Maтай 6:1–18
Аврагч шавь нартаа зөв шударга үйл үйлдэхийг заав
Есүс бусдын анхаарлыг татахын тулд бус харин өөрсдийн Тэнгэрлэг Эцэгийн таалалд нийцүүлэхийн тулд сайн үйлс үйлдэх хэрэгтэй гэж сурган, Уулан дээрх номлолоо үргэлжлүүлсээр байв. Энэ хичээлээр та сайн үйл үйлдэх сэдлээ үнэлж, өөрийгөө хэрхэн хөгжүүлэхийг хүсэж байгаагаа тодорхойлох боломжтой болно.
Христийн сургаалыг мэдэж авч, ойлгох. Суралцагчдад Христийн сургаалыг “мэдэж авч, ойлгоход” нь тусал. Мэдэж авч, ойлгох нь “оюун ухаан, зүрх сэтгэлийн мэдлэг юм.” Сүнс сайн мэдээний зарчмын үнэнийг гэрчлэх үед суралцагчид “уг зарчмын үнэнийг мэдрэхийн зэрэгцээ илүү тод томруун харж, илүү гүн гүнзгий мэдэхийг хүсэн, амьдралд нь хэрхэн үйлчилж байгааг зүрх сэтгэлдээ илүү бүрэн дүүрэн ойлгодог.” (Kim B. Clark, “Deep Learning and Joy in the Lord” [address given at the Seminaries and Institutes of Religion annual training broadcast, June 13, 2017])
Суралцагчийн бэлтгэл: Суралцагчдыг хичээлийн өмнө 24 цагийн турш өөрсдийн үйлдлийн сэдлийн талаар бодоход урь.
Боломжит суралцах үйл ажиллагаа
Тайлбар: Их Эзэний залбирал болон түүнтэй холбоотой хэсгүүдийг (Матай 6:9–15) Лук 11 дээр төвлөрөх дараагийн хичээлээр заах болно.
Бидний сэдэл
Дараах мэдэгдлийн тухай бод. Густаво хөршийнхөө хашааг засаж өгсөн.
Самбарт алх барьсан хүний дүрс зурахыг бод. Самбарт хүний дүрсний ойролцоо мэдэгдэл бич.
-
Та Густавогийн талаар юу гэж бодож байна вэ?
“Густаво хөршийнхөө хашааг засаж өгсөн” гэсэн мэдэгдлийн төгсгөлийн цэгийг арилгаад, төгсгөлд нь учир нь… гэж бич. Густаво хашааг яагаад зассан байж болох олон янзын шалтгааны хамтаар мэдэгдлийг гүйцээж бичихийг суралцагчдаас хүс. Хариултуудад “тэр сайхан сэтгэлтэй,” “тэр ээжийнхээ үүрэг болгосон үйлчлэлийн ажилд оролцож байсан,” “тэр хөршийнхөө охинд сэтгэгдэл төрүүлэхийг хүссэн,” “тэр хөршийнхөө нохойг хашаандаа оруулахыг хүсээгүй,” “тэр уурлаад хашааг эвдсэн учраас аав нь түүгээр үүнийг засуулсан” зэрэг байж болно.
-
Яагаад бидний сэдэл чухал вэ?
Бид Матай 6 дээр Аврагч Уулан дээрх номлолоо үргэлжлүүлж, сайн үйлс үйлдэх сэдлийн тухай заасан болохыг уншсан. Тохинуулах, бусдад үйлчлэх, залбирах, семинарт оролцох зэрэг сайн үйлс үйлдэх шалтгаануудын талаар бодоход өөртөө туслах үүднээс дараах үйл ажиллагааг гүйцэтгэ.
Судлах тэмдэглэл дээрээ гурван баганатай хүснэгт зураарай. Хүснэгтийн дээд хэсгийг дараах байдлаар бөглө.
Дараах хүснэгтийг самбарт үзүүл. Суралцагчдыг хүснэгтийн дээд хэсэгт байх асуултуудад өгөх хариултаа хүснэгтэд бичихэд урь.
|
Өнгөрсөн долоо хоногт таны үйлдсэн гурван сайн үйл юу байсан бэ? (Нэг мөрөнд нэгийг бич.) |
Тэдгээрийг үйлдэх шалтгаан тань юу байсан бэ? |
Эдгээр сайн үйлийг үйлдсэний дараа танд ямар сэтгэгдэл төрсөн бэ? |
Матай 6:1–6, 16–18-ыг уншаад, зөвийг үйлдэх бидний сэдлийн тухай Аврагч юу гэж сургасныг олж мэд. Зөвт үйл гэдэг үг нь ядууст өгөх зэрэг “шашны сүсэг бишрэлийн үйл” (1-р шүлэг, зүүлт тайлбар b)-ийг илэрхийлдэг. Хоёр нүүртнүүд гэдэг нь “дүр эсгэгчид” (2-р шүлэг, зүүлт тайлбар a)-ийг илэрхийлдэг.
