Luka 22:28–34, 54–61

“A Ua Ou Faatoga mo Oe, Ina Nei Mavae Lou Faatuatua”

Christ’s disciples are resting on a hill, Peter is sitting up and Jesus is walking and looking in his direction. Outtakes include Jesus walking, Peter sitting on the ground, and just Jesus and Peter walking and talking.

Na faatoa mavae lava ona muai faailoa atu e Iesu Keriso o le faamanatuga i Ona soo ae amata loa ona latou talanoa po o ai o le a faalataina le Matai ma le ala e sili atu ai le auauna atu i isi nai lo le talitalia o auaunaga mai isi. I le totonugalemu o nei talanoaga i le afeafe pito i luga lea na fai ai le tausamiga a Iesu ma Aposetolo o le Tausamaaga Mulimuli, sa fesoasoani Iesu ia Peteru ia ona malamalama i le faatauteega o le a feagai ma ia i lona olaga atoa. Sa aoao e le Faaola ia Peteru o le a mafai ona ia fesoasoani atu i isi i le mavae ona ia faamalosia o lona lava faatuatua ia Iesu Keriso. O lenei lesona ua faamoemoe e fesoasoani ia te oe e iloa ai lou manaomia ona faalagolago ia Iesu Keriso ma faaauau pea ona faamalosia lou faatuatua ia te Ia.

Taulai atu i le fesoasoani i tagata aoga. A o e sauni ai e aoao atu, taulai atu i au tagata aoga ae le na o mea o le a e tautalagia pe faia. A o e saunia nisi lesona e sosoo ai, fesili ifo ia te oe lava, “O a ni mea o le a faia e au tagata aoga i le vasega i le aso?” ma le “E faapefea ona ou fesoasoani i au tagata aoga ia iloa mea e manaomia ona latou iloa?”

Sauniuniga a le tagata aoga: Valaaulia tagata aoga e o mai saunia e faasoa mai se aafiaga na fesoasoani e faatupulaia ai lo latou faatuatua ia Iesu Keriso.

Gaoioiga e ono Mafai Ona Aoao Ai

Faamalosia lou agavaa

I le amata ai o le vasega, faasoa atu se aafiaga patino e uiga i se tomai po o se agavaa e mafai ona galo pe afai e faatalale i ai ae e mafai ona faatupuina malosi e ala i faatinoga ma taumafaiga faifai pea.

Fai se lisi o tomai po o agavaa e mafai ona galo e se tasi pe afai latou te le faaaogaina pea pe faamalosia na agavaa (mo se faataitaiga, tomai faaafeleti po o tomai tusitusi).

E ono mafai faapefea ona faatatau lenei mea i lou agavaa e maua ai le faatuatua ia Iesu Keriso?

I le lesona o le aso, o le a e aoao ai e uiga i le auala e finagalo Iesu Keriso e te faamalosia ai lou agavaa e faatuatua ai ia te Ia.

Afai na talosagaina tagata aoga e sauni mo le vasega e ala i le mafaufau i se aafiaga na fesoasoani ia i latou e faatupulaia ai lo latou faatuatua ia Iesu Keriso, mafaufau e fai atu i nisi o volenitia e faasoa ane o latou aafiaga i le vasega atoa.

Faaaoga se minute e mafaufau loloto ai i mea o loo e faia i le taimi nei pe e te manao e fai e faatupulaia ai lou faatuatua ia Iesu Keriso. E mafai ona e tusia i lau api faamaumau suesuega e uiga i mea o loo e faia i aso taitasi, faalevaiaso, pe faalemasina foi. O nei faatinoga e ono aofia ai ni sini o loo e galue ai i le taimi nei.

A o e suesue i le aso, vaavaai mo suiga po o faaleleiga e mafai ona e faia e faamalosia ai lou faatuatua ia Iesu Keriso ina ia mafai ai ona e faalagolago ia te Ia e tusa lava po o a tulaga o feagai ma oe i le olaga.

