A Girl/Young Woman lying on a bed reading scriptures.
Ang mga kasulatan naghatag og daghang mga oportunidad sa pagkat-on og importante nga mga leksiyon gikan niadtong kinsa nagpuyo sa nangagi. Nagtudlo usab kini kanato sa gitagna nga mga panghitabo nga mahitabo sa umaabot. Sa Pinadayag 8–11, girekord ni Juan ang mga panagna mahitungod sa importante ug makahasol nga mga panghitabo nga mahitabo sa dili pa ang Ikaduhang Pag-anhi ni Jesukristo. Kini nga leksiyon gituyo aron matabangan ka nga mabati ang gahom sa Ginoo ug ang Iyang abilidad sa pagpanalipod kanato gikan sa mga kalamidad ug kadautan sa kataposang mga adlaw.
Paglikay sa pagpangagpas. Samtang ang Ginoo naghatag kanato og importanteng mga panagna mahitungod sa Iyang Ikaduhang Pag-anhi, adunay daghang mga detalye ang wala Niya gibutyag. Likayi ang pagpangagpas mahitungod sa mga detalye nga wala mahibaloi.
Pagpangandam sa estudyante: Mahimong ipaambit ang pamahayag ni Presidente Russell M. Nelson gikan sa sinugdanan niini nga leksiyon ug dapita ang mga estudyante sa pagtuon mahitungod sa pipila ka gamhanang mga buhat nga himoon sa Ginoo sa dili pa ang Iyang Ikaduhang Pag-anhi. Ang mga entry nga “ Kataposang mga Adlaw, Ulahing mga Adlaw ” diha sa Giya ngadto sa mga Kasulatan (anaa sa scriptures.ChurchofJesusChrist.org) mahimong mapuslanon nga mga kapanguhaan alang niini.
Posible nga mga Kalihokan sa Pagkat-on
Milagrosong mga panghitabo sa kataposang mga adlaw
Mahimong dapiton ang mga estudyante sa pagpakigbahin og mga tubag sa mosunod nga pangutana sa dili pa basahon ang pamahayag ni Presidente Russell M. Nelson.
Unsa ang pipila sa gamhanang mga buhat nga nahimo sa Ginoo kaniadto, alang sa uban o sa imong kaugalingong kinabuhi?
Si Presidente Russell M. Nelson mipakigbahin og importante nga panabot mahitungod sa mga panghitabo nga mahitabo sa dili pa ang Ikaduhang Pag-anhi sa Manluluwas:
Imahe
Official portrait of President Russell M. Nelson taken January 2018
Ang atong Manluluwas ug Manunubos, si Jesukristo, mohimo sa uban Niyang labing gamhanan nga mga buhat karon ug sa higayon nga Siya mobalik na pag-usab. Makakita kita og milagrosong timailhan nga ang Dios Amahan ug ang Iyang Anak maoy nagdumala niini nga Simbahan sa kahalangdon ug himaya.
(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96)
Unsa nga mga hunahuna o mga pagbati ang anaa kanimo samtang imong gibasa kini nga pamahayag?
Unsa ang pipila sa gamhanang mga buhat nga imong nahibaloan nga buhaton sa Ginoo sa dili pa ang Iyang Ikaduhang Pag-anhi?
Gikan sa pamahayag ni Presidente Nelson, atong nakat-onan nga ang Ginoo mohimo sa pipila sa Iyang labing gamhanan nga mga buhat sa dili pa Siya moanhi pag-usab. Niini nga leksiyon imong matun-an ang mahitungod sa pipila niining gamhanang mga buhat. Hatagig pagtagad kon unsa ang imong nakat-onan mahitungod sa Dios, sa Iyang gahom, ug sa Iyang gugma alang kanato diha sa imong pagtuon.
