Maтай 6:19–34

“Эхлээд Бурханы хаанчлалыг хайгтун”

Христ Бурханы хаанчлалыг эрэлхийлэгчдэд бүх зүйл нэмэгдэн өгөгдөх болно гэж заадаг.

Уулан дээрх номлолынхоо нэг хэсэг болгож, Есүс Христ Өөрийн шавь нарт “эхлээд Бурханы хаанчлалыг … хайгтун” (Матай 6:33) хэмээн заасан. Энэ хичээлээр та Бурханыг амьдралдаа эн тэргүүнд тавихын ач холбогдлыг тунгааж, хуваалцах боломжтой болно.

Суралцагчийн бэлтгэл: Бурханыг амьдралдаа эн тэргүүнд тавихын ач холбогдол, адислалыг бусадтай хэрхэн хуваалцахаа тунгаан бодоход суралцагчдыг урь.

Боломжит суралцах үйл ажиллагаа

Аврагч шавь нартаа эхлээд “Бурханы хаант улсыг эрэлхийлэхийг заав”

Дараах бодит амьдралын жишээнүүдийг унш.

• АНУ-ын Калифорнид амьдардаг серфингийн авьяаслаг тамирчин залуугийн семинарын хуваарь түүний ахлах сургуулийн серфингийн багийн сургуулилттай нэгэн зэрэг байхаар таарсан байна.

• Бразилын нэгэн залуу эмэгтэй найзынхаа 15 насны төрсөн өдөрт хажууд нь суух хүндэт зочноор уригдсан боловч өөрийнхөө жишигт нийцэхгүй даашинз өмсөх хэрэгтэй болжээ.

• Шинэ Зеландад амьдардаг регбигийн авьяаслаг тоглогч залуу эрэгтэй удахгүй мэргэжлийн багт тоглох урилга хүлээн авах гэж байгаа боловч бүрэн цагийн номлолд үйлчлэх насанд хүрсэн байлаа.

Эдгээр нь өсвөр үеийнхэн өөрсдийн амьдралд Бурханыг эн тэргүүнд тавих ёстой нөхцөл байдлууд бөгөөд энэ нь тийм ч амар биш юм.

• Бурханыг амьдралдаа эн тэргүүнд тавихтай холбоотой ямар асуулт эсвэл асуудлууд эдгээр нөхцөл байдалд байгаа өсвөр үеийнхэнд тулгарах вэ?

• Бурханыг амьдралдаа эн тэргүүнд тавихтай холбоотой ямар асуулт эсвэл асуудлууд танд эсвэл таны найз нөхдөд байж болох вэ?

Та энэ хичээлийг судлахдаа өөрийн асуудлуудыг шийдэх, Их Эзэнийг эн тэргүүнд тавихын ач холбогдлыг мэдрэхэд туслахыг Түүнээс хүс. Дараах бүлэг судраас нэгийг судлаарай. Бурханыг амьдралдаа эн тэргүүнд тавихад туслах Аврагчийн заасан үнэнийг олж мэдэж, ойлгоход тань туслах Ариун Сүнсний зааварчилгааг эрэлхийл.

Суралцагчид судлах шүлгээ өөрсдөө сонгох эсвэл А, Б сонголтоос аль нэгийг гүйцэтгэх боломжтой. Дараах сонголтуудыг самбарт харуулах нь тустай байж болно.

А сонголт: Матай 6:19–24. Эдгээр шүлэгт Аврагч бидний хамгийн их үнэ цэнтэйд тооцдог зүйлсийг илэрхийлэхдээ эд баялаг гэдэг үгийг, бидний амьдралын алсын хараа эсвэл төвлөрөх ёстой зүйлсийг илэрхийлэхдээ нүд гэдэг үгийг ашиглажээ. Иосеф Смитийн Орчуулгын 22-р шүлэгт Их Эзэний заасан зүйлсийг тодруулж өгдөг. “Нүд чинь Бурханы цог жавхланг харах саруул аваас бүтэн бие чинь гэрэлтэй байна” (Иосеф Смитийн Орчуулга, Матай 6:22 [Матай 6:22, зүүлт тайлбар b]-д буй; мөн Сургаал ба Гэрээ 88:67-г үзнэ үү). Мөн эд баялаг гэдэг үг нь материаллаг байдал эсвэл баян хүнийг илэрхийлж байна (Матай 6:24, зүүлт тайлбар e-г үзнэ үү).

