Pinadayag 12

“Gubat didto sa Langit”

Diin ka gikan sa wala ka pa matawo sa kalibotan? Sa unsang paagi nga ang pagkahibalo niini makaapekto sa imong kinabuhi? Samtang naghulagway sa iyang panan-awon sa “unsay mahitabo human niini” ( Pinadayag 4:1) mahitungod sa kataposang mga adlaw ug sa Ikaduhang Pag-anhi ni Jesukristo, si Juan mipakigbahin usab sa mga detalye sa atong kinabuhi sa wala pa dinhi sa yuta, lakip ang usa ka “gubat didto sa langit” ( Pinadayag 12:7) ug ang pagsupak ni Satanas sa mga sumusunod ni Jesukristo sa mortalidad. Kini nga leksiyon gituyo aron makatabang nga madugangan ang imong pasalig nga mosunod kang Jesukristo pinaagi sa pagtabang kanimo nga makasabot sa imong premortal nga pagpili sa pagsunod sa Manluluwas ug pagsalikway kang Satanas.

Paghatag og panahon sa mga estudyante nga mamalandong. Paghatag og mga kahigayonan alang sa mga estudyante sa pagpamalandong unsa ang ilang nahibaloan ug gituohan ug unsay ilang gibati mahitungod sa unsa ang ilang nakat-onan. Ang pagbuhat niini mahimong makadugang sa posibilidad nga sila matudloan pinaagi sa Espiritu. Kini mahimong makatabang kanila nga maila ang ilang kasamtangang espirituwal nga kalamboan ug unsa ang kinahanglan nilang buhaton aron mabag-o ug molambo.

Pagpangandam sa estudyante: Pipila ka adlaw una pa kini nga leksiyon, dapita ang mga estudyante sa paghatag og pagtagad sa mga paagi nga ilang nakita si Satanas nga nakig-away batok kang Jesukristo ug sa Iyang mga sumusunod. Awhaga sila sa pag-andam sa pagpaambit og pihong mga pananglitan kon unsa ang ilang namatikdan.

Posible nga mga Kalihokan sa Pagkat-on

Unsa nga kalainan ang mahimo niini?

Sa tibuok kalibotan nga debosyonal alang sa kabatan-onan, si Sister Wendy W. Nelson, asawa ni Presidente Russell M. Nelson, mipakigbahin sa mosunod nga pamahayag. Sulayi paghanduraw unsa ang iyang gidapit nimo nga mahanduraw ug mabati. Mahimo nimong tan-awon ang “Paglaum sa Israel” (1:01:34), nga anaa sa ChurchofJesusChrist.org, gikan sa time code 20:52–21:37, o basaha ang mosunod nga pamahayag.

Mahimong ipaambit ang mosunod nga mga parapo usa sa matag higayon ug tugoti ang mga estudyante sa paghisgot sa pamahayag ni Sister Nelson. Mahimo silang mamalandong unsa kaha ang panagway sa atong premortal nga kinabuhi ug unsa kaha ang bation nga makasinati sa gipanulti ni Sister Nelson.

Pagkanindot kaha kon makatan-aw kamo og 10-minutos nga bidyo kalabot sa inyong premortal nga kinabuhi diha sa YouTube.

Si Propeta Joseph Smith mitudlo nga kon makatan-aw kamo sa langit sulod sa lima ka minuto, mas mahibalo kamo kalabot sa usa ka hilisgotan kay sa kon inyo kining gitun-an sa tibuok ninyong kinabuhi. Busa hunahunaa lang kon makahimo kamo sa pagtan-aw sa inyong premortal nga kinabuhi sulod sa 10 minutos!

Siyempre nakaamgo kita nga maalamong gihimo sa Ginoo nga dili kita makahinumdom niadto nga mga panumdoman. Apan, sa makadiyot lang, hunahunaa ang epekto sa inyong kinabuhi karon kon tugotan kamo sa pagtan-aw og 10 minutos sa inyong premortal nga kinabuhi.

(Wendy W. Nelson, “Paglaum sa Israel” [tibuok kalibotan nga debosyonal sa mga kabatan-onan, Hunyo 3, 2018], dugang ngadto sa New Era ug Ensign, 4–5, ChurchofJesusChrist.org)

• Kon makita nimo ang imong kaugalingon sa premortal nga kinabuhi, unsa nga piho nga mga butang ang imong gilaoman nga makita, makat-onan, mabati, o masabtan gikan sa pagbaton niana nga kasinatian?

• Unsang kalainan sa imong hunahuna ang mahimo niini sa imong kinabuhi?

