Mateo 19:16–30; Marcos 10:17–31

“Unsa Pa may Kinahanglan Kong Buhaton?” (Mateo 19:20)

Lawyer asks Jesus what he should do to inherit eternal life. Outtakes include the desert landscape, Jesus with the two men/lawyers with his disciples and followers in the background, and some of the images from “Christ and the Rich Young Ruler.”

Usa ka batan-ong lalaki nga dato kaayo nangutana kang Jesus kon unsa ang gikinahanglan diha niya aron makabaton og kinabuhing dayon. Mahigugmaong gidapit ni Jesus ang batan-ong lalaki sa pagbaligya sa tanan niyang katigayonan ug mosunod Kaniya. Kini nga leksiyon mahimong magdasig kanimo sa pagkat-on gikan sa Manluluwas kon unsa ang Iyang ipabuhat nimo aron mas makasunod Kaniya.

Pagpahiangay sa konsepto sa leksiyon. Ang mga ideya sa pagtudlo nga anaa niini nga manwal kinahanglan nga ipahiangay aron mas labing makab-ot ang mga panginahanglan sa estudyante. Sigon sa iaghat sa Espiritu Santo, paggamit og personal nga kasinatian ug mga ideya ug pagmailin-ilinon samtang nagpahiangay sa materyal sa leksiyon.

Pagpangandam sa estudyante: Awhaga ang mga estudyante sa paghinumdom sa panahon diin sila nagmapasalamaton nga gikorehian sa uban. Sa unsang paagi ang pagtabang kanato nga makakita kon asa kita pweding molambo mahimo nga usa ka timailhan sa gugma?

Posible nga mga Kalihokan sa Pagkat-on

Tambag kon unsaon pagpalambo

Ikonsiderar ang pagmodelo sa mosunod nga kalihokan pinaagi sa pagpaambit og personal nga sanglitanan gamit ang mosunod nga mga pangutana. Dayon dapita ang mga estudyante nga buhaton ang susamang butang uban sa kapares.

Pagpili og butang nga ganahan nimong buhaton ug butang nga ikaw hanas (pananglitan, usa ka sport, usa ka musikal nga instrumento, usa ka kalingawan nga buhaton [hobby], usa ka hilisgotan sa klase, o trabaho). Dayon sa matinuorong paagi timbang-timbanga ang imong mga abilidad sa maong kalihokan ug ang imong tinguha sa paglambo pinaagi sa pagtubag sa mga pangutana sama sa mosunod:

Unsa ang imong mga kalig-on? Unsa ang imong mga kahuyang?
Kon papilion ka og ni bisan kinsa aron moobserbar kanimo ug dayon mohatag nimo og piho nga tambag kon unsaon sa paglambo, kinsa man kaha kini? Ngano man?

Dapita ang mga estudyante nga sundon ang sunod nga instruksiyon sa hilom nga paagi tungod sa personal nga matang niini.

Karon pangutan-a ang imong kaugalingon sa susamang mga pangutana, apan niining higayona maghunahuna sa imong espirituwal nga paglambo (pananglitan, mahimo nimong tutokan ang imong kahibalo sa ebanghelyo, imong pagkatakos, imong mga tinguha sa paglambo, o imong sama kang Kristo nga mga hiyas).

Aron sa pagdasig ug pagbayaw sa mga sakop sa klase, ikonsiderar nga tugotan ang mga estudyate og duha hangtod sa tulo ka minuto aron sa pagtino og espirituwal nga mga kalig-on o sa susama kang Kristo nga mga hiyas nga ilang nakita diha sa ubang mga sakop sa klase. Tutoki ang pipila nga nagkinahanglan og pagdayeg ilabi na kadtong diyotay ra og ideya sa ilang kaugalingon.

Diha sa Bag-ong Tugon, nakat-on kita mahitungod sa batan-ong lalaki kinsa nakahukom nga mangayo og tambag gikan sa Manluluwas. Basaha ang Mateo 19:16–19 aron mahibaloan ang pangutana sa maong batan-ong lalaki ug giunsa sa Manluluwas sa pagtubag kaniya sa sinugdanan.

Sa imong hunahuna sa unsang paagi kaha ang tubag sa Manluluwas ngadto sa batan-ong lalaki magamit usab sa atong kinabuhi?
Unsay imong nakat-onan mahitungod ni Jesukristo gikan sa Iyang tubag?

