Pinadayag 6–14

Kinatibuk-ang Pagpasabot

Isip kabahin sa iyang gipadayag, si Juan nakakita og panan-awon sa Kordero sa Dios nga nag-abli sa unang unom ka mga silyo sa silyado nga basahon. Narekord niya ang mga panagna mahitungod sa importante ug makahasol nga mga panghitabo nga mahitabo una pa ang Ikaduhang Pag-anhi ni Jesukristo. Iyang gipaambit ang mga detalye sa atong premortal nga pagkabuhi, lakip na ang “gubat didto sa langit” (Pinadayag 12:7) ug ang pagbatok ni Satanas ngadto sa mga sumusunod ni Jesukristo sa mortalidad. Gitagna usab niya ang Pagpahiuli sa Simbahan sa Manluluwas ug ang pagbulag sa mga matarong gikan sa mga daotan.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit kinahanglang andamon daan para sa kada leksiyon.

Pinadayag 6–7

Katuyoan sa leksiyon: Kini nga leksiyon makatabang sa mga estudyante nga mabati ang kamahinungdanon sa pagsalig kang Jesukristo aron mahimong putli ug magpabiling matinud-anon panahon sa mga kasakitan sa ulahing mga adlaw.

Pagpangandam sa mga estudyante: Dapita ang mga estudyante sa pagbasa sa pangutana nga anaa sa Pinadayag 6:17 ug motambong nga andam mopaambit unsa ang ilang hunahuna nga mahimo aron makasagubang sa mga kasakitan sa ulahing mga adlaw.

Sugyot sa pagtudlo pinaagi sa videoconference: Human sa pagtuon o pagpangita sa mga estudyante sa mga kasulatan nga nagtudlo kon unsaon paghimo sa atong “ mga bisti … [pag]paputi sa dugo sa Kordero” ( Pinadayag 7:14), mahimong dapiton ang pipila ka mga estudyante sa pag-share sa ilang screen ug ipakita ang mga kasulatan nga ilang nakaplagan sa Gospel Library nga app. Kon ang mga estudyante nagmarka sa mga bahin niini sa mga kasulatan, mahimong pangutan-on sila nganong ilang gimarkahan kini.

Pinadayag 8–11

Katuyoan sa leksiyon: Kini nga leksiyon gituyo aron matabangan ang mga estudyante nga mabati ang gahom sa Ginoo ug ang Iyang abilidad sa pagpanalipod kanato gikan sa mga kalamidad ug kadautan sa kataposang mga adlaw.

Pagpangandam sa estudyante: Mahimong ipaambit ang pamahayag ni Presidente Russell M. Nelson gikan sa sinugdanan niini nga leksiyon ug dapita ang mga estudyante sa pagtuon mahitungod sa pipila ka gamhanang mga buhat nga himoon sa Ginoo sa dili pa ang Iyang Ikaduhang Pag-anhi. Ang mga entry nga “ Kataposang mga Adlaw, Ulahing mga Adlaw ” diha sa Giya ngadto sa mga Kasulatan (anaa sa scriptures.ChurchofJesusChrist.org) mahimong mapuslanon nga mga kapanguhaan alang niini.

Mga Hulagway: Ang dayagram nga nagrepresentar sa mga panghitabo sa pito ka mga silyo.

Pinadayag 12

Katuyoan sa leksiyon: Kini nga leksiyon gituyo aron makatabang sa pagpataas sa pasalig sa mga estudyante nga mosunod kang Jesukristo pinaagi sa pagtabang kanila nga makasabot sa ilang premortal nga pagpili nga mosunod sa Manluluwas ug mosalikway kang Satanas.

Pagpangandam sa estudyante: Pipila ka adlaw sa wala pa kini nga leksiyon, dapita ang mga estudyante sa paghatag og pagtagad sa mga paagi nga ilang nakita si Satanas nga nakig-away batok kang Jesukristo ug sa Iyang mga sumusunod. Awhaga sila sa pag-andam sa pagpaambit og pihong mga pananglitan sa unsa ang ilang namatikdan.

