“Nakita Ko ang Laing Anghel …, Nagdala sa Walay Kataposang [Ebanghelyo]”
Imahe
The Melbourne Australia Temple angel Moroni.
Hunahunaa ang mahitungod sa Ikaduhang Pag-anhi ni Jesukristo. Sa unsang paagi nga Ang Simbahan ni Jesukristo sa mga Santos sa Ulahing mga Adlaw nagtabang kanimo nga makasabot ug makaandam alang niana? Si Apostol Juan nanagna sa mga panghitabo nga mahimong pasiuna sa madaugon nga Ikaduhang Pag-anhi sa Manluluwas, lakip ang Pagpahiuli sa Iyang Simbahan ug ang paglain sa mga matarong gikan sa mga dautan. Kini nga leksiyon gituyo aron makatabang kanimo nga makasabot sa unsang paagi nga ang Manluluwas ug ang Iyang gipahiuli nga Simbahan makatabang sa kalibotan—lakip na kanimo—nga maandam sa Iyang Ikaduhang Pag-anhi.
Pagtudlo gamit ang pulong sa Dios. Sa matag oportunidad, dasiga ang mga estudyante nga modangop ngadto sa mga kasulatan ug sa mga pulong sa mga propeta alang sa giya, mga tubag sa mga pangutana, ug suporta. Sa pagbuhat sa ingon sa mga estudyante, “ang mga pulong ni Kristo magtug-an [kanila] sa tanan nga mga butang nga [ilang] buhaton” ( 2 Nephi 32:3).
Pagpangandam sa estudyante: Dapita ang mga estudyante sa paghimo og usa ka listahan sa kon unsa ang ilang gibati nga tulo o upat sa labing importanteng mga katuyoan sa Ang Simbahan ni Jesukristo sa mga Santos sa Ulahing mga Adlaw.
Posible nga mga Kalihokan sa Pagkat-on
Ang katuyoan sa Simbahan
Ang mosunod nga kalihokan mahimong usa ka pagdrama-drama, mahimong isip sa usa ka klase o diha sa ginagmayng mga grupo.
Handurawa nga anaa ka sa klase sa tulunghaan sa dihang ang hilisgotan kabahin sa naorganisar nga relihiyon gihisgotan. Usa ka klasmeyt ang miingon nga nagkagamay ang mga tawo nga nahisakop, o nanambong sa usa ka simbahan tungod kay sila mibati nga ang mga simbahan walay kapuslanan. Kini nga komento nakapahimo nimo sa paghunahuna mahitungod sa tanan nga mga katuyoan sa Ang Simbahan ni Jesukristo sa mga Santos sa Ulahing mga Adlaw.
Unsa ang pipila ka mga butang nga pamati nimo kinahanglang masabtan sa uban mahitungod kon nganong giorganisar ni Jesukristo ang Iyang Simbahan?
Ang Simbahan ni Jesukristo sa mga Santos sa Ulahing mga Adlaw adunay daghang importanteng mga katuyoan nga mahimong mosangpot sa imong hunahuna. Si Elder D. Todd Christofferson sa Korum sa Napulog Duha ka Apostoles mipasabot sa usa sa daghang importanteng mga katuyoan sa Ang Simbahan ni Jesukristo sa mga Santos sa Ulahing mga Adlaw:
Imahe
Portrait of Elder D. Todd Christofferson. Photographed in March 2020.
Ang Simbahan ni Jesukristo sa mga Santos sa Ulahing mga Adlaw talagsaong gitugutan ug gisugo sa pagtuman sa mga gikinahanglang andamon alang sa Ikaduhang Pag-anhi sa Ginoo; sa pagkatinuod, gipahiuli kini alang niana nga tuyo.
Sa unsang paagi kaha nga ang pagkasabot niini nga katuyoan nakaapekto sa unsaon nimo ug sa uban pagtan-aw ug pagsalmot diha sa Simbahan?
