Doktrinal nga Kahanas: Pinadayag 20:12

“Ug ang mga Patay Gipanaghukman … Pinasikad sa Ilang mga Binuhatan”

Sa miaging leksiyon sa, “Pinadayag 20:11–15,” imong nakat-onan ang mahitungod sa Kataposang Paghukom ug sa tahas sa Manluluwas isip atong Maghuhukom. Kini nga leksiyon makatabang kanimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Pinadayag 20:12, pagpasabot sa doktrina, ug paggamit sa mga baroganan sa pag-angkon og espirituhanong kahibalo.

Pagpaminaw sa mga tubag sa mga estudyante. Likayi ang kalagmitan sa paghunahuna mahitungod sa sunod nga bahin sa plano sa leksiyon samtang ang mga estudyante nangutana o nagtubag sa mga pangutana. Paminaw og maayo sa unsay ilang ipaambit, ug pangutana og follow-up nga mga pangutana kon gikinahanglan aron tinud-anay nga masabtan ang ilang mga pangutana ug komento. Usahay mas importante ang paghisgot og usa ka hilisgotan nga makapainteres sa mga estudyante o sa pagtabang kanila nga mas makasabot sa usa ka doktrina kay sa paghisgot og hurot sa tanang materyal sa plano sa leksiyon.

Pagpangandam sa estudyante: Dapita ang mga estudyante sa pagrebyo sa Pinadayag 20:12 ug sa pagpangandam sa pagpaambit ngadto sa klase kon unsa ang ilang nakat-onan mahitungod sa Kataposang Paghukom ug sa unsang paagi kita makapangandam alang niini.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas nga itudlo human sa leksiyon sa “Pinadayag 20:11–15,” nga mao ang pangkonteksto nga leksiyon alang sa tudling sa doktrinal nga kahanas sa Pinadayag 20:12 . Kon gikinahanglan nga kining leksiyon sa tudling sa doktrinal nga kahanas ibalhin ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ikonsiderar ang paghangyo sa tulo ka mga estudyante sa dili pa ang klase nga ang matag-usa magrebyo sa usa sa mga baroganan sa pag-angkon og espirituhanong kahibalo ug sa pag-andam sa pagpakigbahin og summary niana nga baroganan unya sa leksiyon.

Imemorya ug ipasabot

Tabangi ang mga estudyante nga masag-ulo ug mapasabot ang pakisayran sa kasulatan ug ang mahinungdanong hugpong sa mga pulong sa kasulatan alang sa Pinadayag 20:12 gamit ang labing epektibong mga paagi alang kanila.

Ikonsiderar ang pagpahinumdom sa mga estudyante nga sa miaging leksiyon, natun-an nila ang tudling sa doktrinal nga kahanas mahitungod sa Kataposang Paghukom. Dapita sila sa pagtan-aw kon makit-an ba nila kini nga tudling diha sa mga kasulatan nga wala pay duha ka minuto, pinaagi sa panumdoman o pinaagi sa paggamit sa ubang mga kapanguhaan.

Ang mosunod nga kalihokan makatabang kanimo sa pagsag-ulo sa pakisayran sa kasulatan ug sa mahinungdanong hugpong sa mga pulong sa kasulatan “ug ang mga patay gipanaghukman … pinasikad sa ilang mga binuhatan” ( Pinadayag 20:12):

• Isulti ang pakisayran sa kasulatan ug ang mahinungdanon nga hugpong sa pulong sa kasulatan sa makusog lima ka higayon.

• Dayon isulat ang pakisayran sa kasulatan ug ang mahinungdanon nga hugpong sa mga pulong sa kasulatan sa usa ka piraso nga papel tulo ka higayon gikan sa memorya. Human sa matag pagsulay, susiha ang imong katukma ug paghimog bisan unsang gikinahanglang mga kausaban sa sunod nga pagsulay.

Ikonsiderar ang pagpangutana kon ang usa ka sakop sa klase makasulti ba sa pakisayran sa kasulatan ug sa mahinungdanong hugpong sa mga pulong sa kasulatan gikan sa panumdoman, o dapita ang klase sa pag-recite niini nga dungan.