Bidyo: “Paglaom sa Israel” (1:01:34; tan-awa gikan sa time code nga 20:52 hangtod sa 21:36)
Hulagway: Ang hulagway sa babaye ug sa dragon
Tsart: Ang tsart nga nagpasabot sa mga simbolo nga anaa sa Pinadayag 12:1–3

Sugyot sa pagtudlo pinaagi sa videoconference: Kon mangandam sa pagpakigbahin sa pamahayag ni Sister Wendy W. Nelson, ilha kon labing maayo ba nga ipaambit ang bidyo. Kon ipaambit ang teksto, ikonsiderar ang pagpaambit sa mga parapo usa sa matag higayon, nga magtugot sa mga estudyante sa paghisgot sa ilang mga pagbati mahitungod sa pamahayag, kon unsa kaha ang hitsura sa ilang kinabuhi sa wala pa dinhi sa yuta, ug unsa kaha ang bation nga makita kini.

Revelation 14

Katuyoan sa leksiyon: Kini nga leksyon gituyo aron sa pagtabang sa mga estudyante nga makasabot kon sa unsang paagi ang Manluluwas ug ang Iyang gipahiuli nga Simbahan makatabang sa kalibotan—lakip na kanila—sa pag-andam alang sa Iyang Ikaduhang Pag-anhi.

Pagpangandam sa estudyante: Dapita ang mga estudyante sa paghimo og usa ka listahan sa kon unsa ang ilang gibati nga tulo o upat sa labing importanteng mga katuyoan sa Ang Simbahan ni Jesukristo sa mga Santos sa Ulahing mga Adlaw.

Mga Hulagway: Usa ka hulagway sa istatuwa ni anghel Moroni sa templo; hulagway sa usa ka sanggot
Mga Materyal alang sa mga estudyante: Mga kopya sa mosunod nga mga kapanguhaan kon ang mga estudyante dili maka-access niini sa online: Russell M. Nelson ug Wendy W. Nelson, “Paglaom sa Israel” (tibuok kalibotan nga debosyonal sa kabatan-onan, Hunyo 3, 2018), dugang ngadto sa New Era ug Ensign, ChurchofJesusChrist.org; Russell M. Nelson, “Ang Partisipasyon sa mga Sister sa Pagpundok sa Israel,” Liahona, Nob. 2018, 68–70; Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–95

Sugyot sa pagtudlo pinaagi sa videoconference: Mahimong sugdan ang klase pinaagi sa pagpaila sa senaryo ug dayon ibutang ang mga estudyante sa mga breakout room aron idrama-drama kini ug hisgotan ang mga reaksiyon o mga tubag nga mahimong aduna sila niini. Ang mga estudyante mahimo usab nga magtinabangay sa paglista kon unsay ilang gibati nga labing importante nga mga butang nga masabtan kon nganong giorganisar ni Jesukristo ang Iyang Simbahan.

Pagrebyo sa Doktrinal nga Kahanas 25

Katuyoan sa leksiyon: Kini nga leksiyon maghatag sa mga estudyante og kahigayonan sa pagpalawom sa ilang pagsabot ug sa paggamit sa mga kamatuoran gikan sa 13 ka mga tudling sa doktrinal nga kahanas gikan sa ikaduhang bahin sa Bag-ong Tugon.

Pagpangandam sa estudyante: Mahimong hatagan ang mga estudyante og kopya sa handout nga nalakip niini nga leksiyon. Dapita sila sa pagrebyo sa mga pakisayran sa kasulatan ug sa mahinungdanong hugpong sa mga pulong sa kasulatan ug sa pagkonsiderar sa mga sitwasyon diin ang pagsabot niadto nga mga tudling mahimong makatabang.

Sugyot sa pagtudlo pinaagi sa videoconference: Kon ang mga estudyante naghimo og mga hulagway nga nagrepresentar sa usa o sa daghan pa sa mga tudling sa doktrinal nga kahanas, ikonsiderar ang pagtugot kanila sa paggamit og digital nga mga programa o mga app sa pagbuhat niini. Hatagi sila og oportunidad sa pagpaambit sa ilang mga hulagway ngadto sa klase kon mahuman na sila.