-
Та Аврагчийн заасан зүйлийг хэрхэн нэгтгэн дүгнэх вэ?
Уншсан зүйлээ нэгтгэн дүгнэхэд болон асуумаар байгаа зүйлээ асуухад суралцагчдыг урь. Суралцагчид нэгтгэн дүгнэхдээ дараахтай төстэй зарчмуудыг дурдаж болох юм. Хэрэв бид Тэнгэрлэг Эцэгийн таалалд нийцүүлэхийн тулд зөв шударга үйлийг үйлдвэл Тэр биднийг шууд шагнана. Хэрэв бид бусдад харагдахын тулд зөв шударга үйлийг үйлдвэл өөрсдийн хүчин чармайлтад тэнгэрлэг адислал хүлээн авахгүй. Хүсвэл тодорхойлсон зарчмуудаа самбарт бичихэд суралцагчдыг урь.
Олны дунд залбирах нь “нууцаар” (Матай 6:6) үйлдээгүй болохоор буруу болно гэсэн үг биш гэдгийг ойлгох нь чухал. Залбирал болон шашны бусад зан үйлийг чин сэтгэлээсээ, бүхнээ зориулан, Бурханыг алдаршуулах хүсэлтэйгээр үйлдэж байгаа бол олон нийтийн дунд үйлдэж болдог. Мацаг барих үед энэ нь мөн адил байдаг. Матай 6:16 дээрх “баргар царай” мөн “царайгаа барайлгах” гэдэг үгс нь өөрсөд рүүгээ анхаарал татахын тулд мацаг барьж байгаагаа гадна төрхөөрөө харуулсан, Есүсийн үед амьдарч байсан хүмүүсийг илэрхийлдэг.
-
Биднийг зөв шударга үйл үйлдэх үед ч Их Эзэн яагаад бидний сэдлийн талаар ингэж их анхаардаг гэж та бодож байна вэ?
Хүснэгтээ эргэн хараад, өөрийн сайн үйл үйлдсэн шалтгаанаа Матай 6 дээр цэдэглэснээр Аврагчийн заасан зүйлстэй харьцуул.
-
Та яагаад “хамгийн дээд, сайн шалтгаануудын төлөө үйлчлэхээр хичээх” ёстой гэж бодож байна вэ? (Dallin H. Oaks, “Why Do We Serve?” Ensign, Nov. 1984, 13).
-
Хэрэв хэн нэгэнд зөв шалтгаанаар үйлдэхэд хэцүү байсан бол та тэдэнд юу хийхийг зөвлөх байсан бэ?
Тэргүүн зөвлөлийн ерөнхийлөгч асан Дийтр Ф.Угдорф Аврагчийн Өөрийн ажлыг гүйцэтгэх сэдлийн талаар заасан.
Тэр энэ дэлхий дээр ирсэн хамгийн агуу, хамгийн чадварлаг, хамгийн ихийг бүтээсэн хүн мөн хамгийн даруухан нь байсан юм. Тэрээр хамгийн гайхамшигт үйлчлэлүүдээ цөөн хэдэн дагалдагчийнхаа дэргэд үйлддэг байсан бөгөөд хийсэн зүйлээ “хэнд ч ярьж болохгүй” хэмээн тэдэнд сануулдаг байв [Лук 8:56-г үзнэ үү]. Хэн нэгэн Түүнийг “сайн” гэж дуудахад Тэрээр тэдэнд Бурханаас өөр хэн ч сайн биш гэдэг байсан [Марк 10:17–18-ыг үзнэ үү]. Дэлхийн магтаал сайшаал нь Түүнд ямар ч учир утгагүй гэдэг нь илэрхий байна. Түүний цор ганц зорилго бол Тэнгэрлэг Эцэгтээ үйлчилж, “үргэлж Түүнд тааламжтай зүйлсийг үйлдэх” [Иохан 8:29] явдал байсан. Бид Эзэний үлгэр дуурайлыг дагахдаа сайнаар гүйцэтгэх болно.
(Дийтр Ф.Угдорф, “Чин үнэнч байх нь,” 2015 оны 4-р сарын Ерөнхий чуулган, 69)
Аврагчийн Өөрийн ажлыг хийх сэдлийг дүрслэн харуулдаг жишээний талаар бод.
-
Эдгээр жишээнээс чухам юу нь таны сэтгэлийг хөдөлгөсөн бэ?
-
Эдгээр жишээ нь Аврагчийн хайрыг болон Түүний бидний нүглийг цагаатгасан шалтгааныг ойлгоход хэрхэн тус болж байна вэ?
Дараах асуултуудыг харуулаад, судлах тэмдэглэлдээ хариулж бичихэд суралцагчдыг урь.
-
Та өөрийн сайн үйл үйлдэх сэдлийн тухай юу гэж бодож байна вэ?
-
Таны сайн үйл үйлдэх сэдэл Тэнгэрлэг Эцэгтэй харилцах харилцаанд тань ямар арга замаар нөлөөлөх вэ?
