Pinadayag 15–19
“Pagadag-on ... sa Kordero”
Unsa man ang mosulod sa imong hunahuna kon maghunahuna ka sa gitagna nga ulahing mga adlaw? Si Juan nga Tigpadayag mihulagway sa tin-aw nga panghitabo sa kalaglagan ug kadautan nga mopuno sa kalibotan. Apan kini nga mga kahimtang dili molungtad. Si Jesukristo “[makadaug] … kay siya mao ang Ginoo sa mga [ginoo], ug Hari sa mga [hari]” (Pinadayag 17:14). Kini nga leksiyon makatabang nimo nga mosalig kang Jesukristo nga mas masaligon samtang imong atubangon ang mga hagit sa kataposang mga adlaw.
Mag-focus sa Langitnong Amahan ug ni Jesukristo. Walay mas makapanalangin sa mga estudyante kay sa pagkaila ug paghigugma sa Langitnong Amahan ug ni Jesukristo. Samtang nangandam ug nagtudlo og mga leksiyon, padayon sa pagtinguha og inspirasyon sa mga paagi sa pagtabang kanila sa pagbuhat niini.
Pagpangandam sa estudyante: Dapita ang mga estudyante sa pagpamalandong kon unsay ilang nahibaloan mahitungod sa mga pagsulay sa kataposang mga adlaw ug mga rason nga makasalig sila ni Jesukristo.
Posible nga mga Kalihokan sa Pagkat-on
Mga hampak, mga pagsulay, ug hugot nga pagtuo sa Ginoo
Isip kabahin sa panan-awon ni Juan, gipakita sa Ginoo kang Juan ang pito ka anghel nga nagbubo sa lainlaing mga hampak ngadto sa mga dautan sa kataposang mga adlaw. Kini nga mga hampak naglakip sa mga kabahong, tubig nga nahimong dugo, hilabihang kainit, kangitngit, kasakit, dalugdog ug kilat, linog, ug dagkong panibug-ok sa ulan [hail] (tan-awa sa Pinadayag 16).
Pamalandongi ang mosunod nga mga pangutana:
-
Unsa pa ang imong nahibaloan mahitungod sa mga pagsulay ug pagkadautan sa kataposang mga adlaw? Unsay gibati nimo mahitungod niining mga pagsulay?
-
Unsa kamasaligon ang imong gibati nga ang Ginoo makatabang kanimo nga malatas ang bisan unsang mga pagsulay nga mahimo nimong maatubang? Ngano man?
Sa wala pa misulat si Juan mahitungod sa kalaglagan ug mga pagsulay nga mohampak sa mga tawo sa yuta sa kataposang mga adlaw, naghulagway siya og lain pa. Basaha ang Pinadayag 15:2–4 ug sulayi paghanduraw unsa ang nakita ni Juan.
Mahimong makatabang kini sa mga estudyante nga itandi ang gitudlo ni Juan mahitungod sa “dagat nga bildo” sa bersikulo 2 sa unsa ang gitudlo ni Joseph Smith mahitungod niini sa Doktrina ug mga Pakigsaad 130:6–7 .
-
Ngano kaha nga makatabang ang pagkat-on mahitungod sa gibayaw nga mga Santos nga nagpuyo sa presensiya sa Dios sa dili pa mobasa mahitungod sa mga hampak nga gihulagway ni Juan?
Samtang magpadayon ka sa imong pagtuon, tinguhaa ang giya sa Espiritu Santo aron matabangan ka nga makahibalo ug makasabot nga makadangop ka sa Ginoo alang sa tabang atol sa mga hagit sa kataposang mga adlaw. Aron matabangan ka nga mas makasabot unsa ang gitudlo sa matag kapitulo nga imong tun-an, ikonsiderar ang pagbasa sa mga ulohan nga kapitulo sa dili pa basahon ang mga bersikulo.
Ikonsiderar ang pagkopya ug pag-apud-apod ngadto sa mga estudyante sa mosunod nga mga handout. Wala gilaoman nga kompletohon sa mga estudyante ang tanang gisugyot nga mga kalihokan. Ang mga estudyante mahimong hatagan og mga kalihokan nga kompletohon o mahimo silang mopili sa mga kalihokan nga labing makapainteres kanila. Ang mga estudyante mahimong mobuhat nga magtinagsa o diha sa gagmay nga mga grupo, sumala sa ilang mga panginahanglan sa pagkat-on.
