Toe Iloiloga o le Atamai i Aoaoga Faavae 10

Faaaoga Fuaitau o Mau o le Atamai i Aoaoga Faavae

O se tasi faamoemoega o le atamai i aoaoga faavae o le fesoasoani atu lea ia te oe e aoao pe faapefea ona faaaoga aoaoga faavae o loo aoaoina i fuaitau o mau o le atamai i aoaoga faavae i tulaga moni o le olaga. O lenei lesona o le a tuuina atu ai ia te oe ni avanoa e faataitai ai ona faaaoga nisi o fuaitau na e suesueina i lenei tausaga.

Sauniuniga a le tagata aoga: Valaaulia tagata aoga e iloilo ia fuaitau e fa o le atamai i aoaoga faavae o loo faaalia i le siata lenei. Fai atu ia i latou e saunia e faasoa mai ni auala patino e mafai ona latou faaaogaina ai upumoni o loo i nei fuaitau.

Gaoioiga e ono Mafai Ona Aoao Ai

O se lesona o le fuaitau o le atamai i aoaoga faavae atonu e manaomia ona aoao atu e suitulaga i lenei lesona toeiloilo. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona o fuaitau o le atamai i aoaoga faavae taitasi o le a aoaoina a o faagasolo ia vasega seminare.

Aoaoga faavae mo le olaga masani

Toe iloilo fuaitau e fa o le atamai i aoaoga faavae i le siata lenei. A o e faitauina tulaga faataitai o loo i lalo, fuafua po o le fea o fuaitau o le atamai i aoaoga faavae e ono fesoasoani i tulaga faataitai taitasi.

Mau Faasino o Tusitusiga Paia	Fasifuaitau Autu o Mau
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Luka 24:36–39	“Aua o le agaga e leai sona aano ma ni ivi, pei o a’u nei ua outou vaavaai i ai.”
Ioane 17:3	“O le ola faavavau foi lenei, ia latou iloa oe le Atua moni e toatasi, ma Iesu Keriso.”

Faaali atu tulaga faataitai nei i le laupapa mo tagata aoga e vaai i ai a o latou ulufale mai i totonu o le vasega. Afai e manaomia, fetuunai ia tulaga faataitai ina ia avea o se faiga e sili atu ona talafeagai ai i tagata aoga. E fuafua i le taimi, e mafai e tagata aoga ona faia se gaoioiga se tasi po o gaoioiga uma e lua i lenei lesona.

Fautuaina tagata aoga e faaaoga o latou manatu mai le gaoioiga sauniuni a le tagata aoga iinei ma le vaega atoa o totoe o le lesona.

1. O Kalosi e iai sana uo e auai i se isi faatuatuaga Kerisiano ua faaalia lona talitonuga e faapea o Iesu Keriso o se agaga ma e leai Sona tino faaletino.

2. E vaai Lise ia te ia lava o se tagata e talia soo se mea, e aofia ai le taliaina o soo se amioga ae ia tau lava ina faamaoni. O lenei mea na taitai atu ai o ia e fesiligia le aoaoga faavae a le Tama Faalelagi mo le faaipoipoga ma le aiga. Ona o ana fesili, sa le’i leva ona le toe auai Lise i le lotu ma le ola ai i isi poloaiga.

3. Ua tau tomanatu Maria pe mafai faapefea ona ia faia le taumafaina o le faamanatuga o se aafiaga e sili atu ona anoa.

4. Ua le toe gauai atu Fosi i lana vasega seminare ma sauniga o le Aoga Sa ona ua ia lagona ua lava mea ua ia iloa e uiga i le Tama Faalelagi ma Iesu Keriso.

Filifili se tasi o tulaga faataitai, ma mafaufau e uiga i le fuaitau o le atamai i aoaoga faavae e fetaui ma oe.

• E faapefea e le fuaitau o le atamai i aoaoga faavae na e filifilia ona faatatau i lenei vaaiga faataitai?

• O le a se mea e mafai ona fesoasoani ai lenei fuaitau i le tagata o loo i le vaaiga faataitai ina ia malamalama ai e uiga i le Tama Faalelagi ma Iesu Keriso ma o La’ua naunautaiga mo i tatou?

• O a ni faatinoga e mafai ona e fautuaina lenei tagata e fai ina ia aoga ai upumoni i le fuaitau na e filifilia? Aisea?