Imbis nga gamiton ang mosunod nga kalihokan, ikonsiderar ang pagsulat sa pakisayran sa kasulatan ug mahinungdanong hugpong sa mga pulong sa kasulatan diha sa pisara ug pagdapit og mga boluntaryo sa pagsulat sa palibot niini sa mga kamatuoran nga ilang nakat-onan mahitungod sa Kataposang Paghukom. Dayon dapita ang pipila ka mga estudyante sa pagpasabot ngadto sa klase kon unsa ang ilang gisulat.

Hinumdomi nga sa miaging leksiyon, imong nakat-onan ang kamatuoran nga: hukman kita sa Dios gikan sa mga basahon nga nasulat sumala sa atong mga binuhatan. Aron matabangan ka sa pagtimbang-timbang kon unsa ka maayo ang imong pagsabot niini nga kamatuoran, hunahunaa nga usa ka manghod mangutana kanimo sa mosunod nga mga pangutana atol sa pamilya nga pagtuon sa kasulatan. Tubaga ang daghang mga pangutana kutob sa imong mahimo.

Kon ang mga estudyante hangyoon sa pagtubag sa mosunod nga mga pangutana, ipakita ang mga pangutana alang kanila, ug ikonsiderar ang pagdapit kanila sa paghisgot sa ilang mga tubag uban sa usa ka pares. Libot sa palibot sa kwarto ug paminawa ang ilang mga tubag. Kon ang mga estudyante nagkinahanglan og tabang, pahinumdomi sila sa materyal nga ilang natun-an sa leksiyon nga “Pinadayag 20:11–15.”

• Kinsa ang pagahukman?

• Kinsa ang atong mahimong maghuhukom ug ngano?

• Unsa man ang hukman kanato?

• Unsa nga mga libro nga kita pagahukman? (Tan-awa sa Pinadayag 20:12 .)

• Unsaon nato aron maka-andam para sa paghukom?

Karon nga pipila na ka minuto ang milabay sukad ikaw nagtrabaho sa pagsag-ulo sa mahinungdanong hugpong sa mga pulong sa kasulatan sa Pinadayag 20:12 , tan-awa kon mahimo pa ba nimo kining i-recite gikan sa memorya. Susiha ang imong pagkatukma kon gikinahanglan.

Bansaya ang paggamit

Kon tulo ka estudyante gihangyo sa wala pa ang klase sa pag-andam sa matag usa og summary sa usa ka baroganan sa pag-angkon og espirituhanong kahibalo, dapita sila sa pagpakigbahin sa ilang mga summary ngadto sa klase niining higayona. Kon ang mga estudyante wala gihangyo daan, ikonsiderar ang paghangyo og tulo ka mga boluntaryo nga ang matag usa mo-summarize sa usa sa mga baroganan. Seguroha ang pagdayeg ug pagbalido sa matag estudyante nga nag-summarize sa usa sa mga baroganan.

Ang paggamit sa mga baroganan sa pag-angkon og espirituhanong kahibalo makatabang kanato sa tinuod nga mga sitwasyon sa kinabuhi. Isuma sa daklit ang mga baroganan sa pag-angkon og espirituhanong kahibalo sa imong kaugalingong mga pulong. Dayon rebyoha ang mga parapo 5–12 sa “Pag-angkon og Espirituhanong Kahibalo” nga bahin sa Mahinungdanon nga Dokumento sa Doktrinal nga Kahanas (2022), nga mangita og bisan unsang dugang nga mga kamatuoran nga mahimo nimong iapil sa imong gisuma.

Alang sa mosunod nga kalihokan, ikonsiderar ang pagdapit sa mga estudyante sa pagpakigbahin sa ilang kaugalingong mga sitwasyon diin ang usa ka tawo kinahanglang mas makasabot sa mga kamatuoran mahitungod sa Kataposang Paghukom. Dayon ikonsiderar ang pag-ilis sa bisan hain o sa duha ka mga sitwasyon diha sa leksiyon og usa (mga) nga gipaambit sa mga estudyante.

Basaha ang mosunod nga mga senaryo, ug pagpili og usa nga ganahan nimong i-pokus alang sa sunod nga kalihokan. Hunahunaa kon ngano kaha nga ang usa ka tawo sa kana nga kahimtang mobati og sama sa ilang gibati. Maka-relate ka ba sa gibati sa bisan hain niining batan-ong mga babaye? Pamalandongi kon unsa kaha ang wala pa nila masabti mahitungod sa Kataposang Paghukom nga makatabang kanila.

