Pinadayag 5

“Ang Kordero … Takos”

Painting of Jesus Christ in America, greeting Nephites.

Sa imong hunahuna unsa kaha ang buot ipasabot sa pagsimba sa Langitnong Amahan ug kang Jesukristo? Nganong sa imong hunahuna gisimba nato Sila? Nakita ni Juan ang trono sa Dios ug ang nagkalain-laing mga gihimaya nga mga binuhat nga nagdayeg ug nagsimba Kaniya. Kini nga leksiyon makatabang kanimo nga madugangan ang imong tinguha sa pagsimba sa Langitnong Amahan ug ni Jesukristo nga adunay dugang nga gugma ug sinseridad.

Pagpalig-on sa atong relasyon sa Langitnong Amahan ug ni Jesukristo. Ang mga estudyante kinsa naghigugma sa Langitnong Amahan ug kang Jesukristo ug nahibalo sa Ilang gugma alang kanila mibati og tinud-anay nga tinguha nga mahiduol Kanila. Pahinumdomi ang mga estudyante nga ang seminary makatabang kanila nga mabati ang gugma sa Dios alang kanila.

Pagpangandam sa estudyante: Dapita ang mga estudyante sa pagpakig-istorya sa usa ka miyembro sa pamilya o lider sa Simbahan mahitungod kon unsa ang buot ipasabot niini sa pagsimba sa Langitnong Amahan ug kang Jesukriso.

Posible nga mga Kalihokan sa Pagkat-on

Ang trono sa Dios

Ikonsiderar ang pagsugod sa klase pinaagi sa pagkanta og himno nga nagdayeg sa Dios, sama sa “Himaya sa Dios sa Kahitas-an” (Mga Himno, nu. 24). Dapita ang mga estudyante sa pagmatikod sa kinaiya sa pagdayeg diha sa himno.

Lain pang kapilian mao ang pagpahunahuna sa mga estudyante sa usa ka tawo nga ilang gihigugma ug giunsa nila pagpakita nianang tawhana nga sila nagmahal kaniya. Dapita ang mga estudyante sa pagkonsiderar giunsa nila pagpakita og gugma sa Dios.

Dapita ang mga estudyante sa paglista sa ilang mga tubag diha sa pisara.

Unsa ang imong nahibaloan mahitungod sa Langitnong Amahan ug ni Jesukristo nga nakapa-ukyab sa imong kasingkasing og usa ka tinuod nga tinguha sa pagdayeg Kanila?

Ang pagdayeg sa Langitnong Amahan ug ni Jesukristo mahimong adunay dakong epekto sa atong mga kinabuhi ug makatabang kanato nga mobati nga duol Kanila.

Unsa ang pipila ka mga oportunidad nga aduna ka aron sa pagsimba sa Amahan ug sa Anak?

Paggahin og higayon sa paghunahuna kon kapila ka kasagaran tinud-anay nga nagdayeg sa Langitnong Amahan ug kang Jesukristo. Pamalandongi kon sa unsang paagi mausab ang imong kinabuhi kon magdayeg ka kanila nga mas makanunayon ug sa makahuluganong paagi. Tinguhaa ang impluwensiya sa Espiritu Santo diha sa imong pagtuon sa Pinadayag 5 aron makahibalo kon sa unsang paagi nimo mas tinud-anay nga madayeg ang Langitnong Amahan ug si Jesukristo.

Ang Kordero Takos

A modern replica of an ancient papyrus scroll, folded and sealed with multiple clay seals. Sealing an ancient document in this way identified its owner and his authority, made the document legally binding, and protected it from unauthorized disclosure. Jesus Christ’s role as the only person worthy to open and read the sealed book in Revelation 5 highlights His authority as the executor of God’s plan of salvation.

Diha sa iyang panan-awon, nakita ni Juan ang trono sa Dios diha sa celestiyal nga gingharian. Sa palibot sa trono mao ang lain-laing gihimaya nga mga binuhat ug mga mananap nga nagdayeg ug nagsimba sa Dios (tan-awa ang Pinadayag 4:1–11). Iyang nakita ang Langitnong Amahan nga naglingkod sa Iyang trono, naggunit og libro nga gisilyohan og pito ka silyo (tan-awa ang Pinadayag 5:1). Ang libro naglangkob sa kabubut-on, mga misteryo, ug mga buhat sa Dios sulod sa 7,000 ka tuig sa temporal nga paglungtad sa yuta (tan-awa sa Doktrina ug mga Pakigsad 77:6–7).

Basaha ang Pinadayag 5:2–4 , nga mangita sa reaksiyon ni Juan.

Unsa ang imong namatikdan?
Tungod kay ang basahon nga adunay mga silyo nagrepresentar sa temporal nga kasaysayan sa yuta, si Juan tingali nabalaka nga kon walay tawo nga takos sa pag-abli niini, nan ang katuyoan sa Dios sa paglalang sa yuta dili mahitabo. Unsay mahitabo sa mga anak sa Langitnong Amahan kon ang Iyang plano alang sa ilang kaluwasan dili gayod mapahigayon?

