Fakataukei Fakatokāteliné: Fakahā 20:12

“Pea Naʻe Fakamāuʻi ʻa e Pekiá … ʻo Fakatatau ki Heʻenau Ngaahi Ngāué”

Naʻá ke ako ʻi ha lēsoni kimuʻa, “Fakahā 20:11–15,” fekauʻaki mo e Fakamaau Fakaʻosí pea mo e fatongia ʻo e Fakamoʻuí ʻi heʻene hoko ko hotau Fakamāú. ʻE lava ke tokoni atu ʻa e lēsoni ko ʻení ke ke ako maʻuloto e potufolofola fakataukei fakatokāteliné mo e kupuʻi lea folofola mahuʻinga ki he Fakahā 20:12, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié.

Fakafanongo ki he tali ʻa e kau akó. Fakaʻehiʻehi mei he faʻa fakakaukau ki he konga hoko ʻo e palani lēsoní lolotonga hono fakahoko pe tali ʻe he kau akó e ngaahi fehuʻí. Fakafanongo fakalelei ki he meʻa ʻoku nau vahevahé, pea fai ha ngaahi fehuʻi vakaiʻi ʻo ka fiemaʻu ke mahino moʻoni kiate koe ʻenau ngaahi fehuʻí mo e fakamatalá. ʻOku faʻa mahuʻinga ange he taimi ʻe niʻihi ke aleaʻi ha tefito ʻoku fakamānako ki he kau akó pe tokoni ke mahino lelei ange kiate kinautolu ha tokāteline ʻi hano akoʻi kotoa ʻo e naunau ʻi he palani ʻo e lēsoní.

Teuteu ʻa e tokotaha akó: Fakaafeʻi e kau akó ke nau toe vakaiʻi e Fakahā 20:12 pea teuteu ke vahevahe mo e kalasí e meʻa kuo nau ako fekauʻaki mo e Fakamaau Fakaʻosí pea mo e founga te tau lava ai ʻo teuteu ki aí.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ia ʻi he hili ʻa e “Fakahā 20:11–15” ʻa ia ko e lēsoni fakaʻuhinga ia ki he potufolofola fakataukei fakatokāteline ʻo e Fakahā 20:12 . Kapau ʻoku fiemaʻu ke ʻunuakiʻi e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo hono lēsoni puipuituʻá lolotonga e uike ko iá.

Fakakaukau ke kole ki ha kau ako ʻe toko tolu kimuʻa he kalasí ke nau takitaha fakamanatu ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié pea mo teuteu ke vahevahe ha fakamatala nounou ʻo e tefitoʻi moʻoni ko iá ʻamui ange ʻi he lēsoní.

Ako maʻuloto pea fakamatalaʻi

Tokoni ki he kau akó ke nau ako maʻuloto mo fakamatalaʻi ʻa e potufolofola mo e kupuʻi lea folofola mahuʻinga ki he Fakahā 20:12 ʻo fakaʻaongaʻi e ngaahi founga lelei taha maʻanautolú.

Fakakaukau ke fakamanatu ki he kau akó naʻa nau ako ʻi he lēsoni kimuʻá ha potufolofola fakataukei fakatokāteline fekauʻaki mo e Fakamaau Fakaʻosí. Fakaafeʻi kinautolu ke vakai pe te nau lava ʻo kumi ʻa e potufolofola ko ʻení ʻi he folofolá ʻo siʻi hifo ʻi he miniti ʻe uá, mei heʻenau manatú pe fakaʻaongaʻi ha ngaahi maʻuʻanga tokoni kehe.

ʻE lava ke tokoni e ʻekitivitī ko ʻení ke ke ako maʻuloto ʻa e potufolofolá mo e kupuʻi lea folofola mahuʻinga “pea naʻe fakamāuʻi ʻa e pekiá … ʻo fakatatau ki heʻenau ngaahi ngāué” ( Fakahā 20:12):

• Lea ʻaki tuʻo nima ʻa e potufolofolá mo e kupuʻi lea folofola mahuʻingá.

