Pinadayag 1–5

Kinatibuk-ang Pagpasabot

Unsa nga mga ideya ang mosantop sa imong hunahuna kon maghunahuna ka sa Basahon sa Pinadayag? Si Apostol Juan, kinsa misulat sa basahon, namahayag, “Bulahan sila kinsa nagbasa, ug sila kinsa naminaw ug nakasabot sa mga pulong niini nga panagna” (Ang Hubad ni Joseph Smith, Pinadayag 1:3 [diha sa appendix sa Ang Hubad ni Joseph Smith]). Diha sa basahon sa Pinadayag, makit-an nimo ang daghang pagsimbolo ug paghulagway nga magtudlo nimo mahitungod ni Jesukristo, sa plano sa Langitnong Amahan, ug sa Ikaduhang Pag-anhi sa Manluluwas. Imo usab nga makita kon sa unsang paagi si Jesukristo ug ang Iyang mga sumusunod mibarog nga madaugon labaw kang Satanas ug sa mga gingharian sa mga tawo. Gisulat ngadto sa pito ka simbahan sa Asia atol sa panahon sa grabeng pagpanggukod, ang basahon sa Pinadayag makatabang nimo nga matinud-anon nga mabuntog ang mga kalisdanan sa kataposang mga adlaw ug mangandam alang sa pagbalik sa Manluluwas.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang mahimong kinahanglan nga andamon nang daan para sa kada leksiyon:

Pinadayag 1

Katuyoan sa leksiyon: Kini nga leksiyon gituyo aron matabangan ang mga estudyante nga makasabot sa pipila ka simbolismo sa basahon sa Pinadayag ug unsa ang gitudlo niini kanila mahitungod kang Jesukristo.

Pagpangandam sa estudyante: Dapita ang mga estudyante sa pagbasa sa “ Pinadayag ni Juan ” diha sa Giya ngadto sa mga Kasulatan, anaa sa scriptures.ChurchofJesusChrist.org, ug motambong nga andam nga mopaambit unsa ang ilang interesadong makat-onan ug ngano.

Content nga ipakita: Ang hulagway ni Jesus taliwala sa mga kandila
Handout: Pag-andam og igong mga kopya sa handout nga “Mga Simbolo sa Panan-awon ni Juan” alang sa mga estudyante.

Pinadayag 2–3, Bahin 1

Katuyoan sa leksiyon: Kini nga leksiyon makapadasig sa mga estudyante sa pagpaminaw sa tingog sa Manluluwas nga nag-ila sa ilang maayong mga buhat ug naghatag kanila og gikinahanglan nga pagpanul-id.

Pagpangandam sa estudyante: Dapita ang mga estudyante sa pag-ila hain nga mga dapit sa ilang kinabuhi sila mibati nga ang Manluluwas nahimuot kanila. Isip kabahin niini nga imbitasyon, ang mga estudyante mahimong mag-ampo ug mangayo sa Langitnong Amahan nga tabangan sila nga makita kon unsa ang maayo nilang gibuhat. Mahimo usab silang mohangyo sa ilang mga ginikanan aron tabangan sila.

Butang o hulagway nga ipakita: Pag-andam sa pagpakita og hulagway ni Jesus diha sa Pultahan (Libro sa mga Hulagway sa Ebanghelyo [2009], nu. 65) ug sa mapa sa pito ka mga simbahan.
Bidyo: “Mrs. Patton—ang Istorya Nagpadayon” (16:09; tan-awa gikan sa time code 15:08 hangtod sa 15:55)

Sugyot sa pagtudlo pinaagi sa videoconference: Samtang mangita ang mga estudyante sa maayong mga buhat nga namatikdan ni Juan nga gibuhat sa pito ka simbahan ug ang pagpanul-id nga iyang gihatag kanila, dapita ang mga estudyante sa pag-type sa unsay ilang nakit-an sa chat. Human sa igong panahon, hangyoa ang klase sa pag-search sa chat ug pagpili og usa ka panabot gikan sa usa ka klasmeyt nga gusto nilang hisgotan nga mas detalyado. Ang estudyante nga nag-post sa panabot mahimong hangyoon sa pagpasabot kon unsa ang iyang gisulat. Pangutana og mga pangutana aron matabangan ang klase sa paghisgot sa importansiya sa napiling hilisgotan.

