Fakahā 21–22
“Ko Ia ia ʻe Ikuná, ʻe Maʻu ʻe Ia ʻa e Ngaahi Meʻa Kotoa Pē”
Te ke lava nai ʻo fakakaukauloto pe ʻe fēfē haʻate nofo mo e ʻOtuá ʻi he puleʻanga fakasilesitialé? ʻI he ngaahi ʻata fakaʻosi ʻo e fakahā maʻongoʻonga ʻa Sioné, naʻá ne mamata “ki ha langi foʻou mo ha fonua foʻou” pea mo ha kolo māʻoniʻoni ʻoku ʻalu hifo mei he langí (vakai, Fakahā 21:1–2). Naʻá ne fakamoʻoniʻi ʻe nofo ʻa e ʻOtuá “mo kinautolu, pea te nau hoko ko hono kakai” (Fakahā 21:3). ʻOku fakataumuʻa ʻa e lēsoni ko ʻení ke tokoni ke mahino kiate koe ko e faingamālie ko ia ke nofo mo e Tamai Hēvaní mo Sīsū Kalaisi ʻi he puleʻanga fakasilesitialé ʻoku taau ia mo hoʻo ngaahi ngāue kotoa pē.
Tokoniʻi e kau akó ke nau fakatokangaʻi ʻa e mālohi, ʻaloʻofa mo e ivi tākiekina ʻo e ʻEikí. Tokoniʻi e kau akó ke nau sio ki he toʻukupu ʻo e ʻEikí ʻi hono tāpuakiʻi e kakai ʻi he folofolá. ʻI heʻenau vakai ki hení, te nau lava lelei ange ai ke ongoʻi e ʻofa, mālohi, mo e ʻaloʻofa ʻa e ʻEikí ʻi honau ngaahi tūkunga fakatāutahá.
Teuteu ʻa e tokotaha akó: Fakaafeʻi e kau akó ke fakalaulauloto ki he tuʻunga ʻo e puleʻanga fakasilesitialé mo e ʻuhinga te nau fiemaʻu ai ke maʻu iá.
Fakamatala Fakamahinó mo e Puipuituʻá
Ngaahi ʻEkitivitī Fakalahi ki he Akó
ʻE fēfē nai ʻa e kolo ʻo e ʻOtuá?
Fakakaukau ke fakaafeʻi e kau akó ke lau e Fakahā 21:10–11, 23–27 . Hili hono lau e ngaahi fakamatala ʻo e koló mo e kakai ʻe ʻi aí, aleaʻi e ngaahi fehuʻi hangē ko e “Ko e hā e meʻa naʻe mahuʻinga taha kiate koe ʻi he ngaahi veesi ko ʻení?” pe “ʻOkú ke pehē ʻe fēfē kapau te ke nofo ʻi he kolo ko iá?”
“ʻEiki Sīsū, Ke Ke Hāʻele Mai” ( Fakahā 22:20)
Fakakaukau ke fakaafeʻi e kau akó ke nau lau e Fakahā 22:12–14 , ʻo fakakaukau ki he founga ʻe lava ke fakaʻaongaʻi ai e ngaahi lea ko ʻení kiate kinautolú.
Ko e tali ki he folofola fakaʻosi ʻa e Fakamoʻuí “Ko e moʻoni ʻoku ou haʻu vave,” naʻe tali ai ʻe Sione ʻo pehē: “ʻIo ke pehē, ʻEiki Sīsū, ke ke hāʻele mai” ( Fakahā 22:20). Naʻe tautapa ʻa Sione ki he ʻEikí ke toe hāʻele vave mai ki he māmaní. Fakaafeʻi e kau akó ke nau fakakaukau ki he ʻuhinga te nau ala fiemaʻu ai ke “haʻu vave” ʻa e Fakamoʻuí.
Fetongitongi e founga kamata ʻo e lēsoní
Fakakaukau ke huluʻi e vitiō ʻo e pōpoaki ʻa Palesiteni Dieter F. Uchtdorf “Ko Hoʻo Fiefia ʻo Lauikuongá” (20:47), ʻoku maʻu ʻi he ChurchofJesusChrist.org, mei he taimi 2:27 ki he 3:40. Hili e vitioó, fakaafeʻi e kau akó ke aleaʻi e meʻa ʻoku fiemaʻu meiate kinautolu ke maʻu ai e meʻaʻofa maʻongoʻonga taha ʻa e Tamai Hēvaní.
