Painting of Jesus Christ by Mike Malm. Christ appears to be walking on the water with his arms outstretched to receive those who come, unto Him. There are clouds in the background with sunlight reflecting off the clouds. Light also emanates from around his head.
Nakahunahuna ka na ba kon unsaon nimo pag-atubang ang mga hagit sa mortalidad nga magmalamposon? Ang Manluluwas mitudlo sa mga Santos gikan sa pito ka simbahan sa Asya unsaon pagbuntog sa mga pagpanggukod, mga sala, ug ubang mga hagit aron makadawat sa Iyang gisaad nga mga panalangin. Kini nga leksiyon makatabang kanimo nga makabati og dugang nga tinguha nga mabuntog ang mga hagit ug madawat ang mga panalangin nga gisaad nga ihatag sa Manluluwas.
Pagtabang sa mga estudyante nga mahimong aktibong mga sumasalmot. Usa ka paagi sa pagtabang sa mga estudyante aron mahimong aktibong mga sumasalmot mao ang paghatag kanila og mga kahigayonan sa pagpili unsa ang ilang gustong tun-an. Mahimong maghatag og pipila ka susama nga mga sugilanon nga pagatun-an, mga pangutana nga tubagon, o mga kalihokan nga kapilian.
Pagpangandam sa estudyante: Dapita ang mga estudyante sa paghangyo sa usa ka miyembro sa pamilya o kasaligang higala sa pagpaambit og kasinatian kanila diin siya nakabuntog sa usa ka babag uban sa panabang sa Manluluwas.
Posible nga mga Kalihokan sa Pagkat-on
Pagkakita sa kataposan gikan sa sinugdanan
Mahimong ibutang ang mga estudyante nga magkapares ug dapiton sila sa pagpasabot sa usag usa unsa ang ilang paboritong pagkaon ug nganong naghinam-hinam man sila nga makakaon niini. Dayon ipaambit ang mosunod nga analohiya ug dapita ang mga estudyante sa pagtubag sa may kalabotang pangutana.
Handurawa ang imong kaugalingon sa mosunod nga sitwasyon nga gihulagway ni Brother Ahmad S. Corbitt sa Kinatibuk-ang Kapangulohan sa Young Men. Tan-awa ang “Makahimo Kamo sa Pagpundok sa Israel!,” nga makita sa ChurchofJesusChrist.org, gikan sa time code 4:49 hangtod sa 5:22, o basaha ang mosunod nga pamahayag.
Imahe
The official portrait of Ahmad Corbitt.
Pananglit usa ka adlaw sa wala pa ka mobiya padulong sa eskwelahan usa sa imong mga ginikanan mihimo og tinuod nga saad nga imong makaon ang imong paboritong pagkaon sa imong pagpauli! Mahinamon kaayo ka! Samtang naa sa eskwelahan naghunahuna ka nga nagkaon niana nga pagkaon, ug matilawan na nimo kini. Natural lang, imong gipaambit ang imong nindot nga balita ngadto sa uban. Ang pagpaabot nga makapauli nakapalipay kaayo nimo nga ang mga pasulit ug mga hagit sa eskwelahan daw gaan ra. Walay makapawagtang sa imong kalipay o makapaduhaduha nimo tungod kay sigurado kaayo ang saad!
Mahimo usab natong magamit ang analohiya ni Brother Corbitt sa atong mga espirituhanong kinabuhi.
Ngano sa imong hunahuna nga mas makasugakod kita sa mga pagsulay ug mga hagit sa mortalidad kon magpabilin kitang nakatutok sa mahangturong mga saad nga gihimo kanato sa atong Langitnong Amahan?
Sa Pinadayag 2–3, si Jesukristo mipamatuod sa Iyang mahangtorong mga saad ug mitudlo sa mga Santos kon unsaon nila nga makadawat niini nga mga saad. Ang mga Santos sa panahon ni Juan nagkinahanglan og tabang sa daghang mga hagit parehas sa kadtong imong lagmit giatubang, lakip ang mga sala, pagpanglutos, ug kawalay pagtagad. Diha sa imong pagtuon niini nga mga kapitulo, pamalandong sa unsang paagi nga ang pagsabot niini nga mga saad gikan sa Ginoo mahimong makatabang kanimo sa imong kinabuhi.