Б сонголт: Матай 6:25–34. Эдгээр шүлгийн Иосеф Смитийн Орчуулга нь Их Эзэн Өөрийн төлөөлөгчдөд “дэлхий ертөнцөөр … явж … хүмүүст сургаал айлдах” үүрэг хариуцлагынх нь талаар ярьж байсныг тодотгож өгдөг (Joseph Smith Translation, Matthew 6:25–26 [Bible appendix]). Их Эзэний зааварчилгаа энэ үед арван хоёр төлөөлөгчдөд зориулагдсан байсан бол Түүний заасан зарчим бидэнд ч мөн хамаатай. Бурхан биднийг багтаасан Өөрийн бүтээлүүдэд хэрхэн анхаарал тавьдаг тухай жишээг ажигла. Суралцаж байхдаа 33-р шүлэгт онцгой анхаарал хандуул. Энэ шүлгийн Иосеф Смитийн Орчуулга нь “Энэ дэлхийн зүйлүүдийг бүү эрэлхийл, харин та нар юуны түрүүнд Бурханы хаант улсыг байгуул” гэж эхэлдэг (Иосеф Смитийн Орчуулга, Матай 6:38 [Bible Appendix]).

• Та Аврагчийн үгсийг уншиж, Ариун Сүнсний удирдамжийг урих явцдаа өөрт утга учиртай санагдсан юуг олж харсан бэ? Энэ нь яагаад утга учиртай байсан бэ?

Олж мэдсэн зүйлээ хуваалцахад зарим суралцагчийг урь. Тэдний дурдсан аливаа зарчмыг самбарт бичих талаар бодож үз. Хэрэв суралцагчид зарчмуудыг хуваалцахгүй бол, “та Аврагчийн заасан үнэнүүдийн нэгийг хэрхэн нэгтгэн дүгнэх вэ?” гэж асуухыг бодоорой.

Аврагч эдгээр шүлэгт бид Бурханд болон эд баялагт (эсвэл материаллаг зүйлсэд) хоёуланд зэрэг үйлчилж чадахгүй бөгөөд хэрэв бид эхлээд Бурханы хаанчлалыг хайвал Тэр бидэнд хэрэгтэй гэж мэдэж буй зүйлсээрээ биднийг адислах болно гэсэн үнэн зарчмуудыг заасан.

• Тэнгэрлэг Эцэг, Есүс Христ хоёрыг өөрийн амьдралд эн тэргүүнд тавих урам зориг өгдөг Тэдний талаар та юу мэдэх вэ?

Бурханыг эн тэргүүнд тавьдаг залуучууд

     

 

 

 

•    

• Та хэзээ Бурханыг амьдралдаа эн тэргүүнд тавьж байсан бэ?

• Та өөрийнхөө шийдвэрийн үр дүнд ямар адислалуудыг олж харсан бэ?

Бурханыг эн тэргүүнд тавихад бусдыг урамшуулах

Өөрийн амьдралд Бурханыг эн тэргүүнд тавих тухай Аврагчийн сургаалыг хэрхэн хэрэгжүүлдэг талаараа бод. Энэ хичээлийг үзэж дуусгахдаа Ариун Сүнснээс урам зориг авахаар үргэлжлүүлэн эрэлхийл.

Танай гадас эсвэл дүүргийн ерөнхийлөгчийн зөвлөлөөс чуулга эсвэл ангийг тань бүсийнхээ өсвөр үеийнхэнд Бурханыг амьдралдаа эн тэргүүнд тавих сэдэл төрүүлэн туслах видео бүтээхэд урьсан гэж төсөөл. Ерөнхийлөгчийн зөвлөл уг видеог өсвөр үеийнхний арга хэмжээн дээр үзүүлэхээр төлөвлөжээ.

Суралцагчид видеог бие даан эсвэл жижиг бүлгээр хийж бүтээхээр төлөвлөж болно. Хэрэв видео бүтээхээр төлөвлөх нь танай суралцагчдад тохирохгүй бол Бурханыг амьдралдаа эн тэргүүнд тавих тухай үг эсвэл хичээл төлөвлөж болно.

