PAINTING BY GREG Olson of Christ knocking on a door
Si Jesukristo nahibalo sa matag usa kanato. Siya nasayod unsa ang maayo natong gibuhat, ug Siya nasayod unsay mas maayo pa natong mabuhat aron mahimong mas sama Kaniya. Sa lahi-lahi nga mga mensahe ngadto sa matag pito ka mga simbahan sa Asya, gitala ni Juan ang tingog ni Jesus nga nag-ila sa maayong mga buhat sa mga Santos ug nagpasidaan kanila sa mga butang nga kinahanglan nilang bag-ohon. Kini nga leksiyon makapadasig kanimo sa pagpaminaw sa tingog sa Manluluwas nga nag-ila sa imong maayong mga buhat ug naghatag kanimo og gikinahanglan nga pagtul-id.
Pagtutok sa pagtabang sa mga estudyante. Panahon sa pagpangandam sa leksiyon, pagtutok sa mga estudyante ug dili lamang sa materyal sa leksiyon. Ipangutana “Unsa ang buhaton sa mga estudyante sa klase karon”? o “Unsaon sa mga estudyante nga makadiskobre sa mga kamatuoran nga mahimong makahuluganon alang kanila?”
Pagpangandam sa estudyante: Dapita ang mga estudyante sa pag-ila hain nga mga dapit sa ilang kinabuhi sila mibati nga ang Manluluwas nahimuot kanila. Isip kabahin niini nga imbitasyon, ang mga estudyante mahimong mag-ampo ug mangayo sa Langitnong Amahan nga tabangan sila aron makasabot unsa ang maayo nilang gibuhat. Mahimo usab silang mohangyo sa ilang mga ginikanan aron tabangan sila.
Posible nga mga Kalihokan sa Pagkat-on
Timan-i nga ang mga mensahe ni Juan naglakip usab sa mga saad sa Manluluwas alang sa kadtong nakabuntog sa mga pagsulay ug mga hagit sa mortalidad. Kini mas detalyado nga pagahisgotan sa sunod nga leksiyon.
Paminawa ang tingog sa Manluluwas
Pagpakita og usa ka hulagway ni Jesus nga nanuktok sa pultahan samtang ang mga estudyante nagkonsiderar sa mosunod nga pangutana.
Imahe
Jesus Christ depicted knocking on a door. Christ is portrayed wearing red and white robes. The painting illustrates the concept of Christ “knocking on the door,” as described in scripture. There is no doorknob depicted in the painting, symbolizing that the door must be opened from within.
Unsa ang imong bation kon makadungog ka og tuktok sa pultahan sa inyong balay ug nakamatikod nga ang Manluluwas ang nanuktok? Ngano man?
Sa iyang mensahe ngadto sa mga miyembro sa Simbahan sa Laodicea (diin ang usa sa pito ka mga simbahan nga gisulatan ni Juan sa Asya natukod; tan-awa ang Pinadayag 1:11), mitapos si Juan pinaagi sa usa ka pagdapit gikan kang Jesukristo.
Basaha ang Pinadayag 3:20 ug ilha ang imbitasyon sa Manluluwas.
Paggahin og panahon sa pagtabang sa mga estudyante aron makasabot sa simbolismo ni Jesus nga nagtindog sa pultahan ug nanuktok. Mahimong hisgotan unsa ang gipasabot niini nga patuktokon Siya ug moanhi ug mokaon kauban nato sa atong panahon. Pananglitan, diha sa atong pagdapit sa Manluluwas sa atong kinabuhi Siya maghatag og kalig-on, kahimsog, ug kahupay alang sa atong mga kalag.
Unsa sa imong hunahuna ang gisimbolo nga kahulogan sa Pinadayag 3:20 ?
Ngano sa imong hunahuna nga ang Manluluwas nanuktok sa pultahan inay nga mosulod dayon?
Unsaon nimo pag-abli ang pultahan ngadto kang Jesukristo ug magtinguha nga mas maminaw sa Iyang tingog?
Unsa ang imong bag-o lang nabuhat aron makapaminaw sa Iyang tingog ug makaabli sa pultahan?
