Pagrebyo sa Doktrinal nga Kahanas 25
Pagsabot ug Paggamit
Usa sa mga katuyoan sa doktrinal nga kahanas mao ang pagtabang kanimo nga makasabot ug magamit ang mga tudling sa doktrinal nga kahanas sa imong kaugalingong mga kahimtang o diha sa imong pagtabang sa uban. Kini nga leksiyon maghatag kanimo og kahigayonan sa pagpalawom sa imong pagsabot ug paggamit sa mga kamatuoran nga anaa makita sa 13 ka mga tudling sa doktrinal nga kahanas gikan sa ikaduhang bahin sa Bag-ong Tugon.
Pagpangandam sa estudyante: Mahimong hatagan ang mga estudyante og kopya sa handout nga nalakip niini nga leksiyon. Dapita sila sa pagrebyo sa mga pakisayran sa kasulatan ug sa mahinungdanong hugpong sa mga pulong sa kasulatan ug sa pagkonsiderar sa mga sitwasyon diin ang pagsabot niadto nga mga tudling mahimong makatabang.
Posible nga mga Kalihokan sa Pagkat-on
Ang tudling sa doktrinal nga kahanas nga leksiyon kinahanglang itudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.
Gipalig-on pinaagi sa mga kamatuoran sa ebanghelyo
Si Presidente M. Russell Ballard sa Korum sa Napulog Duha ka Apostoles kausa mipahayag nga usa sa mga katuyoan sa doktrinal nga kahanas mao ang pagtutok sa “pagpalambo ug pagpalig-on sa [atong] hugot nga pagtuo kang Jesukristo ug madugangan ang [atong] abilidad sa pagpuyo ug paggamit sa ebanghelyo sa [atong] mga kinabuhi” (“Ang Mga Oportunidad ug Responsibilidad sa Mga Magtutudlo sa CES sa Ika-21 nga Siglo” [gabie uban sa General Authority, Peb. 26, 2016], broadcasts.ChurchofJesusChrist.org). Sa laing pagkasulti, ang mga tudling sa doktrinal nga kahanas gituyo aron mas molig-on ang imong hugot nga pagtuo!
Handurawa nga usa ka adlaw aduna kay mga higala nga mosulti nimo human sa seminary nga ilang gibati nga ang doktrinal nga kahanas usa ka pag-usik sa panahon. Gibati nila nga ang mga tudling sa doktrinal nga kahanas dili makatabang ug wala makakita kon sa unsang paagi kini makatabang kanila sa ilang mga kinabuhi.
Gamit ang gihatag nga tsart, pamalandongi ang mga tudling nga imong natun-an atol niining katunga sa Bag-ong Tugon. Pamalandongi kon hain nga mga tudling ang nagpanalangin o nagtabang kanimo.
Ipakita ang mosunod nga mga pakisayran sa kasulatan ug mahinungdanong hugpong sa mga pulong sa kasulatan, o ihatag ang handout ngadto sa mga estudyante.
Doktrinal nga Kahanas sa Bag-ong Tugon: 1 Mga Taga-Corinto–Pinadayag
Pakisayran sa Kasulatan |
Mahinungdanong Hugpong sa mga Pulong sa Kasulatan |
“Ang inyong lawas templo sa Espiritu Santo.” | |
“Hinoon diha sa Ginoo ang babaye dili gawas sa lalaki ni ang lalaki gawas sa babaye.” | |
“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.” | |
Diha sa Pagkabanhaw, adunay tulo ka ang-ang sa himaya. | |
“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.” | |
Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.” | |
“Ang adlaw ni Kristo … dili pa moabot, hangtod nga mahitabo una ang pagsupil.” | |
“Ang balaan nga kasulatan … makagagahom sa pagtudlo kanimo ngadto sa kaluwasan.” | |
Ang Langitnong Amahan mao “ang Amahan sa mga espiritu.” | |
“Kon aduna man kaninyoy nakulangan og kaalam, papangayoa siya sa Dios.” | |
“Ang hugot nga pagtuo patay kon kini walay binuhatan.” | |
“Ang maayong balita [gi]wali hangtod ngadto sa mga patay.” | |
“Ug ang mga patay gipanaghukman … pinasikad sa ilang mga binuhatan.” |
-
Sa unsang paagi ka napanalanginan, nalig-on, o napanalipdan sa bisan hain sa mga tudling sa doktrinal nga kahanas nga imong gitun-an karong tuiga?
