Famerenana ny fifehezana fotopampianarana 7
Isan’ny iray amin’ny tanjonan’ny fifehezana fotopampianarana ny hanampy anao hianatra ny fomba fampiharana ny fotopampianarana ampianarina ao amin’ny soratra masina amin’ireo toe-javatra izay mety hatrehinao na ny manodidina anao. Ity lesona ity dia hanome fahafahana anao hizatra hampihatra eo amin’ny fiainana ny fotopampianarana sasany izay nianaranao tamin’ity taona ity.
Fiomanan’ny mpianatra: Asao ireo mpianatra hifidy andinin-tsoratra masina fifehezana fotopampianarana iray izay tsapan’izy ireo fa sarotra ny mampihatra azy eo amin’ny fiainany ary iray izay tsapany fa mora ny mampihatra azy. Angataho izy ireo mba ho vonona hanazava ny antony nisafidianany ny andinin-tsoratra masina tsirairay avy.
Sahanasa fianarana azo atao
Azo ampianarina ho solon’ity lesona famerenana ity ny lesona iray momba ny andinin-tsoratra masina fifehezana fotopampianarana. Jereo ny fandaharam-potoana izay nomen’ny tale na ny mpandrindra eo anivon’ny vondromparitra mba hahazoana antoka fa hampianarina mandritra ny fotoana ampianarana ny seminera avokoa ireo lesona momba ny andinin-tsoratra masina fifehezana fotopampianarana.
Atombohy amin’ny fanasana ireo mpianatra hizara ny heviny avy amin’ny fiomanany amin’ny maha-mpianatra azy. Azon’ny iray kilasy iaraha-manao, na mandeha tsiroaroa na anaty vondrona kely izany.
Manampy ny hafa
Mba hanampiana ireo mpianatra hampihatra ireo fahamarinana izay nampianarina tao amin’ny iray amin’ireo andinin-tsoratra masina fifehezana fotopampianarana dia hevero ny hampiasa ity rafi-tantara mety hitranga ity na ny hanasa ireo mpianatra hisaintsaina ny azy ireo manokana.
Eritrereto hoe manompo fianakaviana iray ao amin’ny paroasinao ianao ka vao haingana no very asa ilay raim-pianakaviana ao amin’izany fianakaviana izany. Kivy tanteraka io raim-pianakaviana io dia nitsahatra nankany am-piangonana, sy nitsahatra nivavaka ary nitsahatra namaky soratra masina. Misy ankizy anankitelo ao amin’io fianakaviana io: zatovovavy 17 taona iray, sy zatovolahy 15 taona iray, ary ankizivavy 10 taona iray. Ilay ankizivavy 10 taona sy ny reniny dia mankany am-piangonana ihany indraindray. Ireo zatovo anankiroa kosa dia mankany am-piangonana matetika, saingy noho ny fitohizan’ny tsy fananan’ny rain’izy ireo asa dia voatery nitsahatra nankany am-piangonana izy ireo.
Eo am-pamerenanao mijery ity lisitra ahitana andinin-tsoratra masina fifehezana fotopampianarana manaraka ity dia saintsaino ny mety ho fihetseham-po sy olana atrehin’ny olona tsirairay ao amin’io fianakaviana io. Saintsaino hoe inona amin’ireo fahamarinana avy ao amin’ireo soratra masina ireo no mety hanampy bebe kokoa ny olona tsirairay ao amin’io fianakaviana io ary nahoana.
Asehoy ity tabilao manaraka ity mba hahazoan’ireo mpianatra mijery izany mandritra ny lesona. Raha manampy dia ampio andinin-tsoratra masina fifehezana fotopampianarana izay mety ilaina amin’ity toe-java-misy ity ao amin’izany.