Samtang nagtuon ang mga estudyante, ikonsiderar ang paglibot sa palibot sa kwarto [room] aron makatabang sa mga estudyante nga adunay lisod nga mga bersikulo o mga pangutana. Hinumdomi nga wala kita mahibalo sa tanang interpretasyon sa nakita ni Juan. Samtang naglibot sa kwarto [room], pagtuon uban sa mga estudyante ug ikonsiderar ang pagpangutana sama sa mosunod: “Bisan og dili nato masabtan ang tanang detalye, unsa sa inyong hunahuna ang kinatibuk-ang ideya o baroganan nga gisulayan pagpasabot ni Juan niini nga mga bersikulo?” “Unsa pa ang inyong nakat-onan sa basahon sa Pinadayag nga makatabang niini nga pangutana?” Ikonsiderar ang pagpangita og dugang nga impormasyon diha sa mga kapitulo 55 ug 56 sa New Testament Student Manual [2014].
Opsiyon A: Mga anghel ug mga hampak
Ang paghunahuna mahitungod sa mga hampak nga nakita ni Juan diha sa Pinadayag 16 mahimong makapabalaka kanato. Bisan pa niana, ang pagpalambo sa atong hugot nga pagtuo diha ni Jesukristo makatabang kanato nga mabuntog ang atong mga kabalaka. Importante kining timan-an nga sa dihang ang mga anghel mibubo sa ilang mga hampak, sila mipamatuod sa kinaiya sa Ginoo. Ang pagkasayod sa Iyang kinaiya makatabang kanato nga mapalambo ang atong hugot nga pagtuo diha Kaniya.
Basaha ang Pinadayag 16:5, 7 , nga mangita kon giunsa sa mga anghel paghulagway ang Ginoo ug ang Iyang mga paghukom. Isulat sa mosunod nga speech bubble kon unsa ang imong gibati nga gisulti sa mga anghel.
-
Ngano kahang makatabang man kanato ang pagsabot sa kinaiya sa Ginoo diha sa atong pagkat-on mahitungod sa Iyang paghukom?
-
Kanus-a man sa imong kinabuhi nakatabang kanimo ang pagsabot unsa ang Dios? Sa unsang paagi nga ang paghinumdom sa kinaiya ni Jesukristo makatabang kanimo nga mosalig Kaniya?
Opsiyon B: Pagkadautan ug ang gahom sa Manluluwas
Paghunahuna og pipila ka mga pananglitan sa pagkadautan diha sa kalibotan ug sa unsang paagi kini nakaapekto kanato.
-
Kon ikaw maghunahuna og usa ka butang nga magrepresentar sa pagkadautan sa kalibotan, unsa kaha kini? Ngano man?
-
Kon ikaw maghunahuna og usa ka sagradong simbolo o titulo aron magrepresentar sa Manluluwas ug sa unsang paagi Siya makatabang kanato sa pagbuntog niini nga pagkadautan, unsa kaha kini? Ngano man?
Bahina ang usa ka panid sa imong journal ngadto sa tunga. Basaha ang Pinadayag 17:3–7, 14 , nga naghanduraw sa mga simbolo nga gigamit ni Juan niini nga mga bersikulo. Sa usa ka bahin sa nabahin nga panid sa imong journal isulat ang mahinungdanong mga pulong o hugpong sa mga pulong nga gigamit sa paghulagway sa kadautan. Sa pikas bahin, isulat ang mga simbolo nga nagrepresentar ni Jesukristo ug sa mga matarong. Ang mosunod nga makatabang nga mga pulong mahimong mapuslanon:
Hugaw nga Pakighilawas ( Pinadayag 17:4): imoral nga sekswal nga mga binuhatan. Kini mahimo usab nga “usa ka simbolo sa pagbiya sa hingpit nga kamatuoran” (Giya ngadto sa mga Kasulatan,“ Gidili nga Panghilawas ,” scriptures.ChurchofJesusChrist.org)
Babilonia ( Pinadayag 17:5): ang ngalan sa usa ka siyudad nga nailhan tungod sa pagkadaotan niini, gigamit ingon nga simbolo sa pagkadaotan ug pagka-kalibotanhon
Dautan nga Babaye ( Pinadayag 17:5): usa ka babaye nga nakahimo og imoral nga sekswal nga mga binuhatan alang sa salapi o patigayon
Kahibulong ( Pinadayag 17:6): natingala, nahingangha (tan-awa sa bersikulo 6)
-
Unsa ang imong nakat-onan gikan sa mga simbolo nga imong nabasa?
