Mataio 26:36–46; Luka 22:39–46, Vaega 1

Ua Puapuagatia Iesu Keriso i le Faatoaga o Ketesemane

I le Faatoaga o Ketesemane, sa oo ai Iesu Keriso i puapuaga e le mafaamatalaina o se vaega o Lana Togiola. O le vaega muamua lenei o se lesona e lua vaega e uiga i puapuaga o le Faaola i Ketesemane ma lona taua faaleaoaoga faavae. O le faamoemoega o lenei lesona o le fesoasoani lea ia te oe ia malamalama atili i le mea na tupu i le Faatoaga o Ketesemane ma le ala na avea ai o se faatinoga o le alofa mo oe. I le lesona e sosoo ai, o le a e suesue ai i le aoaoga faavae o le Togiola a Iesu Keriso ma aoao ai pe mafai faapefea ona e mauaina le malosi ma le fesoasoani mai le Faaola.

Faaaloalo mo autu paia. Taumafai e fatu se siosiomaga o le migao, faaaloalo, ma le faamoemoe mo vasega taitasi. Pe a tulai mai se autu e faapitoa le paia, taumafai e fesoasoani i tagata aoga ia faatumauina se uiga faaalia o le migao. Mafaufau e tata musika ma faaali ata o le a saofaga i le lagona o le migao. Atonu foi e aoga le faafeiloai atu i tagata aoga a o latou ulufale mai i totonu ma faamanatu atu ia i latou le paia o le autu o loo talanoaina.

Sauniuniga a le tagata aoga: Valaaulia tagata aoga e fai se mea e fesoasoani ia i latou e mafaufau loloto ai ia Iesu Keriso ma Lana Togiola. Mo ni faataitaiga e mafai ona iloiloina se viiga, manatunatu i se ata o Iesu Keriso, faitauina o se fuaitau o tusitusiga paia, po o se isi mea.

Gaoioiga e ono Mafai Ona Aoao Ai

O lenei lesona o le lesona muamua o lesona e lua e uiga i puapuaga o Iesu Keriso i le Faatoaga o Ketesemane. Afai e na o le pau le taimi e aoao atu ai lenei anotusi o le periota e tasi o le vasega, tagai i le lesona e sosoo ai (“Mataio 26:36–46; Luka 22:39–46, Vaega 2”) mo manatu e ono manaomia ona faaopoopo i totonu o lenei lesona.

O le a le mea ua faia e Iesu Keriso mo i tatou?

O Peresitene Dallin H. Oaks sa ia faasoa mai se vaega o sa laua talanoaga ma se tasi tagata o le Ekalesia. Matamata le vitio “What Has Our Savior Done for Us?” mai le faailo taimi 0:00 i le 0:34. O loo i ai lenei vitio i le ChurchofJesusChrist.org.

I le tele o tausaga ua mavae, sa ou feiloai ai i se tamaitai sa fai mai na talosagaina o ia e ana uo e toe foi mai i le ekalesia i le mavae ai o le tele o tausaga sa le toaga ai, ae sa le mafai ona ia mafaufau i se mafuaaga e tatau ai ona ia toe foi mai. Ina ia faamalosiau atu ia te ia, sa ou fai atu ai, “A e mafaufau i mea uma sa faia e le Faaola mo oe, e tele ni mafuaaga ia te oe e te toe foi mai ai e tapuai ma auauna atu ia te Ia.” Sa faateia au ina ua ia tali mai, “O le a Lana mea sa fai mo au?”

(Dallin H. Oaks, “O Le A le Mea Ua Faia e lo Tatou Faaola mo i Tatou?,” Liahona, Me 2021, 75)

• E faapefea ona e tali atu i le fesili a lea tamaitai?

