I-assess ang Imong Nakat-onan 4

Mateo 14–20; Marcos 6–10; Lucas 10; 12; 14–18; Juan 5–11

Kini nga leksiyon gituyo aron matabangan ka sa pagtimbang-timbang sa mga tumong nga imong gitakda, ug sa nakat-onan ug sa personal nga pag-uswag nga imong nasinati sa panahon sa imong pagtuon sa Bag-ong Tugon.

Pag-ampo alang sa mga estudyante. Aron mas makatutok diha sa tagsa-tagsa ka mga estudyante, iampo sila nga ilitok ang ilang ngalan. Pangayo sa Langitnong Amahan og tabang sa pagsabot sa mga panginahanglan sa mga estudyante ug sa pagkahibalo unsa nga mga paagi sa pagtudlo ang gamiton aron makab-ot kana nga panginahanglan. Paminawa ang mga pag-aghat mahitungod sa unsaon pagtabang ang matag estudyante.

Pagpangandam sa estudyante: Dapita ang mga estudyante sa pagpamalandong sa espirituhanong paglambo nga ilang nasinati panahon sa ilang pagtuon sa Bag-ong Tugon. Nakatabang ba ang ilang pagtuon sa Bag-ong Tugon sa ilang pag-ila, paghigugma, ug pag-alagad sa Langitnong Amahan ug kang Jesukristo? Unsa ang mga makahuluganong kasinatian nga anaa kanila?

Posible nga mga Kalihokan sa Pagkat-on

Kini nga leksiyon gituyo aron matabangan ang mga estudyante sa pagtimbangtimbang sa mga tumong nga ilang gitakda, sa ilang abilidad sa pagpasabot sa mga pagtulon-an sa Bag-ong Tugon, o kon sa unsang paagi nausab ang ilang mga kinaiya, mga tinguha, ug abilidad sa pagsunod sa ebanghelyo. Ang pagtuon sa klase bahin sa Mateo 14–20; Marcos 6–10; Lucas 10; 12; 14–18; ug Juan 5–11 tingale naghatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, ang mga kalihokan mahimong ipahiangay nga ilakip kadto nga mga kamatuoran.

Duol ngadto kang Jesukristo ug mahimong Iyang disipulo

Paggahin og pipila ka gutlo sa pagpamalandong kon sa unsang paagi ikaw naglambo isip usa ka disipulo ni Jesukristo ug sa tinguha nga mas mahingpit ang pagduol ngadto Kaniya samtang nagtuon ka sa Bag-ong Tugon. Ang pipila ka paagi nga ikaw giawhag sa pagbuhat niini mao ang imong abilidad sa pagdawat ug pagsunod sa personal nga pagpadayag ug pagpasabot sa pipila ka tahas ug titulo ni Jesukristo ug sa imong mga paningkamot sa pagpangita og kalinaw sa kinabuhi pinaagi kang Jesukristo. Tinguhaa ang pagkahibalo gikan sa imong Langitnong Amahan kon sa unsang paagi ikaw naglambo ug nag-uswag sa ingon niining mga paagi ingon man sa bisan unsang mga buhat nga angay nimong ipadayon o ipahiangay aron mapadayon ang pagpalawom sa imong pagkadisipulo ni Jesukristo.

Palamboa ang imong abilidad sa pagdawat og pagpadayag

Sugdi ang klase pinaagi sa hinay kaayo nga pagpatukar og usa ka pamilyar nga awit. Kinahanglan nga igo ang kahinay niini nga bisan sa kinagamyang saba kutob sa mahimo, kadtong mga naglingkod duol sa gigikanan sa tukar dili makadungog niini. Hangyoa ang mga estudyante sa pag-ila unsa nga sonata ang gitukar.

Paggahin og usa ka minuto sa pagpaminaw sa tukar sa imong palibot.

• Unsa nga mga tingog nga madungog lamang nimo kon imong paminawon og maayo?

• Unsa ang puwede nimong buhaton kon makadungog ka og hinay kaayong tingog ug gusto kang masayod kon unsa kini?

Ang mga estudyante tingale motubag nga mopaduol sila sa tinubdan sa tukar, maningkamot nga magpundo ug maghilom, ipunting ang ilang mga hunahuna sa pagpaminaw, o babagan ang mga saba sa palibot. Ikonsiderar ang pagsulat sa mga tubag sa mga estudyante diha sa pisara ug dayon mohangyo sa mga estudyante sa paggamit niadto nga mga paagi aron masulayan sa pag-ila ang gitukar nga kanta.

• Sa unsang paagi kini nga kalihokan susama sa pagkadawat og pagpadayag gikan sa Espiritu Santo?

Usa sa mahinungdanong tumong sa seminary mao ang pagtabang nga mapalambo ang imong abilidad sa pagdawat og personal nga pagpadayag gikan sa Espiritu Santo.