Sa Pinadayag 12 , Si Juan misulat mahitungod sa premortal nga Gubat sa Langit. Diha sa imong pagtuon, pangita og mga detalye mahitungod sa imong premortal nga relasyon kang Jesukristo. Paghunahuna mahitungod kon sa unsang paagi nga ang pagsabot niini nga relasyon mahimong makaapekto sa imong abilidad sa pagsunod Kaniya ug pagbuntog kang Satanas sa imong kinabuhi karon.

Ang premortal nga Gubat sa Langit

Ang mosunod nga content gituyo aron matabangan ang mga estudyante nga makasabot sa mga simbolo ug paghanduraw gikan sa panan-awon ni Juan aron nga sila makasabot sa Gubat sa Langit diha unya sa leksiyon. Idumala ang panahon nga igahin sa mga estudyante niining mga bersikulo aron matugotan og igong panahon alang sa mga kalihokan diha unya sa leksiyon.

Aron matabangan ka nga maandam sa pagtuon sa mga pagtulun-an ni Juan mahitungod sa Gubat sa Langit, mahimong makatabang alang kanimo ang pagtuon sa Pinadayag 12:1–5 ug dayon tan-awa ang hulagway sa ubos nga nagpakita og pipila sa mga simbolo niini nga mga bersikulo. Gamita ang mosunod nga tsart aron matabangan ka nga makasabot unsa ang girepresentar niini nga mga simbolo.

Mahimong ipakita ang mosunod nga kasayoran alang sa mga estudyante.

Simbolo	Unsa ang girepresentar
Usa ka babaye ( Pinadayag 12:1)	“Ang simbahan sa Dios” (tan-awa sa Ang Hubad ni Joseph Smith, Pinadayag 12:7 [diha sa Apendiks sa Ang Hubad ni Joseph Smith])
Ang anak sa babaye ( Pinadayag 12:2)	“[Ang] gingharian sa atong Dios ug sa iyang Kristo” (tan-awa sa Ang Hubad ni Joseph Smith, Pinadayag 12:7 [diha sa Apendiks sa Ang Hubad ni Joseph Smith])
Usa ka dragon ( Pinadayag 12:3)	Satanas (tan-awa sa Ang Hubad ni Joseph Smith, Pinadayag 12:8 [diha sa Apendiks sa Ang Hubad ni Joseph Smith])

Aron makat-on mahitungod sa Gubat sa Langit, paghimo og tsart sama sa mosunod diha sa imong journal sa pagtuon. Basaha sa Ang Hubad ni Joseph Smith, Pinadayag 12:7–11 (diha sa Apendiks sa Ang Hubad ni Joseph Smith). Timan-i nga “Si Miguel ug ang iyang mga [anghel]” ( Pinadayag 12:7) mao si Adan ug ang ubang matarong nga espiritu nga mga anak sa Dios.

Ikonsiderar ang paghimo sa mosunod nga tsart diha sa pisara aron madrowing sa mga estudyante diha sa ilang journal sa pagtuon. Agi og dugang sa pagkompleto sa tsart sa ilang journal sa pagtuon, ang mga estudyante mahimong magsulat og mga tubag nga dili kaayo personal sa gagmay nga mga piraso sa papel ug i-post kini sa pisara sunod sa tukma nga pangaghat.

Ang Gubat sa Langit Ang Hubad ni Joseph Smith, Pinadayag 12:7–11 (diha sa Apendiks sa Ang Hubad ni Joseph Smith)
Ako nakat-on nga si Satanas …
Ako nakat-on nga si Jesukristo …
Ako nakat-on nga ako …

Pamalandong sa unsa ang imong nabasa ug unsa ang imong nasulat sa imong tsart.

• Unsay labing makahuloganon alang kanimo? Unsay imong mga pangutana?

• Unsa ang natabang sa bersikulo 11 kanimo aron makasabot mahitungod sa kon unsa kaha ka diha sa premortal nga kinabuhi? Unsa ang nahimong tahas sa Manluluwas diha sa pagtabang kanimo nga mabuntog si Satanas?

Sa pagtudlo mahitungod sa premortal nga kinabuhi ug sa atong mga binuhatan didto, si Presidente Dallin H. Oaks sa Unang Kapangulohan mipasabot pag-ayo sa mosunod:

Sa Konseho sa Langit, tanang espiritu nga mga anak sa Dios gipaila sa plano sa Amahan, lakip na sa mortal nga mga sangputanan ug pagsulay, langitnong tabang, ug sa mahimayaong padulngan niini. Kita nakakita sa kataposan gikan sa sinugdanan. Ang dili maihap nga mga tawo kinsa natawo dinhi sa yuta mipili sa plano sa Amahan ug nakig-away alang niini sa langitnong sangka nga misunod.