Paggahin og higayon sa pagpamalandong sa mga panalangin sa Simbahan sa Manluluwas ug sa Iyang gipahiuli nga ebanghelyo diha sa imong kinabuhi. Diha sa imong pagtuon, pamati sa mga pangaghat ug mga impresyon gikan sa Espiritu Santo nga makatabang kanimo nga magamit kining mga panalangin aron mas makapangandam alang sa Ikaduhang Pag-anhi sa Manluluwas.
Nakakita si Juan og usa ka panan-awon sa ulahing adlaw nga Pagpahiuli
Isip kabahin sa iyang panan-awon nga natala diha sa basahon sa Pinadayag, nakasaksi si Juan og daghang importanteng mga panghitabo nga mahitabo sa dili pa ang Ikaduhang Pag-anhi sa Manluluwas. Nakakita siya og 144,000 nga matinud-anon nga halangdong mga pari gikan sa tanang mga tribu sa Israel nga giordinahan aron magdumala sa ebanghelyo ug magdala sa mga tawo ngadto sa Simbahan (tan-awa sa Pinadayag 7:4–8 ; 14:1–5 ; Doktrina ug mga Pakigsaad 77:11). Nakasaksi usab siya sa daghang mga anghel nga naglihok aron maandam ang kalibotan alang sa pagbalik sa Manluluwas (tan-awa sa Pinadayag 14:6–20).
Ikonsiderar ang pagpakita og hulagway sa usa ka istatuwa ni anghel Moroni samtang ang mga estudyante mamalandong sa mosunod nga pangutana.
Imahe
Angel Moroni on the Meridian Idaho Temple during winter at sunrise.
Nahibulong ka ba kon nganong ang kadaghanan sa atong mga templo adunay usa ka istatuwa ni Moroni sa ibabaw?
Kini nga mga istatuwa nagsimbolo sa pagsangyaw sa gipahiuli nga ebanghelyo sa tibuok kalibotan. Ang langitnong mga mensahero, lakip na si Moroni, mihimo og importanteng tahas sa Pagpahiuli sa ebanghelyo pinaagi kang Propeta Joseph Smith. Sa Pinadayag 14 , si Juan mipasabot sa importanteng tahas ni Moroni ug sa uban pang mga anghel diha sa pagtabang sa pagpangandam sa kalibotan alang sa pagbalik sa Manluluwas.
Basaha ang Pinadayag 14:6 , nga mangita alang sa unsa ang imong nakat-onan gikan sa paghulagway ni Juan nga nagpahinumdom kanimo ni Moroni ug sa iyang misyon.
Unsa man ang imong nakit-an? (Kon gusto ka nga makakat-on pa og daghan mahitungod sa tahas ni Moroni sa Pagpahiuli, tan-awa ang Joseph Smith—Kasaysayan 1:29–54 .)
Agig dugang kang Moroni, ang anghel nga giingon sa Pinadayag 14:6 mahimo usab nga nagrepresentar og daghang langitnong mga mensahero kinsa mitabang sa pagpahiuli sa ebanghelyo ni Jesukristo. Basaha ang mosunod aron maila ang ubang mga anghel nga mihimo og tahas sa pagpahiuli sa ebanghelyo:
Mahimong tugotan ang mga estudyante sa pagbuhat nga magpares o diha sa gagmayng mga grupo aron rebyohon ang usa niining mga tudling ug ilhon ang ubang mga anghel nga mihimo og tahas sa Pagpahiuli.
Basaha ang Pinadayag 14:7 , nga mangita kon unsay gisulti sa anghel.
Ang mga pulong nga “nahiabot na ang takna sa iyang paghukom” nagpasabot sa panahon nga si Jesukristo mohukom sa tanang katawhan sa yuta. Ang Iyang mga paghukom mahitabo atol sa Ikaduhang Pag-anhi (tan-awa sa Malaquias 3:1–5) ug sa Kataposang Paghukom (tan-awa sa 2 Nephi 9:15). Inubanan sa panabang sa langitnong mga mensahero, gipahiuli ni Jesukristo ang Iyang ebanghelyo aron sa pagtabang sa pag-andam sa kalibotan alang sa Iyang Ikaduhang Pag-anhi.
