Pagrebyo sa Doktrinal nga Kahanas 24
Gamita ang mga Tudling sa Doktrinal nga Kahanas
Ang usa sa mga katuyoan sa doktrinal nga kahanas mao ang pagtabang kanimo nga makakat-on kon unsaon paggamit ang mga tudling sa doktrinal nga kahanas sa imong kaugalingong kinabuhi. Kini nga leksiyon maghatag kanimo og mga kahigayonan sa pagbansay sa paggamit sa pipila sa mga tudling sa doktrinal nga kahanas ngadto sa nagkalainlaing mga tinud-anay nga sitwasyon.
Pagpangandam sa estudyante: Dapita ang mga estudyante sa paggamit sa Doktrinal nga Kahanas nga app o sa lain pang mga paagi sa pagbansay sa pagsag-ulo sa mga pakisayran sa doktrinal nga kahanas sa Bag-ong Tugon ug sa mahinungdanong hugpong sa mga pulong sa kasulatan. Hangyoa sila nga motambong sa klase nga andam mopaambit og usa ka tudling nga aduna na silay mga kasinatian sa paggamit.
Posible nga mga Kalihokan sa Pagkat-on
Paggamit sa mga baroganan sa ebanghelyo
Ang tudling sa doktrinal nga kahanas nga leksiyon kinahanglang itudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.
Si Presidente Dieter F. Uchtdorf, kanhi sa Unang Kapangulohan, mipasabot sa kamahinungdanon sa paggamit sa mga baroganan sa ebanghelyo. Tan-awa ang bidyo nga “Sa Pagkahimong Matuod” gikan sa time code nga 11:24 hangtod sa 12:02, anaa sa ChurchofJesusChrist.org, o basaha ang mosunod nga pamahayag.
Dinhi sa Simbahan ni Jesukristo mahingkod ang inyong espiritwalidad ug maduol sa Manluluwas pinaagi sa paggamit sa mga baroganan sa ebanghelyo sa matag adlaw.
Uban sa pailub ug kamapadayunon, bisan ang kinagamyang buhat sa pagkadisipulo o agipo sa pagtuo mamahimong magdilaab nga daob sa gipahinungod nga kinabuhi. Gani, ingon ana ang sinugdanan sa kadaghanang dagkong daob [bonfire]—isip gamay nga kidlap.
(Dieter F. Uchtdorf, “Sa Pagkahimong Matuod,” Ensign o Liahona, Mayo 2015, 82)
Paghunahuna mahitungod sa pipila ka mga kamatuoran sa ebanghelyo nga bag-ohay ra nimong gigamit sa imong kinabuhi.
-
Sa unsang paagi nga ang pagkahibalo sa mga kamatuoran nakahulma sa imong mga pagpili nga nahimo?
Sa niini nga leksiyon aduna kay kahigayonan sa pagsalmot sa mga kalihokan nga mahimong makatabang kanimo nga magamit ang mga baroganan sa ebanghelyo sa adlaw-adlaw.
Pagrebyo sa mga tudling sa doktrinal nga kahanas
Ang pagrebyo sa mga pakisayran sa doktrinal nga kahanas ug sa mahinungdanong hugpong sa mga pulong kinahanglang mokuha lamang og gamay nga bahin sa klase. Kini nga bahin sa kalihokan gituyo aron matabangan ang mga estudyante nga mahinumdoman ang mga tudling ug makaila dayon sa mga kamatuoran nga ila nang nakat-onan.
Tan-awa sa daklit ang mosunod nga mga tudling sa doktrinal nga kahanas, ug hunahunaa kon unsay imong nabuhat sa pagpuyo niini.
Ipakita ang mosunod nga tsart aron ang mga estudyante makatan-aw niini hangtod sa kinatibuk-an sa leksiyon.
Doktrinal nga Kahanas sa Bag-ong Tugon: 1 Mga Taga-Corinto–Gipadayag
|
“Ang inyong lawas templo sa Espiritu Santo.” | |
|
“Hinoon diha sa Ginoo ang babaye dili gawas sa lalaki ni ang lalaki gawas sa babaye.” | |
|
“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.” | |
|
Diha sa Pagkabanhaw, adunay tulo ka ang-ang sa himaya. | |
|
“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.” | |
|
Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.” | |
|
“Ang adlaw ni Kristo … dili pa moabot, hangtod nga mahitabo una ang pagsupil.” | |
|
“Ang balaan nga kasulatan … makagagahom sa pagtudlo kanimo ngadto sa kaluwasan.” | |
|
Ang Langitnong Amahan mao “ang Amahan sa mga espiritu.” | |
|
“Kon aduna man kaninyoy nakulangan og kaalam, papangayoa siya sa Dios.” | |
|
“Ang hugot nga pagtuo patay kon kini walay binuhatan.” | |
|
“Ang maayong balita [gi]wali hangtod ngadto sa mga patay.” | |
|
“Ug ang mga patay gipanaghukman … pinasikad sa ilang mga binuhatan.” |
Gamita ang mga kamatuoran sa kinabuhi
Mahimong makatabang ang pagtan-aw giunsa sa uban paggamit ang mga kamatuoran sa ebanghelyo.
