Mataio 26:36–46; Luka 22:39–46, Vaega 2

E Mafai Faapefea e Puapuaga o le Faaola i Ketesemane ona Aafia ai Lo’u Olaga?

O le lona lua ai lenei o se lesona e lua ni vaega e uiga i puapuaga o le Faaola i Ketesemane ma lona taua faaleaoaoga faavae. I le avea ai o se vaega o Lana Togiola, na tauave ai e Iesu Keriso i Ona lava luga a tatou agasala, tiga, ma’i, ma faaletonu. Ona o Lana taulaga togiola, ua mafai ai e Ia ona fesoasoani ia i tatou i luitau tatou te feagai i le olaga nei. O lenei lesona ua faamoemoe e fesoasoani ia te oe e lagona ai se manaoga sili atu mo le malosi ma le fesoasoani e mafai e Iesu Keriso ona ofo atu ia te oe e ala i Lana Togiola.

I le talanoa ai e uiga i le Togiola a Iesu Keriso. Na aoao mai e Peresitene Russell M. Nelson, “E le atoatoa le aoaoga faavae pe a tautalagia le taulaga togiola a le Alii e ala i fasifuaitau pupuu, e pei ‘o le Togiola’ po o ‘le mana gafatia o le Togiola’ po o le ‘faaaogaina o le Togiola’ po o le ‘faamalosia e ala i le Togiola.’ … E leai se tagata noa ua ta’ua ‘o le Togiola’ lea e mafai ona tatou valaau atu i ai mo se fesoasoani, faamalologa, faamagaloga, po o le mana. … O le taulaga togiola a le Faaola—le faatinoga tutotonu o le talafaasolopito o le fanauga uma a tagata —e silisili ona malamalama ma faafetaia pe a tatou fesootai atu ma le maioio ma le manino ia te Ia lava” (Russell M. Nelson, “Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 40).

Sauniuniga a le tagata aoga: Valaaulia tagata aoga e mafaufau pe mafai faapefea e Iesu Keriso ona faamanuiaina i latou ona o Lana Togiola.

Gaoioiga e ono Mafai Ona Aoao Ai

O lenei lesona o le lesona lona lua o lesona e lua e uiga i puapuaga o Iesu Keriso i le Faatoaga o Ketesemane. Afai e lava na o se taimi e aoao atu ai le anotusi lesona o lesona uma e lua i le periota e tasi o le vasega, tagai i le lesona talu ai (“Mataio 26:36–46; Luka 22:39–46, Vaega 1”) mo manatu e ono manaomia ona tuu faatasia i totonu o lenei lesona.

Aisea na manaomia ai ona puapuagatia tele Iesu Keriso?

Mafaufau i le tulaga faataitai lenei.

Sa fiafia lau uo o Chandler e aoao atili e uiga i le Ekalesia mo nai masina ua tuanai. Sa ia faaaluina le tele o taimi i lou aiga e aoao atili ai e uiga i le talalelei ma sa auai foi i suesuega o tusitusiga paia ma lou aiga mo ni nai taimi. I se tasi afiafi, ina ua uma ona suesue i mea na tutupu e faatatau i puapuaga o le Faaola i Ketesemane, sa fesili Chandler, “Aisea na manaomia ai ona puapuagatia tele Iesu?”

Mafaufau e vaevae le vasega i ni paga e talanoaina le fesili lenei.

• E faapefea ona e tali atu i le fesili a Chandler?

Mafaufau i ou lagona e uiga ia Iesu Keriso ma Lana Togiola. Pe a e mafaufau e uiga i Lana taulaga togiola, o a ni au fesili o i ai? E faapefea e le iloaina na puapuagatia o Ia mo oe ona aafia ai ou lagona e uiga ia te Ia?O le lesona talu ai (“Mataio 26:36–46; Luka 22:39–46, Vaega 1”) o loo faamamafa ai le tele o auiliiliga o mafatiaga o le Faaola i Ketesemane. Faaaoga sina taimi e toe suesue ai le Mataio 26:36–39 ma le Luka 22:41–44 . Vaavaai mo upu po o fasifuaitau patino, e aofia ai i latou atonu ua uma ona e vaseina lalo, e taua ia te oe e uiga i le Faaola ma e faamatala ai mea na Ia oo i ai i Ketesemane.

