Pinadayag 1

“Ang Pinadayag ni Jesukristo”

Tungod sa paggamit niini sa simbolismo, ang basahon sa Pinadayag usahay daw katingad-an o makalibog. Tinuod nga ang basahon sa Pinadayag puno sa simbolismo nga naghimo sa mga bahin niini nga lisod sabton. Bisan pa niana, daghang mga mensahe sa basahon sa Pinadayag ang yanong mga kamatuoran mahitungod sa mga butang sama sa mga tahas ni Jesukristo, mga hitabo nga nagpalibot sa Ikaduhang Pag-anhi, ug ang kataposang kadaugan sa maayo batok sa dautan. Ang basahon gisulat ni Juan ang Apostol ug iyang gitumong alang ngadto sa pito ka mga kongregasyon sa Simbahan sa Asya Minor (karon Turkey). Sama sa kadaghan karon, kining matinud-anong mga sumusunod ni Jesukristo miantos tungod sa ilang pagtuo kang Jesukristo ug nahupay sa mga mensahe ug paghanduraw nga gisulat ni Juan. Kini nga leksiyon gituyo aron tabangan ka nga makasabot sa pipila ka simbolismo sa basahon sa Pinadayag ug unsa ang matudlo niini kanimo mahitungod kang Jesukristo. 

Pagsabot sa simbolismo. Ang mga simbolo mao ang kasagaran nga gigamit sa mga kasulatan aron magtudlo og mga mahinungdanon nga espirituhanong mga kamatuoran. Paggahin og panahon sa pagtabang sa mga estudyante sa paggamit sa lainlaing mga pamaagi sa paghubad niining mga simbolo. Ang pagbuhat sa ingon makatabang kanila aron mas masabtan ang tibuok basahon sa Pinadayag.

Pagpangandam sa estudyante: Dapita ang mga estudyante sa pagbasa sa “ Pinadayag ni Juan ” diha sa Giya ngadto sa mga Kasulatan, anaa sa scriptures.ChurchofJesusChrist.org, ug motambong nga andam nga mopaambit unsa ang ilang interesadong makat-onan ug ngano.

Posible nga mga Kalihokan sa Pagkat-on

Panan-awon ni Juan

Ipakita ang mosunod nga hulagway ug dapita ang mga estudyante sa paghisgot unsa ang ilang nakita nga panghitabo niini ug ang bisan unsang mga pangutana nga aduna sila mahitungod niini.

Isip alternatibo, mahimong sugdan ang leksiyon sama sa mosunod: Una pa magklase, ibutang ang usa ka butang sa lamesa o sa lingkoranan atubangan sa klase. Tabuni ang mao nga butang aron dili mailhan sa mga estudyante kon unsa kini. Inig sugod sa klase, dapita ang mga estudyante sa pagtag-an kon unsa kini nga butang. Human sa pipila ka pagtag-an, dapita ang usa ka estudyante sa pagduol sa atubangan sa klase ug hangyoa siya nga ablihan og gamay ang gitabon aron siya ra ang makakita sa butang. Hangyoa kini nga estudyante nga ihulagway ang butang ngadto sa klase nga dili magsulti kon unsa kini. Dapita ang estudyante sa paglingkod. Ikonsiderar ang pagpangutana sa mosunod:

Sa unsang paagi nga ang estudyante nga gipahulagway sa butang nagrepresentar og usa ka tahas sa mga propeta ug apostoles?

Isip “Pinadayag ni Jesukristo” ( Pinadayag 1:1), kini nga basahon usahay tawagon nga “Apokalipsis,” nga sa Gresya nagpasabot nga usa ka “pagpadayag o pagkuha sa tabon” (tan-awa sa Giya ngadto sa mga Kasulatan, “ Pinadayag ni Juan ”).

Kini nga basahon mao ang pagbutyag sa Ginoo nga si Jesukristo ug sa pagpadayag sa Iyang awtoridad, gahom, ug sa labing importanteng tahas diha sa plano sa Amahan sa kaluwasan. Ang basahon nagpadayag usab og importanteng impormasyon mahitungod sa mga panghitabo padulong ngadto sa Ikaduhang Pag-anhi ug sa Milenyum.

Si Apostol Juan, ang gihigugma nga disipulo ni Jesukristo, mao ang nagsulat niini nga basahon. Gisulat ni Juan ang basahon sa isla sa Patmos sa panahon nga ang mga Kristiyanos nagsagubang og sayop nga mga pagtulun-an, kaluya, ug grabing pagpanglutos (tan-awa sa Pinadayag 1:9 ; 2:4, 10, 14–15 ; 3:16 ; 6:9).