Basaha ug ikonsiderar ang pagmarka sa pangutana sa batan-ong lalaki nga narekord diha sa Mateo 19:20 . Ikonsiderar ang pagsulat og usab sa iyang pangutana diha sa imong kasulatan gamit ang imong kaugalingong mga pulong.

Si Presidente Harold B. Lee (1899–1973) nagtudlo:

Ang matag usa kanato, kon [buot nga] moab[o]t kita sa kahingpitan, kinahanglan gay[o]d nga sa usa ka higayon mangutana sa atong mga kaugalingon, “[Unsa pa may kinahanglan kong buhaton]?”

(Mga Pagtul[o]n-an sa mga Presidente sa Simbahan: Harold B. Lee [2000], 242)

Sa unsang paagi ang pagpangutana niini makatabang nga kita mas makasunod ni Jesukristo?
Sa unsang paagi maapektohan ang atong mga paningkamot sa pagsunod sa Manluluwas kon dili nato kini ipangutana?
Nganong ang Langitnong Amahan ug si Jesukristo mao man ang labing haom nga makatabang kanimo sa pagkat-on sa unsay angay nimong usbon?

Ang Ebanghelyo ni Marcos nagdugang og pipila ka mahinungdanong detalye mahitungod kang Jesukristo dinhi niini nga asoy. Basaha ang Marcos 10:21 , nga mangita og ebidensya sa mosunod nga kamatuoran: Tungod kay gihigugma kita ni Jesukristo, Iya kitang tabangan nga mahibalo kon unsay kulang sa atong mga paningkamot sa pagsunod Kaniya.

Hibaloi nga ang Marcos 10:21 wala maghisgot nga ang Manluluwas bokal nga nagpahayag sa iyang gugma. Apan gisulat ni Marcos nga “Si Jesus nga nagtan-aw kaniya nahigugma kaniya.” Paggahin og gutlo aron sa pagpamalandong unsa ang pagtan-aw ni Jesukristo kanimo ug sa gugma nga Iyang gibati alang kanimo.

Ikonsiderar nga ipakita ang una sa mosunod nga mga pangutana ug sa pagtugot nga mahatagan ang mga estudyante og panahon sa pagpamalandong niini sa dili pa motubag.

Nganong mahinungdanon man ang pagkahibalo nga si Jesukristo nahigugma niadtong mga moduol Kaniya aron makorehian?
Sa unsang paagi ang mga pagdapit sa Manluluwas sa paglambo usa ka timailhan sa Iyang gugma?
Unsa ang gitudlo sa Ether 12:27 mahitungod sa kon sa unsang paagi ang Ginoo makatabang kanimo?

Basaha ang Marcos 10:22 aron makita kon unsa ang gipili nga buhaton sa batan-ong lalaki.

Si Elder Bruce R. McConkie (1915–1985) sa Korum sa Napulog Duha ka Apostoles mipasabot og pipila ka posibleng mga sangpotanan sa gihimong desisyon sa batan-ong lalaki.

Gibilin ngari kanato ang paghunahuna unsa kaha unta nga mga pagkasuod ang giambitan sa [dato nga batan-on] uban sa Anak sa Dios, unsa kaha unta nga pakigdait ang iyang natagamtam uban sa mga apostol, unsa kaha unta nga mga pagpadayag ug mga panan-awon ang iyang nadawat kon siya nakahimo pa sa pagsunod sa balaod sa celestial nga gingharian. Sama sa gihapon, siya nagpabiling wala mailhi; nga unta, ang iyang ngalan nahimong dungganon nga handumanan taliwala sa mga santos sa kahangtoran.

(Bruce R. McConkie, “Obedience, Consecration, and Sacrifice,” Ensign, Mayo 1975, 51)

Pangita og paagi nga matugotan ang mga estudyante sa pagtubag sa mosunod nga pangutana. Mahimo nilang tubagon pinaagi sa pagdrama-drama o pinaagi sa pagsulat diha sa ilang mga journal sa pagtuon. Ang paghatag og mga higayon sa mga estudyante sa pagpasabot nganong kinahanglan kita nga mosunod sa Manluluwas makatabang sa pagpalawom sa ilang pagkadisipulo.