Hunahunaa kon sa unsang paagi ang pagkahibalo ug pagpuyo sa mga kamatuoran sa ebanghelyo nakatabang nimo kaniadto, nakatabang nimo karon, ug makatabang nimo sa umaabot. Kompletoha ang mosunod nga kalihokan aron matabangan ka nga mabansay sa paggamit sa mga kamatuoran gikan sa mga tudling sa doktrinal nga kahanas nga imong gitun-an.
Usa ka paagi sa pagpahaom niini nga kalihokan mao ang pagdapit sa matag estudyante sa pagbuhat sa mosunod nga mga lakang:
-
Pagpili og usa ka tudling sa doktrinal nga kahanas, ug isulat ang pakisayran ug mahinungdanong hugpong sa pulong ngadto sa usa ka piraso sa papel. Ilakip ang imong ngalan sa papel.
-
Pakigbaylo og mga papel sa laing estudyante, ug sunda ang instruksiyon nga gilista sa ubos sa ulohan nga “Nangagi.”
-
Pakigbaylo og mga papel pag-usab, ug kompletoha ang mga instruksiyon alang sa “Kasamtangan.”
-
Pakigbaylo og mga papel sa kataposang higayon, ug sunda ang mga instruksiyon alang sa “Umaabot.”
-
Iuli ang mga papel ngadto sa orihinal nga estudyante.
Kon mahuman na ang kalihokan, ikonsiderar ang pagpaambit sa mga estudyante og usa ka butang nga ilang nagustohan o nakapadayeg kanila nga gisulat sa usa ka klasmeyt.
Nangagi
Paghunahuna og higayon nga misalig ka sa usa sa mga kamatuoran gikan sa tudling sa doktrinal nga kahanas. Kon dili ka makahunahuna og piho nga panahon sa imong kinabuhi, hunahunaa ang usa ka tawo nga imong nailhan o usa ka tawo gikan sa usa ka asoy diha sa mga kasulatan kinsa napanalanginan samtang sila milihok sa usa ka kamatuoran sa usa ka tudling sa doktrinal nga kahanas.
Irekord ang mga panalangin nga miabot tungod sa pagpuyo niini nga kamatuoran. Seguroha ang pagpasabot kon sa unsang paagi kini mipauswag o makadugang sa imong pagsalig sa Langitnong Amahan ug ni Jesukristo.
Kasamtangan
Hunahunaa ang imong mga kasamtangang panginahanglanon ug kahimtang. Rebyoha ang mga tudling sa doktrinal nga kahanas, ug pagpili og tudling nga imong gibati nga mahimo nimo nga mas masunod sa imong kinabuhi. Irekord kon unsay imong mahimo sa paglihok uban sa hugot nga pagtuo ug paggamit sa tudling.
Umaabot
Pagpili og tudling sa doktrinal nga kahanas, ug pagsulat og senaryo nga mahimong mahitabo kanimo sa umaabot diin ang mga kamatuoran nga gitudlo sa tudling makatabang kanimo sa paglihok uban sa hugot nga pagtuo.
Mahimong makatabang ang pagpahinumdom sa mga estudyante sa mga pagtulun-an ni Elder Uchtdorf gikan sa sinugdanan sa leksiyon. Ang paghisgot sa mga pangutana sama sa mosunod makatabang sa mga estudyante sa pagpamalandong sa kaimportante sa paggamit sa mga kamatuoran sa ebanghelyo sa ilang kinabuhi.
Pamalandongi kon sa unsang paagi ang pagkahibalo ug pagbuhat sa kamatuoran nakaimpluwensiya sa imong kinabuhi ug mga desisyon.
-
Sa unsang paagi nga ang pagpuyo sa ebanghelyo nakatabang sa paglig-on sa imong hugot nga pagtuo kang Kristo?
-
Unsa ang imong mahimo aron mas mahinumdoman ang mga kamatuoran ni Kristo samtang mohimo ka og mga pagpili sa umaabot?
Dugang nga Kalihokan sa Pagkat-on
Pag-aksyon niini
Ikonsiderar ang pagbahin sa klase ngadto sa gagmay nga mga grupo ug dapita sila sa paghimo ug pag-aksiyon og mga senaryo diin ang mga kamatuoran gikan sa mga tudling sa doktrinal nga kahanas makatabang. Ang mga estudyante nga nagtan-aw sa senaryo mahimong makahunahuna dayon mahitungod sa mga kamatuoran gikan sa tudling sa doktrinal nga kahanas nga makatabang sa usa ka tawo diha sa senaryo nga molihok uban sa hugot nga pagtuo. Laing kausaban niini nga kalihokan mao ang pagdapit sa mga grupo sa pag-aksiyon og usa ka senaryo, lakip kon unsaon paglihok nga magmatinud-anon sa gihatag nga sitwasyon, gamit ang usa sa mga tudling sa doktrinal nga kahanas isip ilang giya.