E malamalama Iesu Keriso i o tatou manaoga ma o le a fesoasoani ia i tatou

Sa tau atu e Iesu Keriso i Ona soo le malo i le lumanai o loo faatalitali mai mo i latou aua sa latou faaauau pea ona savavali faatasi i le faatuatua ma Ia (tagai i le Luka 22:28–30). Peitai, sa fesoasoani foi le Alii ia Simona Peteru e saunia mo le malaga faigata faaleagaga o le a le pine ona feagai ma ia.

Faitau i le Luka 22:31–34, ma vaavaai mo mea na finagalo le Alii e fesoasoani ia Peteru ia malamalama ai.

Mafaufau e lisi i luga o le laupapa mea na maua e tagata aoga.

Ina ia malamalama atili i le uiga o le manao o Satani e “lulu [Peteru] e pei o le saito” (fuaiupu 31), faitau le faamalamalamaga i le vaega o le “Tala ma Faamatalaga o Talaaga” i le faaiuga o le lesona.

O a ni mea ua e matauina e uiga i le malamalama o le Faaola ia Peteru? E faapefea ona ese mai i le ala na vaai ai Peteru ia te ia lava?
E mafai faapefea e mea na e aoaoina e uiga i le sootaga a Peteru ma Iesu Keriso ona fesootai foi i lau sootaga ma le Faaola?
Ina ua uma ona folafola atu e Peteru lona faatuatua ma le faamaoni ia Iesu Keriso, o le a le mea na faaalia e le Faaola o le a faia e Peteru?

Mafaufau e faaali atu se ata o loo faaalia ai Peteru ina ua uma ona ia faafitia Iesu Keriso.

The Apostle Peter standing at the base of a stone stairway outside the palace of the high priest (where Christ was taken to be tried by the chief priests, elders and scribes). Peter is turning his head away from Christ as Christ turns to look at him. Three other people are standing/and or sitting near Peter. One of the people, a young woman, is pointing her finger at Peter. Three cocks are on the stone stairs. One of the cocks is crowing.

Mulimuli ane i lena po, ina ua pue faapagotaina Iesu Keriso ma avatu i le fale o le ositaulaga sili e faamasinoina, sa mulimuli atu Peteru mai se mea mamao (tagai i le Luka 22:54).

Faitau le Luka 22:55–62 e aoao ai pe na faapefea ona faataunuuina le valoaga a Iesu e uiga ia Peteru.

O le a se mea na e aoaoina e uiga i le Faaola mai Ana fegalegaleaiga ma Peteru lea e mafai ai ona e faatuatua ia Iesu Keriso?

Faamalosia o lo tatou faatuatua ia Iesu Keriso

Tuu atu i tagata aoga e faasoa mai ni upumoni eseese o loo latou aoaoina e uiga ia Iesu Keriso. O se tasi o upumoni atonu latou te faailoa mai o le e saili Iesu Keriso e faamalosia lo tatou faatuatua ia te Ia ina ia mafai ai ona tatou faatoilaloina osofaiga a Satani.

Mafaufau e faaali atu faamatalaga nei ma fesili i tagata aoga po o a ni mea e tutusa ai na latou matauina i le va o saunoaga a Peresitene Nelson ma le lapataiga a le Faaola ia Peteru.

E pei ona fesoasoani le Faaola ia Peteru ia malamalama i faanaunauga o Satani (tagai i le Luka 22:31), o Peresitene Russell M. Nelson na lapataia i tatou e faapea “ua faateleina e le fili ana osofaiga i le faatuatua ma i o tatou luga ma o tatou aiga i se saoasaoa tele” (Russell M. Nelson, “Malelega Amata,” Ensign po o le Liahona, Nov. 2018, 7). Sa ia aoao mai foi e faapea “ua faafaina e le fili ana taumafaiga e faalavelave i molimau ma taofia le galuega a le Alii” (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Ensign po o le Liahona, Me 2019, 68).