(Dallin H. Oaks, “Ang Dako nga Laraw,” Liahona, Mayo 2020, 93-94)

• Unsa ang imong nakat-onan nga mahimong makapalig-on sa imong hugot nga pagtuo kang Jesukristo ug makatabang kanimo aron mosunod Kaniya?

Usa ka kamatuoran nga lagmit imong nakat-onan gikan sa imong pagtuon mao nga imong nabuntog si Satanas sa kinabuhi sa wala pa dinhi sa yuta pinaagi sa Pag-ula ni Jesukristo ug pinaagi sa pagpabiling matinud-anon sa imong pagpamatuod.

• Sa unsang paagi nga ang pagkasayod niini nga kamatuoran makaapekto sa paagi sa imong pagtan-aw sa imong kaugalingon ug sa uban?

• Unsa ang natabang niining kamatuoran kanimo aron makasabot mahitungod sa gahom sa Manluluwas ug sa Iyang Pag-ula?

Hinumdomi nga human sa pagrebelde ni Satanas, siya ug ang iyang mga sumusunod “gitambog sa yuta”( Pinadayag 12:9). Basaha ang Pinadayag 12:12, 17 , nga mangita kon kang kinsa si Satanas nakigbatok sa gubat human siya isalikway sa langit. Mahimong idugang ang imong mga panabot ngadto sa tsart nga imong gimugna.

Sa dili pa ipangutana ang sunod nga pangutana, pahinumdomi ang mga estudyante sa imbitasyon gikan sa pagpangandam sa estudyante nga kalihokan.

• Sa unsang paagi nimo nakita ang gubat nga gisugdan ni Satanas batok sa mga sumusunod ni Kristo nga nagpadayon karon?

• Sa unsang paagi nga ang pagkahibalo sa mga kamatuoran nga imong nakat-onan mahitungod sa premortal nga Gubat sa Langit makatabang kanimo niini nga gubat batok ni Satanas karon?

Rebyoha unsay imong gilista sa imong journal sa pagtuon, ug ikonsiderar ang hilom nga pagpamalandong ug ang pag-ampo mahitungod sa imong personal nga pagtuo sa imong kinabuhi sa wala pa dinhi sa yuta ug sa mga reyalidad sa gubat tali ni Satanas ug niadtong nagsunod ni Jesukristo. Ikonsiderar kon sa unsang paagi ang imong nakat-onan karon makatabang kanimo nga mas makasabot sa imong premortal nga pagsalig ug pagdepende diha ni Jesukristo. Sa unsang paagi ka mahimong mas hingpit nga makasalig ug makadepende Kaniya dinhi sa kinabuhi sa kalibotan? Irekord ang imong mga hunahuna ug mga impresyon diha sa imong journal sa pagtuon.

Komentaryo ug Background nga Impormasyon

Giunsa nako pagbuntog si Satanas sa premortal nga Gubat sa Langit?

Si Presidente Henry B. Eyring sa Unang Kapangulohan mipakigbahin sa mosunod:

Hunahunaa og balik kon unsa ang atong nahibaloan sa kalibotan sa espiritu sa wala pa kita matawo. Ang atong Langitnong Amahan mipresentar og usa ka plano alang sa Iyang mga Anak. Anaa kita didto. … Si Lucifer, ang atong espiritu nga igsoon, misupak sa plano nga nagtugot kanato sa kagawasan sa pagpili. Si Jehova, ang Pinalangga nga Anak sa Langitnong Amahan, mipaluyo sa plano. Si Lucifer nangulo og usa ka pagsupak. Ang makanunayong pag-abag ni Jehova sa plano sa Dios nagmadaugon, ug Siya mibulontaryo nga mamahimong atong Manluluwas.

Ang kamatuoran nga kamo anaa sa mortalidad karon nagsiguro kanato nga kamo mipaluyo sa Amahan ug sa Manluluwas. Gikinahanglan ang pagtuo diha ni Jesukristo sa pagpaluyo sa plano sa kalipay ug ang papel ni Jesukristo niini kon gamay pa kaayo ang inyong nahibaloan kabahin sa mga hagit nga inyong sagubangon diha sa mortalidad.