Видеоныхоо дэлгэрэнгүй тоймыг гарга. (Видео бүтээх шаардлагагүй бол та зөвхөн төлөвлөгөө гаргах хэрэгтэй.) Тоймдоо дараах зүйлсийг багтаа. Үүнд:

• Аврагчийн Матай 6 дээр заасан дор хаяж нэг үнэн болон энэ нь Бурханыг амьдралдаа тавихад өсвөр үеийнхэнд хэрхэн туслах тухай тайлбар

• Хэн нэгэн хүний Бурханыг амьдралдаа эн тэргүүнд тавьж буй тухай орчин үеийн жишээ. Энэ жишээ нь таны хувийн туршлага эсвэл таны мэддэг хэн нэгний туршлага байж болно. Жишээнд энгийн дүгнэлт бич.

Мөн тоймдоо дараах санаануудын нэг эсвэл хэд хэдийг багтаа. Үүнд:

• Сүмийн удирдагчийн гаргасан мэдэгдэл

• Таны оруулж болох зураг эсвэл үзүүлэн болон тэдгээрийг хэзээ оруулж болох тухай

• Таны хувийн гэрчлэл

Хангалттай цаг гаргаж өгсний дараа видеонд оруулах зүйлээ ангийнхантайгаа хуваалцахад суралцагчдыг урь. Тэднийг хуваалцах зуур дараах шалгах асуултуудыг тавих талаар бодож үз. “Та яагаад тухайн үг хэллэг эсвэл үнэнд төвлөрөхөөр шийдсэн бэ?” “Та яагаад дараах түүх эсвэл туршлагыг ашиглахаар шийдсэн бэ?” “Энэ нь яагаад өнөө үед өсвөр үеийнхэнд тусалж чадна гэж та бодож байна вэ?”

Хичээлийн эхэнд суралцагчдын илэрхийлсэн асуудал эсвэл асуултуудыг эргэн харах талаар бодож үз. Суралцагчдаас “Таны суралцсан зүйл эдгээр асуудлыг шийдвэрлэхэд хэр тус болох вэ?” гэж асуу.

Та видео бүтээх төлөвлөгөөгөө гэр бүл, найз нөхөдтэйгөө хуваалцаж болно. Ирээд, Намайг дага гарын авлагыг бие даан судлах цаг дээр энэ сэдвийн талаар гэр бүлийнхэнтэйгээ ярилцахдаа үүнийг гүйцэтгэх нь хамгийн тохиромжтой.

Хэрэв та видео бүтээж чаддаг бол хийгээд, бусадтай хуваалцах талаар бодож үз.

Тайлбар ба нөхцөл байдлын тухай мэдээлэл

Бид Бурханыг амьдралдаа эн тэргүүнд тавьснаар ямар ямар адислал хүлээн авдаг вэ?

Ерөнхийлөгч Эзра Тафт Бэнсон (1899–1994) ийн заасан.

Ерөнхийлөгч Эзра Тафт Бэнсоны гэрэл зураг. Тэр задгай зуухны өмнө арьсан сандал дээр суусан байна. Тэрээр гараа урдаа атгасан байдалтай сууж байгаа бөгөөд нэг хуруундаа оюу эрдэнийн бөгж зүүжээ. Албан ёсны хөрөг зураг, 1986 он.

Бид Бурханыг амьдралынхаа бусад юм бүхний өмнө тавих ёстой. …

Бид Бурханыг нэгдүгээрт тавьсан үед бусад бүх зүйл зохих байрандаа орох юм уу бидний амьдралаас алга болдог. Их Эзэнийг хайрлах бидний хайр бусдыг энэрэх, цаг хугацаагаа зохицуулах, өөрсдийн сонирхдог зүйлсийг хийх болон эн тэргүүнд анхаарах ёстой зүйлсийн маань дэс дарааг тогтоон өгч, удирдан чиглүүлж, туслах болно.

(Ezra Taft Benson, “The Great Commandment—Love the Lord,” Ensign, May 1988, 4)

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсоны 2018 оны 1-р сард авхуулсан албан ёсны хөрөг зураг.

Та Бурханыг амьдралдаа хамгийн хүчтэй нөлөөлөгч болгоход бэлэн үү? …

Ийнхүү бэлэн байх нь таныг хэрхэн адисалж болохыг бодоод үзээрэй. …

Хэрэв танд сайн мэдээний тухай болон Сүмийн талаар үнэхээр мэдэхийг хүссэн асуулт байвал Бурханыг амьдралдаа ялуулахыг сонгосноор та амьдралын тань замыг зааж, гэрээний зам дээрээ баттай зогсоход туслах өөрчлөгдөшгүй, мөнхийн үнэнийг олж, ойлгоход чиглүүлэгдэх болно.