Faatinoga o fuaitau o le atamai i aoaoga faavae i tulaga faaletagata lava ia

I lau api faamaumau suesuega, tusi ai se ata faatusa faigofie o se talavou, ma tusi i lalo o latou tausaga, itupa, ma tulaga faaleaiga. O lenei tagata e mafai ona moni pe mafaufauina. Ia aofia ai ni nai fesili patino, faafitauli, po o luitau o loo feagai ma lenei tagata i le taimi nei.

Mafaufau e valaaulia tagata aoga e fai lenei mea i luga o se fasi pepa nai lo a latou api faamaumau suesuega. E mafai ona latou auina mai i totonu a latou pepa ma se faatusa i le tulimanu o le itulau e fesoasoani ia i latou e faailoga ai a latou pepa ae le faaalia i isi po o ai e anaina. Tufa atu pepa i isi tagata o le vasega ina ia mafai ona latou taliina fesili nei e faavae i le tulaga faataitai ua tuuina atu. I se isi itu, e mafai e tagata aoga ona faaaoga le tulaga faataitai mai a latou lava pepa.

Iloilo fuaitau o le atamai i aoaoga faavae o loo i lalo (ma soo se isi lava ua e filifilia) ma fuafua pe o a fuaitau e ono fesoasoani i le tulaga faataitai.

Faaali atu le siata lenei ina ia mafai ona faasino i ai tagata aoga a o faagasolo le lesona. Afai e aoga, mafaufau e faaaoga fuaitau faaopoopo pe eseese o fuaitau o le atamai i aoaoga faavae ese nai lo o fuaitau o loo faamamafaina i lenei lesona.

Mau Faasino o Tusitusiga Paia	Fasifuaitau Autu o Mau
Luka 2:10–12	“Aua o le aso nei ua fanau ai i le aai o Tavita, lo outou Faaola, o le Alii o Keriso.”
Ioane 3:5	“Afai e le fanau se tasi i le vai ma le Agaga, e le mafai ona sao o ia i le malo o le Atua.”
Ioane 3:16	“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.”
Mataio 5:14–16	“Ia faapea ona pupula atu lo outou malamalama i luma o tagata.”
Mataio 11:28–30	“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
Mataio 16:15–19	Na fetalai Iesu, “Ou te avatu foi ia te oe ki o le malo o le lagi.”
Ioane 7:17	“Ai se tasi e fia fai lona finagalo, e iloa ai e ia le mataupu.”
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Ioane 17:3	“O le ola e faavavau foi lenei, ia latou iloa oe le Atua moni e toatasi, ma Iesu Keriso.”
Luka 24:36–39	“Aua o le agaga e leai sona aano ma ni ivi, pei o a’u nei ua outou vaavaai i ai.”

Tusi se faamatalaga puupuu i le talavou o i le tulaga faataitai. Ia aofia ai mea nei:

• O le fuaitau o le atamai i aoaoga faavae e te lagona o le a sili ona fesoasoani ia i latou e malamalama ai i manaoga o le Tama Faalelagi ma Iesu Keriso mo i latou ma pe aisea.

• O se aafiaga patino, tala mai tusitusiga paia, po o se faataitaiga mai le soifuaga o le Faaola e fesootai ma mea o loo aoaoina i le fuaitau ma e ono uunaia ai lenei tagata.

• O faatinoga atonu latou te faia e faatino ai upumoni i le fuaitau o le atamai i aoaoga faavae na e fautuaina mai. (Mo se faataitaiga, mo le Luka 22:19–20 e mafai ona e faaaofia ai se fautuaga e uiga i le valaauliaina o le uunaiga a le Agaga Paia ma mea e manatua e uiga i le Faaola i le taimi o le faamanatuga, pe mo le Ioane 7:17 e mafai ona e fautuaina atu ni lauga e mafai ona latou faitau i ai ina ia malamalama atili ai i le Tama Faalelagi ma Iesu Keriso.)

• O lau lava molimau ia Iesu Keriso ma upumoni na aoaoina i le fuaitau na e filifilia.

Afai na faia e tagata aoga lenei gaoioiga i le vaaiga faataitai a se isi tagata, valaaulia i latou e faasalalau atu pepa ina ia mafai ai e tagata aoga taitasi ona toe maua a latou lava pepa. Valaaulia tagata aoga e faasoa mai mea na latou aoaoina mai lenei aafiaga. Mafaufau e faasoa atu se aafiaga patino po o se molimau e fesootai i ai.

Afai na e tusia le faamatalaga i se tagata moni, mafaufau e tuuina atu ia i latou pe talanoa ma i latou e uiga i lau faamatalaga.