Iloilo Lou Aoaoina 4

Mataio 14-20; Mareko 6-10; Luka 10; 12; 14–18; Ioane 5–11

O lenei lesona ua faamoemoe e fesoasoani ia te oe e iloilo ai sini na e faatuina ma le aoaoina atoa ai ma lou tuputupu ae o oe lava ia na e mauaina mai i lau suesuega o le Feagaiga Fou.

Tatalo mo tagata aoga. Ina ia taulai atu atili i tagata aoga taitasi, tatalo mo i latou e ala i le tauina o o latou igoa. Talosaga mo le fesoasoani a le Tama Faalelagi ina ia malamalama ai i manaoga o tagata aoga ma le iloaina ai po o a fuafuaga faalefaiaoga e faaaoga ina ia fesoasoani e ausia ai na manaoga. Faalogo mo musumusuga e uiga i le auala e fesoasoani ai i tagata aoga taitoatasi.

Sauniuniga a le tagata aoga: Valaaulia tagata aoga e toe tomanatu i le tuputupu ae faaleagaga sa latou mauaina i a latou suesuega o le Feagaiga Fou. O fesoasoani la latou suesuega o le Feagaiga Fou ia latou iloa, alofa, ma auauna atu i le Tama Faalelagi ma Iesu Keriso? O a ni aafiaga anoa na latou maua?

Gaoioiga e Ono Mafai ona Aoao Ai

Ua faamoemoeina lenei lesona e fesoasoani i tagata aoga e iloilo sini na latou faatuina, o lo latou gafatia e faamatala aoaoga i le Feagaiga Fou, ma pe e faapefea e o latou uiga, manaoga, ma gafatia e ola i le talalelei ona suia. O le suesuega a le vasega i le Mataio 14-20; Mareko 6-10; Luka 10; 12; 14–18; ma Ioane 5–11 sa ono faamamafaina isi upumoni nai lo upumoni i nei gaoioiga o loo mulimuli mai. Afai o lea, e mafai ona fetuunai gaoioiga e faaaofia ai na upumoni.

O mai ia Iesu Keriso ma avea ma Ona soo

Faaalu sina taimi e mafaufau loloto ai po o faapefea ona e tuputupu ae o se soo o Iesu Keriso ma sailia e alu atu ia te Ia ma le atoatoa a o e suesue i le Feagaiga Fou. O nisi auala ua uunaia ai oe e faia o lea o loo maua i lou gafatia ona maua ma mulimuli i faaaliga faaletagata lava ia ma faamatala atu nisi o matafaioi ma faalagiga eseese o Iesu Keriso ma i au taumafaiga e saili le filemu i lenei olaga e ala ia Iesu Keriso. Saili e iloa mai lou Tama i le Lagi pe faapefea ona e tuputupu ae ma atiina ae i nei auala faapea foi ma soo se faiga e tatau ona e faaauau pea ona fai pe fetuunai ina ia faaauau ona faalolotoina ai pea lou avea ma soo o Iesu Keriso.

Faateleina lou agavaa e maua faaaliga

Amata le vasega i le taina lemu o se pese masani. E tatau ona lava le filemu e tusa lava pe fai sina pisapisao laiitiiti o tagata aoga, ae le mafai e i latou e nonofo latalata i le puna o le leo ona lagona le musika. Fesili i tagata aoga e faailoa le pese o loo taina.

Faaalu se minute e faalogo ai i leo o loo siomia ai oe.

O a leo e mafai ona e lagonaina pe a tau lava o le faalogo ma le faaeteete?
O le a se mea e mafai ona fai pe afai e te faalogo i se mea e matua leo lemu ae e te fia iloa po o le a lena mea?

Atonu e tali atu tagata aoga e tatau ona latou faalatalata atili i le puna o le leo, taumafai e matuai filemu ma aua le pisa, taulai o latou manatu i le faalologo, pe tineia ese o leo faapisapisao. Mafaufau e tusi tali a tagata aoga i le laupapa ma fesili i tagata aoga e faaaoga na metotia e taumafai ai ina ia faailoa le pese o loo taina.

E faapefea ona tutusa lenei gaoioiga ma le mauaina o se faaaliga mai le Agaga Paia?

O se faamoemoega taua i le seminare le fesoasoani ia te oe ia faateleina lou mafai e maua faaaliga faaletagata lava ia mai le Agaga Paia.

