista usahay moabot gikan sa pagbati nga kadto lamang hingpit ang angay nga higugmaon o nga kita dili angayan nga magmalipayon gawas kon kita hingpit.
(Gerrit W. Gong, “Pagkahimong Hingpit diha kang Kristo,” Liahona, Hulyo 2014, 14–15, 17)
Hinumdomi nga ang tanan natong mga paningkamot sa pagsunod sa mga sugo ug paghinulsol dili gayod paigo kon kini dili tungod sa paglimpyo sa sala ug pagkabanhaw gikan sa kamatayon nga atong madawat gikan sa Manluluwas nga si Jesukristo pinaagi sa Iyang Pag-ula. (Tan-awa sa 2 Nephi 25:23 ; Alma 34:9–10 .)
Dapita ang mga estudyante sa pagpaambit sa klase sa unsay ilang gihisgotan diha sa ilang mga grupo.
Aron matabangan ang mga estudyante nga mas makasabot sa tahas sa Manluluwas sa pagtabang kanato nga mahimong hingpit, ikonsiderar ang pagbasa ug paghisgot sa Moroni 10:32 .
Posibleng mga pangutana nga pagahisgotan
Ikonsiderar ang pagpili og usa o labaw pa sa mosunod nga mga pangutana aron pahisgotan sa mga estudyante. O lagmit nga makatabang kon ipakita kini o ang parehong mga pangutana ug dapiton ang mga estudyante nga tubagan ang duha o labaw pa diha sa ilang mga journal sa pagtuon. Pagkahuman niini, mahimong maghisgot ang mga estudyante isip usa ka klase sa ilang gisulat.
Unsa ang gitudlo kanato sa mga pulong niini nga mga propeta mahitungod sa kahulugan sa “kinahanglang magmahingpit kamo”?
Unsa ang gitudlo kanato sa mga propeta nga dili kahulogan niini nga mga pulong?
Unsa man ang tahas sa Manluluwas sa pagtabang kanato nga mahimong hingpit?
Unsa ang imong nahibaloan mahitungod sa Langitnong Amahan ug ni Jesukristo nga nakahatag kanimo og paglaom nga usa ka adlaw lagmit nga mahimo kang hingpit sama Kanila?
Unsa nga mga paningkamot ang kasamtangan nimong gibuhat sa espirituhanon, pisikal, sosyal, o intelektuwal aron mahimong mas mahisama sa Langitnong Amahan ug ni Jesukristo?
Ikonsiderar ang pagpamatuod bahin sa Manluluwas, sa Iyang mga pagtulon-an sa Mateo 5 , ug sa Iyang tahas sa pagtabang kanato nga mahimong hingpit sama sa Langitnong Amahan.
Komentaryo ug Background nga Impormasyon
Unsaon nako nga mahimong hingpit?
Si Elder Scott D. Whiting sa Seventy mitudlo:
Imahe
Official Portrait of Elder Scott D Whiting. Photographed in March 2017.
Ang sugo nga mahimong sama Kaniya wala gitumong aron mobati kamo nga sad-an, dili takos, o wala higugmaa. Ang atong tibuok mortal nga kasinatian adunay kalabotan sa pag-uswag, pagpaninguha, pagkapakyas, ug paglampos. …
Maayo gayud ang inyong gibuhat, gihigugma kamo, apan wala kana nagpasabot nga kompleto na kamo. Adunay buhat nga gikinahanglang himoon niini nga kinabuhi ug sa sunod. Pinaagi lamang sa Iyang balaanong tabang nga kitang tanan mouswag ngadto sa pagkahimong sama Kaniya.
Niining mga panahon, diin “ang tanan nga mga butang [daw] nagkaguliyang; ug … ang kahadlok [morag] diha sa tanan nga mga katawhan,” [ Doktrina ug mga Pakigsaad 88:91 ], ang bugtong pangontra, ang bugtong tambal, mao ang maningkamot nga mahimong sama sa Manluluwas, ang Manunubos sa tanang katawhan, ang Kahayag sa Kalibotan, ug mangita Kaniya kinsa namahayag, “Ako ang dalan” [ Juan 14:6 ].
