Sukda ang Imong Nakat-onan 12

Pinadayag 1–22

Kini nga leksiyon gituyo sa pagtabang kanimo nga makatimbang-timbang sa mga tumong nga imong gitakda ug sa personal nga paglambo nga imong nasinati atol sa imong pagtuon sa Bag-ong Tugon.

Pagtabang sa mga estudyante sa pagsukod sa ilang nakat-onan. Hatagi ang mga estudyante og mga kahigayonan sa pagsukod sa ilang nakat-onan. Usa sa paagi mao ang pagdapit kanila sa pagpaambit sa unsang paagi sila mitubo o milambo isip resulta sa ilang mga pagtuon ug hugot nga pagtuo.

Pagpangandam sa estudyante: Samtang nagkompleto ang mga estudyante sa ilang pagtuon sa Bag-ong Tugon, dapita sila sa paghimo og lista sa tulo ngadto sa lima ka labing epektibo nga mga tudling sa kasulatan nga ilang gitun-an karong tuiga.

Posible nga mga Kalihokan sa Pagkat-on

Kini nga leksiyon gituyo aron matabangan ang mga estudyante sa pagsukod sa ilang abilidad sa pagpasabot sa mga pagtulun-an diha sa Bag-ong Tugon, mga tumong nga ilang gitakda, o giunsa pagkabag-o sa ilang mga kinaiya, mga tinguha, ug abilidad sa pagpuyo sa ebanghelyo. Kon lain-laing mga kamatuoran ang gipasiugda sa klase, ang mosunod nga mga kalihokan mahimong ipahiangay aron malakip ang kadto nga mga pagtulun-an.

Mahimong sugdan ang klase og usa ka personal nga pagpamatuod sa kalamboan ug kalipay nga nasinati pinaagi sa pagtuon ug pagtudlo sa Bag-ong Tugon.

Imong personal nga pag-uswag

Niini nga leksiyon aduna kay kahigayonan sa pagsusi sa imong nakat-onan ug giunsa nimo paggamit ang mga baroganan nga gitudlo diha sa Pinadayag 1–22. Imo usab nga rebyohon ug sukdon ang imong kalamboan sulod sa milabay nga pipila ka bulan diha sa imong pagtuon sa Mga Buhat–Pinadayag. Ang mosunod nga mga kalihokan sa pagkat-on mahimong makatabang kanimo nga makakita kon sa unsang paagi nga ang imong gugma alang sa Langitnong Amahan ug kang Jesukristo mitubo ug giunsa nimo pagkahimong mas sama Kanila.

Ang basahon sa Pinadayag

Mahimong magrebyo ang mga estudyante pinaagi sa pagpaambit ngadto sa usa ka pares o sa pagsulat ngadto sa pisara og usa ka kamatuoran nga ilang nakita nga makahuluganon. Ang mga estudyante mahimo usab nga motuyok palibot sa kwarto aron mopaambit ngadto sa lain-laing mga klasmeyt.

Paggahin og pipila ka minuto aron sa pagrebyo sa bisan unsang mga kasulatan nga imong gimarkahan, mga sulat sa imong kasulatan, o mga entry sa journal nga imong nahimo isip kabahin sa imong pagtuon sa basahon sa Pinadayag.

• Unsa ang pipila ka mga butang nga imong mahinumdoman nga pagkat-on o pamati diha sa imong pagtuon sa basahon sa Pinadayag?

• Unsa ang imong nakat-onan mahitungod sa imong Manluluwas nga si Jesukristo gikan sa basahon sa Pinadayag?

• Unsa ang pipila sa mga kamatuoran nga nakapabati nimo og kadasig nga buhaton isip kabahin sa imong mga pagtuon?

Mahimong Print o ipakita ang mosunod nga mga kalihokan ug tugotan ang mga estudyante sa pagpili hain ang usa nga ilang gusto nga buhaton nga magtinagsa o kauban sa usa ka pares.