O a nisi o auala o loo saili ai Satani e faaumatia lo tatou faatuatua ia Iesu Keriso i aso nei?

Afai e faigata i tagata aoga ona mafaufau i ni faataitaiga, mafaufau e tuuina atu nisi e pei o nei:

Ua tuua e se tasi e pele le Ekalesia ma manao e te alu atu faatasi ma i latou.
Ua osofaia e se tasi i le aoga lou faatuatua.
Ua e faitau i se mea i luga o le initoneti e le fetaui ma ou talitonuga.

Ina ia fesoasoani e faaleleia le talanoaga a le vasega i le isi fesili e sosoo ai, mafaufau e faasoa puupuu atu se tala patino po o se tala i tusitusiga paia e mafai ona fesoasoani i tagata aoga e iloa ai le taua o le faaauau pea ona faamalosia o lo latou faatuatua ia Iesu Keriso. O se tasi o faataitaiga aoga e mafai ona faapea o Kapeteni Moronae, o le “sa le taofia le faia o sauniuniga mo taua, po o le puipuia o lona nuu” ( Alema 50:1).

O le a se mea na fesoasoani ia te oe e faamalosia ai lou faatuatua ia Iesu Keriso?

Mafaufau e faaali atu le saunoaga lenei mai ia Elder Andersen a o mafaufau tagata aoga i ni auala e faamalosia ai lo latou faatuatua ia Iesu Keriso.

O Elder Neil L. Andersen o le Korama a Aposetolo e Toasefululua na faasoa mai nisi o auala e mafai ona tatou faamalosia ai lo tatou faatuatua ia Iesu Keriso.

Ina ia fesoasoani i tagata aoga e saili ni auala e faamalosia ai lo latou faatuatua ia Iesu Keriso, atonu e aoga le faaaofia ai o isi faamatalaga o loo maua i le vaega “Tala ma Faamatalaga o Talaaga”. O le vaega mulimuli o le vitio “Foundations of Faith” (4:14) e mafai foi ona faaalia i le taimi lenei.

O le a le faafuasei ona tuputupu ae lo outou faatuatua, ae e ala i le filifiliga.

O le ala tatou te ola ai i o tatou olaga e faateleina pe faaitiitia ai foi lo tatou faatuatua. O le tatalo, usiusitai, faamaoni, mama a’ia’i o mafaufuaga ma galuega, ma le le manatu faapito e faateleina ai le faatuatua. A aunoa ma uiga nei, o le a faaitiitia lo tatou faatuatua. Aisea na fetalai atu ai le Faaola ia Peteru, “Ua ou faatoga mo oe, ina ne’i mavae lou faatuatua”? ( Luka 22:32). Ona o loo i ai se fili ua fiafia e faaumatia lo tatou faatuatua! Ia tinoū i le puipuia o lou faatuatua.

(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Nov. 2015, 66)

O le a se mea na e aoaoina i le aso e uiga i le mea e finagalo ai Iesu Keriso mo oe?
O le a se mea o le a e amataina pe faaauau ona fai e faamalosia ai lou faatuatua ia Iesu Keriso?
O le a sou manatu o le a faapefea ona faamanuiaina oe i se faatuatua malosi atu ia Iesu Keriso?

Tala ma Faamatalaga o Talaaga

Luka 22:31 . O le a le uiga o le fetalaiga a le Faaola ina ua Ia ta‘u atu ia Peteru sa manao Satani e “lulu [o ia] e pei o le saito”?

Ina ia luluina le saito, o fatu saito aoga e tuueseese mai vaega e le faaaogaina o le laau. Sa faaaoga e Iesu lenei talafaatusa e fesoasoani ai ia Peteru (ma i tatou taitoatasi) ia iloa taumafaiga a Satani e faatamaia lo tatou faatuatua ma taofia ai i tatou mai le avea ma se vaega taua o le malo o le Atua.