1. Si Stephanie adunay pipila ka mga higala kinsa nagpuyo sa usa ka kalibotanon nga estilo sa kinabuhi. Siya miangkon nga bisan tuod sila naglapas sa mga sugo, ang ilang gibuhat daw makalingaw usahay. Wala siya makamatikod sa dagkong negatibo nga mga sangpotanan sa ilang mga pagpili ug naghunahuna nga moapil kanila.

2. Si Kayla usa ka matarong nga batan-ong babaye kinsa mapainubsanong maghinulsol kon siya makahimo og mga sayop, apan siya mobati gihapon og kahadlok kon ang mga tawo maghisgot mahitungod sa Kataposang Paghukom. Naningkamot siya nga dili maghunahuna bahin niini.

Mahimong kompletohon sa mga estudyante ang mosunod nga kalihokan nga magtinagsa o kauban sa usa ka pares.

Pagsulat og sulat ngadto kang Stephanie o Kayla nga sa imong pagtuo makatabang niya nga malikayan ang umaabot nga pagmahay o wala kinahanglana nga kahadlok. Isip alternatibo, mahimo kang mopili sa pagsulat ngadto sa usa ka tawo nga imong nailhan kansang kinabuhi mahimong mapanalanginan pinaagi sa mas maayong pagsabot sa Kataposang Paghukom. Ilakip sa imong sulat kon sa unsang paagi ang matag usa sa mga baroganan sa pag-angkon og espirituhanong kahibalo magamit sa ilang sitwasyon. Mahimo nimong hunahunaon ang mosunod samtang magdesisyon ka unsay isulat.

• Unsaon nimo pagtabang kang Stephanie o Kayla nga makakita sa mga butang gikan sa mahangtorong panglantaw? Sa unsang paagi kini makatabang kaniya?

• Unsa ang imong nakat-onan mahitungod sa Langitnong Amahan, ni Jesukristo, ug sa plano sa kaluwasan nga mahimong makatabang ni Stephanie o Kayla? Giunsa nimo pagkat-on niining mga kamatuoran?

• Unsa nga balaanong gitudlo nga mga tinubdan ang imong isugyot nga iyang dangpan aron makat-on sa kamatuoran mahitungod sa Kataposang Paghukom? Sa unsang paagi nga ang mga kamatuoran nga gitudlo sa Pinadayag 20:12 makatabang kaniya?

• Sa unsang paagi kaha nimo siya madasig nga molihok uban sa hugot nga pagtuo karon ug sa umaabot?

Hatagi ang mga estudyante og kahigayonan sa pagpaambit sa makusog kauban sa klase o diha sa gagmay nga grupo kon unsa ang ilang nasulat ngadto sa batan-ong babaye sa senaryo nga ilang gipili. Paminaw og maayo samtang sila mopakigbahin, ug ikonsiderar ang pagpangutana og follow-up nga mga pangutana sama sa mosunod aron sa pagtabang sa pagpalawom sa ilang panabot: “Aduna bay piho nga mga bersikulo sa kasulatan o mga pamahayag sa mga lider sa Simbahan nga makatabang niya? Sa unsang paagi kini makatabang?” “Unsa ang nakatabang kanimo nga makasabot ug makaandam alang sa Kataposang Paghukom? Imo bang irekomendar kang Stephanie o Kayla ang pagbuhat og susama? Ngano o nganong dili man?”

Kon makatabang sa mga estudyante nga mas mahinumdom sa mahinungdanong hugpong sa mga pulong sa kasulatan alang sa Pinadayag 20:12 , dapita sila sa pagsulay sa pag-recite niini sa makausa pa gikan sa memorya sa dili pa sila mobiya sa klase.

Rebyo sa doktrinal nga kahanas

Sa sinugdanan o kataposang bahin sa umaabot nga leksiyon, paggahin og dili mosobra sa tulo hangtod sa lima ka minuto sa pagrebyo sa tudling sa doktrinal nga kahanas Pinadayag 20:12 . Usa ka paagi sa pagbuhat niini mao ang pagpakita sa pakisayran sa kasulatan ug sa mahinungdanon nga hugpong sa mga pulong sa kasulatan, pag-ilis sa duha o tulo ka mga pulong og mga blangko. Human matubag sa mga estudyante sa husto ang mga blangko, ipakita pag-usab ang pakisayran ug ang mahinungdanong hugpong sa pulong nga adunay lahi nga mga blangko. Mahimo kining balikon sa makadaghang higayon nga adunay lain-laing mga blangko matag higayon.