Ua puapuagatia Iesu Keriso i le Faatoaga o Ketesemane

Ina ua faamaeaina e leFaaolale le tausamaaga o le Paseka, faataunuu le faamanatuga, ma afio atu i le Mauga o Olive e faasoa atu Ana aoaoga faaiu i Ana Aposetolo, sa o teisi atu o Ia faatasi ma Peteru, Iakopo, ma Ioane i le Faatoaga o Ketesemane. O le upu Ketesemane o lona uiga o le “tatau le suauu.” O nisi o elemene taua tele o le Togiola a Iesu Keriso na tutupu i Ketesemane. A o e suesue i nei mea na tutupu, mafaufau pe mafai faapefea e le malamalama i le Togiola a Iesu Keriso ona fesoasoani ia te oe ia iloa ma lagonaina le alofa o le Atua mo oe.

O fuaitau o mau nei o loo faamatala mai ai nisi o mea autu na tutupu o se vaega o mafatiaga o le Faaola i le Faatoaga o Ketesemane. Mafaufau e kopi le siata lenei i lau api faamaumau suesuega ma faamaeaina a o e suesue i fuaiupu. Mafaufau foi e vase upu taua ma fasifuaitau mai nei fuaiupu i au tusitusiga paia.

E faaopoopo atu i le faitauina o fuaiupu o loo i lalo, atonu foi e te manao e matamata i le “The Savior Suffers in Gethsemane” mai le faailo taimi 0:00 i le 5:52 (o loo maua i le ChurchofJesusChrist.org) ma vaai faalemafaufau i le molimauina o lenei mea paia na tupu.

Mafaufau e faaali le siata lenei i le laupapa ma fai atu i tagata aoga e kopi i a latou api faamaumau suesuega. E fuafua i manaoga ma tomai o tagata aoga, filimaoti pe sili i tagata aoga ona faauma le siata e le tagata lava ia, fai faatasi o se vasega, po o se paga po o se vaega toalaiti.

Atonu foi e aoga le taina o musika e aumai ai le migao ma faaali atu ata o Iesu Keriso a o suesue le vasega.

Faitau ia mau nei.	O le a se mea na e aoaoina mai po o sou lagona ia Iesu Keriso mai nei fuaiupu?
Mataio 26:36–39
Mataio 26:40–46
Luka 22:39–44
Mosaea 3:7
Mataupu Faavae ma Feagaiga 18:10–11

A ua lava loa se taimi o tagata aoga e suesue ai fuaiupu ma faauma le siata, valaaulia i latou e faasoa mai mea sa latou aoaoina pe lagonaina. Tuu atu i le toatele o tagata aoga le avanoa e faasoa mai ai o latou manatu, lagona, ma uunaiga. O fesili o loo i lalo e ono mafai ona fesoasoani e faaaoga o se vaega o le talatalanoaga.

• O a ni manatu, lagona, po o ni uunaiga na e maua a o e suesue i nei fuaiupu?

• O a nisi o upu autu po o fasifuaitau patino mai nei fuaiupu e sili ona taua ia te oe? Aisea?

• O a ni mea na fesoasoani nei fuaiupu ia te oe e lagona ai le alofa o le Tama Faalelagi ma Iesu Keriso mo oe?

O le tau o le alofa faapelepele o le Atua

Na faasoa mai e Elder D. Todd Christofferson o le Korama a Aposetolo e Toasefululua le ala e faaalia ai e mafatiaga o le Faaola i Ketesemane Lona alofa e le iu mo i tatou. Matamata le vitio “Abide in My Love” mai le faailotaimi 11:33 i le 14:02. O loo maua lenei vitio i le ChurchofJesusChrist.org.