Nasayod ko nga ang pagkahimong sama Kaniya pinaagi sa Iyang balaanong tabang ug kalig-on mahimong makab-ot pinaagi sa usa ka lakang human sa laing lakang. Kay kon dili, wala unta Niya ihatag kanato kini nga sugo [tan-awa sa 1 Nephi 3:7 ].
(Scott D. Whiting, “Pagkahimong Sama Kaniya,” Liahona, Nob. 2020, 14)
Dugang nga mga Kalihokan sa Pagkat-on
Alternatibong paagi sa pagsugod niini nga leksiyon: Pagbuhat og butang nga morag imposible
Tabangi ang mga estudyante nga makita nga uban sa maayong panglantaw, mga panudlo, ug tabang, mabuhat ang butang nga morag imposible. Ikonsiderar ang pagpraktis atol sa pag-andam para sa leksiyon sa dili pa gamiton kini nga kalihokan sa klase.
Walk-through-paper trick: Hatagi ang mga estudyante og tibuok nga papel ug gunting. Mandoi sila nga maggunting og bangag sa papel nga igo ang kadak-on aron makaagi sila niini. Pagkahuman sa pagtugot kanila nga mosulay (ug napakyas), ihatag kanila ang mosunod nga mga panudlo ug usa ka bag-ong panid sa papel:
Lakang 1: Piloa ang papel sa katunga nga patindog.
Lakang 2: Samtang nag-atubang kanimo ang pinilo, pagbuhat og walo ka parehong espasyo nga paggunting padulong sa kilid sa papel, pero undang sa paggunting kon moabot na sa 1 cm (1/2 pulgada) gikan sa pikas tumoy aron dili nimo hingpit nga maputol ang papel.
Lakang 3: Baliha ang papel aron mahilayo kanimo ang pilo. Pagbuhat og pito ka paggunting taliwala sa mga paggunting nga imong unang gibuhat, nga moundang pag-usab kon moabot na sa 1 cm (1/2 pulgada) ang gilay-on gikan sa pilo aron dili nimo kini hingpit nga maputol.
Lakang 4: Balik sa gipilo nga tumoy. Ang walo ka paggunting nga imong gibuhat sa gipilo nga tumoy makahimo og siyam ka lungag [loop]. Guntinga ang pilo sa kada lungag [loop] pwera sa una ug ulahing kilid.
Lakang 5: Hinay-hinaya sa pagbukhad ang papel aron dili kini magisi. Kinahanglan nga maporma na kini og dakong lungag [loop] nga mapasigo kanimo.
Pagsabot sa pagkahingpit
Ang Manluluwas mitudlo sa mga Nephite mahitungod sa pagkahingpit
Ikompara kon unsa ang gitudlo sa Manluluwas sa wala pa ang Iyang Pagkabanhaw mahitungod sa pagkahimong hingpit (tan-awa sa Mateo 5:48) sa kon giunsa Niya kini pagtudlo pagkahuman sa Iyang Pagkabanhaw ngadto sa mga Nephite (tan-awa sa 3 Nephi 12:48). Dapita ang mga estudyante sa pagkonsiderar sa pag-link o pag-cross reference niini nga mga bersikulo diha sa ilang mga kasulatan. Kon gikinahanglan, tukia nga ang Manluluwas naglakip sa Iyang kaugalingon sa paghulagway sa pagkahingpit ngadto sa mga Nephite. Hisgoti kon unsa ang gitudlo niana kanato.
Kalihokan diha sa journal bahin sa Wali sa Bukid
Kon giawhag ang mga estudyante nga magsugod og entry sa journal sa pagtuon sa leksiyon nga “Mateo 5:1–12”, ikonsiderar ang pagdapit kanila nga idugang ang ilang mga hunahuna ug mga impresyon gikan sa leksiyon karong adlawa ngadto niana nga entry sa journal.