Төгс эзэмших сургаалын давтлага 1

Олох ба цээжлэх: Лук 2:10–12-оос Лук 24:36–39

Семинарын анги.

Төгс эзэмших сургаалын зорилгуудын нэг бол төгс эзэмших сургаалын судрын хэсгүүдийн эшлэл, түлхүүр үг хэллэгийг цээжлэхэд тань туслах явдал юм. Энэ хичээл нь Шинэ Гэрээний эхний 11 төгс эзэмших сургаалын судрын хэсгийн судрын эшлэл, түлхүүр үг хэллэгийг олох, цээжлэхэд танд туслах зорилготой.

Хайрын орчин бүрдүүл. Бие биетэйгээ танилцах боломжийг суралцагчдад олгох нь хайр, хүндэтгэл, зорилго бүхий суралцах орчныг бүрдүүлдэг. Өөрсдийн амьдралын талаарх зохистой мэдээллийг бие биетэйгээ хуваалцахад суралцагчдыг уриалах аргуудыг олж мэд.

Боломжит суралцах үйл ажиллагаа

Төгс эзэмших сургаалын судрын хэсгүүдийн талаарх хичээлийг энэ хичээлийн оронд зааж болох юм. Төгс эзэмших сургаалын судрын хэсгүүдийн талаарх хичээл бүрийг хичээлийн улирлын туршид заасан байхын тулд хичээл заах хуваарийг хараарай.

Судрын эшлэл, түлхүүр үг хэллэг

• Төгс эзэмших сургаалын судрын хэсгийн эшлэл, түлхүүр үг хэллэгийг яагаад мэдэж байх шаардлагатай вэ?

Та судруудыг цээжлэхийн ач холбогдлын талаарх Арван хоёр төлөөлөгчийн чуулгын ахлагч Ричард Г.Скоттын (1928–2015) дараах мэдэгдлийг санаж байгаа байх.

Арван хоёр төлөөлөгчийн чуулгын ахлагч Ричард Г.Скоттын хамгийн сүүлд авхуулсан албан ёсны хөрөг зураг, 2004 он. Тэрээр 2015 оны 9-р сарын 22-нд таалал төгссөн.

Судруудыг цээжлэх нь агуу хүчийг авчирдаг. Судрыг цээжлэх нь шинэ нөхөрлөл үүсгэж байгаатай адил. Энэ нь хэрэгцээтэй үед маань тусалж, тайтгаруулж, сүнсний нөлөөг өгч, өөрчлөлт хэрэгтэй үед урам дэм өгдөг шинэ танилтай болсонтой адил юм.

(Ричард Г.Скотт, “Судрын хүч,” 2011 оны 10-р сарын Ерөнхий чуулган, 5)

Эхний 11 төгс эзэмших сургаалын судрын хэсгийн эшлэл, түлхүүр үг хэллэгийг сурахын тулд дараах хүснэгтийг судлах тэмдэглэлдээ хуулах эсвэл зөөврийн төхөөрөмж дээрээ Doctrinal Mastery аппликэйшныг татаж аваад, аппликэйшн дээрх цээжлэхэд туслах үйл ажиллагаануудыг ашиглах талаар бодож үз.

Дараах жагсаалтыг үзүүл.

Судрын эшлэл	Судрын түлхүүр үг хэллэг
Лук 2:10–12	“Өнөөдөр, Давидын хотод Аврагч Эзэн Христ та нарын төлөө мэндэллээ.”
Иохан 3:5	“Хэн ус болон Сүнснээс эс төрнө, тэр Бурханы хаанчлалд орж үл чадна.”
Иохан 3:16	“Бурхан ертөнцийг үнэхээр хайрласандаа цорын ганц Хүүгээ өгсөн.”
Матай 5:14–16	“Та нарын гэрэл тэдний өмнө тийнхүү гэрэлтэг.”
Матай 11:28–30	“Зүдэж зүтгэгсэд хийгээд хүнд ачаа үүрсэн бүгд ээ, Над дээр ир. Би та нарыг амраая.”
Maтай 16:15–19	“Би чамд тэнгэрийн хаанчлалын түлхүүрийг өгнө” хэмээн Есүс хэлэв.
Иохан 7:17	“Хэрэв хэн нэгэн нь Түүний хүслийг үйлдэхийг хүсвэл тэрээр энэ сургаалыг мэднэ.”
Maтай 22:36–39	“Чи Бурхан Эзэнээ хайрла. … Чи хөршөө … хайрла.”
Лук 22:19–20	“Намайг дурсаж” ариун ёслолоос хүрт хэмээн Есүс Христ зарлигласан.
Иохан 17:3	“Цорын ганц үнэн Бурхан Таныг болон Таны илгээсэн Есүс Христийг мэдэх нь мөнхийн амь мөн.”
Лук 24:36–39	“Учир нь сүнсэнд та нарын харж байгаа Над шиг яс, мах байдаггүй юм.”