Ia tatou mafaufau i le tau o le alofa faapelepele o le Atua. Sa faaali mai e Iesu, ina ia togiola mo a tatou agasala ma togiola i tatou mai le oti, faaletino ma faaleagaga, o Ona mafatiaga ia na oo ai ia te Ia lava, “o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia lē inuina e [Ia] le ipu oona, ma faaitiiti” [ Mataupu Faavae ma Feagaiga 19:18] . O Ona tiga i Ketesemane ma luga o le satauro sa sili atu i lo tiga e mafai e se tagata ona lavatia. Ae ui i lea, ona o Lona alofa mo Lona Tama ma mo i tatou, sa Ia tumau ai ma, o sona taunuuga, ua mafai ai ona Ia ofoina mai ia i tatou le tino ola pea ma le ola faavavau.

O se faatusa loloto le “[tafe] o le toto mai ona pu afu uma” [ Mosaea 3:7 ] a o mafatia ai Iesu i Ketesemane, le nofoaga e tatau ai le olive. Ina ia gaosi le suauu olive i le taimi o le Faaola, e olopala muamua olive e ala i le faataavale ai o se maa tele i luga. O “mea ua olopalaina” sa tuu i totonu o ato lalaga vaivai matagataga, lea sa faaputu o le tasi i luga o le isi. O lo latou mamafa e tatauina mai i fafo le suauu muamua ma sili ona lelei. Ona toe faaaoga lea o se isi mamafa faaopoopo e ala i le tuuina o se amopou tele po o se ogalaau i luga o ato ua faaputuina, ma toe maua ai nisi suauu. Mulimuli lava, ina ia tatau mai i fafo ni mataua mulimuli, e faamamafa le amopou i ni maa i le tasi pito e maua ai le mamafa sili, mo le olopalaina. Ma ioe, e mumu totototo le suauu i le taimi muamua e tafe mai ai.

Ou te mafaufau i le tala a Mataio e uiga i le Faaola a o Ia ulufale atu i Ketesemane i lena po matautia—lea na Ia “amata ai ona faanoanoa o Ia ma matua mamafatu lava. …

“Ma sa oo ina ia maliu faaitiiti atu i luma, ona faapa’ū faō ai lea o ia, ma tatalo, ua faapea atu, Lo’u Tama e, afai e mafai, ia aveese lenei ipu ia te a’u: a e aua le faia lo’u loto, a o lou finagalo” [ Mataio 26:37, 39 ].

Ona oo lea e pei ona ou mafaufau iai sa faateteleina le atuatuvale, sa Ia aioi atu i le taimi lona lua mo se toomaga ma, masalo i le taimi mulimuli i le luluti ai o Ona puapuaga, o le taimi lona tolu. Sa Ia onosaia le tiga seia oo lava ina ua faamalieina le faamasinotonu i le matāūa mulimuli lava. Na Ia faia lenei mea e togiola ai oe ma a’u.

E maeu lenei meaalofa taua o le alofa paia!

(D. Todd Christofferson, “Tumau i Lo’u Alofa,” Ensign po o le Liahona, Nov. 2016, 51)

• O a ni upu po o ni fasifuaitau mai lenei saunoaga sa tulaga ese ia te oe?

• E faapefea e mafatiaga o le Faaola i Ketesemane ona faaalia ai Lona alofa sili mo oe lava ia?

Sa molimau mai Peresitene Ezra Taft Benson (1899–1994) e faapea o mafatiaga o le Faaola i le Faatoaga o Ketesemane, ma mulimuli ane i Kalevaria, “o le faatinoga aupito silisili lea o le alofa i le talafaasolopito ua faamaumauina” (Aoaoga a Peresitene o le Ekalesia: Ezra Taft Benson [2014], 94).

Valaaulia tagata aoga e faasoa mai a latou tali i le fesili lenei ma soo se manatu po o lagona latou te mananao e faasoa mai e uiga ia Iesu Keriso. Faailoa atu i tagata aoga o le a latou maua avanoa e faaopoopo ai i a latou tali i vaiaso a sau a o latou suesue i isi mea e tutupu e o faatasi ma le Togiola a Iesu Keriso. Molimau atu i upumoni sa talanoaina i le lesona lenei.

• O le a se mea na faia e Iesu Keriso mo au?