-
Unsa ang natabang sa mga titulo ni Jesukristo sa bersikulo 14 nga nakatabang kanimo aron makasabot mahitungod Kaniya?
-
Unsa ang imong nahibaloan bahin sa paagi nga ang Kordero, o si Jesukristo, nakabuntog sa tanang pagkadautan? (Tan-awa sa Giya ngadto sa mga Kasulatan, “ Kordero sa Dios ,” scriptures.ChurchofJesusChrist.org.) Unsa man ang kahulogan niini nganha kanimo?
Opsiyon C: Kaminyoon sa Kordero
-
Unsa ang pipila sa mga rason nga ang mga pamilya kasagaran magsaulog diha sa mga kasal?
Gigamit ni Juan ang paghulagway sa usa ka kaminyoon aron sa pagtudlo kanato mahitungod sa ulahing mga adlaw. Kining kaminyoon nga iyang gisuwat usa ka pagsimbolo sa Ikaduhang Pag-anhi sa Manluluwas.
Pagdrowing og usa ka yanong hulagway sa usa ka pangasaw-onon ug pamanhonon ug isulat unsa ang imong nakat-onan mahitungod sa matag usa diha sa imong pagtuon.
Basaha ang Pinadayag 19:7–9 aron makita kon giunsa kita pagdasig sa Ginoo sa pagbati mahitungod niini nga kaminyoon. Ang pangasaw-onon niini nga mga bersikulo nagsimbolo sa mga miyembro sa Simbahan sa Ginoo kinsa nag-andam sa ilang kaugalingon alang sa pagbalik ni Kristo.
-
Sigon sa bersikulo 8 , sa unsang paagi kita makapangandam alang niini nga kaminyoon? Unsay gipasabot niana alang kanimo?
-
Sa unsang mga paagi ang relasyon sa kaminyoon usa ka haum nga simbolo sa atong gipakigsaad nga relasyon uban ni Jesukristo?
-
Sa unsang paagi nga ang pagbalik sa Manluluwas mahimo nga panahon sa pagmaya alang kanimo?
Basaha ang mosunod nga mga kasulatan ug paghunahuna mahitungod sa unsa ang imong mahimo aron makapangandam sa panahon diin si Jesukristo mobalik pag-usab. Mahimo nimong markahan unsa ang imong nakaplagan sa imong mga kasulatan o magsulat mahitungod niini sa imong journal.
-
Unsa ang imong gibati mahitungod kang Jesukristo ug sa unsa ang Iyang nahimo alang sa pag-andam kanimo sa Iyang pag-abot?
Pangutan-a ang mga estudyante unsa ang ilang nakat-onan, ilabi na mahitungod kang Jesukristo. Kon wala sila makasabot sa mga aspeto sa unsay ilang natun-an, pasaligi sila ug dapita sila sa pagpakigbahin sa unsay ilang nakat-onan. Dasiga ang mga estudyante sa pagpadayon sa pagtuon sa mga kasulatan kada adlaw ug sa pagtukod og pagsalig sa ilang Manluluwas. Tabangi sila nga makakita nga ang mga simbolo, mga titulo, ug mga kinaiya nga ilang gitun-an diha sa mga kasulatan naghulagway nga si Jesukristo makatabang kanato sa pagbuntog sa kadautan sa kataposang mga adlaw.
-
Unsay gusto nimong mahinumdoman o buhaton?
-
Sa imong gibati sa unsang paagi kaha kini makatabang kanimo sa panahon sa mga pagsulay sa kataposang mga adlaw?
Komentaryo ug Background nga Impormasyon
Pinadayag 17 . Unsay akong makat-onan gikan sa simbolismo sa babaye diha sa mananap?