Aron sa pagdapit sa Manluluwas sa pagtukod, paglig-on, ug pagpanalipod kanato pinaagi sa mga tudling sa doktrinal nga kahanas, kinahanglan natong dugangan ang atong panabot ug abilidad sa paggamit sa mga kamatuoran nga makita diha sa mga tudling. Ang mosunod nga mga kalihokan gituyo aron matabangan ka sa pagbuhat niini.
Pagsabot ug paghinumdom sa mga kamatuoran sa ebanghelyo
Usa ka paagi aron mas masabtan ug mahinumduman ang mga kamatuoran nga makita diha sa mga tudling sa doktrinal nga kahanas mao ang pagtandi niini ngadto sa inadlaw-adlaw nga mga butang ug mga sitwasyon.
Pagpili og duha sa mga tudling nga gusto nimong mas masabtan, ug rebyoha ang ilang mahinungdanong hugpong sa mga pulong sa kasulatan.
Depende sa mga panginahanglananon sa mga estudyante ug sa anaa nga oras, mahimong mopili ang mga estudyante og labaw pa sa duha ka mga tudling alang niini nga kalihokan.
a) Pagdrowing o pagkuha og hulagway sa usa ka butang nga pamati nimo may kalabotan sa mahinungdanong hugpong sa mga pulong sa maong tudling. (Pananglitan, alang sa Santiago 1:5–6 mahimo kang magdrowing og usa ka tawo nga nag-ampo. Alang sa 1 Mga Taga-Corinto 15:40–42 mahimo kang magdrowing o magkuha og larawan sa adlaw, bulan, o mga bitoon.)
b) Pagsulat og mubo nga pagpasabot kon giunsa sa butang pagkonektar ngadto sa kamatuoran nga gitudlo diha sa tudling.
Mahimong dapiton ang mga estudyante sa pagpaambit sa ilang drowing o larawan, kauban sa ilang pagpasabot, ngadto sa usa ka pares o diha sa gagmayng grupo. Mahimo usab nga makaayo ang pagdapit og pipila ka mga estudyante sa pagpaambit sa ilang larawan ug pagpasabot ngadto sa klase.
Paggamit sa mga kamatuoran sa ebanghelyo
Si Elder David A. Bednar sa Korum sa Napulog Duha ka Apostoles mitudlo og usa ka kamatuoran nga makatabang kanato nga makasabot ug makagamit sa mga tudling sa doktrinal nga kahanas. Iyang gitudlo nga ang mga baroganan sa ebanghelyo mohatag og “bililhong panglantaw sa mahangtorong kamatuoran samtang atong gisinati ang lainlaing mga kahimtang, mga hagit, mga desisyon, ug mga kasinatian sa pagkamortal” (“Ang Mga Baroganan sa Akong Ebanghelyo,” Liahona, Mayo 2021, 124). Ang mga baroganan nga nakita sa mga tudling sa doktrinal nga kahanas mahimong makatabang kanato sa daghang mga sitwasyon sa atong mga kinabuhi.
Pagpili og duha ka mga tudling nga adunay mga baroganan nga gusto nimong mahibaloan kon unsaon paggamit sa imong kinabuhi. Mahimong mao kini ang samang mga tudling nga imong napili bag-ohay lang, o mahimong lahi kini.
Depende sa mga panginahanglananon sa mga estudyante ug sa anaa nga oras, mahimong mopili ang mga estudyante og labaw pa sa duha ka mga tudling alang niini nga kalihokan.