Basaha ang Pinadayag 5:5–7 , nga mangita kon nganong si Juan dili na kinahanglang mohilak. Timan-i nga diha sa Hubad ni Joseph Smith sa bersikulo 6 , ang numero siyete giilisan ngadto sa dose (diha sa Apendiks sa Ang Hubad ni Joseph Smith).

Ang mga estudyante mahimong dapiton sa pagpakigbahin sa ilang mga pagbati alang sa Manluluwas ug nganong sila mapasalamaton Kaniya. Samtang ang mga estudyante nagtuon, hatagi sila og mga kahigayonan sa pagpaambit unsa ang ilang nadiskobrehan ug papangutan-a. Tabangi sila nga makakita og mga tubag diha sa mga kasulatan. Mahimong hisgotan unsa ang ilang nakat-onan mahitungod sa Manluluwas gikan sa Iyang mga ngalan ug sa mga paagi nga Siya gihulagway.

Dugang nga mga panabot alang sa Pinadayag 5:5–6 anaa sa “Komentaryo ug Background nga Impormasyon” nga bahin.

Basaha ang Pinadayag 5:8–14 , nga mangita kon giunsa sa nagkalainlaing mga gihimayang binuhat pagsanong sa dihang nakuha ni Jesukristo ang basahon gikan sa kamot sa Langitnong Amahan. Mahimo usab nimong basahon kon giunsa paghulagway ni Joseph Smith ang mga binuhat sa palibot sa trono sa Dios diha sa Doktrina ug mga Pakigsaad 76:20–21 .

Sa imong hunahuna nganong ingon man niini ang pagsanong sa gihimayang mga binuhat?
Hunahunaa nga anaa ka didto. Sa imong hunahuna unsa ang imong bation? Unsa ang imong buhaton?
Unsa ang atong makat-onan gikan sa giunsa pagsimba sa gihimayang mga binuhat ang Langitnong Amahan ug si Jesukristo?

Usa ka kamatuoran nga atong makat-onan mao nga samtang kita makaila ug makabati og pasalamat alang sa Langitnong Amahan ug ni Jesukristo, kita nagtinguha sa pagsimba ug pagdayeg Kanila.

Pagsimba

Ikonsiderar ang pagpakita sa mosunod nga pamahayag.

Si Bishop Dean M. Davies (1951–2021) sa Presiding Bishopric mitudlo mahitungod sa pagsimba. Mahimo nimong basahon ang pamahayag sa ubos o tan-awon ang “Ang mga Panalangin sa Pagsimba” (gikan sa time code 3:34 hangtod sa 4:45 ug 8:54 hangtod sa 11:14), nga anaa sa ChurchofJesusChrist.org.

11:28

Kon kita magsimba sa Dios, moduol kita Kaniya inubanan sa matinahurong gugma, kamapainubsanon, ug pagdayeg. Kita moila ug modawat Kaniya isip atong Hari, ang Tiglalang sa uniberso, ang atong pinalangga ug walay kinutuban ang kamahigugmaon nga Amahan.

Motahod ug motamod kita Kaniya.

Motugyan kita sa atong kaugalingon ngadto Kaniya.

Mobayaw kita sa atong mga kasingkasing diha sa pag-ampo, mopakabililhon sa Iyang pulong, magmaya sa Iyang grasya, ug mopasalig sa pagsunod Kaniya uban sa gipahinungod nga kamaunungon. …

Kon kita magsimba, ang atong mga kasingkasing modayeg sa atong bulahang Dios sa buntag, hapon ug gabii.

Kita makanunayong mobalaan ug motahod Kaniya—sa atong mga meetinghouse, mga panimalay, mga templo, ug sa tanan natong paghago.

Kon magsimba kita, atong ibukas ang atong mga kasingkasing sa makaayo nga gahom sa Pag-ula ni Jesukristo.

Ang atong kinabuhi mahimong timaan ug pahayag sa atong pagsimba.

(Dean M. Davies, “Ang mga Panalangin sa Pagsimba,” Ensign o Liahona, Nob. 2016, 94–95)

Unsay imong nakat-onan mahitungod sa pagsimba gikan niini nga pamahayag?

Aron masusi ang pagsabot sa mga estudyante bahin sa pagsimba, dapita sila sa pagpasabot sa konsepto sa pagsimba sa Dios ngadto sa usa ka klasmeyt. Pamatia pag-ayo ang ilang mga tubag, ug pagtanyag og dugang nga mga pagsabot kon gikinahanglan.

Sa imong hunahuna sa unsang paagi ang sinsero nga pagsimba sa Langitnong Amahan ug ni Jesukristo makapanalangin sa imong kinabuhi?
Kanus-a ka mibati nga duol sa Langitnong Amahan o ni Jesukristo pinaagi sa sinsero nga pagsimba?
Sa unsang paagi nga ang imong pagsimba mas makapakita sa imong mga pagbati alang sa Langitnong Amahan ug kang Jesukristo?
Pagpili og usa o labaw pa sa mosunod nga mga aksiyon, ug pamalandong kon sa unsang paagi ang sinsero nga pagsimba makatabang kanila nga mahimong mas makahuluganon: pag-ampo, pagtuon sa kasulatan, pag-ambit sa sakramento, pagtahod sa Igpapahulay, pagpuasa, pagtambong sa templo.
Unsa ang imong nabati nga nakapaaghat nga palamboon o usbon mahitungod sa paagi sa imong pagsimba?

