Rebyo sa Doktrinal nga Kahanas 8

Imemorya ang mga Pakisayran ug Mahinungdanong Hugpong sa mga Pulong sa Kasulatan

A Bolivian boy reading scriptures.

Ang paghinumdom sa mga tudling sa kasulatan ug sa mga kamatuoran nga gitudlo niini makatabang kanimo sa daghang mga paagi. Sa tibuok tuig, dasigon ka sa pagmemorya sa mga pakisayran sa kasulatan ug sa mga mahinungdanong mga hugpong sa kasulatan sa matag usa sa 24 ka mga tudling sa doktrinal nga kahanas sa Bag-ong Tugon. Kini nga leksiyon gituyo nga makatabang nimo sa pagmemorya sa pipila ka pakisayran sa kasulatan ug sa mahinungdanong hugpong sa mga pulong gikan sa nag-unang 11 ka tudling sa doktrinal nga kahanas diha Bag-ong Tugon.

Pagpangandam sa estudyante: Awhaga ang mga estudyante sa pagdala og mga kopya sa karaan nga magasin sa Simbahan nga mahimong guntingon aron himoong biswal sa pagmemorya sa mga tudling sa doktrinal nga kahanas.

Posible nga mga Kalihokan sa Pagkat-on

Ang usa ka tudling sa doktrinal nga kahanas nga leksiyon lagmit nga kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Alang sa kalihokan niini nga leksiyon, dalha ang mosunod nga mga butang sa klase: ubay-ubay nga kopya sa karaang mga magasin sa Simbahan, pipila ka gunting, papilit, papel nga de kolor, pangmarka, ug mga krayola. Ang mga estudyante mahimong mogamit usab sa ilang kaugalingon nga mga device aron pag-search og mga imahe o hulagway gikan sa media library sa Simbahan.

Paggamit og mga biswal nga tabang sa pagmemorya

Ikonsiderar ang paggamit og butang nga ipakita sa leksiyon [object lesson] nga makatabang sa paghulagway sa mga benepisyo sa paggamit og mga biswal nga matabang sa pagmemorya.

Usa ka paagi sa pagbuhat niini mao ang paghulagway og usa ka senaryo o paglista og hut-ong sa mga butang ug dayon hangyoon ang mga estudyante sa pagsubli og sulti sa mga detalye. Dayon mogamit og biswal, sama sa mga hulagway o mga drowing, aron sa paghulagway sa lainlain nga senaryo o sa paglista og lainlaing hut-ong sa mga butang, ug hangyoon ang mga estudyante sa pagsubli og sulti niadtong mga detalye. Pangutan-a ang mga estudyante asa sa duha ka paagi ang naghimong sayon alang kanila sa paghinumdom.

Ang pagmemorya og mga tudling sa kasulatan sa doktrinal nga kahanas makatabang nimo sa paghinumdom sa mga pulong sa Manluluwas ug paghinumdom niini sa mga panahon sa panginahanglan. Adunay daghang lainlain nga paagi nga imong magamit nga makatabang nimo sa pagmemorya sa mga kasulatan. Kini nga leksiyon magtutok sa paggamit og mga biswal nga makatabang sa paglig-on sa imong pagmemorya sa piho nga mahinungdanong hugpong sa mga pulong sa kasulatan gikan sa mga tudling sa doktrinal nga kahanas sa Bag-ong Tugon.

Ang mosunod mao ang lista sa 11 ka tudling sa doktrinal nga kahanas sa Bag-ong Tugon. Ikonsiderar ang pagmarka niining maong mga tudling kauban sa mahinungdanong hugpong sa mga pulong sa kasulatan kon wala ka pa makabuhat niini.

Ipakita ang mosunod nga handout aron ang mga estudyante maka-refer niini hangtod nga mahuman nila og himo ang ilang biswal atol sa mosunod nga kalihokan.