Si Juan nakakita sa pag-abli sa ikapitong silyo
Lagmit imong mahinumdoman nga sa iyang panan-awon nga natala sa basahon sa Pinadayag, si Juan nakakita og usa ka basahon nga adunay pito ka mga silyo. Ang matag silyo nagrepresentar sa usa ka yugto sa 1,000 ka tuig sa yuta (tan-awa sa Pinadayag 5 ; Doktrina ug mga Pakigsaad 77:6–7). Ang mosunod nga hulagway mahimong makatabang kanimo sa paghanduraw sa pagpasabot nga gihatag ni Juan ngadto sa matag usa niining mga panahon.
Mahimong hatagan ang mga estudyante og kopya sa mosunod nga hulagway o ipakita kini sa klase.
Imahe
A diagram of John’s vision of the 7 seals in the book of revelation including scripture verse reference
Ngano kaha nga makatabang man alang kanimo nga mahibalo nga si Juan nagtutok sa kadaghan sa iyang mga sinulat ngadto sa mga hitabo nga may kalabotan sa Ikaduhang Pag-anhi sa Manluluwas, kaysa sa mga hitabo nga may kalabotan sa miaging mga silyo?
Sa Pinadayag 11 , nakita daan ni Juan ang usa ka panahon sa dihang ang usa ka gamhanang kasundalohan nga gilangkoban sa daghang “katawhan ug kabanayan ug sa mga pinulongan ug sa kanasoran” ( Pinadayag 11:9) mosulay sa paglaglag sa Jerusalem (tan-awa usab sa Ezekiel 38:4–6, 14–16 ; Joel 2:1–9 ; Pinadayag 9:16–17 ; 11:2). Apan ang mga sinulat ni Juan nagpakita nga ang duha ka saksi nga gipadala sa Dios mopugong niini nga kasundalohan sa pagtuman sa katuyoan niini sulod sa 42 ka bulan (tan-awa ang Pinadayag 11:2–3).
Unsa ang imong nakat-onan mahitungod niining duha ka mga saksi?
Unsang ebidensiya ang imong nakita nga ang gahom sa Dios maanaa kanila?
Basaha ang Pinadayag 11:7–10 , nga mangita sa unsa ang gitagna ni Juan nga mahitabo niining duha ka mga propeta human sila makahuman sa ilang pagpangalagad taliwala sa mga Judio.
Unsa ang gisugyot niining mga bersikulo mahitungod sa espirituwal nga kondisyon sa kadaghanan kinsa mabuhi sa yuta nianang panahona?
Ang mga kasulatan nagpakita nga sa panahon sa “tulo ka adlaw ug tunga” ( Pinadayag 11:9) sa dihang kini nga mga propeta magbuy-od nga patay diha sa kadalanan, ang gamhanang kasundalohan mobalik pag-usab ang ilang pagtagad sa pagbuntog sa Jerusalem (tan-awa ang Zacarias 14:2).
Imahe
Photo of the Mount of Olives
Sa niini nga bukid, ang Manluluwas miantos diha sa Tanaman sa Getsemani isip kabahin sa Iyang Pag-ula (tan-awa ang Lucas 22:39–44). Ang Bukid sa mga Olibo mao usab diin ang Manluluwas “moasdang, ug makig-away batok niadtong mga nasod” ( Zacarias 14:3–4) nga nagtinguha sa paglaglag sa mga Judio sa dili pa ang Iyang pagpakita sa tibuok kalibotan.
Mahimong bahinon ang klase ngadto sa ginagmay nga mga grupo. Ang matag grupo mahimong magtuon og usa sa mosunod nga mga tudling sa kasulatan ug magsuma unsa ang ilang nakat-onan alang sa klase.
Basaha ang mosunod nga mga tudling, nga mangita sa mga detalye mahitungod sa gamhanang mga buhat nga himoon sa Ginoo diha sa Jerusalem ug sa Bukid sa mga Olibo sa dili pa ang Iyang Ikaduhang Pag-anhi.
Unsa ang mahimong epekto sa mga panghitabo nga narekord niini nga mga tudling ngadto sa mga tawo nga makasinati niini?