Ang Basahon ni Mormon nagpamatuod nga si Juan giorden nang daan aron mosulat sa mga butang nga narekord sa basahon sa Pinadayag (tan-awa sa 1 Nephi 14:18–27 ; Ether 4:16).

Kini mahimong usa ka maayong panahon sa pagdapit sa mga estudyante sa pagpaambit sa ilang mga hunahuna gikan sa pagpangandam sa estudyante nga kalihokan.

Basaha ang Pinadayag 1:1–3 ug matikdi unsa ang gitudlo ni Juan mahitungod sa pinadayag nga iyang nadawat. (Timan-i nga ang Hubad ni Joseph Smith nag-ingon, “Bulahan sila kinsa nagbasa ug sila kinsa naminaw ug nakasabot sa mga pulong niini nga panagna.”)

• Unsay mipatigbabaw kanimo niining mga bersikulo?

• Unsa ang gisulti ni Juan nga kinahanglan buhaton sa usa ka tawo aron mapanalanginan sa sulod sa basahon sa Pinadayag?

Basaha ang Paghubad ni Joseph Smith sa Pinadayag 1:4–8 ug pangitaa kon unsa ang gusto ni Juan nga mahibaloan ug mabati niini nga mga Santos mahitungod kang Jesukristo.

Tan-awa ang “Komentaryo ug Background nga Impormasyon” nga bahin alang sa mga panabot sa “mga hari ug mga pari” ug sa “Alpa ug Omega.”

• Unsa ang imong napalgan sa Pinadayag 1:4–8 nga gusto ni Juan nga mahibaloan ug mabati sa mga Santos mahitungod kang Jesukristo?

• Hain niining mga kamatuoran mahitungod kang Jesukristo ang mahimong makatabang alang niining mga Santos kinsa nag-antos sa pagpanglutos?

Mahimong isulat diha sa pisara ang mga kamatuoran nga napalgan sa mga estudyante.

• Sa unsang paagi kaha kining mga kamaturoan mahimong makatabang kanimo diha sa imong pag-atubang sa mga hagit sa kinabuhi?

Ang nagsimbolo nga panan-awon ni Juan

Sa iyang panan-awon, nadungog ni Juan ang tingog ni Kristo (tan-awa ang Pinadayag 1:10–11). Sa dihang milingi siya paingon sa tingog sa Manluluwas, nakita niya ang nagsimbolong imahe parehas sa hulagway nga gipakita sa sinugdanan sa leksiyon.

Sa tibuok nga mga kasulatan, ang mga propeta naggamit og simbolismo aron pagpalawom sa pagsabot mahitungod kang Jesukristo ug sa Iyang ebanghelyo. Ang simbolismo mahimong usa ka epektibo nga himan sa pagtudlo tungod kay kini mahimong masabtan sa mga tawo sa lainlain nga mga pinulongan, mga kultura, ug mga henerasyon. Ang simbolismo mahimo usab makapahayag og pipila ka nagkalain-lain nga mga mensahe. Agig dugang, ang simbolismo mahimong makapalambo sa pagsabot pinaagi sa makapadasig nga mga ideya ug mga emosyon nga lisod isulti pinaagi sa mga pulong lamang.

• Unsa ka kamasaligon sa imong abilidad sa pagsabot sa kahulogan sa mga simbolo diha sa mga kasulatan?

• Paghunahuna og pipila ka mga simbolo nga gigamit sa Bag-ong Tugon sa paghulagway ni Jesukristo (sama sa karnero, pan, tubig, bato, ug magbalantay). Sa unsang paagi kining mga simbolo makatabang kanimo aron mas makasabot Kaniya?

Basaha ang Pinadayag 1:12–18 ug pangita alang sa dugang nga mga detalye ug mga simbolo sa panan-awon ni Juan kang Jesukristo.

Sa mosunod nga tsart imong makita ang pipila ka mga simbolo nga nahisgotan sa panan-awon ni Juan. Usa ka bililhong paagi sa pagsabot sa mga simbolo nga anaa sa mga kasulatan mao ang paggamit sa uban pang mga kasulatan.

Ikonsiderar ang pag-andam og kopya sa handout alang sa matag estudyante. Dapita sila sa pagbasa sa mga kasulatan ug pagsulat og posible nga kahulogan sa mga simbolo. Mahimong makatabang alang sa mga estudyante ang pagtrabaho sa handout nga magpares, sa gagmayng mga grupo, o isip usa ka klase.

Ang mga panabot mahitungod sa dugang nga mga simbolo nga wala makita sa tsart anaa makita diha sa “Komentaryo ug Background nga Impormasyon” nga bahin.