Ipakita ang mga mosunod nga mga tudling, mga kahulogan, ug mga pangutana. Mahimong ibutang ang mga estudyante sa gagmayng mga grupo aron basahon ang mga tudling ug hisgotan ang mga pangutana.
Mahimong dapiton ang mga estudyante sa pagpapangutana mahitungod niining mga saad ug sa pagtuon sa mga entry sa Giya ngadto sa mga Kasulatan, ug uban pang mga kapanguhaan nga mahimong makatabang kanila aron mas makasabot niini nga mga saad.
Pagmugna og usa ka tsart diha sa imong journal sa pagtuon parehas sa mosunod.
Basaha ang mga bersikulo sa wala nga bahin sa tsart, ug irekord ang mga saad nga imong makita niini sa tuo nga bahin sa tsart (timan-i nga daghang mga saad ang makita sa matag kapitulo). Ang mosunod nga mga kahulogan tingali makatabang kanimo.
Ikaduhang kamatayon ( Pinadayag 2:11): Espirituhanon nga kamatayon, o walay kataposang pagkahilayo gikan sa Dios (tan-awa ang Giya ngadto sa mga Kasulatan, “ Kamatayon, Espirituhanon nga ,” scriptures.ChurchofJesusChrist.org)
Unsa nga mga pagkaparehas ang imong nakita niini nga mga saad?
Unsaon nimo pagsuma sa mga pulong sa Manluluwas mahitungod sa unsaon pagdawat sa Iyang walay kataposang mga saad?
Kining mga tudling mahimong makatabang kanato aron makasabot nga kon kita magmadaugon, nan ang Manluluwas mohatag kanato sa mga panalangin sa kahimayaan.
Sa unsang paagi nga ang pagkahibalo nga si Kristo misaad kaninyo og mahangtorong mga panalangin makatabang kaninyo sa paglahutay sa mga hagit sa mortalidad?
Hain niini nga mga saad ang nagdasig kanimo sa pagbuntog sa imong giatubang? Ngano man?
Pahinumdomi ang mga estudyante nga gamiton ang ilang pagpangandam sa klase diha sa ilang pagtubag sa mosunod nga pangutana. Dapita ang mga estudyante nga isulat diha sa pisara ang ilang mga tubag.
Unsa kaha ang atong kinahanglan nga mabuntog aron makadawat sa kahimayaan?
Tinguhaa ang tabang gikan sa Langitnong Amahan pinaagi sa Espiritu Santo aron maila ug masulat ang usa ka butang nga imong gikinahanglang buntogon sa imong kinabuhi. Kini mahimong usa ka sala, pagkaadik, o uban pang personal nga hagit. Isulat kon nganong lisod kini alang kanimo ug nganong gusto nimo kini nga mabuntog. Samtang magpadayon ka sa pagtuon, pangayo og tabang sa Langitnong Amahan pinaagi sa Espiritu Santo aron makahibalo unsay imong mahimo aron mabuntog kini.
Pagbuntog sa kalibotan
Si Elder Neil L. Andersen sa Korum sa Napulog Duha ka Apostoles mipaambit sa mosunod mahitungod sa pagbuntog:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Posible ba nga makabuntog sa kalibotan ug makadawat niini nga mga panalangin? Oo, posible.
Kadtong makabuntog sa kalibotan makapalambo og malukpanong gugma alang sa atong Ginoo ug Manluluwas, si Jesukristo. …
Ang pagbuntog sa kalibotan dili mahitabo sa usa lamang ka makahuluganong hitabo sa kinabuhi, apan sa tibuok kinabuhi nga makahuluganong mga higayon nga modeterminar sa mahangturon nimong padulngan.
Unsa ang imong nakat-onan gikan ni Elder Andersen mahitungod sa pagbuntog?