Unsa ang natabang kanimo niining mga gipanagnang panghitabo sa pagsabot o pagbati mahitungod sa Manluluwas?
Ngano nga importante alang kanimo nga makasabot ug mobati niini nga mga butang mahitungod sa Manluluwas karon sa imong kinabuhi?
Panalipod alang sa mga Santos sa Dios
Bisan og ang kadautan, gubat, ug kalaglagan mag-una sa Ikaduhang Pag-anhi, importante usab nga hinumdoman nga ang Ginoo misaad og tabang ug espirituhanong panalipod niadtong mopili sa pagsunod Kaniya (tan-awa ang Pinadayag 17:14 ; 1 Nephi 22:16–17). Usa ka dapit sa kalinaw, dangpanan, ug kahilwasan mao ang Zion, ang Bag-ong Jerusalem, nga mahimutang sa kontinente sa Amerika (tan-awa ang Doktrina ug mga Pakigsaad 45:66 ; Ang Mga Artikulo sa Hugot nga Pagtuo 1:10). Ang Ginoo wala pa magpadayag og daghang mga detalye mahitungod niining umaabot nga siyudad, apan Siya mitudlo mahitungod sa panalipod nga maanaa didto.
Kon ang mga estudyante adunay dugang nga mga pangutana mahitungod sa Zion, mahimong gamiton ang “Unsa ang Zion?” diha sa “Komentaryo ug Background nga Impormasyon” nga bahin niini nga leksiyon.
Unsa nga mga pulong o mga hugpong sa pulong ang imong nakita nga importante gikan niining mga bersikulo?
Asa maggikan ang matarong nga katawhan sa Zion?
Unsa ang gibuhat sa Ginoo karon aron sa pag-andam kanato niining umaabot nga panahon ug aron sa pagpanalipod kanato gikan sa mga dautan ug mga peligro sa atong panahon?
Paghunahuna mahitungod sa unsay imong nakat-onan
Tan-awa ngadto sa pamahayag ni Presidente Nelson sa sinugdanan sa leksiyon, ug paghunahuna mahitungod sa unsa ang imong natun-an karon mahitungod sa gamhanang mga buhat nga himoon sa Ginoo.
Mahimong ipakita ang mosunod nga mga pangaghat isip mga ulohan sa lahi-lahi nga mga dapit sa pisara ug dapiton ang daghang mga estudyante sa pagpili og usa ka pangaghat aron kompletohon. Ang mga estudyante mahimo dayon nga dapiton sa pagpaambit nganong ilang gisulat ang ingon.
Ang pipila ka mga butang nga labing mipatigbabaw kanako gikan sa akong mga pagtuon karon mao ang …
Karon ako nakat-on o nakabati nga ang Ginoo …
Tungod sa unsa ang akong nakat-onan o nabati karon, gusto nako nga …
Komentaryo ug Background nga Impormasyon
Unsa ang atong nahibaloan mahitungod sa duha ka mga propeta nga maanaa sa Jerusalem?
Si Elder Bruce R. McConkie (1915–85) sa Korum sa Napulog Duha ka Apostoles naghatag sa mosunod nga mga panabot:
Imahe
Head and shoulders portrait of Elder Bruce R. McConkie.
Kinsa kaha kining mga saksi? Wala kita masayod, gawas lang nga mga sumusunod sila ni Joseph Smith; maghupot sila sa balaan nga Melchizedek nga Pagkapari; mga miyembro sila sa Ang Simbahan ni Jesukristo sa mga Santos sa Ulahing mga Adlaw. Makataronganon ang magtuo, kay nasayran man kon sa unsang paagi ang Ginoo motratar sa iyang katawhan sa tibuok kasaysayan, nga sila mahimong duha ka sakop sa Konseho sa Napulog Duha o sa Unang Kapangulohan sa Simbahan.