Kon mahimo nimong ibalik ang panahon aron makigsulti niini nga batan-ong lalaki sa wala pa siya makadesisyon nga mopalayo gikan sa pagdapit sa Manluluwas, unsa man ang imong isulti kaniya?

Andam ka bang mangutana ug motuman?

Ipiyong ang imong mga mata ug sulayi sa paghanduraw nga ang Manunubos nagtan-aw kanimo uban sa susamang paghigugma sa batan-ong lalaki dinhi niini nga asoy.

Si Elder Larry R. Lawrence sa Seventy mitanyag sa mosunod nga pagdapit ug pagsaad.

Mosugyot ko nga matag usa ninyo moapil unya sa espirituhanong buhat, bisan gani karong gabii samtang mag-ampo mo. Mapaubsanong mangutana sa Ginoo sa mosunod nga pangutana: “Unsay nakapugong sa akong pag-uswag?” Sa laing pagkasulti: “Unsa pa may akong kulang?” Dayon hil[o]m nga maghulat sa tubag. Kon sinsero kamo, ang tubag magkaanam kaklaro. Pagpadayag kini nga alang ra gay[o]d kaninyo.

(Larry R. Lawrence, “Unsa Pa May Akong Kulang?” Liahona, Nob. 2015, 35)

Unsa kaha sa imong tan-aw ang mahimong epekto sa pagdawat sa sugyot ni Elder Lawrence diha sa imong kinabuhi? Unsa kaha ang epekto kon wala kini nimo dawata?
Unsay epekto sa kahibalo nga nahigugma si Kristo nimo sa imong kaandam sa pagpangutana niini?

Lagmit nga makabenepisyo ang mga estudyante gikan sa pagkompleto sa mosunod diha sa ilang mga journal sa pagtuon.

Gahini og pipila ka gutlo karon aron sa pagpangutana sa Dios unsa kaha ang Iyang gusto nga imong bag-ohon sa imong kinabuhi. Mahimo nga usa kini ka butang nga angay nimong undangon, sugdan sa paghimo o buhaton sa lahi nga paagi. Dayon pamalandongi ang imong kinabuhi ug isulat ang mga hunahuna ug impresyon nga moabot kanimo. (Kon ang imong tubag dili dayon moabot, padayona ang pagpangutana uban sa determinasyon sa pagtuman sa tubag kon imo na kining madawat. Ang Ginoo motubag sa hustong panahon ug sa labing maayo nga paagi alang kanimo.)

Pagpaambit og personal nga kasinatian, o pagdapit og mga estudyante nga mopaambit mahitungod sa panahon diin sila nagmapasalamaton sa mapinanggaong pagkorehir sa ilang kinabuhi. Ikonsiderar ang pagtino og mga paagi nga ang pagkorehir gikan sa Dios mahimong moabot (pinaagi sa usa ka sakop sa pamilya, pinaagi sa lider sa Simbahan, pinaagi sa pagbasa sa kasulatan, pinaagi sa mga pag-aghat sa Espiritu Santo, ug uban pa).

Komentaryo ug Background nga Impormasyon

Sa unsang paagi nga ang mga pagdapit sa Manunubos sa paghinulsol usa ka timailhan sa Iyang gugma?

Si Elder S. Mark Palmer sa Seventy nagtudlo:

Kon mapainubsanon kita, atong hang[o]pon ang imbitasyon sa Ginoo sa paghinulsol, pagsakripisyo, ug magsilbing ebidensya sa Iyang hingpit nga gugma alang nato. Total, ang imbitasyon sa paghinulsol usa man usab ka imbitasyon sa pagdawat sa maanindot nga gasa sa kapasayloan ug kalinaw.

(S. Mark Palmer, “Ug si Jesus, sa Nagsud-ong Siya Kaniya, Nahigugma Kaniya,” Liahona, Mayo 2017, 116)

Maayo ba ang magpadayon og kabalaka mahitungod sa atong mga kakulangan?

