Kinsa ang maayong ehemplo kanimo sa matarong nga pagpakabuhi? Sa unsang paagi nga ang ilang ehemplo nakatabang kanimo nga mahiduol sa Dios? Pagkahuman sa pagtudlo bahin sa mga tawong bulahan, nga nakatabang kanato sa pagsabot sa kinaiya ug karakter sa Dios, gitudlo ni Jesukristo nga makapanalangin sa uban ang atong matarong nga mga ehemplo. Tinguha niini nga leksiyon nga matabangan ka sa paggamit niini nga kamatuoran ug masukod ang imong mga aksiyon ug hiyas aron mas mapakita ang kahayag ni Jesukristo.
Pag-andam sa estudyante: Dapita ang mga estudyante sa pagkonsiderar sa mosunod nga mga pangutana:
Kinsa sa imong kinabuhi ang ehemplo sa pagpakabuhi nga sama ni Kristo sa pulong ug buhat?
Unsa ang ilang gibuhat aron ipakita ang kahayag ug gugma sa Dios?
Sa unsa nga paagi nga nakaapekto kanimo ug sa uban ang ilang mga binuhatan?
Posible nga mga Kalihokan sa Pagkat-on
Asin sa katawhan
Ang Manluluwas kanunay nga migamit og mga pagkompara o mga sambingay aron itudlo ang mga yanong ideya nga adunay lawom nga mga kahulogan. Samtang magtuon ka niini nga leksiyon, hunahunaa kon sa unsang paagi makatabang kanimo ang mga butang nga gihisgotan ni Jesus nga masabtan unsay Iyang gitudlo.
Kon posible, pagdala sa klase og asin ug lain-laing mga pagkaon sama sa mga prutas, mga utanon, karne, o keso, nga gihiwa-hiwa og gagmay. (Kon dili posible, pangutana kon nakakaon na ba ang mga estudyante og pagkaon nga angay nga butangan og asin pero wala kini butangi og asin.) Dapita ang mga estudyante nga sulayan ang lain-laing mga pagkaon nga adunay asin o walay asin.
Basaha ang Mateo 5:13 nga mangita kon giunsa paghulagway ni Jesukristo ang Iyang mga disipulo.
Gawas sa paggamit niini aron mopalami sa timpla sa atong pagkaon, para sa unsa pa ang paggamit sa asin?
Pagdapit og estudyante nga basahon ang mosunod nga parapo gikan sa Dali, Sunod Kanako.
Ang asin dugay nang gigamit aron sa pagpreserba, pagtimpla, ug pagpalimpyo. Ang asin adunay relihiyoso usab nga kahulogan para sa mga Israelita. … Kon ang asin mawagtangan sa kaparat niini, dili na kini epektibo, o “wala nay kaposlanan” ( Mateo 5:13). Kini mahitabo kon kini masagolan o mahogawan sa laing mga elemento.
Unsa sa imong hunahuna ang gitudlo sa Manluluwas pinaagi sa pagkompara sa Iyang mga disipulo ngadto sa asin?
Unsa ang pipila ka partikular nga mga butang nga espirituhanong makahugaw kanato?
Pagtagana og panahon aron pamalandongan sa imong kasingkasing kon sa unsang paagi nga ikaw, isip asin sa katawhan, makatabang sa mga tawo sa imong palibot nga mahimong labing maayo kutob sa ilang mahimo. Ikonsiderar usab kon unsa nga mga tintasyon ang imong giatubang ug unsaon nimo sa pagpabiling putli ang imong kaugalingon. Kon nagtugot ka og bisan unsang mga hugaw nga mosulod sa imong kinabuhi, mahimo kining tangtangon pinaagi sa gasa sa paghinulsol nga anaa pinaagi kang Jesukristo.
Kahayag sa Kalibotan
Basaha ang Mateo 5:14–16, nga mangita kon unsa ang gilaoman ni Jesukristo kanato isip Iyang mga disipulo.
Unsa nga baroganan sa kamatuoran ang imong maila gikan sa Mateo 5:14–16 ?
Gikan sa Mateo 5:14–16 mahimo nga imo nang nailhan ang usa ka baroganan nga pareho niini: Ang atong matarong nga ehemplo makaawhag sa uban nga himayaon ang Langitnong Amahan.
Unsa sa imong hunahuna ang gipasabot sa paghimaya sa Langitnong Amahan?
Sa dihang ang nabanhaw nga Manluluwas anaa kauban sa mga Nephite, Siya mitudlo kanila og dugang pa mahitungod sa kahayag nga kinahanglang huptan sa Iyang mga disipulo. Ikonsiderar ang pag-cross reference o pag-link sa Mateo 5:14–16 ngadto sa 3 Nephi 18:24–25.