Ang mga pulong nga gigamit sa paghulagway sa babaye kinsa misakay diha sa mananap nagpamatuod sa dakong politikal ug makagun-ob nga gahom nga siya maanaa ibabaw sa mga nasod ug mga gingharian ug mga katawhan. … Ang iyang sinina naghulagway sa gahom ug bahandi (tan-awa sa bersikulo 4); siya ang “inahan sa mga dautan nga babaye,” nga nagpakita nga siya nanganak ug ubang mga prostitusyon—mga organisasyon, mga gobyerno, ug mga ideolohiya nga nagpatunghag pagkadaotan ( bersikulo 5). Mirekord si Juan nga siya nahibulong sa pagkagamhanan sa kadautan sa babaye (tan-awa sa bersikulo 6). Bisan pa niana, sa kataposan siya pagalaglagon pinaagi niadtong sa kaniadto iyang gimandoan (tan-awa sa bersikulo 16 ; 1 Nephi 22:13). …
Usa ka posible nga kahulogan sa paghulagway ni Juan niini nga mga bersikulo mao nga sa kataposang mga adlaw, usa ka estilo sa kinabuhi nga sekswal nga imoralidad, bahandi, ug kapintas mokaylap sa kalibotan (tan-awa usab sa 1 Nephi 13:5–9). Mga institusyon, mga panggobyerno, ug mga tawo kinsa mosagop niini nga estilo sa kinabuhi mahunahuna isip kabahin sa Babelonia. (New Testament Student Manual [2014], 560)
Asa ako makakat-on pa og dugang mahitungod sa simbolismo diha sa Pinadayag 15–19?
Alang sa komentaryo sa simbolismo niini nga mga kapitulo, mahimo nimong konsultahon ang mga kapitulo 55 ug 56 sa New Testament Student Manual (2014), anaa sa ChurchofJesusChrist.org.
Dugang nga mga Kalihokan sa Pagkat-on
Paglimitar sa impluwensiya sa Babilonia ngari kanato
Kon ang mga estudyante makabenepisyo gikan sa mas dakong pagtutok sa pagbuntog sa Babelonia, ikonsiderar ang paggamit sa pakigpulong ni Elder David R. Stone sa Kapitoan, “Zion Taliwala sa Babilonia,” Liahona, Mayo 2006, 90–93. Ang iyang analohiya sa Manhattan Temple mahimong magamit sa pagtabang sa mga estudyante nga makaila sa kaimportante sa pagdugang sa ilang panahon kauban sa Manluluwas samtang gilimitahan ang impluwensiya sa Babelon diha kanila. Mahimong makabenepisyo usab ang mga estudyante gikan sa pagtuon ug paghisgot sa mga sumbanan sa Ginoo alang kanila diha sa Alang sa Kalig-on sa Kabatan-onan (booklet, 2011).
Pinadayag 19:10 . “Ang [pagpamatuod kang] Jesus, mao man ang espiritu sa propesiya”
Ang mga estudyante mahimong makabenepisyo gikan sa pagsabot sa gahom sa usa ka pagpamatuod kang Jesukristo. Dapita ang mga estudyante nga mobasa sa Pinadayag 19:10 alang sa kahulogan sa “[pagpamatuod kang] Jesus.” Tabangi ang mga estudyante sa pagdiskobre nga ang “espiritu sa propesiya” ( bersikulo 10) nagpasabot sa gasa sa pagpadayag ug inspirasyon gikan sa Dios, nga nagtugot kanato nga makadawat ug makapamulong sa Iyang pulong (tan-awa sa Giya ngadto sa mga Kasulatan, “ Pagpanagna, Panagna ,” scriptures.ChurchofJesusChrist.org). Dapita ang mga estudyante sa pagkonsiderar kon unsaon kaha nila sa pagpanalangin ang uban ug pag-andam sa kalibotan alang sa Ikaduhang Pag-anhi ni Jesukristo pinaagi sa ilang pagpamatuod kang Jesukristo.
Simbolismo ni Jesukristo sa Iyang Ikaduhang Pag-anhi
Aron matabangan ang mga estudyante nga makat-on mahitungod sa Ikaduhang Pag-anhi ni Jesukristo, ikonsiderar ang pagpakita sa mosunod nga hulagway ug dapita ang mga estudyante sa pagbasa sa Pinadayag 19:11–16 . Dapita sila sa paghisgot sa mga simbolo nga ilang nakit-an.
Ang mga tabang sa pagtuon ug ubang mga kasulatan makatabang sa pagpadayag sa kahulogan sa mga simbolo. Pananglitan, aron mas masabtan ngano nga ang espada mogawas sa baba ni Jesukristo o nganong Siya “[magahari …pinaagi sa [bunal] nga puthaw” ( Pinadayag 19:15), basaha ang Doktrina ug mga Pakigsaad 11:2 ug ang 1 Nephi 11:25 .