Bisan tuod og si Juan mao ang mensahero, si Jesus mao ang tingog sa maong mga mensahe ngadto sa pito ka mga simbahan. Diha sa imong pagtuon sa mga mensahe sa Pinadayag 2–3, paminaw sa tingog ni Jesukristo nganha kanimo. Pagkonsiderar og mga paagi nga ikaw makaabli sa pultahan aron tugotan ang Manluluwas nga makauban ug makalig-on kanimo.Samtang ang matag usa sa pito ka mga mensahe talagsaon, aduna usab silay pipila ka pagkaparehas.
Ang mga estudyante makabaton og kahigayonan sa pagtuon niining mga bersikulo sa mas detalyado nga paagi sa umaabot nga leksiyon. Alang niini nga kalihokan, dapita lang sila sa pag-ila ug paghisgot sa kamahinungdanon sa gibalik-balik nga hugpong sa pulong “nasayod ako sa imong mga nabuhat.”
Pangitaa ug mahimong markahan ang gibalik-balik nga hugpong sa pulong “nasayod ako sa imong mga nabuhat” diha sa Pinadayag 2:2, 9, 13, 19 ; 3:1, 8, 15 . Sa niini nga mga bersikulo gitala ni Juan ang tingog ni Jesukristo, nga nagrepresentar usab sa kabubut-on sa Langitnong Amahan.
Ngano kaha nga importante man nga masabtan nga ang Langitnong Amahan ug si Jesukristo “nasayod sa [imong] mga nabuhat”?
Usa ka kamatuoran nga atong makita sa Pinadayag 2–3 mao ang tungod ang Langitnong Amahan ug si Jesukristo nahibalo sa matag usa kanato, Sila makaila sa atong maayong mga buhat ug mopasidaan kanato sa gikinahanglan nga mga pagbag-o. Pangita og ebidensiya niini nga kamatuoran diha sa imong pagtuon sa tambag ngadto sa pito ka mga simbahan.
Tambag ngadto sa pito ka mga simbahan
Ipakita ang mosunod nga mapa ug mga pakisayran. Mahimong magtuon sa usa sa pito ka mga simbahan isip usa ka klase aron ipakita kon unsaon sa pagtubag ang mga pangutana nga mosunod sa mga pakisayran. Ang nahibilin nga mga simbahan mahimo dayon nga bahinon tali sa klase. Dapita ang mga estudyante sa pagtuon sa mga bersikulo ug motubag sa mga pangutana sa ilang kaugalingon o diha sa gagmayng mga grupo. Bisitaha kauban sa mga estudyante diha sa ilang pagtuon ug paghatag og tabang kon gikinahanglan.
Ang impormasyon sa mosunod nga mga pakisayran ug ang “Komentaryo ug Background nga Impormasyon” nga bahin mahimong makatabang sa mga estudyante nga makasabot sa lisod nga mga pulong ug mga hugpong sa pulong.
Imahe
Map of the Mediterranean.
Tan-awa ang mapa sa pito ka mga simbahan ug pagpili og labing menos duha ka mga simbahan aron tun-an. Pangitaa ang maayong mga buhat nga giila ni Jesukristo sa pipila ka mga simbahan ug ang pagpanul-id nga Iyang gihatag sa matag simbahan.
Efeso ( Pinadayag 2:1–7): Ang mga Nicolaita usa ka relihiyoso nga grupo nga niangkon nga makahimo sila og sekswal nga sala nga walay silot tungod kay ang grasya sa Dios moluwas kanila.
Pergamo ( Pinadayag 2:12–17): Ang doktrina ni Balaam nagpasabot sa paglapas sa mga sugo sa Dios aron sa pagtagbaw sa kalibotanon nga mga tinguha o sa pagpangita sa kadungganan sa mga tawo (tan-awa sa 2 Pedro 2:15). Timan-i ang kahulogan sa mga Nicolaita sa ibabaw.
Filadelfia ( Pinadayag 3:7–13): Kini nga mensahe nag-ila lamang sa maayong mga buhat.
Laodicea ( Pinadayag 3:14–22): Kini nga mensahe nagtul-id lamang sa mga dili perpektong mga buhat. Timan-i nga aron mahimong dagaang nagpasabot nga dili hingpit nga mapasaligon sa ebanghelyo ni Jesukristo.
Unsang maayong mga buhat ang giila ni Jesukristo? Sa unsang paagi nimo nakita ang susamang maayong mga buhat taliwala sa mga miyembro sa Simbahan sa atong panahon?
Unsa nga pagpanul-id o tambag ang gihatag ni Jesus ngadto sa simbahan nga imong napili? Nganong maayo man usab kini nga tambag alang sa Simbahan karon?