(Henry B. Eyring, “Ang Kalig-on nga Naggikan sa Hugot nga Pagtuo diha sa Pagpaluyo,” Liahona, Mayo 2019, 58)

Si Brother Ahmad S. Corbitt, Unang Magtatambag sa Kinatibuk-ang Kapangulohan sa Young Men, mipaambit sa mosunod:

Sa dihang misaad si Jesukristo [diha sa premortal nga kalibotan nga] moanhi Siya sa mortalidad ug mohatag sa Iyang kinabuhi sa pagpundok ug pagluwas kanato, wala lamang kamo motuo Kaniya. Kamo nga “halangdong mga espiritu” adunay “hilabihan ka dako nga hugot nga pagtuo” nga inyong nakita ang Iyang saad nga sigurado [Russell M. Nelson ug Wendy W. Nelson, “Paglaum sa Israel,” 8; Alma 13:3 ]. Dili Siya makapamakak, mao nga Siya inyong nakita nga mipaagas na sa Iyang dugo alang kaninyo, sa dugayng panahon nga wala pa Siya matawo. …

… Sa wala pa kamo halangdong mga espiritu matawo, nakakat-on kamo sa pagtan-aw sa mga saad ni Kristo niini nga siguradong paagi, ug kamo nakatilaw sa Iyang kaluwasan. Ang inyong dakong pagtuo daw mga muskulo nga magkakusgan ug magkadako samtang dugangan ninyo ang pag-ehersisyo niini, apan anaa na kini sa sulod kaninyo.

(Ahmad S. Corbitt, “Makahimo Kamo sa Pagpundok sa Israel!,” Liahona, Mayo 2021, 62)

Asa pa ako makakat-on og dugang mahitungod sa premortal nga kinabuhi?

Mahimong tun-an ang pipila sa mosunod nga mga kapanguhaan:

Moises 4:1–4

Giya ngadto sa mga Kasulatan, “ Gubat sa Langit ,” scriptures.ChurchofJesusChrist.org

Unsa nga matang sa gubat ang Gubat sa Langit?

Si Elder Bruce R. McConkie (1915–1985) sa Korum sa Napulog Duha ka Apostoles mihulagway sa panagbangi nga nahitabo sa langit.

Unsa nga klase sa gubat? Sama nga matang nga nagpatigbabaw sa yuta; ang mao lamang nga matang nga si Satanas ug ang espiritu nga mga binuhat ang makapasiugda—og usa ka gubat sa mga pulong, kagubot sa mga opinyon, panagbangi sa mga ideolohiya; usa ka gubat tali sa kamatuoran ug kasaypanan, tali sa kahayag ug sa kangitngit. … Ug ang gubat nagpadayon gihapon. Ania kini karon sa yuta ingon sa kaniadto sa langit; ang matag tawo kinahanglang mopili kon unsang heneral ang iyang sundon.

(Bruce R. McConkie, Doctrinal New Testament Commentary [1973], 3:518)

Dugang nga mga Kalihokan sa Pagkat-on

Mga alternatibong paagi sa pagsugod sa leksiyon

Isip alternatibo sa unsay gisugyot sa sinugdanan sa leksiyon, ang mga estudyante mahimong makabenepisyo pinaagi sa paghisgot sa ilang mga kasinatian sa pagpuyo sa panahon diin ang mga gubat miulbo sa tibuok kalibotan. Mahimo nilang hisgotan ang pipila sa labing dako og epekto o kasamtangang mga gubat ug ang mga epekto niadtong mga gubat sa dili pa maghisgot sa espirituhanong mga gubat, o mga gubat, ug ang mga epekto niini. Dugang pa, ang mga estudyante mahimong hangyoon sa pagrebyo og kadali, pag-sketch, o pagpakigbahin sa unsay ilang nahibaloan mahitungod sa plano sa kaluwasan ug dayon sa paghunahuna mahitungod sa premortal nga kinabuhi. Mahimo nilang hisgotan ang ilang nahibaloan, gituohan, o gustong mahibaloan mahitungod niini nga bahin sa plano.

Ang babaye sa kamingawan

Pahinumdomi ang mga estudyante nga ang “babaye” nga giingon sa Pinadayag 12 nagrepresentar sa “simbahan sa Dios” ( Ang Hubad ni Joseph Smith, Pinadayag 12:7 [diha sa Apendiks sa Ang Hubad ni Joseph Smith]). Human mabasa ang mahitungod sa Gubat sa Langit diha sa Pinadayag 12:7–11 , mahimong makaayo ang pagbasa sa Pinadayag 12:8–17 , nga mangita unsa ang gustong buhaton ni Satanas sa Simbahan sa Manluluwas. Aron matabangan ang mga estudyante nga makasabot sa simbolikanhong mga pagtulun-an ni Juan niini nga mga bersikulo, ikonsiderar ang pagpangutana sama sa mosunod: “Unsa sa imong hunahuna ang nagrepresentar sa babaye nga naglupad ngadto sa kamingawan human gilutos sa dragon?” (Tan-awa sa Pinadayag 12:13–14 ; tan-awa usab sa Doktrina ug mga Pakigsaad 86:1–3 .)