Tungod kay ang Langitnong Amahan ug si Jesukristo nahigugma ug nagpakabana kanato, gusto Sila nga motabang kanato nga mabuntog ang tanan nga gikinahanglan aron makadawat og kahimayaan.
Mahimong ipakita ang mosunod nga mga ideya, o tugotan ang mga estudyante sa paghimo og ilang kaugalingong paagi sa pag-ila unsa ang ilang mabuhat aron makadawat sa panabang sa Manluluwas aron mabuntog ang ilang mga hagit.
Kon gikinahanglan, pagprinta og mga kopya sa mosunod nga pamulong ni Elder Andersen.
Basaha ang Abril 2017 nga pakigpulong sa kinatibuk-ang komperensiya nga may ulohan nga “Pagbuntog sa Kalibotan” ni Elder Neil L. Andersen sa Korum sa Napulog Duha ka Apostoles. Pangita og mga panabot kon unsa ang imong mabuhat aron makabuntog.
Basaha ang Juan 16:33 , ug dayon tun-i giunsa sa Manluluwas pagbuntog sa tintasyon ni Satanas diha sa Mateo 4:1–11 . Pangitaa kon unsaon nimo pagsunod ang tambag ug ehemplo sa Manluluwas diha sa imong paningkamot sa pagbuntog sa mga hagit ug sa mga sala.
Pangitaa ang pulong nga “pagbuntog” diha sa Gospel Library nga app o sa ChurchofJesusChrist.org. Tun-i ang mga kinutlo o mga kasulatan nga imong makit-an aron mahibaloan kon unsaon usab nimo sa pagbuntog.
Hatagi ang mga estudyante og igong panahon sa pagkompleto sa ilang pagtuon. Dayon dapita sila sa pagpaambit unsa ang ilang napalgan o nakat-onan ingon man usab ang ilang mga hunahuna o mga pagbati kon unsaon kaha nila sa paggamit ang unsay ilang nakat-onan.
Paghunahuna og bisan usa lamang ka butang nga mahimo nimong buhaton aron matabangan ka nga mabuntog ang hagit o sala nga imong nahunahunaan sa sayong bahin niini nga leksiyon. Sa imong personal nga journal, pagsulat kon unsa ang imong buhaton ug ipasalig nga buhaton kini. Ikonsiderar ang pagpaambit sa imong plano ngadto sa imong mga ginikanan o sa gisaligan nga lider sa Simbahan.
Unsa ang imong nakat-onan mahitungod sa Langitnong Amahan ug ni Jesukristo gikan niini nga leksiyon?
Unsa ang imong nahibaloan na mahitungod kang Jesukristo ug sa Iyang Pag-ula nga naghatag kanimo og pagsalig nga Siya makatabang kanimo nga mabuntog ang tanang mga butang ug madawat ang Iyang gisaad nga mga panalangin?
Ang mga Kristiyanos kinsa gihukman sa mga opisyales nga Romano nga mabilanggo o mamatay usahay makaluwas sa ilang mga kaugalingon pinaagi sa pagpanimpalas ni Kristo ug sa pagsimba hinoon sa emperador. Gi-rekord ni Juan ang pagdayeg sa Ginoo alang sa mga Santos didto sa Pergamo tungod sa “[pagkupot] pag-ayo” sa Iyang ngalan, bisan ubos sa hulga sa kamatayon ( Pinadayag 2:13 ; tan-awa usab Pinadayag 2:25 ; 3:3, 11). Usa ka nagbalik-balik nga hugpong sa mga pulong diha sa Pinadayag 2–3 mao ang tambag sa “[pagkupot] pag-ayo” ngadto sa kamatuoran (tan-awa sa Pinadayag 2:13, 25 ; 3:3, 11). Si Presidente M. Russell Ballard sa Korum sa Napulog Duha ka Apostoles mipasabot nga ang “pagkupot pag-ayo” ngadto sa kamatuoran, nga makaplagan diha sa pulong sa Dios, nagpasabot sa “pagpatalinghog ngadto niini, pagsunod sa mga baroganan nga gitudlo diha niini, ug sa paghupot niadto nga mga baroganan ingon og ang ato gayod nga mga kinabuhi nag-agad niini—diin, kon naghisgot kita og espiritwal nga kinabuhi, literal kini nga tinuod gayod” (Be Strong in the Lord,” Ensign, Hulyo 2004, 10).