Unsa ang pipila sa mga paagi nga ang gipahiuli nga ebanghelyo sa Ginoo ug ang Iyang Simbahan nagtabang sa pag-andam sa kalibotan sa Iyang Ikaduhang Pag-anhi? Ipasabot ang imong mga tubag.
Unsa ang gitudlo diha kanimo sa mga paningkamot sa Ginoo sa pag-andam kanato alang sa Iyang Ikaduhang Pag-anhi mahitungod Kaniya ug sa Iyang mga tinguha alang kanimo?
Ang atong tahas diha sa pag-andam sa kalibotan alang sa Ikaduhang Pag-anhi
Gitapos ni Juan kini nga bahin sa iyang sinulat pinaagi sa paghulagway og usa ka panan-awon niya sa usa ka “ m[u]rag anak [o]g tawo” ( Pinadayag 14:14). Basaha ang Pinadayag 14:14–15 , nga mangita kon unsa ang nasaksihan ni Juan.
Kini nga mga bersikulo mahimong gamiton aron matabangan ang mga estudyante nga mabati ang kadinalian ug kaimportante sa pagsalmot uban sa Ginoo diha sa pagpundok sa Israel. Mahimong makatabang ang pagpakita og hulagway sa usa ka sanggot o pagdrowing og usa ngadto sa pisara samtang nagpasabot sa kamahinungdanon sa galab sa kamot sa Manluluwas ( bersikulo 14).
Imahe
Drawing of a sickle.
Ang sanggot mao ang usa ka hait, kurbado nga sulab nga gigamit sa pagputol ug pag-ani (o pagsanggi) sa mga tinanom. Sa dihang si Jesus mitudlo sa sambingay sa trigo ug sa mga sagbot (tan-awa ang Mateo 13:24–30, 36–43), Siya miingon nga ang trigo (matarong nga mga tawo) ibulag gikan sa mga sagbot (dili matarong nga mga tawo) “sa kataposan sa kalibotan” ( Mateo 13:40). Sa iyang panan-awon, si Juan nakasaksi sa pagpundok sa mga matarong gikan sa mga dautan agig pagpangandam alang sa kalaglagan sa mga dautan (tan-awa sa Pinadayag 14:16–20). Ang hugpong sa pulong nga “Palihoka ang imong [sanggot], ug pangani na” diha sa Pinadayag 14:15 mahimong magkahulugan sa pagpundok sa mga kalag ngadto kang Jesukristo.
Sa unsang paagi kaha sa imong hunahuna ang imbitasyon nga gihulagway sa bersikulo 15 mahimong magamit sa mga miyembro sa Simbahan karon? (Tan-awa sa Doktrina ug mga Pakigsaad 4:4 ; 33:7 .)
Si Jesukristo nagdapit kanato sa pagsalmot sa pagpundok sa mga kalag ngadto Kaniya sa pagpangandam alang sa Iyang Ikaduhang Pag-anhi. Kini mao ang kasagaran gitawag nga ang pagpundok sa Israel.
Paggahin og higayon sa pagrebyo sa bag-ohay lang nga mga pagtulun-an sa mga propeta ug apostoles sa Ginoo nga may kalabotan sa pagsalmot sa pagpundok sa Israel. Aron mabuhat kini, mahimo kang mangita sa hilisgotan nga “Pagpundok” sa bag-ohay nga mga pakigpulong sa kinatibuk-ang komperensiya sa ChurchofJesusChrist.org o diha sa Gospel Library nga app. Isip alternatibo, mahimo nimong irebyo ang usa o daghan pa sa mosunod nga mga mensahe gikan ni Presidente Russell M. Nelson ug ni Sister Wendy W. Nelson. Diha sa imong pagtuon, pangita sa mga pamahayag nga naghulagway sa atong tahas sa pagtabang sa pagpundok sa Israel ug sa pagpangandam sa kalibotan alang sa Ikaduhang Pag-anhi.
Mahimong maghatag og mga kopya sa mosunod alang sa mga estudyante nga lagmit walay access sa elektronik. Hatagi ang mga estudyante og panahon sa pagtuon ug dayon sa pagpaambit og mga pamahayag nga ilang nakaplagan gikan sa ilang mga pagtuon.