-
Сайн үйл үйлдэхэд Аврагчийн жишээг дагахын тулд хийж чадах нэг зүйл тань юу вэ?
Цөөн суралцагчийг бичсэн эсвэл мэдэрсэн ямар нэг зүйлээ сайн дураараа хуваалцахад урь. Ирэх хичээлээр энэхүү хичээлийг судалснаас хойш тэдний сайн үйл үйлдэх сэдэл хэрхэн өөрчлөгдсөнийг үнэлж дүгнэх боломжтой болно гэдгийг суралцагчдад хэл. Энэ хичээл дээр заасан зарчмуудын тухай гэрчлэлээ хуваалцах талаар бодож үз.
Тайлбар ба нөхцөл байдлын тухай мэдээлэл
Бидэнд үйлчлэх ямар ямар зөв үндэслэл байдаг вэ?
Тэргүүн зөвлөлийн ерөнхийлөгч Даллин Х.Өүкс үйлчлэх зөв шалтгаануудын талаар ийн заажээ.
Бошиглогч Моронай хэрэв бид өөрсдийн хийж буй үйлсэд сайшаал хүртэхийг хүсвэл тэдгээрийг зөв шалтгаанаар үйлдэх ёстой хэмээн сургасан. Хэрэв хүн “бэлэг өргөж, эсвээс Бурханд залбирлаа ч, тэрбээр үүнийг үнэн сэтгэлээсээ хийхгүй аваас, энэ нь түүнд ямар ч ашиггүй байх болно.
“Учир нь болгоогтун, энэ нь түүний хувьд зөв шударга хэмээн тооцогдохгүй.” (Морон. 7:6–7.) …
… Бидний үйлчлэл хувийн ашиг сонирхол эсвэл бусад жижиг учир шалтгааны төлөө бус, харин Бурханыг болон хөршөө хайрлах хайрын үүднээс байх ёстой.
(Dallin H. Oaks, “Why Do We Serve?” Ensign, Nov. 1984, 12, 14)
Есүс Христийн тухай болон Түүний сайн мэдээний талаарх гэрчлэл хэрхэн бидэнд сайн үйл үйлдэх сэдэл төрүүлдэг вэ?
Арван хоёр төлөөлөгчийн чуулгын ахлагч Дийтр Ф.Угдорф “бидний амьдралын хамгийн хүчирхэг сэдэл[ийн]” тухай ингэж заажээ.
Бидний сэдэл, бодол санаа эцсийн эцэст үйлдэлд маань нөлөөлнө. Есүс Христийн сэргээгдсэн сайн мэдээний үнэнүүдийн талаарх гэрчлэл амьдралын маань хамгийн хүчирхэг сэдэл юм. Их Эзэн Өөрт нь үйлчлэхийг хүссэн хүмүүст хандан “Санаа бодол болгондоо над уруу харагтун; бүү эргэлз, бүү ай” (С ба Г 6:36) хэмээн дахин дахин хэлсэн.
… Бидний гэрчлэл бидэнд зөв зүйтэй амьдрах урам зоригийг өгдөг бөгөөд зөв зүйтэй амьдрах нь бидний гэрчлэлийг улам хүчирхэг болгодог. …
… Гэрчлэл нь бидэнд бүх цаг үед, бүх нөхцөл байдалд зөв зүйлийг хийхээр сонгох урам зоригийг өгдөг. Энэ нь бидэнд Бурхантай илүү ойртох урам зоригийг өгч, Түүнийг бидэн рүү ойртох боломжтой болгодог (Иаков 4:8-ыг үзнэ үү).
(Dieter F. Uchtdorf, “The Power of a Personal Testimony,” Ensign or Liahona, Nov. 2006, 37, 39)
Нэмэлт суралцах үйл ажиллагаа
Хичээлийг эхлүүлэх өөр хувилбар
Суралцагчдыг ангид орж ирэхээс өмнө самбарт “Хүмүүсийн бусдад үйлчилдэг шалтгаанууд юу вэ?” гэсэн асуултыг бичих талаар бодож үз. Суралцагчдыг самбарт өөрсдийн хариултыг бичихэд урь. Дараа нь тэднээс бусдад үйлчлэх шалтгаануудаа сайнаас мууг хүртэл эрэмбэлэн жагсаахыг хүс. Дараах асуултуудыг тэдэнд тавихыг бод. “Таны хамгийн сүүлд хийсэн сайн зүйл юу вэ? Үүнийг ямар сэдлээр үйлдсэн бэ?”
Тэнгэрлэг шинж чанаруудын жагсаалт дээр нэмж бичих
Өмнөх хичээлээр суралцагчид Матай 5–7-оор судлах тэмдэглэлээ бичиж эхэлсэн байж магадгүй. “Би … хийснээр Тэнгэрлэг Эцэг, Есүс Христ хоёртой илүү адил болж чадна.” Тэднийг энэ судлах тэмдэглэлийг өнөөдрийн хичээлээс олж авсан аливаа ойлголт дээрээ нэмэхэд урих талаар бодож үз.