Mafaufau i manaoga o tagata aoga ma pe o le a aoga faamatalaga i nei parakalafa ia i latou.

I le Tusi a Mamona, sa faamatala e Nifae le Agaga Paia e pei o se “leo filemu ma itiiti” lea e sili ona tatou lagonaina nai lo le faalogoina ( 1 Nifae 17:45). E mafai ona tatou faaleleia o tatou agavaa e faalogo pe lagona ai le Agaga Paia i o tatou loto i auala talitutusa na tatou te faaaogaina e faalogo ai i se leo lemu. O le faalatalata atili faaleagaga i le Atua, o le faafilemu i o tatou mafaufau, o le taulai atu o o tatou manatu, ma le polokaina o le pisapisao i tua o auala aoga uma ia e faateleina ai lo tatou agavaa e iloa musumusuga o le Agaga Paia.

Faaalu sina taimi e mafaufau loloto ai i aafiaga talu ai nei sa e maua ai faaaliga faaletagata lava ia mai le Agaga Paia. E te ono iloiloa au faamatalaga sa e tusia i au tusitusiga paia po o lau api faamaumau suesuega. E te ono talosaga foi i le Tama Faalelagi e fesoasoani ia te oe ia iloa pe manatua le faaaliga faaletagata lava ia sa e mauaina. Ona faamaumau lea o manatu ma faalogona e oo i lou mafaufau ma le loto.

O a aafiaga na oo mai ia te oe talu ai nei i le mauaina o faaaliga faaletagata lava ia? Sa faapefea ona e iloa o nei aafiaga e mai le Atua?
O a mea ua e aoao i lau suesuega i le Feagaiga Fou e mafai ona fesoasoani ia te oe ina ia iloa ai le Agaga Paia?
O a malamalamaaga e mafai ona e faasoa i se tasi o loo tauivi ina ia iloa le Agaga?

O se tasi matafaioi autu o le Agaga Paia o le molimau lea e uiga i le Tama ma le Alo (tagai i Mataio 16:17 ; Ioane 15:26 ; 3 Nifae 11:32).

O le a se mea ua fesoasoani le Agaga ia te oe e te malamalama ai pe lagona e uiga i le Tama Faalelagi ma Iesu Keriso?
E avea faapefea le meaalofa o le Agaga Paia ma le avanoa mo le mauaina o faaaliga faaletagata lava ia ma faamaoniga o le alofa o le Atua ia te oe?

Uunaia tagata aoga e faaauau ona saili faaaliga faaletagata lava ia e tusa pe lagona e faigata ona iloa musumusuga mai le Agaga Paia.

Faamatala matafaioi ma faalagiga o Iesu Keriso

Faaali ata nei o le falaoa ma le mamoe. Fesili i tagata aoga pe mafai ona latou faamatala pe faapefea ona faaaoga e le Faaola nei faailoga e aoao atu ai e uiga ia te Ia lava.

Photographic illustration of Jesus Christ holding a white lamb in his arms.

E faapefea ona faaaoga e le Faaola le falaoa ma le mamoe e aoao atu ai e uiga ia te Ia lava?

E te ono toe manatua sa aoao atu e le Faaola faatusatusaga e pei o le “O a’u nei o le areto o le ola” (tagai i le Ioane 6:35, 41, 48, 51), “O a’u le leoleo mamoe lelei” ( Ioane 10:11) ma “O a’u nei o le toe tu, ma le ola” ( Ioane 11:25).

O a ni mea ua aoao mai e nei faalagiga ia te oe e faatatau i le uiga o le Faaola ma matafaioi e mafai ona Ia faatinoina i lou olaga?
E faapefea ona fesoasoani le malamalama i Lona uiga ma matafaioi ia te oe e alofa atili ai ia te Ia?

A o e suesue i le Feagaiga Fou, atonu ua tausi sau lisi i lau api talaaga mo suesuega i matafaioi ma faalagiga o Iesu Keriso. Afai ua ia te oe lenei lisi, faaalu ni nai minute e iloilo ai. Faaaopoopo nisi faalagiga ma matafaioi atonu sa e misia. Afai e te lei amataina lena lisi, atonu e te manao e amata loa i le taimi lenei, ma lisiina soo se matafaioi ma faalagiga e mafai ona e mafaufau i ai. Afai e le mafai ona e mafaufau i ai, mafaufau e iloilo le “ O le Keriso Soifua: O le Molimau a Le Au Aposetolo ” (ChurchofJesusChrist.org) po o “Iesu Keriso” i le Taiala mo Tusitusiga Paia po o le Taiala Autu mo ni manatu.