Ikonsiderar ang panginahanglan sa mga estudyante ug kon ang impormasyon nga anaa sa mosunod nga parapo makatabang ba kaha kanila.

Sa Basahon ni Mormon, si Nephi mihulagway sa Espiritu Santo isip “hinay hinagawhaw nga tingog” nga atong mabatyagan labaw sa atong madungog ( 1 Nephi 17:45). Atong mapalambo ang atong abilidad sa pagkadungog o pagbatyag sa Espiritu Santo diha sa atong kasingkasing sa mga paagi nga susama niadtong atong gigamit sa pagpaminaw sa hinay nga sonata. Ang espirituhanong pagpaduol ngadto sa Dios, ang pagkalma sa atong hunahuna, ang pagtutok sa atong mga hunahuna, ug ang pagbabag sa mga kasaba sa palibot tanan epektibong mga paagi aron madugangan ang atong abilidad sa pag-ila sa hunghong sa Balaang Espiritu.

Gahini og pipila ka gutlo nga makapamalandong sa bag-ong mga kasinatian diin ikaw nakadawat og personal nga pagpadayag gikan sa Espiritu Santo. Mahimo nimong rebyohon ang imong mga mugbong sulat diha sa imong mga kasulatan o sa imong journal sa pagtuon. Mahimo usab nimong hangyoon ang Langitnong Amahan nga tabangan ka sa pag-ila o paghinumdom sa personal nga pagpadayag nga imong nadawat. Dayon morekord sa mga hunahuna ug mga pagbati nga misulod sa imong hunahuna ug kasingkasing.

• Unsa ang bag-o nimong mga kasinatian sa pagkadawat og personal nga pagpadayag? Giunsa nimo sa pag-ila nga kining maong mga kasinatian gikan sa Dios?

• Unsay imong nakat-onan diha sa imong pagtuon sa Bag-ong Tugon nga makatabang nimo sa pag-ila sa Espiritu Santo?

• Unsang mga ideya ang imong ikapaambit ngadto sa usa ka tawo nga naglisod sa pag-ila sa Espiritu?

Usa sa mga nag-unang mga tahas sa Espiritu Santo mao ang pagpamatuod bahin sa Amahan ug sa Anak (tan-awa sa Mateo 16:17 ; Juan 15:26 ; 3 Nephi 11:32).

• Unsa ang natabang sa Espiritu kanimo sa pagsabot o pagbati mahitungod sa Langitnong Amahan ug kang Jesukristo?

• Sa unsang paagi ang gasa sa Espiritu Santo ug ang kahigayonan sa personal nga pagpadayag ebidensya sa gugma sa Dios alang kanimo?

Dapita ang mga estudyante nga ipadayon ang pagtinguha og personal nga pagpadayag bisan og mobati sila og kalisod sa pag-ila sa mga pag-aghat gikan sa Espiritu Santo.

Ipasabot ang mga tahas ug mga titulo ni Jesukristo

Ipakita ang mosunod nga mga hulagway sa pan ug sa usa ka karnero. Pangutan-a ang mga estudyante kon makahimo ba sila sa pagpasabot kon giunsa sa paggamit sa Manluluwas kini nga mga simbolo sa pagtudlo mahitungod sa Iyang kaugalingon.

• Giunsa sa Manluluwas sa paggamit ang pan ug karnero sa pagtudlo mahitungod sa Iyang kaugalingon?

Mahimo nimong hinumdoman og balik ang pagtulon-an sa Manluluwas sa pagkumpara sama sa “Ako ang pan sa kinabuhi” (tan-awa sa Juan 6:35, 41, 48, 51), “Ako ang maayong magbalantay” ( Juan 10:11), ug ang “Ako ang pagkabanhaw, ug ang kinabuhi” ( Juan 11:25).

• Unsa ang gitudlo niini nga mga titulo kanimo mahitungod sa kinaiya sa Manluluwas ug sa mga tahas nga Iyang mabuhat diha sa imong kinabuhi?

• Sa unsang paagi ang pagsabot sa Iyang kinaiya ug mga tahas nagtabang nga mas modugang ang imong paghigugma Kaniya?

Sa imong pagtuon sa Bag-ong Tugon, tingale nakatipig ka og lista diha sa imong journal sa pagtuon sa mga tahas ug mga titulo ni Jesukristo. Kon ugaling aduna ka niini nga lista, gahini og pipila ka minuto aron marebyo kini. Pagdugang og bisan unsa nga titulo nga posible nimong nalimtan. Kon wala pa ka makahimo niana nga lista, mahimo nimo kining sugdan karon, nga ilista ang bisan unsa nga mga tahas og mga titulo nga imong mahunahunaan. Kon wala kay mahunahunaan, ikonsiderar ang pagrebyo sa “ Ang Buhi Nga Kristo: Ang Pagpamatuod sa mga Apostoles ” (ChurchofJesusChrist.org) o “Jesukristo” diha sa Ang Giya ngadto sa mga Kasulatan alang sa pipila ka ideya.