|
Andinin-tsoratra masina |
Andian-teny manan-danja ao amin’ny soratra masina |
|
“Mankanesa aty Amiko, ianareo rehetra izay miasa fatratra sy mavesatra entana, fa Izaho no hanome anareo fitsaharana.” | |
|
Hoy Jesoa: “Homeko anao ny fanalahidin’ny fanjakan’ny lanitra.” | |
|
“Tiava an’i Jehovah Andriamanitrao. … Tiava ny namanao.” | |
|
Nandidy i Jesoa Kristy hoe: mandraisa ny Fanasan’ny Tompo “ho fahatsiarovana Ahy.” | |
|
“Raha misy olona ta-hanao ny sitrapony, dia hahalala ny amin’ny fampianarana izy.” |
Hevero ny hangataka ireo mpianatra hilalao an-tsehatra ny fifanakalozan-kevitra nifanaovan’ny rahavavy na rahalahy mpanompo amin’ny olona iray ao amin’ilay fianakaviana. Ny mpianatra izay maka ny toeran’ ilay olona iray ao amin’ilay fianakaviana dia afaka maneho ireo olana mikasika ny toe-java-misy, ary ny mpianatra izay maka ny toeran’ilay rahavavy na rahalahy manompo kosa dia afaka manome sosokevitra miainga avy amin’ireo andinin-tsoratra masina fifehezana fotopampianarana.
-
Inona avy ireo mety ho fihetseham-po na olana iainan’ny tsirairay avy amin’ireo olona ao amin’io fianakaviana io?
-
Nahoana no manampy ny fisaintsainana ireo fihetseham-po sy ireo olana alohan’ny hanapahana hevitra ny amin’izay fahamarinana mety hanampy indindra?
Misafidiana ankizy iray sy ny iray amin’ireo ray aman-dreny avy amin’ilay fianakaviana ao anatin’io rafi-tantara io. Misafidiana andinin-tsoratra masina fifehezana fotopampianarana iray sy fahamarinana izay tsapanao fa tena hanampy ny tsirairay avy amin’izy ireo.
-
Iza amin’ireo olona ireo no nosafidinao? Inona ny andinin-tsoratra masina fifehezana fotopampianarana sy fahamarinana hozarainao amin’izy ireo? Nahoana?
Eritrereto ny tsirairay avy amin’ireo olona izay nosafidinao.
-
Raha ianao no anontaniana, dia inona avy ireo asa voafaritra hanasanao azy ireo tsirairay avy mba hataony mba hahafahany miaina ireo fahamarinana izay ampianarina ao amin’ireo andinin-tsoratra masina fifehezana fotopampianarana ireo?
Rehefa mizara ny valin-teniny amin’ilay fanontaniana teo aloha ireo mpianatra, dia hevero ny hametraka fanontaniana fanaraha-maso toy izao manaraka izao: oOviana ianao na ny olona hafa izay fantatrao no niaina zavatra izay nampiharana ilay fahamarinana tamin’io fomba io? Oviana ianao na ny olona hafa izay fantatrao no nanao ireo asa ireo, ary inona ny zavatra nitranga vokatr’izany? Inona ny zavatra nianaranao mikasika ny Ray any An-danitra sy i Jesoa Kristy avy amin’ireo toe-javatra niainana ireo?
-
Ahoana no mety ahafahan’ireo asa ireo hanampy azy ireo handray hery sy tanjaka avy amin’ny Ray any An-danitra sy i Jesoa Kristy?
Fampiharana fanampiny
Misafidiana iray amin’ireo andinin-tsoratra masina fifehezana fotopampianarana izay tsy nampiasainao tamin’ny sahanasa teo aloha. Mieritrereta toe-java-misy iray izay mety hahafahan’io andinin-tsoratra masina io hanampy olona iray hahita valiny amin’ny fanontaniana iray na hiatrika olana iray. Raketo ao amin’ny diary fandalinanao ny eritreritrao.
Amporisiho ireo mpianatra mba hizara ny hevitr’izy ireo momba ny toe-java-misy hafa izay ahafahan’ny olona mahazo tombony avy amin’ny fampiharana ireo fahamarinana izay ampianarina ao amin’ireo andinin-tsoratra masina fifehezana fotopampianarana ireo. Hevero ny hijoro ho vavolombelona ny amin’ny fahafahan’ny Mpamonjy manampy azy ireo amin’ny fampiharana ireo fahamarinana ireo eo amin’ny fiainan’izy ireoa.