Tuu atu i tagata aoga se avanoa e faasoa mai ai i mea sa latou mauaina. O se tasi o auala e faia ai lenei mea o le valaaulia lea o tagata aoga e o mai i le laupapa ma tusi se upu po o se fasifuaitau mai fuaiupu sa latou suesueina e tulaga ese ia i latou e uiga i mafatiaga o Iesu Keriso i Ketesemane.

Faaaogaina o faaaliga i ona po nei e malamalama atili ai i puapuaga o le Faaola

A aunoa ma le faamanuiaga o faaaliga i ona po nei na maua e le Perofeta o Iosefa Samita e uiga i le Faaola ma Lana Togiola, o le a tele naua mea o le a tatou le malamalama i ai e uiga i mea na puapuagatia ai Iesu Keriso, i Ketesemane ma luga o le satauro, o se vaega o Lana Togiola ma le mafuaaga na Ia puapuagatia ai i nei mea.

Faitau i le Mataupu Faavae ma Feagaiga 19:16–19, ma vaavaai i mea na aoao mai e Iesu Keriso e uiga i Ona puapuaga.

• O le a se mea ua fesoasoani atu ai nei fuaiupu e te malamalama ai e uiga pe aisea na puapuagatia tele ai Iesu Keriso?

• O a ni mea ua fesoasoani nei fuaiupu e te malamalama ai e uiga i le alofa o le Faaola mo oe?

Faitau i le Alema 7:11–13, ma faamaea le siata lenei i lau api faamaumau suesuega. Atonu e fesoasoani le iloa o le upu fesoasoani i le fuaiupu 12 o lona uiga “o le tuuina atu o le toomaga po o le fesoasoani” (Dallin H. Oaks, “Faamalosia e Ala i le Togiola a Iesu Keriso,” Ensign po o le Liahona, Nov. 2015, 61).

O le a le mea na puapuagatia pe tauaveina e le Faaola i Ona lava luga?	O le a le mea e mafai e Iesu Keriso ona fai mo i tatou ona o Lana Togiola?

Atonu e aoga le kopi o le siata talu ai i le laupapa ma tusi tali a tagata aoga i koluma talafeagai pe a uma ona fai atu ia i latou e faasoa mai mea na latou maua.

O tali mo le koluma muamua e aofia ai mea nei:

• “tiga ma puapuaga ma faaosoosoga o ituaiga eseese uma” (Alema 7:11)

• “o tiga ma ma’i o ona tagata” (Alema 7:11)

• “oti” (Alema7:12

• “vaivai” (Alemaa 7:12

• “o agasala a ona tagata”Alema 7:13)

O tali mo le koluma lona lua e aofia ai mea nei:

• “tatala fusi o le oti” (Alema 7:12)

• “ia faatumuina i le alofa mutimutivale” (Alema 7:12)

• “fesoasoani i ona tagata e tusa ma o latou vaivaiga” (Alema 7:12)

• “soloiese a latou solitulafono e tusa ma le mana o lana laveaiga” (Alema 7:13)

• O le a se mea na e aoaoina mai nei fuaiupu e uiga i le mea na puapuagatia ai Iesu Keriso ma le mafuaaga pe aisea na Ia puapuagatia ai i na mea?

• E faapefea ona faamanuiaina i tatou taitoatasi i mafatiaga o le Alii i Ketesemane?

O se tasi upumoni e mafai ona tatou aoaoina mai le Alema 7:11–13 e faapea na puapuagatia Iesu Keriso ina ia laveai i tatou mai le agasala ma le oti ma fesoasoani ia i tatou i luitau o le olaga faaletino. Atonu e te manao e tusi le upumoni lenei i totonu o au tusitusiga paia. E mafai foi ona e tusia lenei upumoni ma au tali i fesili nei i lau api faamaumau suesuega.

