Toe Iloiloga o le Atamai Faapitoa i Aoaoga Faavae 8

Tauloto Mau Faasino ma Fasifuaitau o Mau Autu

O le manatuaina o fuaitau o tusitusiga paia atoa ma upumoni o loo aoaoina mai ai e mafai ona fesoasoani ia te oe i le tele o auala. I le faagasologa o le tausaga, o le a uunaia oe e tauloto mau faasino ma fasifuaitau o mau autu mo fuaitau taitasi o atamai faapitoa i aoaoga faavae e 24 o le Feagaiga Fou. Ua faamoemoeina lenei lesona e fesoasoani ia te oe e tauloto ni nai mau faasino ma fasifuaitau o mau autu mai fuaitau muamua e 11 o atamai faapitoa i aoaoga faavae i le Feagaiga Fou.

Sauniuniga a le tagata aoga: Valaaulia tagata aoga e aumai kopi o mekasini tuai o le Ekalesia e mafai ona latou tipitipi ma fai se fausaga vaaia mo le taulotoina o fuaitau o atamai faapitoa i aoaoga faavae.

Gaoioiga e Ono Mafai Ona Aoao Ai

E ono manaomia ona aoaoina se lesona tau fuaitau o atamai i aoaoga faavae e suitulaga ai i lenei lesona toe iloilo. Feutaga’i ma le kalena faasolosolo o lesona ua saunia e le taitai faatonu po o le taitai faamaopoopo o le eria po o le lisone e faamautinoa ai o le a aoaoina lesona taitasi tau fuaitau o atamai i aoaoga faavae a o faagasolo ai seminare.

Mo gaoioiga o lenei lesona, aumai mea nei i le vasega: o ni kopi o mekasini lolomi tuai a le Ekalesia, ni seleulu, o se fagu kelu, pepa lanu, peni makamea, ma penivali. E mafai ona faaaoga e tagata aoga a latou lava masini faaneionapo e sue ai le potutusi i luga o le upega tafailagi a le Ekalesia mo ata faatusa po o ata patino.

O le faaaogaina o meafaitino vaaia e fesoasoani i le taulotoina

Mafaufau e faaaoga se lesona faatino ina ia fesoasoani e faaali atu ai le aoga o meafaitino vaaia e fesoasoani ai mo le taulotoina.

O se tasi auala e mafai ona faatino ai o le faamatala o se faataitaiga pe lisiina se vasega o mea faitino ona fesili lea i tagata aoga e toe fai mai mea sa faamatala atu ai. Ona faaaoga ai lea o se meafaitino vaaia, e pei o se ata po o se tusi ata, e faamatala ai se isi faataitaiga pe lisiina o se isi vasega o meafaitino, ona fai atu lea i tagata aoga e toe faaupuina mai auiliiliga sa tuuina atu. Fesili i tagata aoga po o le fea o nei auala e lua sa sili ona faafaigofie ona latou manatuaina ai o faamatalaga auiliili.

O le taulotoina o fuaitau o mau o le atamai i aoaoga faavae e mafai ona fesoasoani ia te oe e manatua ai fetalaiga a le Faaola ma toe manatua ai i taimi o manaomia ai. E tele ni faiga eseese e mafai ona e faaaoga e fesoasoani ia te oe e taulotoina ai tusitusiga paia. O lenei lesona o le a taulai atu i le faaaogaina o meafaitino vaaia e fesoasoani e faamausali ai lou taulotoina o fasifuaitau o mau autu patino mai fuaitau o atamai faapitoa i aoaoga faavae o le Feagaiga Fou.

O loo ua tuuina atu i lalo se lisi o uluai fuaitau o mau o le atamai i aoaoga faavae e 11 o le Feagaiga Fou. Mafaufau e faailoga nei fuaiupu faatasi ai ma o latou fasifuaitau o mau autu pe a faapea e lei maea ona e faia.

Mau Faasino o Tusitusiga Paia	Fasifuaitau o Mau Autu o Tusitusiga Paia
Luka 2:10–12	“Aua o le aso nei ua fanau ai i le aai o Tavita, lo outou Faaola, o le Alii o Keriso.”
Ioane 3:5	“Afai e le fanau se tasi i le vai ma le Agaga, e le mafai ona sao o ia i le malo o le Atua.”
Ioane 3:16	“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.”
Mataio 5:14–16	“Ia faapea ona pupula atu lo outou malamalama i luma o tagata.”
Mataio 11:28-30	“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
Mataio 16:15–19	Na fetalai Iesu, “Ou te avatu foi ia te oe ki o le malo o le lagi.”
Ioane 7:17	“Ai se tasi e fia fai lona finagalo, e iloa ai e ia le mataupu.”
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Ioane 17:3	“O le ola e faavavau foi lenei, ia latou iloa oe le Atua moni e toatasi, ma Iesu Keriso.”
Luka 24:36–39	“Aua o le agaga e leai sona aano ma ni ivi, pei o a’u nei ua outou vaavaai i ai.”

Fatuina o se mea vaaia

E fuafua i le toatele o le vasega, o le gaoioiga lenei e mafai ona fai taitoatasi, taitoalua, po o ni vaega laiti. Afai e mafai, aumai ni kopi o mekasini tuai a le Ekalesia i le vasega e faaaoga e tagata aoga. Afai e le o avanoa ni ata lolomi, fai atu i tagata aoga e tusi a latou lava ata i ni fasi pepa. Mafaufau pe fatu faatasi se ata vaaia faatasi ma tagata aoga. Valaaulia tagata aoga e faasoa atu a latou ata vaaia i le faaiuga o lenei gaoioiga.

Saili pe tusi ni ata e mafai ona fesoasoani ia te oe e manatua ai le mau faasino o tusitusiga paia ma le fasifuaitau o mau autu o tusitusiga paia mai se tasi o fuaitau muamua e 11 o atamai faapitoa i aoaoga faavae a le Feagaiga Fou. O lau foafoaga e mafai ona aofia ai se ata e tasi pe lua e fesoasoani ia te oe e manatua ai se fasifuaitau o mau autu o tusitusiga paia atoa, pe mafai ona aofia ai ata eseese mo upu taitasi i le fasifuaitau mau autu o tusitusiga paia. A o e galue i lau foafoaga, mafaufau pe faapefea ona faatatau lenei fuaitau o loo e taulai i ai ia Iesu Keriso ma Lana talalelei.

A uma ona faia e tagata aoga lea vaega, valaaulia i latou e faasoa mai a latou foafoaga i le vasega.

Afai e lava le taimi, e mafai ona tapena e tagata aoga se lesona puupuu e uiga i le fuaitau ua latou filifilia e mafai ona faaaoga i se afiafi faaleaiga po o se suesuega o tusitusiga paia faaleaiga. Valaaulia tagata aoga e saili se auala e faaaoga ai se mea vaaia sa latou foafoaina o se vaega o la latou lesona. E mafai ona taitai e nei fesili tagata aoga a o latou tapenaina a latou lesona:

O le a se fesoasoani ia te oe o lenei fuaitau o tusitusiga paia i le malamalama e uiga ia Iesu Keriso ma Lana talalelei?
E mafai faapefea ona faaaafia e upumoni mai lenei fuaitau o tusitusiga paia lou olaga?
O a aafiaga na e maua e faatatau i upumoni o loo aoao i lenei fuaitau o tusitusiga paia?

Mafaufau e uunaia tagata aoga e faataitai le taulotoina o mau faasino ma fasifuaitau o mau autu o tusitusiga paia ia i latou lava. Atonu e manatu i latou e filifilia nisi o fuaitau atoatoa e tauloto.