Ang ubang mga estudyante mahimong maglisod sa pagtimbang-timbang o sa pagpakigbahin sa personal nga mga pagbati mahitungod sa pagsimba ug pagpamatuod. Hatagi ang mga estudyante og mga kahigayonan sa pagkaandam mopaambit, apan seguroha ang pagtahod sa ilang kabubut-on.

Kon mahuman na ang mga estudyante, pagdapit og mga boluntaryo sa pagpaambit sa pipila sa ilang mga hunahuna ug mga pagbati samtang ilang gitubag ang mga pangutana. Seguroha ang pagdasig sa mga estudyante sa pagpadayon sa pagpaningkamot sa pagpalawom sa ilang personal nga pagsimba ug sa paglig-on sa ilang mga pagpamatuod ni Jesukristo. Ikonsiderar ang paghatag og personal nga pagsaksi kon nganong ang indibidwal nga pagsimba ug pagpamatuod importante sa atong espirituhanong kalamboan.

Kalihokan A: Pagsimba ug pagsunod sa Dios sa kinasingkasing

Sa Pinadayag 4 – 5 , tingali natun-an nimo ang kabahin sa panan-awon ni Juan diin iyang nakita ang trono sa Dios uban sa lain-laing mga binuhat ug mahulagwayong mga mananap nga nagsimba sa Langitnong Amahan ug ni Jesukristo. Mahimong gidapit ka sa pagpamalandong kon giunsa nimo paghatag og pagdayeg ang Langitnong Amahan ug si Jesukristo ug sa pagkonsiderar og mga paagi nga mapalambo nimo ang imong personal nga pagsimba.

• Unsa ang bag-ohay lang nimong nakat-onan o nabati mahitungod sa Langitnong Amahan o ni Jesukristo nga nakapadasig kanimo sa pagtinguha sa pagsimba Kanila?

• Unsa nga mga paningkamot ang imong gihimo sa pagpalambo sa imong pagsimba? Pananglitan, tingali nagtinguha ka sa pagpalawom sa imong pagsimba pinaagi sa pag-ampo, pagtuon sa kasulatan, pag-ambit sa sakramento, pagtahod sa adlaw nga Igpapahulay, pagpuasa, pagtambong sa templo, o uban pang paagi.

• Sa unsa nga paagi kini nga mga paningkamot nakaapekto kanimo ug sa imong relasyon ngadto sa Langitnong Amahan ug ni Jesukristo?

Kalihokan B: Sukli ug buntoga ang kadaotan uban ang hugot nga pagtuo kang Kristo

Ang mosunod nga kalihokan mahimong ipahiangay aron masukod ang kalamboan sa pagbuntog sa kalibotan, nga gitudlo diha sa leksiyon sa “Pinadayag 2–3, Bahin 2.”

Sa Pinadayag 12 – 13 , tingali imong nakat-onan nga sa kinabuhi sa wala pa dinhi sa yuta kitang tanan migamit sa atong hugot nga pagtuo kang Jesukristo sa pagbuntog ni Satanas. Mahimong gidapit ka sa pagpamalandong sa imong pagtuo niini nga mga pagtulun-an ug sa paghunahuna kon unsay imong mahimo sa pagpadayon sa pagbutang sa imong pagsalig kang Jesukristo samtang kita makig-away sa kaaway dinhi sa mortalidad.

• Unsa nga mga aksiyon ang imong gibati nga kinahanglan nimong buhaton pagkahuman sa imong pagtuon?

• Unsa nga mga babag o mga hagit ang imong nasugatan sa pagbuhat niadto nga mga aksiyon? Unsa nga mga kalamposan ang imong nadawat?

• Sa unsang paagi nakatabang kanimo ang pagbuhat niining mga lakang nga mas mapaduol ngadto kang Jesukristo o makadawat og paglig-on gikan Kaniya aron mabuntog si Satanas?

Ang Bag-ongTugon: Mga Buhat–Pinadayag

Kon ang pagpangandam sa estudyante gigamit, ikonsiderar ang pagdapit og pipila ka mga estudyante sa pagpakigbahin sa mga tudling sa kasulatan nga ilang gipili ug sa pagpasabot nganong ila kining gipili. Isulat sa pisara ang mga pakisayran sa kasulatan nga ilang gipakigbahin aron ang uban makagamit niini sa mosunod nga kalihokan.