(Bruce R. McConkie, The Millennial Messiah: The Second Coming of the Son of Man [1982], 390)
Sama sa unsa kaha kon si Jesukristo moanhi pag-usab?
Si Presidente Russell M. Nelson mitudlo:
Imahe
Official portrait of President Russell M. Nelson taken January 2018
Si [Jesukristo] mobalik sa Balaan nga Siyudad (tan-awa sa Doktrina ug mga Pakigsaad 133:46–48). Didto ug bisan asa, “ang himaya sa Ginoo igapadayag, ug ang tanan nga unod sa tingob makakita niini” ( Isaias 40:5 ; tan-awa usab sa Doktrina ug mga Pakigsaad 101:23). Ang Iyang “ngalan pagatawgon Kahibulongan, Magtatambag, Dios nga Makagagahom, Amahan nga walay Kataposan, Prinsipe sa Pakigdait” ( Isaias 9:6). …
Nianang panahona Siya adunay bag-ong mga ngalan ug palibotan sa espesyal nga mga Santos. Pagailhon Siya isip “Ginoo sa kaginoohan, ug ang Hari sa kaharian: ug sila nga [magauban] kaniya [mao kadtong mga] tinawag, ug mga pinili, ug mga kasaligan” ( Pinadayag 17:14) sa ilang responsibilidad dinhi sa mortalidad. Dayon Siya “magahari sa kahangtoran” ( Pinadayag 11:15).
(Russell M. Nelson, “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas,” Liahona, Abr. 2020, 10)
Unsa ang Zion?
Ang pulong nga Zion gigamit diha sa mga kasulatan nga nagkahulugan og nagkalainlaing mga butang. Usahay ang pulong nagpasabot sa katawhan sa Zion ug naghulagway kanila isip “ang putli og kasingkasing” ( Doktrina ug mga Pakigsaad 97:21). Ang Zion mahimo usab nga nagpasabot sa tibuok Simbahan ug sa mga istaka [stake] niini sa tibuok kalibotan (tan-awa sa Doktrina ug mga Pakigsaad 82:14). Ang pulong nga Zion mahimong magtumong usab sa piho nga geograpikanhong mga lokasyon, sama sa siyudad sa Enoch (tan-awa ang Moises 7:18–21), sa karaang Jerusalem (tan-awa ang 2 Samuel 5:7 ; 1 Mga Hari 8:1), ug sa ulahing mga adlaw nga Bag-ong Jerusalem (tan-awa ang Doktrina ug mga Pakigsaad 45:66–67 ; 57:1–3 ; Ang Mga artikulo sa Hugot nga Pagtuo 1:10).
Unsaon nako pagbati ang kalinaw taliwala sa mga kalamidad sa kataposang mga adlaw?
Mahimong isulat ang mga pulong nga Tam-is ug Pait diha sa pisara ug dayon hangyoa ang mga estudyante sa paghunahuna ug pagpakigbahin og pipila ka mga kasinatian sa kinabuhi nga makonsiderar nga parehas nga tam-is ug pait.
Dapita ang mga estudyante sa pagbasa sa Pinadayag 10:1–3, 8–11 ug Doktrina ug mga Pakigsaad 77:14 , nga mangita unsa ang gihatag kang Juan, unsa ang iyang gihimo niini, ug unsa ang girepresentar niining maong buhat. Ipasabot nga napanalanginan si Juan nga siya dili mamatay aron makadala siya og mga tawo ngadto sa Manluluwas (tan-awa sa Doktrina ug mga Pakigsaad 7:1–4).
Sa unsang paagi mahulagway ang mga hitabo sa kataposang mga adlaw nga gitagna ni Juan isip parehas nga tam-is ug pait?
Unsang mga responsibilidad ang lagmit gihatag sa Ginoo kanato nga mahimong magdala ngadto sa parehas nga tam-is ug pait nga mga kasinatian?
Sa imong hunahuna ngano nga ang Ginoo nagtugot kanato nga makasinati sa parehas nga tam-is ug pait?