Doctrinal Master - Matthew - John

Pakisayran sa Kasulatan	Mahinungdanong Hugpong sa mga Pulong sa Kasulatan
Lucas 2:10–12	“Kay karong gabhiona, natawo sa lungsod ni David ang inyong Manluluwas, ang Kristo nga Ginoo.”
Juan 3:5	“Walay makasulod sa gingharian sa Dios gawas kon matawo siya pinaagi sa tubig ug sa Espiritu.”
Juan 3:16	“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak.”
Mateo 5:14–16	“Ipadan-ag ang inyong kahayag atubangan sa mga tawo.”
Mateo 11:28–30	“Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo.”
Mateo 16:15–19	Si Jesus miingon, “Ihatag ko kanimo ang mga yawe sa gingharian sa langit.”
Juan 7:17	Ang buot magbuhat sa gisugo sa Dios mahibalo kon ang akong gitudlo gikan ba sa Dios.”
Mateo 22:36–39	“Higugmaa ang Ginoo nga imong Dios. … Higugmaa ang imong isigkatawo.”
Lucas 22:19–20	Si Jesukristo nagsugo, moambit sa sakramento “aron paghandom kanako.”
Juan 17:3	“Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo nga imong gipadala.”
Lucas 24:36–39	“Kay ang espiritu walay unod ug mga bukog, sama sa nakita ninyo nga ania kanako.”

Paghimo og usa ka biswal

Depende sa gidak-on sa klase, ang mosunod nga kalihokan mahimong buhaton sa indibidwal nga paagi, nga may pares, o sa gagmay nga mga grupo. Kon mahimo, pagdala og karaang mga kopya sa magasin sa Simbahan aron magamit sa klase. Kon walay giimprinta nga mga hulagway, hangyoa ang mga estudyante sa pagdrowing og ilang kaugalingong mga hulagway ngadto sa mga piraso nga papel. Ikonsiderar ang dungan nga paghimo og biswal kauban sa mga estudyante. Dapita ang mga estudyante sa pagpaambit sa ilang mga biswal dapit sa kataposan niini nga kalihokan.

Pangita o pagdrowing og mga hulagway nga makatabang nimo sa paghinumdom sa pakisayran sa kasulatan ug sa mahinungdanong hugpong sa kasulatan gikan sa usa sa nag-unang 11 ka mga tudling sa doktrinal nga kahanas sa Bag-ong Tugon. Ang imong hinimo maglakip og usa o duha ka hulagway nga makatabang nimo sa paghinumdom sa tibuok nga mahinungdanong hugpong sa mga pulong sa kasulatan, o maglakip kini og lainlaing mga hulagway alang sa matag pulong diha sa mahinungdanong hugpong sa pulong sa kasulatan. Samtang nagtrabaho ka sa imong hinimo, hunahunaa kon sa unsang paagi ang tudling nga imong gitutokan may kalabotan ni Jesukristo ug sa Iyang ebanghelyo.

Kon mahuman na ang mga estudyante, dapita sila nga ipaambit diha sa klase ang ilang mga tubag.

Kon duna pay panahon, ang mga estudyante mahimong mag-andam og mubo nga leksiyon mahitungod sa tudling nga ilang gipili nga mahimong gamiton sa home evening o sa pamilya nga pagtuon sa kasulatan. Awhaga ang mga estudyante sa pagpangita og paagi nga magamit ang biswal nga ilang gihimo isip kabahin sa ilang leksiyon. Ang mosunod nga mga pangutana makagiya sa mga estudyante samtang mangandam sila sa ilang mga leksiyon:

• Unsa ang natabang niining mao nga tudling sa kasulatan sa atong pagsabot mahitungod kang Jesukristo ug sa Iyang ebanghelyo?

• Sa unsang paagi ang mga kamatuoran gikan niini nga tudling sa kasulatan makaapekto sa imong kinabuhi?

• Unsa nga mga kasinatian ang imong nasinati nga may kalambigitan sa mga kamatuoran nga gitudlo niini nga tudling sa kasulatan?

Ikonsiderar ang pag-awhag sa mga estudyante nga magbansay sa pagmemorya sa mga pakisayran sa kasulatan ug sa mahinungdanong hugpong sa mga pulong nga sila ra. Mahimo gani nilang ikonsiderar ang pagpili og pipila sa tibuok nga mga tudling aron memoryahon.