Та уруу татагдахдаа, тэр бүү хэл туйлдаж, ганцаардаж эсвэл буруугаар ойлгогдсон үед тань уруу таталтууд ирэх үед Бурханыг амьдралдаа ялуулахыг сонгож, Түүнээс өөрийгөө хүчирхэгжүүлэхийг хүсэн гуйхад ямар их зориг шаардагдахыг төсөөлөөрэй.

… Та амьдралдаа Бурханыг ялуулах сонголтыг хийснээр Бурхан бол “гайхамшгийн Бурхан” [Мормон 9:11] болохыг өөрийн биеэр мэдэж авах болно.

(Рассэлл М.Нэлсон, “Бурхан ялах болтугай,” 2020 оны 10-р сарын Ерөнхий чуулган, 103)

Аврагч “Амийнхаа төлөө санаа бүү зов” мөн “Маргаашийн төлөө санаа бүү зов” хэмээн хэлэхдээ ямар утга санааг илэрхийлсэн бэ? (Maтай 6:25, 34).

“Хаан Жэймсийн хувилбарын Матай 6:25, 34 дээрх ‘санаа бүү зов’ гэж орчуулагдсан грек хэллэг нь хэт сэтгэл зовниж эсвэл санаа зовох хэрэггүй гэсэн утгатай” (Шинэ гэрээний суралцагчийн гарын авлага [Сүмийн Боловсролын Системийн гарын авлага, 2014], 29).

Аврагч “Өдөр бүрийн зүдүүр өдөртөө хангалттай” хэмээн хэлсэн нь ямар утгатай вэ? (Maтай 6:34)

Энэ хэллэг нь “Маргаашийн асуудлыг бүү авчир—танд өнөөдөр хангалттай асуудал байгаа” гэсэн утгатай (Шинэ Гэрээний суралцагчийн гарын авлага, 29).

Тохой гэж юу вэ? (Maтай 6:27)

Тохой гэдэг нь “еврейчүүдийн ашигладаг байсан уртын энгийн нэгж; гарын тохойноос хурууны үзүүр хүртэлх зай бөгөөд … Их Эзэний цаг үед [ойролцоогоор] 21½ инч байв” (Bible Dictionary, “Cubit”).

Нэмэлт суралцах үйл ажиллагаа

Хуурамч бошиглогчдоос сэрэмжил

Дэлхийд нийтлэг хүлээн зөвшөөрөгддөг боловч Тэнгэрлэг Эцэгийн төлөвлөгөөний эсрэг байдаг санаануудын жишээг хуваалцахад суралцагчдыг урих талаар бодож үз. Хуурамч бошиглогчид Тэнгэрлэг Эцэгийн эсрэг байдаг санаануудыг дэмждэг бөгөөд Есүс Христэд итгэх итгэл, гэрчлэлийг устгахаар оролддог хувь хүн эсвэл бүлэг хүн болохыг тайлбарла. Матай 7:15–20-ийг уншаад, хуурамч бошиглогчдыг ялган таних талаарх Аврагчийн сургаалыг болон эдгээр сургаал яагаад өнөө үед чухал болохыг ярилц. Тэргүүн зөвлөлийн ерөнхийлөгч Даллин Х.Өүксийн дараах мэдэгдэл тус болж болох юм.

Ерөнхийлөгч Даллин Х.Өүксийн 2018 оны 3-р сард авхуулсан албан ёсны хөрөг зураг.

“Сатан … чухал асуудалд биднийг будилуулж, бодол санааг маань төөрөлдүүлэхийг санаархдаг. Аврагч биднийг төөрөгдүүлж болох янз бүрийн сургаал дундаас үнэнийг сонгоход туслан, “Та нар тэднийг үр жимсээр нь таних болно” (3 Нифай 14:16) гэсэн шалгуурыг өгчээ. Тиймээс бид тэр үр дүнг нь болон заасан зарчмуудыг мөн тэдгээрийг заасан хүмүүсийн “үр жимсийг” харах ёстой. Энэ бол Сүм, Сүмийн сургаал, бодлого, удирдлагын эсрэг бидэнд сонсогддог олон эсэргүүцэлд өгөх хамгийн оновчтой хариулт юм. Аврагчийн заасан шалгуурыг дага. Үр жимсийг нь буюу үр дүнг хар.

(Даллин Х.Өүкс, “Мелкизедек санваар ба түлхүүрүүд,” 2020 оны 4-р сарын Ерөнхий чуулган, 84).