Si Elder Dale G. Renlund sa Korum sa Napulog Duha ka mga Apostoles miingon:

Igo ba ang akong nabuhat? Unsa pa ang angay nakong buhaton? Ang aks[i]yon nga atong himoon agig tubag niini nga mga pangutana importante sa atong kalipay niini nga kinabuhi ug sa kahangt[o]ran. …

Apan sa samang higayon, ang atong Langitnong Amahan ug si Jesukristo dili gusto nga kita maparalisa pinaagi sa padayon nga walay kasiguroan atol sa atong mortal nga panaw, maghunahuna kon kita ba nakahimo og igo aron maluwas ug mahimaya.

(Dale G. Renlund, “Pagbuhat sa Kaangayan, Pagpakita sa Makanunayong Gugma, ug Pagkinabuhi diha sa Mapaubsanong Pakig-uban sa Dios,” Liahona, Nob. 2020, 111)

Marcos 10:25 . Unsa ang gipasabot sa “usa ka kamelyo nga [molusot] pinaagi sa mata sa dagom”?

Adunay pipila nga miingon nga ang mata sa dag[o]m mao ang usa ka gamay nga pultahan diha sa paril sa siyudad sa Jerusalem, nga nagkinahanglan sa usa ka kamelyo nga kuhaan sa gipas-an niini aron makasulod. Walay ebidens[i]ya nga adunay sama niana nga pultahan. Ang uban misugyot nga ang pag-usab sa usa ka letra sa Gresyanhon nga teksto mousab sa kasulatan aron masab[o]t nga usa ka pisi, dili usa ka kamelyo, ang kinahanglan nga molusot sa mata sa dag[o]m. Hinoon, sa dihang si Jesukristo mihisg[o]t sa usa ka kamelyo nga molusot sa mata sa dag[o]m, kadto tingali usa ka ehemplo sa pasulabi, tinuyo nga pagpasobra aron sa pagtudlo “nga igakalis[o]d unya sa usa ka datu ang pagsulod sa gingharian sa langit” ( Mateo 19:23).

(Manwal sa Estudyante sa Bag-ong Tugon [Manwal sa Sistema sa Edukasyon alang sa Magtutuon sa Bag-ong Tugon, 2014], 63)

Marcos 10:23–27 . Lisod o imposible ba sa usa ka dato nga tawo ang pagsulod sa langit?

Ang Hubad ni Joseph Smith sa Marcos 10:27 mabasa nga, “Sa mga tawo, nga nagsalig sa katigayonan, dili gayod kini mahimo; apan dili imposible diha sa mga tawo nga nagasalig sa Dios ug misalikway sa tanan alang kanako, kay sa ingon tanan kini nga butang mahimo” (Joseph Smith Translation Marcos 10:26).

Dugang nga mga Kalihokan sa Pagkat-on

//media.ldscdn.org/webvtt/general-conference/october-2015-general-conference/2015-10-1050-elder-larry-r-lawrence-eng.vtt

Ang maniningil sa buhis ug ang Pariseo

Awhaga ang mga estudyante sa pagkompara sa kinaiya sa pag-ampo sa duha ka tawo nga gihulagway sa Lucas 18:9–14 ug paghisgot sa mga pangutana sama sa mosunod:

Sa unsang paagi ang atong kinaiya makaapekto sa atong mga tinguha sa pagpangita og tambag ug pagkorehir?
Sa unsang paagi kini makaapekto sa atong kaandam sa pagdawat ug paglihok sa tambag gikan sa Ginoo, sa mga lider sa Iyang Simbahan, sa atong mga ginikanan, ug sa uban?

Aron makadawat og kinabuhing dayon, kinahanglang andam kita nga motugyan sa bisan unsa nga gikinahanglan sa Ginoo kanato

Ikompara ang reaksyon sa batan-ong lalaki sa Marcos 10:21–22 ngadto sa uban kinsa gihangyo sa pagbuhat og susamang sakripisyo. Ang pipila ka sanglitanan naglakip kang Lehi (tan-awa sa 1 Nephi 2:2–4); Pedro, Santiago, Juan, ug Andres (tan-awa sa Mateo 4:18–22); Mateo, kinsa gitawag usab og Levi (tan-awa sa Lucas 5:27–29); Moises (tan-awa sa Mga Hebreo 11:24–27); ug sa matinud-anong katawhan sa atong panahon.

Sa unsang mga paagi gituman sa Manluluwas ang Iyang gisaad nga narekord sa Mateo 19:29 ngadto sa mga andam mosakripisyo sa tanan Niyang gipabuhat kanila?