Төгс эзэмших сургаал - Матай - Иохан

Ангийн хэмжээнээс хамааран суралцагч бүрд 11 төгс эзэмших сургаалын судрын нэг эсвэл түүнээс олон хэсгийг оноож өгөх талаар бодож үз. Шаардлагатай бол нэг хэсгийг хэд хэдэн суралцагчид оноож өгч болно.

Суралцагчдыг ширээ ширээн дээр очиж, хэсгүүдийг олохын тулд хамтрагчтайгаа ажиллаж, олсон бол бүх 11 төгс эзэмших сургаалын судрын хэсэг болон судрын түлхүүр үг хэллэгүүдийг тэмдэглэхэд урь. Хэдэн минут болоод хамтрагчаа солихыг суралцагчдад уриал.

Бие биетэйгээ хамтран ажиллахдаа дараах зүйлийг хийхэд суралцагчдыг урь (эдгээр зааварчилгааг самбарт бичих нь тустай байж болно).

1. Бие биетэйгээ илүү сайн танилцахын тулд асуу (жишээлбэл, “Чиний хийх дуртай зүйлсийн нэг юу вэ?” эсвэл “Чиний очих дуртай газруудын нэг юу вэ?”).

2. Оногдсон төгс эзэмших сургаалын судрын хэсэг, түлхүүр үг хэллэгийг олоход бие биедээ тусал. Судар дээрээ тухайн хэсэг болон судрын түлхүүр үг хэллэгийг тэмдэглэх талаар бодож үз.

3. Судрын түлхүүр үг хэллэг дэх үнэн яагаад чухал болохыг хуваалц.

4. Судрын эшлэл болон судрын түлхүүр үг хэллэгийг цээжлэхээр оролд.

Хамгийн багадаа төгс эзэмших сургаалын судрын гурван хэсгийг сонгоод, дараахыг гүйцэтгэ.

• Судрын эшлэл болон судрын түлхүүр үг хэллэгийг цээжээр бич.

• Эдгээр шүлгийг яагаад чухал гэж бодож байгаагаа хуваалц.

Дараагийн хэдэн өдрийн турш хамгийн багадаа гурван төгс эзэмших сургаалын судрын хэсгийн судрын эшлэл болон судрын түлхүүр үг хэллэгийг цээжлэхээр чармайгаарай. Эдгээр шүлгийг мэдэж байх нь таны болон таньдаг хүмүүсийн тань амьдралыг ямар аргаар адисалж болохыг олж мэд.

Нэмэлт суралцах үйл ажиллагаа

Өөр үйл ажиллагаа

Суралцагчдад судрын түлхүүр үг хэллэгүүдийг цээжлэхэд туслах өөр нэг арга нь төгс эзэмших сургаалын хэсэг тус бүрд илүү хамаарах асуултуудыг хуудас цаасан дээр бичих явдал байж болно. Суралцагчид асуултад хариулахын тулд хосоороо ажиллах боломжтой. Дараах нь асуух боломжтой асуултын төрлийн жишээнүүд юм.

Лук 2:10–12

Та Христийн мэндэлсний баярын үеэр юу хийх дуртай вэ?

Лук 2:10–12-ыг ол. “Өнөөдөр, Давидын хотод Аврагч Эзэн Христ та нарын төлөө мэндэллээ” гэх судрын түлхүүр үг хэллэгийг тэмдэглэх талаар бодож үз.

Судрын эшлэл болон судрын түлхүүр үг хэллэгийг цээжлэхээр оролд.

Есүс Христийн бидний Аврагчийн хувьд гүйцэтгэх үүргийг таньж мэдэх нь танд яагаад чухал вэ?

Иохан 3:5

Та өөрийн баптисмын талаар юу санаж байна вэ?

Иохан 3:5-ыг ол. “Хэн ус болон Сүнснээс эс төрнө, тэр Бурханы хаанчлалд орж үл чадна” гэх судрын түлхүүр үг хэллэгийг тэмдэглэх талаар бодож үз.

Судрын эшлэл болон судрын түлхүүр үг хэллэгийг цээжлэхээр оролд.

Та саяхан хөрвөгдсөн хүнд Их Эзэний хаант улсын гишүүнчлэлийн адислалын талаар юу хэлэх вэ?