Tala ma Faamatalaga o Talaaga

O le a le taua o Ketesemane?

Na aoao mai Peresitene Russell M. Nelson:

O le upu Ketesemane e sau mai aa o upu Eperu e lua: gath, o lona uiga o le “oomi,” ma le shemen, o le uiga o le “suauu,” e faapitoa lava i le olive.

O nei olive sa oomi i lalo o le mamafa o ni uilimaa tetele e tatau mai ai i fafo le suauu taua. O Keriso la i le Faatoaga i Ketesemane sa oomia moni lava i lalo o le mamafa o agasala a le lalolagi. O iina sa afu o Ia i mataua tetele o le toto—o le “suauu” o Lona soifua—o lea na tafe mai i pu afu uma. …

… Ia manatua, e pei lava o le tino o le olive, lea sa oomiina mo le suauu na aumaia le malamalama, o lea na faapea foi ona oomia ai le Faaola. Mai pu afu uma na puna mai ai le toto ola o lo tatou Togiola. I aso fiafia o lau misiona, pe a taumasuasua lau ipu o le fiafia, ia manatua Lana ipu o le oona lea na mafai ai. Ma a oo mai tofotofoga tiga i o outou luga, ia manatua Ketesemane.

(Russell M. Nelson, “Why This Holy Land?,” Ensign, Dec. 1989, 17–18)

O le a se mea ua faia e lo tatou Faaola mo i tatou?

Sa saunoa mai Peresitene Dallin H. Oaks o le Au Peresitene Sili:

I lalo o le fuafuaga a lo tatou Tama Faalelagi, o [Iesu Keriso] “sa foafoaina le lagi ma le lalolagi” ( Mataupu Faavae ma Feagaiga 14:9) ina ia mafai e i tatou taitoatasi ona maua le aafiaga faaletino e tatau ai e saili ai lo tatou taunuuga faalelagi. I le avea ai ma se vaega o le fuafuaga a le Tama, sa faatoilalo ai e le Toetu o Iesu Keriso le oti e faamautinoa mai ai ia i tatou taitoatasi le tino ola pea. O le taulaga togiola a Iesu Keriso ua aumaia ia i tatou le avanoa e salamo ai mai i a tatou agasala ma toe foi atu ai ma le mamā i lo tatou aiga faalelagi. O Ana poloaiga ma feagaiga ua faaali mai ai ia i tatou le ala, ma o Lana perisitua ua aumaia ai le pule e faatino ai sauniga e taunuu ai i le taunuuga. Ma na finagalo lava lo tatou Faaola ia oo i tiga uma faaletino ma vaivaiga ina ia Ona silafia ai le auala e faamalosia ai i tatou i o tatou mafatiaga.

Sa faia e Iesu Keriso nei mea uma ona e alofa o Ia i fanau uma a le Atua. O le alofa o le faaosofiaga lea mo ia mea uma, ma sa faapena lava talu mai le amataga.

(Dallin H. Oaks, “O Le A le Mea Ua Faia e lo Tatou Faaola mo i Tatou?,” Liahona, Me 2021, 77)

Gaoioiga Faaopoopo e Aoao Ai

O vitio e uiga i le Togiola a le Faaola

O vitio nei e mafai ona faaopoopo ai ni vaega eseese i le aoaoina atu o lenei lesona e uiga i le Togiola a Iesu Keriso. O loo maua uma nei vitio i luga o le ChurchofJesusChrist.org.

“Gethsemane” (0:45). O se tasi o vaega pupuu e sefuluono o vitio e fesoasoani tatou te malamalama ai i agaifanua o le Feagaiga Fou.

“Gethsemane” (3:22). O se faasologa faamusika ma pesepesega a Melanie Hoffman.

“Mataupu 51: Ua Puapuagatia Iesu i le Faatoaga o Ketesemane” (1:46). O se aotelega faigofie o mea na tutupu i Ketesemane.