O le a se mea e mafai ona faamalosia lo‘u faatuatua ia Iesu Keriso?

O Elder Neil L. Andersen o le Korama a Aposetolo e Toasefululua sa aoao mai:

O lo tatou faatuatua ua taulai atu i le Atua lo tatou Tama ma Lona Alo, o Iesu Keriso, o lo tatou Faaola ma le Togiola. Ua faamalosia e lo tatou malamalama e faapea ua toefuataiina mai le atoatoaga o le talalelei i le lalolagi; o le Tusi a Mamona o le afioga a le Atua, ma o loo umia e perofeta ma aposetolo o aso nei ia ki o le perisitua. Tatou te faatauaina lo tatou faatuatua, o galuega e faamalolosia ai lo tatou faatuatua, tatalo mo le faatuatua faateleina, ma le faia o mea uma i lo tatou malosi e puipuia ma faasaogalemuina ai lo tatou faatuatua. …

… E te faatofu oe lava ia i mea lava ia o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.

(Neil L. Andersen, “Tofotoina O Lo Outou Faatuatua,” Ensign po o le Liahona, Nov. 2012, 39–40)

O le a se mea e mafai ona faatamaia ai lo‘u faatuatua ia Iesu Keriso?

Na aoao mai Ahmad S. Corbitt, Fesoasoani Muamua i le Au Peresitene Aoao o Alii Talavou:

Au uo e, o le vaai faalemafaufau ma le loto i ai po o le vaai atu i mea e feteenai ma lou lava tagata moni, aemaise o ponokalafi, o le a faavaivaia ai lou faatuatua ia Keriso ma, a aunoa ma le salamo, e mafai ona faatamaia ai.

(Ahmad S. Corbitt, “E Mafai Ona E Faapotopotoina Isaraelu!,” Liahona, Me 2021, 62)

Luka 22:32 . O le a se mea e mafai ona tatou aoao mai e uiga i le liua mai le malamalama i le fetalaiga a le Faaola o loo ta‘u mai ai e lei liua atoatoa Peteru?

Na aoao mai Elder David A. Bednar o le Korama a Aposetolo e Toasefululua:

O le mea mataina, o lenei Aposetolo maoae sa talanoa ma savavali faatasi ma le Matai, sa molimauina le tele o vavega, ma e i ai se molimau malosi i le paia o le Faaola. Ae na oo lava ia Peteru sa moomia se aoaoga faaopoopo mai ia Iesu e uiga i le mana o le Agaga Paia e faaliliuina ma faamamaina, ma lana matafaioi e auauna atu ai ma le faamaoni.

O le natura lava o le talalelei a Iesu Keriso e manaomia ai se suiga faavae ma le mausali i lo tatou lava natura lea e mafai e ala i le Togiola a le Faaola. O le liua moni e aumaia ai se suiga i lou talitonuga, o lou loto, ma le olaga e talia ma usitaia ai le finagalo o le Atua (tagai i le Galuega 3:19; 3 Nifae 9:20) ma e aofia ai se tautinoga mauai e avea ma soo o Keriso.

(David A. Bednar, “Faaliliuina i le Alii,” Ensign po o le Liahona, Nov. 2012, 106–7)

Gaoioiga Faaopoopo e Aoao Ai

Opogi le lumanai i le faatuatua

O le lomiga o Novema 2020 o le New Era o loo aofia ai ni vaega mai le saunoaga a Peresitene Russell M. Nelson “Opogi le Lumanai i le Faatuatua.” Mafaufau e faaali atu le ata autu o lena tusiga, lea o loo faamamafa mai ai le fasifuaitau “afai ua outou saunia o le a outou le matatau ai lava” ( Mataupu Faavae ma Feagaiga 38:30). Valaaulia tagata aoga e suesue i le fautuaga a Peresitene Nelson mo auala e faamalosia ai lo latou faatuatua ia Iesu Keriso ina ia latou le fefefe ai i soo se mea latou te ono fetaiai i le lumanai.