Human sa igong panahon, dapita ang mga estudyante sa pagpakigbahin diha sa klase kon unsa ang ilang nakat-onan. Ikonsiderar ang paghimo og usa ka lista sa maayong mga buhat ug gikinahanglan nga mga pagpanul-id ngadto sa pisara. Samtang ang sunod nga pangutana gihisgotan, ang mga estudyante mahimong dapiton sa pagpaambit sa ilang mga kasinatian gikan sa pagpangandam nga kalihokan.
Nganong si Jesukristo talagsaon man nga nahaom sa pagkahibalo unsa ang maayo natong gibuhat ug sa unsang paagi kita nagkinahanglan og pag-uswag?
Tambag alang sa imong kaugalingong kinabuhi
Si Presidente Thomas S. Monson (1927–2018) miawhag kanato sa pag-abli sa pultahan ug sa pagtugot sa Manluluwas ngadto sa atong mga kinabuhi. Basaha ang mosunod nga pamahayag o tan-awa ang bidyo nga “Mrs. Patton—ang Istorya Nagpadayon” gikan sa time code 15:08 hangtod sa 15:56, anaa sa ChurchofJesusChrist.org.
Imahe
Official portrait of President Thomas S. Monson, 2008.
Uban sa tanang kusog sa akong kalag ako mopamatuod nga ang atong Langitnong Amahan nahigugma sa matag usa kanato. Siya nakadungog sa mga pag-ampo sa mapainubsanon og [mga] kasingkasing, Siya nakadungog sa atong pagpangayo og panabang. … Ang Iyang Anak, ang atong Manluluwas ug Manunubos, mamulong sa matag usa kanato karon: “Tan-awa nagatindog ko sa pultahan ug nagatuktok; kon may magapatalinghog sa akong tingog ug moabli sa pultahan, kaniya mosulod ako” [ Pinadayag 3:20 ].
Maminaw ba kita niana nga pagtuktok? Maminaw ba kita niana nga tingog? Ablihan ba nato kana nga pultahan ngadto sa Ginoo, aron kita makadawat og tabang nga Iyang giandam nga ihatag? Ako nag-ampo nga kita mohimo.
Tan-awa og balik ang hulagway ni Jesus nga nanuktok sa pultahan ug pamalandong kon unsa ang imong nakat-onan.
Ikonsiderar ang paghatag sa mga estudyante og panahon sa pagtubag sa mosunod nga mga pangutana diha sa ilang mga journal sa pagtuon.
Unsa sa imong hunahuna ang gusto sa Manluluwas nga imong mahibaloan nga maayo nimong gibuhat?
Unsa kaha ang idasig sa Manluluwas kanimo nga usbon sa imong kinabuhi?
Komentaryo ug Background nga Impormasyon
Unsa ang “[paghigugma]…sama sa sinugdanan” nga giingon sa Pinadayag 2:4 ?
Ang mga Santos sa Efeso gipanton tungod sa pagbalewala sa kasugoan sa paghigugma sa Dios (tan-awa ang Mateo 22:37–38).
Pinadayag 2:9 . Sa unsang paagi kita makasinati og kakabus ug dato lang gihapon?
Ang Manluluwas miila sa hugot nga pagtuo sa mga Santos sa Esmirna ug mipasalig kanila sa mahangtorong katigayonan nga gisaad niadtong motuman sa Iyang mga sugo (tan-awa usab sa Santiago 2:5 ; Doktrina ug mga Pakigsaad 11:7).
“Si Balaam usa ka propeta sa Daang Tugon, kansang mga buhat girekord sa Numeros 22–24 ; 31:16 . Sa sinugdanan makita siya nga nagmatinud-anon sa Ginoo ug sa Iyang mga katawhan, balik-balik nga mibalibad sa hangyo ni Balak nga itunglo ang Israel. Bisan pa niana, si Balaam sa kadugayan midawat sa gitanyag ni Balak nga mga katigayonan ug gitudloan si Balak unsaon sa paghimo sa kasundalohan sa Israel nga mahuyang ang ilang mga kaugalingon pinaagi sa sekswal nga pagpakasala ug pagsimba og mga dios-dios (tan-awa sa Numeros 25:1–5 ; 31:13–16). Ang plano naglakip sa paghimo nga ang mga babaye nga taga Moab motintal sa mga lalaki sa Israel ug awhagon sila sa paghalad og mga sakripisyo ngadto sa mga dios-dios, nga maoy hinungdan sa ilang pagkalaglag sa espirituhanong paagi” (New Testament Student Manual [2014], 534).