“Paglaom sa Israel” (tibuok kalibotan nga debosyonal sa kabatan-onan uban ni Russell M. Nelson ug Wendy W. Nelson, Hunyo 3, 2018), dugang ngadto sa New Era ug Ensign, ChurchofJesusChrist.org
Unsa ang usa ka pamahayag nga imong nakaplagan mahitungod sa pagpundok sa Israel nga labing makahuluganon kanimo? Ngano man?
Unsa ang pipila sa mga pihong butang nga imong buhaton aron maandam ang imong kaugalingon ug ang uban alang sa pagbalik sa Manluluwas? Sa unsang paagi nga kining mga butanga makatabang kanimo nga mahimong andam?
Komentaryo ug Background nga Impormasyon
Nganong aduna akoy tahas sa pag-andam sa kalibotan alang sa Ikaduhang Pag-anhi sa Manluluwas?
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Tungod kay ang atoa mao ang kataposan ug mahinungdanon sa tanang mga dispensasyon, tungod kay ang tanang mga butang sa kataposan humanon ug matuman sa atong panahon, busa, adunay usa ka piho kaayo nga responsibilidad nga anaa sa Simbahan karon nga wala sa mga miyembro sa Simbahan sa bisan unsang panahon sa una. Dili sama sa Simbahan sa kapanahonan ni Abraham o Moises,Isaias o Ezequiel, o gani sa panahon ni Santiago ug Juan sa Bag-ong Tugon, kita adunay responsibilidad sa pag-andam sa Simbahan sa Kordero sa Dios sa pagdawat sa Kordero sa Dios —sa linawas, sa madaugong himaya, sa Iyang tahas sa milenyum isip Ginoo sa mga ginoo ug Hari sa mga hari. Walay laing dispensasyon sukad nga aduna niana nga katungdanan.
… Kita adunay responsibilidad isip Simbahan ug isip indibidwal nga [mga] miyembro niana nga Simbahan nga mahimong takos nga moanhi si Kristo nato, nga mahimong takos nga Siya moabi-abi nato, ug nga Siya modawat ug mogakos nato. Ang [mga] kinabuhi nga atong ipresentar Kaniya nianang sagrado nga takna kinahanglan mahimong takos alang Kaniya!
Si Elder Neil L. Andersen sa Korum sa Napulog Duha ka Apostoles mitudlo:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Naghunahuna ba kamo kon nganong gipadala kamo dinhi sa yuta niining panahona? Wala kamo matawo sa panahon nila ni Adan ug Eva o sa panahon nga ang mga paraon mao ang nagamando sa Ehipto o sa panahon sa Ming dynasty. Mianhi kamo sa yuta niining panahona, 20 ka siglo human sa unang pag-anhi ni Kristo. Ang priesthood sa Dios gipahiuli dinhi sa yuta, ug ang Ginoo mipahimutang sa Iyang kamot sa pag-andam sa kalibotan alang sa Iyang mahimayaong pagbalik. Mao kini ang mga adlaw sa dagkong oportunidad ug importante nga mga responsibilidad. Mao kini ang inyong mga adlaw.
Sa inyong bunyag, inyong gipahayag ang inyong hugot nga pagtuo diha ni Jesukristo. … Usa sa inyong importante nga mga responsibilidad mao ang pagtabang sa pag-andam sa kalibotan alang sa Ikaduhang Pag-anhi sa Manluluwas.
Kon ang mga estudyante makabenepisyo gikan sa mas maayong panabot sa gubat nga gipadayon ni Satanas batok niadtong ania sa yuta, ikonsiderar ang pagdapit kanila sa pagbasa sa Pinadayag 13 , nga mangita sa mga pulong ug hugpong sa mga pulong nga naghulagway sa mga kinaiya ug mga binuhatan sa mananap. Unsa ang gitudlo niini nga mga pulong ug hugpong sa mga pulong mahitungod ni Satanas, giunsa niya paglihok, ug unsay iyang gipaningkamotan nga buhaton? Sa unsang paagi ang pagsabot niini nga mga detalye makatabang nimo nga mas mailhan ug mabuntog ang iyang impluwensiya?