Basaha ang 3 Nephi 18:24–25, nga mangita sa kahayag nga kinahanglang huptan sa tinuod nga mga disipulo.
Sa unsang paagi nga ang mga pagtulon-an sa Manluluwas diha sa 3 Nephi 18:24–25 nakaimpluwensya sa imong pagsabot sa Mateo 5:14–16 ?
Pagpakita og samin sa mga estudyante. Kon adunay bidlisiw sa adlaw diha sa kwarto, ipaigo sa samin ang bidlisiw ug ipasanag kini diha sa kwarto. Kon walay bidlisiw, ipakita sa pipila ka mga estudyante ang ilang panagway diha sa samin ug pangutana kon unsa kaklaro ang ilang nakita niini. Dayon paggamit og dry erase marker aron koloran ang samin. Sulayi sa pagpasanag pag-usab ang bidlisiw diha sa kwarto o pangutan-a ang mga estudyante kon unsa kaklaro nilang makita ang ilang panagway diha sa samin karon nga gikoloran na ang samin.
Pangutan-a ang mga estudyante kon unsa ang ilang makat-onan mahitungod sa pagpaaninag sa kahayag ni Kristo gikan niini nga demonstrasyon.
Si Jesukristo mao ang tinuod nga Kahayag sa Kalibotan, ug samtang nagsunod kita Kaniya ug mahimong mas mahisama Kaniya, gipaaninag nato ang kahayag nga Iyang gihatag kanato. (Tan-awa sa Juan 1:4, 9 ; 8:12; Doktrina ug mga Pakigsaad 50:24; 93:2.)
Simbolismo nga gigamit sa Manluluwas
Ang mosunod nga mga pangutana makatabang kanimo nga mas lawom nga maghunahuna mahitungod sa simbolismo nga gigamit sa Manluluwas diha sa Mateo 5:14–16.
Ipahisgot sa mga estudyante ang lain-laing mga sambingay. Mahimo kining buhaton sa lain-laing mga paagi: isip usa ka klase, diha sa gagmay nga mga grupo, o diha sa indibidwal nga pagtuon.
Usa ka siyudad nga anaa sa bungtod:
Imahe
Siyudad nga anaa sa bungtod
Sa unsang paagi nga ang pagsunod kang Jesukristo lisod itago, sama sa siyudad nga anaa sa bungtod?
Sa karaan, gitukod ang mga siyudad sa ibabaw sa mga bungtod aron makahatag og proteksyon batok sa posibleng mga pag-atake. Sa unsang paagi nga ang dayag nga pagpakabuhi sa ebanghelyo makahatag og proteksyon batok sa dili maayong mga impluwensya?
Unsa ang gitudlo niini nga sambingay kanimo mahitungod kon unsa ang gilaoman sa Manluluwas kanimo, isip Iyang mga disipulo, sa pagpakabuhi?
Usa ka kandila:
Imahe
Nagsiga nga kandila.
Sa unsang paagi nga sama ka sa usa ka kandila diha sa ngitngit nga kwarto ug mopadan-ag sa kahayag sa Manluluwas ngadto sa tanan?
Unsa kaha ang hinungdan nga itago sa pipila ka tawo sa ilawom sa basket (gantangan) ang kahayag nga gihatag sa Dios kanila?
Unsa ang gitudlo niini nga sambingay kanimo mahitungod kon unsa ang gilaoman sa Manluluwas kanimo, isip iyang disipulo, sa pagpakabuhi?
Basaha ang mosunod nga pamahayag gikan ni Presidente Dieter F. Uchtdorf, kanhi sa Unang Kapangulohan, nga mangita unsay imong makat-onan mahitungod sa kahayag ni Jesukristo.
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Matag higayon nga ibalik ninyo ang inyong kasingkasing sa Dios sa mapaubsanong pag-ampo, masinati ninyo ang Iyang kahayag. Matag higayon nga tinguhaon ninyo ang Iyang pulong ug kabubut-on diha sa mga kasulatan, molambo ang kahayag ngadto sa kasanag. Matag higayon nga makabantay mo nga dunay nanginahanglan ug mosakripisyo sa inyong kaugalingong kaharohay aron makatabang uban sa gugma, modako ug mosanag ang kahayag. Matag higayon nga isalikway ninyo ang tentasyon ug pilion ang kaputli, matag higayon nga mangita o mohatag kamo og kapasayloan, maisogong mopamatuod sa kamatuoran, ang kahayag mopuli sa kangitngit ug modani usab sa uban nga nangita og kahayag ug kamatuoran.
(Dieter F. Uchtdorf, “Mga Tighupot sa Langitnong Kahayag,” Liahona, Nob. 2017, 80)
Sa imong hunahuna sa unsa nga paagi nga kini nga pamahayag may kalabotan sa Mateo 5:14–16 ?