Mahimong angayan ang pagpaambit og personal nga kasinatian sa pagsimba sa Langitnong Amahan ug ni Jesukristo.

Komentaryo ug Background nga Impormasyon

Kinsa ang “Leon sa banay ni Juda” ug ang “Gamot ni David”?

Kining duha ka hugpong sa mga pulong mga titulo ni Jesukristo. Ang “Leon sa banay ni Juda” usa ka angay nga titulo tungod kay ang usa ka leon harianon ug gamhanan ug tungod kay ang Manluluwas natawo pinaagi sa kaliwatan ni Juda (tan-awa sa Genesis 49:8–10 ; Mateo 1:3 ; Mga Hebreohanon 7:14). Ang titulo nga “Leon ni Juda” usa ka bug-os nga kaatbang sa maaghop ug igsakripisyong Kordero nga nahisgotan diha sa Pinadayag 5:6 . Kining duha ka mga imahe nagpasabot nga si Kristo nagbaton og kaharianon ug kaaghop.

Gitawag usab si Jesus og ang “Gamot ni David.” Ang usa ka gamot naghatag og makaluwas sa kinabuhi nga tubig ug pagkaon sa usa ka tanom—ingon niana ang misyon ni Jesukristo ngadto sa tanan kinsa nagdawat Kaniya isip ilang Manluluwas ug Manunubos (tan-awa ang Juan 15:1–8 ; tan-awa usab ang Isaias 11:1 ; 53:2). Sa kaulahian diha sa pagpadayag ni Juan, si Kristo Mismo mipahayag, “Ako mao ang gamot ug ang kaliwat ni David” ( Pinadayag 22:16). Ang mga tigsulat sa Ebanghelyo kanunay nga naghatag og gibug-aton nga si Jesus usa ka kaliwat ni Haring David (tan-awa sa Mateo 1:1 ; Marcos 10:47 ; Lucas 1:32 ; Juan 7:42).

Unsa ang gisimbolo sa mga mata ug mga sungay diha sa Pinadayag 5:6 ?

Diha sa mga kasulatan, ang mga sungay kasagaran simbolo sa gahom o awtoridad, ug ang mga mata mahimong simbolo sa kahayag ug kahibalo. Diha sa Ang Hubad ni Joseph Smith ang numero siyete giilisan ngadto sa dose (diha sa Apendiks sa Ang Hubad ni Joseph Smith). Ang numerong napulog duha mahimong magsimbolo sa balaanong gobyerno ug organisasyon, o sa pagkapari. Ang Hubad ni Joseph Smith nag-ingon usab nga ang napulog duha ka mga sungay ug mga mata mao ang “napulog duha ka mga sulugoon sa Dios,” nga mahimong nagrepresentar sa Napulog Duha ka mg Apostoles ni Jesukristo.

Kinsa ang atong simbahon?

Si Presidente Russell M. Nelson mipamatuod:

Ang makatubos nga sakripisyo ug Pagkabanhaw ni Jesukristo miusab sa matag mga kinabuhi nato hangtod sa hangtod. Gimahal nato Siya ug mapasalamatong nagsimba Kaniya ug sa atong Langitnong Amahan.

(Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101)

Si Elder Gerrit W. Gong sa Korum sa Napulog Duha ka Apostoles mitudlo:

Mosimba kita sa Dios nga Mahangturong Amahan ug sa Iyang Anak, si Jesukristo, dili kang Propeta Joseph o ni bisan kinsang mortal nga lalaki o babaye.

(Gerrit W. Gong, “Tanan nga mga Kanasoran, mga Kaliwatan, ug mga Pinulongan,” Liahona, Nob. 2020, 39)

Sa unsang paagi nga ang pagsimba makatabang kanako nga mahimong sama sa Dios?

Si Elder Bruce R. McConkie (1915–85) sa Korum sa Napulog Duha ka Apostoles mitudlo:

Dali simbaha ang Ginoo! Unsaon niini paghimo? Ang pagsundog mao ang hingpit nga porma sa pagsimba. Mipasidungog kita niadtong kinsa atong gisunod. Ang labing hingpit nga paagi sa pagsimba mao ang mahimong balaan ingon nga si Jehova balaan. Mao ang mahimong putli sama nga si Kristo putli. Kini mao ang pagbuhat sa mga butang nga makapahimo kanato nga mahimong sama sa Amahan. …

Sa unsang paagi nato dayegon ang Ginoo? Atong buhaton kini pinaagi sa pag-uswag gikan sa grasya ngadto sa grasya, hangtod nga atong madawat ang kahingpitan sa Amahan ug mahimaya sa kahayag ug kamatuoran sama sa atong kahimtang sa atong Sumbanan ug Prototype, ang Gisaad nga Mesiyas.

(Bruce R. McConkie, The Promised Messiah: The First Coming of Christ [1978], 568–69)