• Hili iá pea hiki tuʻo tolu e potufolofolá mo e kupuʻi lea folofola mahuʻingá ʻi ha laʻipepa mei he meʻa ʻokú ke manatuʻí. Hili e feinga takitaha, vakaiʻi pe ʻoku tonu e meʻa naʻá ke hikí pea fai ha ngaahi liliu ʻe fiemaʻú ʻi he feinga hokó.

Fakakaukau ke fehuʻi ange pe ʻe lava ʻe ha mēmipa ʻo e kalasí ʻo talaatu maʻuloto e potufolofolá mo e kupuʻi lea folofola mahuʻingá mei heʻene manatú, pe fakaafeʻi e kalasí ke nau lau maʻuloto fakataha ʻeni.

Fakakaukau ke hiki e potufolofolá mo e kupuʻi lea folofola mahuʻingá ʻi he palakipoé pea fakaafeʻi ha niʻihi te nau loto-lelei ke hiki takatakai e ngaahi moʻoni kuo nau ako fekauʻaki mo e Fakamaau Fakaʻosí, kae ʻoua ʻe fakaʻaongaʻi e ʻekitivitī ko ʻeni ʻi laló. Fakaafeʻi leva ha kau ako ʻe niʻihi ke fakamatala ki he kalasí ʻa e meʻa ne nau tohí.

Fakamanatu ha lēsoni kimuʻa ne mou ako ai ʻa e foʻi moʻoni ʻE fakamāuʻi kitautolu ʻe he ʻOtuá mei he ngaahi tohi kuo tohí ʻo fakatatau ki heʻetau ngaahi ngāué. Ke tokoniʻi koe ke ke fakafuofuaʻi ʻa e mahino ʻokú ke maʻu ki he moʻoni ko ʻení, fakakaukauloto ʻoku fai atu ʻe haʻo tehina ʻa e ngaahi fehuʻi ko ʻení lolotonga hoʻomou ako fakafāmili e folofolá. Tali e ngaahi fehuʻí ki he lahi taha te ke lavá.

Kapau ʻoku kole ki he kau akó ke nau tali e ngaahi fehuʻi ko ʻení, fakaʻaliʻali e ngaahi fehuʻí maʻanautolu, pea fakakaukau ke fakaafeʻi kinautolu ke aleaʻi ʻenau ngaahi talí mo hanau hoa. Lue takai ʻi he lokí ʻo fakafanongo ki heʻenau ngaahi talí. Kapau ʻoku fiemaʻu tokoni e kau akó, fakamanatu ange ʻa e naunau naʻa nau ako ʻi he lēsoni “Fakahā 20:11–15.”

• Ko hai ʻe fakamāuʻí?

• Ko hai ʻe hoko ko hotau fakamāú pea ko e hā hono ʻuhingá?

• Ko e hā e meʻa ʻe fakamaauʻi kitautolu mei aí?

• Ko e hā ʻa e ngaahi tohi ʻe fakamaauʻi kitautolu mei aí? (Vakai, Fakahā 20:12 .)

• ʻE founga fēfē haʻatau mateuteu ki he fakamāú?

Kuo ʻosi ʻeni ha ngaahi miniti siʻi mei hoʻo feinga ke ako maʻuloto e kupuʻi lea folofola mahuʻinga ki he Fakahā 20:12 , vakai pe te ke kei lava pē ʻo lau maʻuloto ia. Vakaiʻi pe ʻoku tonu ho meʻa ne laú, ʻo ka fiemaʻu.