Alang sa matag tudling, ihulagway ang usa ka sitwasyon diin ang usa ka tawo mahimong mogamit sa kamatuoran nga gitudlo sa maong tudling. Pananglitan, ang usa ka batan-on mahimong mas madasig sa pag-apil sa buhat sa family history pinaagi sa pagdugang sa iyang pagpamatuod sa doktrina sa kaluwasan alang sa mga patay nga gitudlo sa 1 Pedro 4:6 .
Ipasabot kon sa unsang paagi nga ang paggamit sa kamatuoran nga gitudlo sa matag tudling nga imong napili mahimong makatabang sa tawo nga makadawat sa panabang sa Manluluwas.
Mahimong hatagan ang matag estudyante og usa ka kard o piraso sa papel ug hangyoon sila nga isulat ang pakisayran sa doktrinal nga kahanas, ang sitwasyon, ug ang pagpasabot kon sa unsang paagi ang kamatuoran nga gitudlo diha sa tudling sa doktrinal nga kahanas makatabang sa usa ka tawo. Mahimong makapadani ug makatudlo unya ang pagkolekta sa mga kard o mga papel ug pagbasa sa mga sitwasyon, nga magdapit sa klase sa pagtag-an kon hain nga tudling ang mahimong labing makatabang sa matag sitwasyon ug sa pagpasabot kon ngano. Kon ang usa ka estudyante makaila og lahi nga tudling kay sa nasulat sa papel, dapita kana nga estudyante sa pagpasabot kon sa unsang paagi nga ang tudling nga iyang gihisgotan mahimo usab nga makatabang.
Ang mga estudyante mahimong motag-an isip usa ka klase, magpares o diha sa gagmay nga mga grupo, o magtinagsa.
Dugang nga mga Kalihokan sa Pagkat-on
Imemorya
Kon mahimong mogamit ang mga estudyante og dugang nga pagbansay sa pagsag-ulo sa mahinungdanong hugpong sa mga pulong sa kasulatan ug pakisayran sa doktrinal nga kahanas, ikonsiderar ang pagbuhat sa pipila o sa tanan sa mosunod nga mga kalihokan:
-
Ipakita ang tanang mga pakisayran sa kasulatan sa doktrinal nga kahanas ug ang mahinungdanong hugpong sa mga pulong sa kasulatan nga wala sa eksaktong pagka sunod-sunod. Dapita ang mga estudyante sa pagtan-aw kon pila ka mga pakisayran sa kasulatan ug mahinungdanong hugpong sa mga pulong sa kasulatan ang ilang matukma sa pagpares. Dayon dapita ang mga estudyante sa pagsusi sa ilang gibuhat gamit ang ilang mga kasulatan.
-
Pagpakita lamang og bahin [portion]sa mahinungdanong hugpong sa mga pulong sa kasulatan, ug dapita ang mga estudyante sa pagkompleto niini ug paghatag sa mga pakisayran sa kasulatan.
-
Sugdi sa pagbasa ang mahinungdanong hugpong sa mga pulong sa hinay-hinay, usa ka pulong sa matag higayon. Kon tan-aw sa mga estudyante kahibalo sila sa gibasa nga tudling sa doktrinal nga kahanas, mahimo nilang ablihan kini diha sa ilang mga kasulatan.
-
Kon anaa, mahimong dapiton ang mga estudyante sa paggamit sa Doktrinal nga Kahanas nga app aron mabansay ang pagsag-ulo.
Pagdrama-drama [Role Play]
Si Sister Joy D. Jones, kanhi Kinatibuk-ang Presidente sa Primary, miingon nga ang pag-role play “makalig-on sa mga anak nga maandam sa usa ka mahagiton nga sitwasyon” (“Importanting mga Panag-istoryahay,” Liahona, Mayo 2021, 13). Mahimong dapiton ang mga estudyante nga ilhon ang sitwasyon diin ang usa ka kamatuoran gikan sa tudling sa doktrinal nga kahanas mahimong makatabang. Dayon mahimo nilang i-role play ang pagsanong sa maong sitwasyon gamit ang kamatuoran gikan sa tudling sa doktrinal nga kahanas.