Mga Simbolo sa Panan-awon ni Juan

Simbolo	Posibleng kahulogan
1. Pito ka mga kandiliro nga bulawan ( Pinadayag 1:12)	1. Tan-awa sa Pinadayag 1:20 ; 3 Nephi 18:24
2. Ang tuo nga kamot sa Manluluwas ( Pinadayag 1:16–17)	2. Tan-awa ang Exodo 15:16 ; Isaias 41:10
3. Pito ka mga bitoon ( Pinadayag 1:16)
4. Usa ka hait nga espada nga duhay sulab ( Pinadayag 1:16)	4. Tan-awa ang Mga Hebreohanon 4:12 ; Helaman 3:29–30
5. Mga yawe sa kamatayon ug sa hades [impyerno] ( Pinadayag 1:18)	5. Tan-awa ang 2 Nephi 9:10–13

Tugoti ang mga estudyante sa pagpaambit sa ilang mga nakaplagan ug sa bisan unsang mga pangutana nga aduna sila.

Maghunahuna mahitungod sa kahimayaan ni Jesus ug sa potensiyal nga kahulogan sa mga simbolo sa panan-awon ni Juan, tan-awa og balik ang hulagway nga gipakita sa sinugdanan sa leksiyon.

• Unsaon man nimo pagpasabot kon unsa ang girepresentar niini nga hulagway?

• Unsang mga kamatuoran ang atong makat-onan mahitungod sa relasyon tali ni Jesukristo ug sa Iyang matinud-anong mga sumusunod?

Usa ka kamatuoran nga atong makat-onan gikan niing mga simbolo mao nga si Jesukristo nagsud-ong ug nagpakabana sa Iyang mga matinud-anong mga sumusunod.

• Sa unsang paagi nga kining kamatuoran ug kining mga simbolo nahimong usa ka panalangin sa mga Santos sa pito ka mga simbahan?

• Sa unsang mga kahimtang lagmit kini nga kamatuoran o pagsimbolo sa imahe ni Kristo mahimong usa ka tinubdan sa kahupay ngadto sa usa ka tinedyer karon?

• Sa unsang paagi nga ang simbolismo niini nga kapitulo nakatabang kanimo aron mas makasabot kinsa ang Manluluwas ug sa unsa Siya sama?

• Unsa ang imong nakat-onan mahitungod sa simbolismo nga mahimong makatabang kanimo diha sa imong pagpadayon sa pagtuon sa basahon sa Pinadayag?

Mahimong mopaambit og pagpamatuod sa mga butang nga imong nabati mahitungod kang Jesukristo ug sa unsang paagi Siya nagsud-ong ug nagpakabana sa Iyang matinud-anong mga sumusunod. Ang mga estudyante mahimong dapiton sa pagbuhat sa susama.

Komentaryo ug Background nga Impormasyon

Pinadayag 1:6 . Unsa ang gipasabot ni Juan diha sa pag-ingon nga si Jesus naghimo kanato nga “[mga hari ug] mga pari”?

Si Presidente Joseph F. Smith (1901–1918) mitudlo:

Ang katuyoan sa atong yutan-ong pagpakabuhi mao nga kita mahimong makabaton og hingpit nga kalipay, ug nga kita mahimong anak nga mga lalaki ug anak nga mga babaye sa Dios, sa hingpit nga pagsabot sa pulong, mahimong mga manununod sa Dios ug isigka mga manununod uban ni Jesukristo [tan-awa sa Mga Taga-Roma 8:14–17 ],nga mamahimong mga hari ug mga pari ngadto sa Dios, nga makapanunod sa himaya, kamandoan, kahimayaan, mga trono ug matag gahom ug kinaiya nga napalambo ug naangkon sa atong Langitnong Amahan. Kini ang tumong sa atong pagkaania dinhi sa yuta. Aron makakab-ot ngadto niining hinimaya nga kahimtang, kinahanglan nga kita moagi niining mortal nga kasinatian, o pagsulay, diin atong mapakita sa atong mga kaugalingon nga angayan, pinaagi sa tabang sa atong magulang nga igsoon nga si Jesus.

(Mga Pagtulun-an sa mga Presidente sa Simbahan: Joseph F. Smith [1998], 122)

Gitudlo ni Presidente Joseph Fielding Smith (1876–1972):

[Ang matinud-anon] gisaaran nga sila mahimong mga anak sa Dios, kauban nga manununod ni Jesukristo, ug kon sila nagmatinud-anon ngadto sa mga sugo ug mga pakigsaad nga gihatag sa Ginoo kanato, nga mahimong mga hari ug mga pari ug mga rayna ug mga babayeng pari, nagdala sa kahingpitan sa mga panalangin sa celestiyal nga gingharian.