Unsa ang gipasabot sa pagdawat sa kahimayaan?
Si Presidente Russell M. Nelson mipasabot:
Imahe
Official portrait of President Russell M. Nelson taken January 2018
Samtang ang kaluwasan maoy usa ka indibidwal nga butang, ang kahimayaan mao ang usa ka butang sa pamilya. Kadto lamang kinsa naminyo didto sa templo ug kansang kaminyoon gibugkos pinaagi sa Balaan nga Espiritu sa Saad magpadayon isip mga kapikas human sa kamatayon ug makadawat sa labing taas nga ang-ang sa celestial nga himaya o kahimayaan.
Si Brother Brian K. Ashton, kanhi sa Kinatibuk-ang Kapangulohan sa Sunday School, mitudlo:
Imahe
Brother Brian K. Ashton - Sunday school General Presidency Second Counselor. Official Portrait 2018.
Ang Amahan naghimo og plano nga magtugot kanato, kon makab-ot ang pipila ka kondisyon,aron makabaton og pisikal nga mga lawas nga mahimong imortal ug mahimaya sa Pagkabanhaw; magminyo ug maghimo og mga pamilya dinhi sa mortalidad o, alang sa matinud-anon kinsa walay oportunidad, human sa mortalidad; mouswag ngadto sa pagkahingpit; ug sa kataposan mobalik sa atong Langitnong mga Ginikanan ug magpuyo uban Kanila ug sa atong mga pamilya sa usa ka kahimtang sa kahimayaan ug mahangtorong kalipay.
(Brian K. Ashton, “Ang Amahan,” Liahona, Nob. 2018, 94)
Dugang nga mga Kalihokan sa Pagkat-on
Pagsabot sa mga panalangin sa kahimayaan
Kon kinahanglan nga mas masabtan sa mga estudyante ang mga saad sa Manluluwas kalabot sa kahimayaan, ikonsiderar ang pagdapit kanila sa pagpangita sa mga entry sa Giya ngadto sa mga Kasulatan sama sa “ Kahoy sa Kinabuhi ,” “ Korona ,” o “ Manna ” (scriptures.ChurchofJesusChrist.org). Mahimo usab nga makatabang ang pagpakita sa mga pamahayag gikan sa seksiyon nga “Komentaryo ug Background nga Impormasyon” nga makatabang sa pagsabot niini nga mga saad.
Pagkupot pag-ayo
Kon ang mga estudyante makabenepisyo gikan sa pagkakita kon sa unsang paagi nga ang “[pagkupot] … pag-ayo” ( Pinadayag 2:25 ; tan-awa usab ang 3:3) makatabang kanila sa pagbuntog sa kalibotan, dapita sila sa pagtuon sa 1 Nephi 8:30 ug ang interpretasyon nga gihatag ni Nephi diha sa 1 Nephi 15:21–25 . Dapita ang mga estudyante sa pag-ila sa mga lihok nga ilang mabuhat aron “[mokupot] pag-ayo,” naghinumdom nga ang kahoy sa kinabuhi ug ang gunitanan nga puthaw nagsimbolo kang Jesukristo ug sa Iyang pulong. Mahimo usab silang mogamit sa mga pamahayag gikan sa “Komentaryo ug Background nga Impormasyon” nga bahin ubos niini nga hilisgotan. Dapita sila nga mopaambit og mga kasinatian diin sila o ang uban migunit pag-ayo ug nakabuntog sa mga hagit o mga sala. Mahimo dayon silang maghimo og plano sa pagbuntog niining mga hagit o mga sala ingon sa gitalasa milabay nga leksiyon.