• O le fea o faamanuiaga o loo lisiina i le koluma lona lua o lau siata o le a sili ona anoa mo oe e te fia oo i ai i le taimi nei? Aisea?

• O anafea na e lagonaina ai le faamoemoe, filemu, mafanafana, po o le malosi lea e mafai ona oo mai ia te oe e ala i mafatiaga togiola a Iesu Keriso?

Ina ia vaai i se faataitaiga e faapupula mai ai le fesoasoani faalelagi e mafai ona tatou maua e ala i le taulaga togiola a le Faaola, mafaufau e matamata a le o le “Atonement—Not a One-Time Thing” (3:00) po o le “Alek’s Story” (6:26). E mafai ona maua uma vitio e lua i le ChurchofJesusChrist.org.

Tagai i le vaega o “Gaoioiga Faaopoopo e Aoao ai” i le faaiuga o lenei lesona mo isi manatu po o vitio e mafai ona faaaoga e faapupula ai le fesoasoani faalelagi e mafai ona tatou maua ona o le taulaga togiola a le Faaola.

Ina ia aoao atili e uiga i le ala e mafai ai e le Faaola ona faamanuiaina o tatou olaga ona o Lana Togiola, suesue nisi o aoaoga a o tatou taitai o le Ekalesia i le vaega “Faitalia pe Fai: O e Manao e Suesue Atili?” o loo maua i le faaiuga o lenei lesona.

• O le a se mea ua e aoaoina pe lagonaina e uiga ia Iesu Keriso e te manao e manatua?

• O le a se mea o le a ese ona e faia ona o mea sa e aoaoina pe lagonaina e uiga ia Iesu Keriso?

Tala ma Faamatalaga o Talaaga

O a ni auala e mafai e le Togiola a le Faaola ona aafia ai o tatou olaga?

Peresitene Dallin H. Oaks o le Au Peresitene Sili:

O le avanoa ina ia faamagaloina ai a tatou agasala o le uiga sili lena o le Togiola a Iesu Keriso. …

Na onosaia e lo tatou Faaola ma le Togiola le mafatiaga lē mafaamatalaina, ina ia avea ai o Ia lava ma taulaga mo agasala a tagata uma o le a salamo. O lea taulaga togiola na ofoina atu ai le lelei silisili, le tamai mamoe e aunoa ma se ila, mo le fuataga silisili o le amioleaga, o agasala a le lalolagi atoa. Na tatala ai le faitotoa mo i tatou taitoatasi ina ia faamamaina ai mai a tatou lava agasala patino, ina ia mafai ai ona toe faaulufale atu i tatou i le afioaga o le Atua, lo tatou Tama e Faavavau. O lenei faitotoa matala o loo avanoa i fanau uma a le Atua.

(Dallin H. Oaks, “O Le A le Mea Ua Faia e Lo Tatou Faaola mo i Tatou?,” Liahona, Me 2021, 76)

Elder Dale G. Renlund o le Korama a Aposetolo e Toasefululua:

I tulaga e le talafeauga pe ua faapito’au, o se tasi o a tatou matafaioi e fai o le faatuatua lea “o mea uma e le talafeauga e uiga i le olaga e mafai ona faasa’oina e ala i le Togiola a Iesu Keriso” [Talai La’u Talalelei: Taiala mo Auaunaga Faifeautalai (2018), 52]. Na manumalo Iesu Keriso i le lalolagi ma “miti’ia” ai faiga faapito’au uma. Ona o Ia, ua mafai ai ona tatou maua le filemu i lenei lalolagi ma ia lototetele. Afai tatou te talia o Ia, o le a faapaiaina e Iesu Keriso faiga faapito’au mo lo tatou lelei. O le a lē na ona Ia faamafanafanaina i tatou ma toefuatai mai mea sa leiloloa; ae o le a Ia faaaogaina le faapito’au mo lo tatou manuia.