Akoako hono fakaʻaongaʻí

Kapau naʻe kole ki ha kau ako ʻe toko tolu kimuʻa he kalasí ke nau takitaha teuteu ha fakamatala nounou ʻo ha tefitoʻi moʻoni ki hono maʻu ʻo e ʻilo fakalaumālié, fakaafeʻi kinautolu ke vahevahe ʻenau ngaahi fakamatala fakanounoú mo e kalasí ʻi he taimi ko ʻení. Kapau naʻe ʻikai ʻuluaki kole ki he kau akó, fakakaukau ke kole ki ha kau ako ʻe toko tolu te nau loto-lelei ke fakamatalaʻi nounou ha taha ʻo e ngaahi tefitoʻi moʻoní. Fakapapauʻi ke fakamālō mo poupouʻi ʻa e tokotaha ako kotoa pē ʻokú ne fakamatalaʻi fakanounou ha taha ʻo e ngaahi tefitoʻi moʻoní.

ʻE lava ke tokoni hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié kiate kitautolu ʻi he ngaahi tūkunga moʻoni ʻo e moʻuí. Fakamatalaʻi fakanounou e ngaahi tefitoʻi moʻoni ʻo hono maʻu ʻo e ʻilo fakalaumālié ʻi he lea pē ʻaʻau. Toe vakaiʻi leva e palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2022), ʻo kumi ha toe ngaahi moʻoni te ke lava ʻo fakakau ʻi hoʻo fakamatala nounoú.

ʻI he ʻekitivitī ko ʻení, fakakaukau ke fakaafeʻi e kau akó ke vahevahe ʻenau ngaahi tūkungá ʻa ia ʻoku fiemaʻu ai ke mahino lelei ange ki ha taha ʻa e ngaahi moʻoni fekauʻaki mo e Fakamaau Fakaʻosí. Fakakaukau leva ke fetongi ʻa e ongo tūkunga ʻi he lēsoní ʻaki ha (ngaahi) tūkunga ʻe vahevahe ʻe he kau akó.

Lau ʻa e ongo tūkunga ko ʻení, pea fili pe ko e fē meʻa te ke fie tokanga taha ki ai ʻi he ʻekitivitī ko ʻení. Fakakaukau ki he ʻuhinga ʻe meimei ke ongoʻi pehē ai ha taha ʻi he tūkunga ko iá. Te ke lava nai ʻo fakafekauʻaki ʻa e ongo ʻe maʻu ʻe ha taha ʻo e ongo finemuí ni? Fakalaulauloto ki he meʻa ʻoku teʻeki mahino kiate kinautolu fekauʻaki mo e Fakamaau Fakaʻosí ʻa ia ʻe ala tokoni kiate kinautolú.

1. ʻOku ʻi ai ha ngaahi kaungāmeʻa ʻo Sitefanī ʻoku nau moʻui ʻi ha tōʻonga moʻui fakamāmani. ʻOkú ne pehē neongo ʻoku nau maumauʻi e ngaahi fekaú, ka ʻoku fakalata he taimi ʻe niʻihi ʻa e meʻa ʻoku nau faí. Kuo teʻeki ke ne fakatokangaʻi ha ngaahi nunuʻa kovi lahi ʻi heʻenau ngaahi filí pea ʻokú ne fakakaukau ke kau fakataha mo kinautolu.

2. Ko Keilá ko ha finemui angatonu ia ʻoku fakatomala ʻi he loto-fakatōkilalo ʻi he taimi ʻokú ne fai ai ha ngaahi fehalākí, ka ʻokú ne kei ongoʻi ilifia pē ʻi he talanoa ʻa e kakaí fekauʻaki mo e Fakamaau Fakaʻosí. ʻOkú ne feinga ke ʻoua te ne fakakaukau ki ai.

ʻE lava ke fakakakato fakafoʻituitui ʻe he kau akó ʻa e ʻekitivitī ko ʻení pe mo hanau hoa.

Fai ha tohi kia Sitefanī pe Keila ʻokú ke tui ʻe lava ʻo tokoniʻi ia ke ne fakaʻehiʻehi mei he fakaʻiseʻisa pe manavasiʻi ʻi he kahaʻú. Ko ha founga ʻe taha, ko hoʻo fili ke tohi ki ha taha ʻokú ke ʻiloʻi ʻe tāpuekina ʻene moʻuí ʻi heʻene maʻu ha mahino lelei ange ki he Fakamaau Fakaʻosí. Fakakau ʻi hoʻo tohí ʻa e founga ʻoku kaunga ai ʻa e ngaahi tefitoʻi moʻoni takitaha ʻo hono maʻu ʻo e ʻilo fakalaumālié ki heʻene tūkungá. Mahalo te ke fiemaʻu ke fakakaukau ki he ngaahi meʻá ni ʻi hoʻo fili e meʻa ke tohí.