Atonu o le a fiafia tagata aoga e faia lenei gaoioiga i ni paga po o ni vaega laiti. Valaaulia tagata aoga e faasoa i le vasega mea na latou faia.

Tusi se kata e momoli atu ai lau faafetai i le Faaola, ma taulai i se tasi pe sili atu o Ana matafaioi po o faalagiga. Faaaofia ai soo se aafiaga sa e iloa na faataunuuina ai e Ia lena matafaioi i lou olaga, ma faaali atu ai lou agaga faafetai.

Afai e fai e tagata aoga se faaputuga o ata i le lesona talu ai, mafaufau pe pasi le gaoioiga o le a sosoo ai.

Fai se mea vaaia e faamatala atu ai matafaioi ma faalagiga o le Faaola. Faaaofia ai mau o tusitusiga paia talafeagai ma pe aisea e anoa ai nei matafaioi ma faalagiga ia te oe. Mafaufau e faasoa atu i luga o fesootaiga i upega tafailagi pe a maea.
Fai se tautalaga puupuu po o se lesona laiitiiti e uiga i se tasi pe sili atu o matafaioi po o faalagiga o le Faaola e mafai ona e aoao atu i se faigalotu o le seminare, po o se lesona i le afiafi faaleaiga, po o se vasega o le lotu. Faaaofia ai po o le a le uiga o le matafaioi po o le faalagiga ma soo se aafiaga sa tupu ia te oe ina ua Ia faataunuuina lena matafaioi i lou olaga.

Lagona le manao faateleina e saili le filemu ia Keriso

Afai na faaaogaina mea vaaia fesoasoani i lesona o loo faasino i nei parakalafa, mafaufau e faaali ia lava mea vaaia e fesoasoani i tagata aoga e manatua na lesona. Nai lo le faitauina o le parakalafa, mafaufau e fesili i tagata aoga po o a mea latou te manatua mai na lesona.

I lau suesuega o le Feagaiga Fou, atonu sa i ai ni ou avanoa e aoao ma mafaufau ai e uiga i le filemu e mafai ona oo mai ia Iesu Keriso. Mo se faataitaiga, atonu ua e manatua le valaaulia a le Faaola e o atu ia te Ia pe a tatou mafatia i avega (tagai i le Mataio 11:28–30) pe o le savali o Iesu i luga o le vai ma fesoasoani e siiae Peteru ina ua amata ona goto o ia (tagai i le Mataio 14:26–33). Atonu sa e maua le avanoa e tusi ai se ata i lau api faamaumau suesuega o se vaega o le lesona i le Mareko 4:35–41 lea sa talanoaina ai le faafilemuina e Iesu Keriso o le matagi i le Sami o Kalilaia. Afai ua ia te oe ni faamatalaga i lau api faamaumau suesuega mai nei lesona, mafaufau e iloilo i ai.

Mafaufau loloto ma tali i nei fesili i lau api faamaumau suesuega ina ia mafai ona e maitauina lou alualu i luma faaleagaga.

Na faapefea ona suia ou manaoga e sailia le filemu ia Keriso a o e suesue i Lona soifuaga ma talaiga?
Na e lagona ea le faateleina po o le faaitiitia o le filemu ia Keriso i ni nai vaiaso ua mavae atu talu ai nei? Afai o lea, po o le a se mea na mafua ai lenei suiga?
Aisea e te manatu ai o Iesu Keriso o le puna o le filemu?
Aisea e te manatu ai e finagalo le Faaola e tuuina atu ia te oe Lona filemu?

Valaaulia tagata aoga e mananao e faasoa atu o latou manatu, faalogona, po o faafesili. Ia tuu atu i tagata aoga ia “faamaoni e uiga i [a latou] fesili e pei ona [latou] manaomia ai” a o uunaia foi i latou e aua ne’i “faatagaina na fesili e taofia ai le faatuatua mai le faia o ana vavega” (Jeffrey R. Holland, “Le Alii e, Ua Ou Faatuatua,” Ensign po o le Liahona, Me 2013, 94).

Mafaufau e molimau atu i le ala e faateleina ai le faatuatua e ala i le suesue i le soifuaga ma aoaoga a Iesu Keriso i le Feagaiga Fou. Atonu e fesoasoani le faasoa atu o se tala patino ma se molimau.