(Dale G. Renlund, “Faapito’au Faaosolilivau,” Liahona, Me 2021, 43)

Elder Ulisses Soares o le Korama a Aposetolo e Toasefululua:

Ou te molimau atu ia te outou, a tatou salamo faamaoni i a tatou agasala, ua tatou faatagaina le taulaga togiola a Keriso ia aoga atoatoa i o tatou olaga. O le a tatou saoloto mai le pologa o le agasala, maua le olioli i la tatou malaga i le lalolagi, ma agavaa ai e maua le faaolataga e faavavau, lea sa saunia mai le faavaega o le lalolagi mo i latou uma o e talitonu ia Iesu Keriso ma o mai ia te Ia.

(Ulisses Soares, “Iesu Keriso: O Le Tausiga o o Tatou Agaga,” Liahona, Me 2021, 83)

Elder Michael John U. Teh o le Fitugafulu:

O se malamalama faateleina e faapea o le Togiola a Iesu Keriso e faatatau ia i tatou patino taitoatasi lava ia o le a fesoasoani taitoatasi ia i tatou ia iloa ai o Ia. O le tele o taimi e faigofie atu mo i tatou ona mafaufau ma tautatala e uiga i le Togiola a Keriso i lona tulaga faalauaitele, nai lo o le faailoaina o lona taua patino i o tatou olaga. O le Togiola a Iesu Keriso e le i’u ma e faavavau ma e aofia ai i lona lautele ma le loloto ae atoatoa ona aafiaga patino o mea uma ma tagata uma ae e aafia ai i tatou uma taitoatasi. Ona o Lana taulaga togiola, ua i ai i le Faaola le mana e faamama, faamalolo, ma faamalosia ai i tatou taitoatasi.

(Michael John U. Teh, “O Lo Tatou Faaola Patino,” Liahona, Me 2021, 99)

Sister Reyna I. Aburto, sa avea ma fesoasoani talu ai i le Au Peresitene Aoao o le Aualofa:

E ala i le Togiola faaola ma le Toetu mamalu o Iesu Keriso, ua mafai ai ona faamaloloina loto ua nutimomoia, o le tiga ua mafai ona avea ma se filemu, ma o le faanoanoa ua mafai ona avea ma se faamoemoe. E mafai e Ia ona opoina i tatou i Ona aao o le alofa mutimutivale, faamafanafanaina, faamamanaina, ma faamaloloina i tatou taitoatasi.

(Reyna I. Aburto, “E Leai se Manumalo o le Tuugamau,” Liahona, Me 2021, 86)

Gaoioiga Faaopoopo e Aoao Ai

Faatinoga o le tala faafaifeautalai

E mafai ona faaaoga le manatu lenei e fesoasoani ai i tagata aoga e faataitai le aoaoina o isi e uiga i le Faaola ma Lana Togiola.

Fuafua e vaevae le vasega i ni vaega taitoatolu. I vaega taitasi, e mafai e ni tagata aoga se toalua ona galulue o ni faifeautalai faamisiona tumau ma o le tagata aoga lona tolu e mafai ona avea ma tagata o loo laua aoaoina. Tuu atu i faifeautalai e aoao atu se lesona e lima minute e uiga i le Togiola a Iesu Keriso. E mafai ona latou faitauina le Alema 7:11–13 ma le tagata o loo aoaoina ma faamatala ia fuaiupu. O le tagata o loo aoaoina e mafai ona faia ni fesili, ma e mafai e faifeautalai ona faaiu i a laua molimau i le ala na aafia ai o laua olaga i le taulaga a le Faaola.

“O Se Suiga o le Loto”

Ina ia fesoasoani i tagata aoga ia iloa se faataitaiga o le suiga e mafai ona tupu i o tatou olaga e ala ia Iesu Keriso, mafaufau e faaali le vitio “A Change of Heart” (4:39), o loo maua i le ChurchofJesusChrist.org.