Pinadayag 2–3, Bahin 2

Katuyoan sa leksiyon: Kini nga leksiyon makatabang sa mga estudyante nga makabati og dugang tinguha nga mabuntog ang mga hagit ug madawat ang mga panalangin nga gisaad nga ihatag sa Manluluwas.

Pagpangandam sa estudyante: Dapita ang mga estudyante sa paghangyo og usa ka sakop sa pamilya o kasaligan nga higala sa pagpakigbahin og usa ka kasinatian ngadto kanila sa dihang nakabuntog siya og babag uban sa tabang sa Manluluwas.

Bidyo: “Makahimo Kamo sa Pagpundok sa Israel!” (10:53; tan-awa gikan sa time code 4:48 hangtod sa 5:22)
Content nga ipakita: Ikonsiderar ang pagpakita sa tsart uban sa mga pakisayran sa kasulatan ug sa mga kahulogan nga gilista ubos sa tsart. Mahimong makatabang usab ang pagpakita sa mga opsiyon nga makita sa kalihokan sa pagtuon sa pagbuntog aron mapilian sa mga estudyante.

Sugyot sa pagtudlo pinaagi sa videoconference: Mahimong makatabang ang paghimo og slide presentation o paggamit og lain nga mga paagi sa pagpakita sa mga kahulogan alang sa kalihokan sa pagpangita sa kasulatan ug sa mga opsiyon sa pagtuon alang sa kataposang kalihokan. Ikonsiderar ang pagpatugtog og makapabayaw nga musika samtang ang mga estudyante mokompleto niining duha ka mga kalihokan.

Pinadayag 5

Katuyoan sa leksiyon: Kini nga leksiyon gituyo aron tabangan ang mga estudyante nga madugangan ang ilang tinguha sa pagsimba sa Langitnong Amahan ug ni Jesukristo nga adunay dugang nga gugma ug sinseridad.

Pagpangandam sa estudyante: Dapita ang mga estudyante sa pagpakig-istorya sa usa ka miyembro sa pamilya o lider sa Simbahan mahitungod sa unsa ang gipasabot sa pagsimba sa Langitnong Amahan ug ni Jesukriso.

Bidyo: “Ang Mga Panalangin sa Pagsimba” (11:28; tan-awa gikan sa time code 3:34 hangtod sa 4:45 ug gikan sa 8:54 hangtod sa 11:14)
Content nga ipakita: Ang pamahayag ni Bishop Dean M. Davies ug, kon tinguhaon, ang lima ka mga pangutana nga gilista sa kataposan sa leksiyon.

Sugyot sa pagtudlo pinaagi sa videoconference: Mahimong makatabang ang pagpakita sa pamahayag ni Bishop Dean M. Davies samtang ang mga estudyante maghisgot unsay ilang nakat-onan mahitungod sa pagsimba gikan sa kinutlo.

Pagrebyo sa Doktrinal nga Kahanas 24

Katuyoan sa leksiyon: Kini nga leksiyon makahatag sa mga estudyante og mga oportunidad sa pagbansay sa paggamit sa pipila sa mga tudling sa doktrinal nga kahanas sa nagkalain-laing tinud-anay nga sitwasyon.

Pagpangandam sa estudyante: Dapita ang mga estudyante sa paggamit sa Doktrinal nga Kahanas nga app o sa lain pang mga paagi sa pagbansay sa pagsag-ulo sa pakisayran sa doktrinal nga kahanas sa Bag-ong Tugon ug sa mahinungdanong mga hugpong sa pulong sa kasulatan. Hangyoa sila nga motambong sa klase nga andam mopaambit og usa ka tudling nga aduna na silay mga kasinatian sa paggamit.

Content nga ipakita: Ang handout nga giulohan og “Doktrinal nga Kahanas sa Bag-ong Tugon: 1 Mga Taga-Corinto–Pinadayag”

Sugyot sa pagtudlo pinaagi sa videoconference: Kon ang mga estudyante mopakigbahin og mga senaryo, mahimo silang dapiton sa pag-post niini gamit ang chat nga function. Mahimo dayong dapiton ang klase sa pagbasa sa mga senaryo, pagpangita og mga tudling sa doktrinal nga kahanas nga magamit sa mga senaryo, ug sa pagpasabot kon sa unsang paagi kini magamit.