(Joseph Fielding Smith, Answers to Gospel Questions, comp. Joseph Fielding Smith Jr. [1958], 4:61)

Pinadayag 1:8 . Unsa ang atong makat-onan gikan sa titulo ni Jesukristo nga “Makagagahom”?

Ang titulo nga “Makagagahom” mao ang Cebuano nga hubad sa Gresyanhon nga pulong Pantokrator,nga nagsugyot og usa ka tawo kinsa nagmando ug naghan-ay sa tanang mga butang. Ang usa ka tema sa basahon sa Pinadayag mao nga bisan og ang mga katawhan sa Dios nagsinati og pagpanggukod ug kasamok, ang Dios sa tinuod nagmando sa tanang mga butang ug mobutang usa ka adlaw niana og kataposan sa tanang dautan. Daghang mga hulagway gikan sa unang mga kapitulo sa Pinadayag ang nagdugang og kalig-on sa tahas sa Manluluwas isip “ang Makagagahom” ( Pinadayag 1:8): Ang iyang pulong gi-representar isip “usa ka mahait nga espada nga duhay sulab” ( Pinadayag 1:16), Anaa Kaniya “ang mga yawe sa Kamatayon ug sa Hades” [impyerno] ( Pinadayag 1:18), ug nasayod Siya sa gibuhat sa mga tawo (tan-awa sa Pinadayag 2:2, 9, 13, 19).

Pinadayag 1:8 . Unsa ang gipasabot niini nga si Jesus mao ang “Alpa ug ang Omega”?

Si Elder Bruce R. McConkie (1915–1985) sa Korum sa Napulog Duha ka Apostoles mitudlo:

Kini nga mga pulong, ang una ug ang kataposang mga letra sa Griyego nga alpabeto, gigamit sa sambingay aron sa pagtudlo sa walay kinutoban ug sa mahangtoron nga kinaiya sa pagkatawo sa atong Ginoo, nga mao nga “gikan sa walay kataposan ngadto sa walay kataposan siya mao gihapon, ug ang iyang mga katuigan dili gayod matapos” [ Doktrina ug mga Pakigsaad 76:4 ].

(Doctrinal New Testament Commentary [1973], 3:439)

Unsang kahulogan ang anaa diha sa mga kandiliro nga nakita sa panan-awon ni Juan?

Si Elder Bruce R. McConkie (1915–1985) sa Korum sa Napulog Duha ka Apostoles mitudlo:

Ang mga kandiliro nagdala sa kahayag; dili kay kini ang nagmugna niini. Ang gamit niini mao ang paghimo nga maanaa, dili sa paghimo niini nga usa ka binuhat. Busa pinaagi sa paggamit sa pito ka mga kandiliro aron sa paghulagway sa pito ka mga simbahan kang kinsa si Juan karon mohatag og tambag, ang Ginoo nagpakita nga ang Iyang mga kongregasyon dinhi sa yuta maoy magdala sa iyang kahayag ngadto sa kalibotan. Si Kristo mao ang kahayag alang sa kalibotan ( Juan 8:12). “Ipakita ninyo ang inyong kahayag aron kini moiwag sa kalibotan. Tan-awa Ako mao ang kahayag diin kamo mopakita—nga diin kamo nakakita kanako nga mihimo” [ 3 Nephi 18:24 ; Mateo 5:14–16 ].

(Doctrinal New Testament Commentary [1990], 3:442)

Dugang nga mga Kalihokan sa Pagkat-on

Ang konteksto sa basahon sa Pinadayag

Aron ipailaila ang konteksto sa basahon sa Pinadayag, mahimong magmugna og usa ka pasulit nga mangutana kang kinsa, asa, ug nganong kini nga basahon gisulat. Ang mga estudyante mahimong mobasa sa Pinadayag 1:4, 9 aron makakita og mga tubag.

Ang panan-awon ni Juan ug ang Basahon ni Mormon

Ang mosunod nga mga bersikulo mahimong gamiton aron magpakita nga ang panan-awon ni Juan importante gayod nga gitudlo pinaagi sa mga propeta sa Basahon ni Mormon. Dapita ang mga estudyante sa pagbasa sa 1 Nephi 14:18–29 ug mangita kon unsa ang nakita ni Nephi ug nganong wala siya misulat mahitungod sa mga bahin sa iyang panan-awon. Mahimo usab basahon sa mga estudyante ang Ether 4:16 aron mangita kon unsa ang gisulti sa Ginoo mahitungod sa katumanan sa panan-awon ni Juan.