Ang mga estudyante tingale malingaw sa paghimo sa mosunod nga kalihokan uban sa kapares o sa gagmay nga mga grupo. Awhaga ang mga estudyante sa pagpaambit diha sa klase sa ilang nahimo.

• Paghimo og sulat-pasalamat nga kard alang sa Manluluwas, nga magtutok sa usa o daghan pang mga tahas o Iyang titulo. Lakipi og bisan unsa nga imong mga kasinatian diin Siya imong giila nga nagtuman niana nga tahas diha sa imong kinabuhi.

Kon ang mga estudyante naghimo og kinolektang mga hulagway [collage] sa miagi inga leksiyon, ikonsiderar nga laktawan ang mosunod nga gisugyot nga kalihokan.

• Paghimo og biswal nga nagpasabot sa mga tahas sa Manluluwas o mga titulo. Lakipi og magamit nga mga pakisayran sa kasulatan ug kon nganong kini nga mga tahas o mga titulo makahuloganon kanimo. Ikonsiderar ang pagpaambit niini ngadto sa social media kon imo nang mahuman.

• Pagsulat og mubo nga pakigpulong o pag-andam og mubo nga leksiyon mahitungod sa usa o daghan pang tahas o titulo sa Manluluwas nga mahimo nimong itudlo isip debosyonal sa seminary, isip leksiyon sa home evening, o usa ka klase sa simbahan. Ilakip kon unsay ipasabot sa tahas o titulo ug ang bisan unsang nabatonan nimong mga kasinatian dihang gituman Niya kana nga tahas diha sa imong kinabuhi.

Mobati og taas nga tinguha sa pagpangita og kalinaw kang Kristo

Kon naggamit og mga biswal nga tabang diha sa mga leksiyon nga gihisgotan sa mosunod nga parapo, ikonsiderar ang pagpakita niadtong mao gihapon nga biswal nga tabang aron matabangan ang mga estudyante sa paghinumdom niadto nga mga leksiyon. Imbes basahon ang parapo, ikonsiderar ang pagpangutana sa mga estudyante kon unsay ilang nahinumdoman sa milabay nga mga leksiyon.

Sa imong pagtuon sa Bag-ong Tugon, maingon og aduna kay mga oportunidad sa pagkat-on ug paghunahuna mahitungod sa kalinaw nga moabot gikan ni Jesukristo. Sama pananglit, tingale mahinumdoman nimo ang pagdapit sa Manluluwas ngari kanato sa pagduol ngadto Kaniya kon mibati kini nga nabug-atan (tan-awa sa Mateo 11:28–30) o ang paglakaw ni Jesus ibabaw sa tubig ug pag-alsa kang Pedro sa dihang nagsugod na siya pagkaunlod (tan-awa sa Mateo 14:26–33). Malagmit aduna kay kahigayonan sa pagdrowing og hulagway diha sa imong journal sa pagtuon isip kabahin niini nga leksiyon sa Marcos 4:35–41 nga gihisgotan ang bahin sa pagkalma ni Jesukristo sa bagyo sa Dagat sa Galilea. Kon aduna kay mga mugbong sinulat sa imong journal sa pagtuon gikan niini nga mga leksiyon, ikonsiderar ang pagrebyo niini.

Pamalandongi ug tubaga ang mosunod nga mga pangutana diha sa imong journal sa pagtuon aron imong masubay ang imong espirituhanong paglambo.

• Sa unsang paagi nausab ang imong mga tinguha sa pagpangita og kalinaw diha ni Kristo samtang natun-an nimo ang Iyang kinabuhi ug pagpangalagad?

• Nabatyagan ba nimo ang pagtaas o pagminos sa kalinaw ni Kristo sa milabay nga mga semana? Kon mao, unsa kaha ang hinungdan niini nga kausaban?

• Ngano kaha nga si Jesukristo mao man ang tinubdan sa kalinaw?

• Ngano kaha nga ang Manluluwas gusto nga mahatagan ka sa Iyang kalinaw?

Dapita ang andam nga mga estudyante sa pagpaambit sa pipila sa ilang mga hunahuna, mga impresyon, o mga pangutana. Tugoti ang mga estudyante nga “prangka [mahitungod sa ilang] mga pangutana sigon sa gikinahanglan [nila]” samtang nag-awhag usab kanila nga dili “itugot nga kini nga mga problema mobabag sa pagtuo nga mohimo og milagro” (Jeffrey R. Holland, “Nagatuo Ako,” Liahona, Mayo 2013, 94).

Ikonsiderar ang paghatag og pagpamatuod kon sa unsang paagi ang pagtuon sa kinabuhi ug pagtulon-an ni Jesukristo sa Bag-ong Tugon makadugang sa hugot nga pagtuo. Makatabang tingale ang pagpaambit og usa ka personal nga sugilanon ug pagpamatuod.