Pinadayag 3:14 . Nganong gitawag man si Jesus og “[ang] Amen”?
“Sa Hebreohanon ug sa Gresyanhon ang pulong nga ‘amen’ nagpasabot nga tinuoray, sa seguradong paagi, o matinud-anong paagi. Sa Pinadayag 3:14 , ang pagkamatinud-anon ug kamatinuoron ni Kristo isip mao ang talagsaong ‘Amen’ gipresentar nga maoy kaatbang sa pagka-dagaang [dili kaayo init dili kaayo bugnaw] nga kinaiya sa mga taga Laodicea [tan-awa usab sa Pinadayag 3:15–16 ]” (New Testament Student Manual [2014], 536).
Sa unsang paagi nako madapit ang Dios sa pagpaambit sa Iyang kahimuot ug pagpanul-id kanako?
Si Presidente Henry B. Eyring sa Unang Kapangulohan mitudlo:
Imahe
Official Portrait of President Henry B. Eyring taken March 2018.
Sa pagsusi ninyo sa inyong kinabuhi atol sa ordinansa sa sakrament, unta ang inyong mga hunahuna makasentro dili lamang sa mga butang nga nasayop ninyo pagbuhat apan sa mga butang usab nga nabuhat ninyo sa sakto—mga gutlo sa dihang gibati ninyo nga ang Langitnong Amahan ug ang Manluluwas nahimuot kaninyo. Mahimo man gani nga mogahin kamo og panahon atol sa sakrament nga mohangyo sa Dios sa pagtabang kaninyo nga makakita niining mga butanga. Kon inyong buhaton, mosaad ko nga kamo dunay bation. Mobati kamo og paglaom.
(Henry B. Eyring, “Kanunay Mohinumdom Kaniya,” Liahona, Peb. 2018, 5)
Dugang nga mga Kalihokan sa Pagkat-on
Usa ka pasiuna ngadto kang Jesukristo
Ang matag usa sa pito ka mga mensahe nagsugod sa usa ka pasiuna kang Jesukristo. Pahinumdomi ang mga estudyante sa simbolismo nga ilang nakat-onan sa Pinadayag 1. Dapita sila sa pagtuon sa unang bersikulo sa matag mensahe nga gipadala ngadto sa matag usa sa pito ka simbahan, nga mangita sa paghulagway ni Jesukristo (tan-awa sa Pinadayag 2:1, 8, 12, 18 ; 3:1, 7, 14). Dayon, dapita ang mga estudyante sa pagpaambit ngadto sa klase kon unsay ilang nakat-onan gikan sa matag paghulagway.
Hingpit nga pagkamapasaligon ngadto kang Jesukristo
Human madiskobrehan sa mga estudyante nga ang mga Santos sa Laodicea “dagaang” (tan-awa sa Pinadayag 3:15–16), dapita sila sa paghunahuna kon unsa kaha kini ang mahimong dagaang diha sa ebanghelyo. Dapita ang mga estudyante sa pagpamalandong sa mosunod nga mga pangutana: Sa sukdanan nga 1–10, unsaon nimo pag-grado ang imong kamapasaligon ngadto ni Jesukristo? Aron malikayan nga mahimong dagaang, unsay imong mahimo aron ang imong pasalig ngadto sa Manluluwas mas motukma sa Iyang pasalig kanimo?
Aron matabangan ang mga estudyante nga makat-on og dugang mahitungod sa hingpit nga pagkamasaligon, ikonsiderar ang pagtan-aw sa bidyo nga “Tinuod nga mga Disipulo sa Manluluwas” gikan sa time code 2:22 hangtod sa 4:37, nga anaa sa ChurchofJesusChrist.org. Ipasabot nga sa Australia ang mga pulong nga “fair dinkum” nagpasabot nga hingpit nga mapasaligon o sa walay pagduhaduha tinuod, sukwahi sa pagka-dagaang. Hangyoa ang mga estudyante sa pagpangita og mga pagkaparehas tali sa mga istorya ni Elder Vinson ug sa pagkamapasaligon sa ebanghelyo ni Jesukristo.