• Te ke tokoniʻi fēfē ʻa Sitefanī pe Keila ke sio ki he ngaahi meʻá mei ha fakakaukau ʻoku taʻengatá? ʻE lava fēfē ʻe he meʻá ni ʻo tokoniʻi iá?

• Ko e hā kuó ke ako fekauʻaki mo e Tamai Hēvaní, Sīsū Kalaisi, mo e palani ʻo e fakamoʻuí ʻe ala tokoni kia Sitefanī pe Keila? Naʻá ke ako fēfē ʻa e ngaahi moʻoni ko ʻení?

• Ko e hā ha ngaahi maʻuʻanga tokoni kuo fokotuʻu fakalangi te ke fokotuʻu atu ke ne tafoki ki ai kae lava ke ne ako ʻa e moʻoni fekauʻaki mo e Fakamaau Fakaʻosí? ʻE tokoniʻi fēfē ia ʻe he ngaahi moʻoni naʻe akoʻi ʻi he Fakahā 20:12 ?

• Te ke poupouʻi fēfē ia ke ngāue ʻi he tuí he taimí ni pea ʻi he kahaʻú?

ʻOange ki he kau akó ha faingamālie ke vahevahe leʻolahi mo e kalasí pe ko ha kiʻi kulupu tokosiʻi ʻa e meʻa ne nau tohi ki he finemuí ʻi he tūkunga ne nau filí. Fakafanongo fakalelei lolotonga ʻenau vahevahé, pea fakakaukau ke fai ha ngaahi fehuʻi vakaiʻi hangē ko ʻení ke tokoni ke fakaloloto ʻenau mahinó: “ʻOku ʻi ai nai ha ngaahi veesi folofola pau pe ngaahi fakamatala ʻa e kau taki ʻo e Siasí ʻe ala tokoni kiate ia? ʻE tokoni fēfē ia?” “Ko e hā kuó ne tokoniʻi koe ke ke maʻu ha mahino mo ke teuteu ki he Fakamaau Fakaʻosí? Te ke fie fokotuʻu ange ke fai ʻe Sitefanī pe Keila ha meʻa tatau? Ko e hā hono ʻuhingá?”

Kapau ʻe tokoni ki he kau akó ke nau manatuʻi lelei ange ʻa e kupuʻi lea mahuʻinga ʻi he Fakahā 20:12 , fakaafeʻi ke nau feinga ke lau maʻuloto tuʻo taha ia kimuʻa pea nau toki mavahe mei he kalasí.

Toe vakaiʻi ʻo e fakataukei fakatokāteliné

ʻI he kamataʻanga pe fakaʻosinga ʻo e lēsoni ka hoko maí, fakaʻaongaʻi ha miniti ʻe tolu ki he nima ke toe vakaiʻi e potufolofola fakataukei fakatokāteline Fakahā 20:12 . Ko e founga ʻe taha ke fai ai ʻení ko hono fakaʻaliʻali ʻa e potufolofolá mo e kupuʻi lea mahuʻinga ʻo e folofolá, pea tamateʻi ha foʻi lea ʻe ua pe tolu. Hili hono fakafonu totonu ʻe he kau akó ʻa e ngaahi konga kuo tamateʻí, toe fakaʻaliʻali ʻa e potufolofolá mo e kupuʻi lea mahuʻingá kae tamateʻi ha ngaahi foʻi lea kehe. ʻE lava ke toutou fakahoko ʻeni ʻaki hono tamateʻi ha ngaahi foʻi lea kehe ʻi he taimi kotoa pē.