Hinumdomi nga gitudloan kita ni Jesus nga mahimong “asin sa katawhan” ug “kahayag sa kalibotan” pagkahuman mismo sa pagtudlo Niya sa Kabulahanan—ang mga Kristohanong kinaiya nga makatabang kanato nga mahimong mas mahisama Kaniya (tan-awa sa Mateo 5:3–12).
Sa unsang paagi nga ang pagkahisama kang Kristo diha sa atong mga aksiyon ug pamatasan makatabang kanato sa pagdasig sa uban nga mopaduol sa Langitnong Amahan?
Unsa ang pipila ka butang nga mabuhat nimo aron mahimong usa ka matarong nga ehemplo sa Manluluwas ngadto sa ubang tawo?
Kon mipili ka og usa sa Kabulahanan sa miaging leksiyon nga gamiton sa imong kinabuhi, sa unsang paagi nga makatabang kanimo kana nga kinaiya nga mahimong asin sa katawhan o kahayag sa kalibotan?
Komentaryo ug Background nga Impormasyon
Sa unsang paagi nga makaapekto ang akong mga buhat isip asin sa katawhan?
Si Presidente James E. Faust (1920–2007) sa Unang Kapangulohan mitudlo:
Imahe
Kataposang opisyal nga litrato ni Presidente James E. Faust, Ikaduhang Magtatambag sa Unang Kapangulohan, 2001. Namatay niadtong 10 sa Agosto 2007.
Ang mga espirituhanon nga mga sustansya, nga nakapahimo kanato nga himsog sa espiritu, mahimo nga mawad-an sa gahom ug kalig-on niini kon dili kita magpuyo nga takos sa balaanon nga giya nga atong gikinahanglan. … Kinahanglan nga ipabilin nato ang atong mga hunahuna ug mga lawas nga limpyo gikan sa tanang mga matang sa pagkaadik ug pagkahugaw. Dili gayod kita mopili sa pagkaon nga napan-os o nahugawan nga pagkaon. Sa mao gihapon nga paagi sa pagpili, kinahanglan nga magbantay kita nga dili mobasa o motan-aw og bisan unsa nga dili maayo. Kadaghanan sa espirituhanon nga polusyon nga moabot sa atong mga kinabuhi moabot pinaagi sa Internet, mga dula sa kompyuter, mga salida sa telebisyon ug mga sine nga hilabihan nga makapaaghat o tataw kaayo nga naghulagway sa malaw-ay nga mga kinaiya sa mga tawo. Tungod kay nagpuyo kita sa sama nga palibot, kinahanglan nga dugangan nato ang atong espirituhanon nga kalig-on.
(James E. Faust, “Espirituhanon nga mga Sustansya,” Liahona, Nob. 2006, 55)
Unsaon nako sa pagpausbaw ang akong kahayag?
Si Presidente Henry B. Eyring mitudlo:
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Matag higayon nga kamo mopili sa pagsulay sa pagpakabuhi sama sa Manluluwas, inyong mapalig-on ang inyong pagpamatuod. Moabot ang panahon nga kamo makahibalo sa inyong kaugalingon nga Siya ang Kahayag sa Kalibotan. Kamo mobati nianang kahayag nga motubo sa inyong kinabuhi. Kini dili moabot nga walay pagpaningkamot. Apan kini moabot samtang ang inyong pagpamatuod motubo ug inyong gipili ang pag-alima niini. Ania ang siguradong saad gikan sa Doktrina ug mga Pakigsaad: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” [Doktrina ug mga Pakigsaad 50:24]. Kamo ang mahimong kahayag sa kalibotan samtang inyong ipaambit ang inyong pagpamatuod sa uban. Kamo ang mopaaninag ngadto sa uban nianang Kahayag ni Kristo sa inyong kinabuhi. Ang Ginoo mangita og pamaagi para nianang kahayag nga mohikap niadtong inyong gimahal.
(Henry B. Eyring, “Usa ka Buhing Pagpamatuod,” Liahona, Mayo 2011, 128 )
Si Presidente Thomas S. Monson mitudlo:
Imahe
Opisyal nga litrato ni Presidente Thomas S. Monson, 2008.
Matag usa kanato mianhi sa yuta nga gihatagan sa Kahayag ni Kristo. Sa atong pagsunod sa ehemplo sa Manluluwas ug magpuyo sama sa Iyang pagpuyo ug sa Iyang pagtudlo, kana nga kahayag mosanag diha sa atong kaugalingon ug modan-ag sa dalan alang sa uban.
(Thomas S. Monson, “Pagpakita og Ehemplo ug Kahayag,” Liahona, Nobyembre 2015, 86)
Dugang nga Kalihokan sa Pagkat-on
Ipadan-ag ang inyong kahayag
Pangutan-a ang mga estudyante kon unsaon nga sila mahimong kahayag ngadto sa uban.