Ang mosunod nga hulagway ug mga parapo mahimong makatabang sa pagpasiuna sa pagsulat sa epistola nga kalihokan.

Tingale imong mahinumdoman nga human makadungog sa pagpamatuod ni Pablo mahitungod ni Jesukristo, si Hari Agrippa miingon, “Nagahunahuna ka diay nga dali mo ra akong mahimong Kristohanon.” Si Pablo maisogong mitubag, “Akong pangamuyo sa Dios mao dili lamang ikaw ra kon dili usab ang tanang nakadungog kanako karong adlawa mahimo untang [Kristiyano] ingon kanako” ( Mga Buhat 26:28–29).

Si Pablo ug ang ubang Apostoles adunay lawom nga tinguha sa pagdala sa uban ngadto kang Kristo pinaagi sa ilang mga pagtulun-an ug mga pagpamatuod. Daghan kanila ang mihatag sa ilang kinabuhi ug namatay isip mga martir alang sa kawsa ni Kristo, gibiyaan ang ilang mga pagtulon-an diha sa basahon sa Mga Buhat ug sa mga Epistola. Hinaot nga imong gidapit kadtong mga pagpamatuod sa imong kasingkasing ug gigamit ang ilang mga pagtulun-an sa imong kaugalingong kinabuhi. Karon imoha na nga higayon sa pagtudlo ug pagpamatuod.

Pagsulat og imong kaugalingong epistola nga gitumong ngadto ni bisan kinsa nga imong pilion. Pananglitan, mahimo nimong isulat kini alang sa imong kaugalingon usa ka tuig ang milabay sa wala pa magtuon sa Bag-ong Tugon, sa usa ka higala nga wala makasabot nganong nagtambong ka sa seminary, o sa usa ka sakop sa pamilya nga makabenepisyo sa imong pagpamatuod sa Manluluwas.

Bisan kon kinsay imong pilion nga pakatumngan sa imong epistola, ilakip ang usa o daghang mga bersikulo gikan sa Mga Buhat–Pinadayag, uban sa unsang paagi nga ang mga kamatuoran gikan niini nga mga bersikulo nakapanalangin sa imong kinabuhi. Ang mosunod nga mga pangutana mahimong makatabang paggiya kanimo, apan mahimo kang mopili sa imong kaugalingon mahitungod sa unsa ang imong isulat.

• Sa unsang paagi nga ang imong natun-an nakatabang kanimo sa pagduol kang Kristo ug pagkaplag og kalinaw diha Kaniya?

• Sa unsang paagi nga ang imong natun-an nakatabang kanimo sa pagbatok o pagbuntog sa kadautan uban sa hugot nga pagtuo kang Jesukristo?

• Sa unsa nga paagi nga ang imong natun-an nakatabang kanimo sa pagtubag og pangutana o pagsulbad og kabalaka o problema?

• Unsa pa ang gusto nimong mahibaloan sa usa ka tawo aron madasig sila sa pagtuon sa Bag-ong Tugon ug moduol kang Kristo?

Kon ang mga estudyante mahuman na og sulat, pagdapit og mga boluntaryo aron mobasa sa ilang epistola ngadto sa klase. Hatagig pagtagad giunsa nila pagpadayag ang ilang pagkamapasalamaton ug pagpamatuod diha sa ilang mga epistola. Pasalamati ang mga estudyante alang sa unsa ang ilang nasulat ug napaambit. Dapita sila sa pagkonsiderar sa pagpaambit sa ilang epistola ngadto sa usa ka tawo gawas sa klase ug sa pagpadayon sa pagtuon sa mga pulong sa mga propeta sa tibuok nilang mga kinabuhi.

Pagpamatuod kabahin sa Manluluwas, sa Iyang pulong sa mga kasulatan, ug sa Iyang buhat pinaagi sa Iyang pinili nga mga sulugoon.