Mataio 19:16–30; Mareko 10:17–31

“Se A se Mea o Toe Ou Te Lei Faia?” (Mataio 19:20)

Lawyer asks Jesus what he should do to inherit eternal life. Outtakes include the desert landscape, Jesus with the two men/lawyers with his disciples and followers in the background, and some of the images from “Christ and the Rich Young Ruler.”

Sa fesili atu se alii talavou mauoa ia Iesu po o le a se mea e manaomia na te faia ina ia maua ai le ola e faavavau. Sa valaaulia ma le alofa e Iesu le alii talavou e faatau atu ana oa ma mulimuli atu ia te Ia. O lenei lesona o le a uunaia ai oe e aoao mai le Faaola mea e finagalo o Ia e te faia a o e saili e mulimuli atili ia te Ia.

Fetuunaiga faatatau o le anolesona. O manatu e aoaoina ai o loo maua i lenei tusi taiala e tatau ona fetuunai ina ia sili ona talafeagai ma manaoga o tagata aoga. Pe a uunaia ai e le Agaga Paia, faaaoga aafiaga ma manatu patino ia te oe ma ia anagofie a o fetuunai tatau anomea o le lesona.

Sauniuniga a le tagata aoga: Valaaulia tagata aoga e toe manatua se taimi na latou faafetai ai ina ua faasaoina e se tasi i latou. E mafai faapefea ona fesoasoani ia i tatou le iloa o se mea e mafai ona faaleleia ai i tatou e avea o se faailoga o le alofa?

Gaoioiga Ono Talafeagai mo Aoaoga

Fautuaga i ni auala e faaleleia ai

Mafaufau e faataitai le gaoioiga lenei e ala i le faasoa atu o se faataitaiga patino ia te oe e faaaoga ai fesili nei. Ona valaaulia lea o tagata aoga e faia foi faapea ma sana soa po o se paga.

Filifili se mea e te fiafia e fai ma e te agavaa lelei ai (mo se faataitaiga, o se taaloga, o se laau fai musika, o se mea e te fiafia e fai, o se mataupu i le aoga, po o se galuega). Ona iloilo lea ma le faamaoni o ou tomai i lena gaoioiga ma lou manao e faaleleia atili e ala i le taliina o fesili e pei o nei:

O a ou malosiaga? O a ou vaivaiga?
Afai e mafai ona e filifilia soo se tagata e mataituina oe ona tuuina atu lea ia te oe o fautuaga patino i ni auala e faaleleia atili ai lea tomai, o ai lena tagata? Aisea?

Valaaulia tagata aoga e mulimuli le leoa i le faatonuga e sosoo ai ona o lona natura patino ia te ia lava.

O lea, fesili ifo nei ia te oe lava i na lava fesili, ae o le taimi nei ia e manatunatu ai i lou lava alualu i luma faaleagaga (mo se faataitaiga, e mafai ona e taulai atu i lou malamalama i le talalelei, lou agavaa, ou manaoga mo le faaleleia atili, po o ou uiga faaKeriso).

Ina ia uunaia ma faagaeetia tagata o le vasega, mafaufau e tuu atu le lua i le tolu minute mo tagata aoga e faailoa mai ai malosiaga faaleagaga po o uiga faaKeriso o loo latou vaaia i isi tagata o le vasega. Ia taulai atu nisi o faaviivii tatau aemaise lava mo i latou atonu e manatu faatauvaa ia i latou lava.

I le Feagaiga Fou, ua tatou aoao ai e uiga i se alii talavou sa filifili e saili fautuaga mai le Faaola. Faitau le Mataio 19:16–19 ina ia aoao e uiga i le fesili a lenei alii talavou ma le auala na muai tali atu ai le Faaola ia te ia.

E te manatu e faapefea ona faatatau le tali a le Faaola i lenei alii talavou i o tatou olaga?
O a ni mea ua e aoao i ai e uiga ia Iesu Keriso ma Lana tali?

Faitau ma mafaufau e maka le fesili a le alii talavou lea o loo tusia i totonu o le Mataio 19:20 . Mafaufau e toe tusi lana fesili i au tusitusiga paia e faaaoga ai au lava upu.

Na aoao mai e Peresitene Harold B. Lee (1899-1973):

E tatau ia i tatou uma lava, pe afai tatou te mananao e taunuu i le tulaga o le atoatoa, ona fesili i se taimi i lenei fesili, “Se a se mea o toe ou te lei faia?”

(Aoaoga a Peresitene o le Ekalesia: Harold B. Lee [2000], 197)

E mafai faapefea e le faia o lenei fesili ona fesoasoani ia i tatou e mulimuli atili ai ia Iesu Keriso?
E faapefea ona aafia a tatou taumafaiga e mulimuli i le Faaola pe afai tatou te le tuuina atu lenei fesili?
Aisea e sili ai ona talafeagai lelei le Tama Faalelagi ma Iesu Keriso e fesoasoani ia te oe e aoao mea e tatau ona e suia?

Ua faaopoopo e le Evagelia a Mareko nisi o faamatalaga taua e uiga ia Iesu Keriso i lenei tala. Faitau le Mareko 10:21, saili mo faamaoniga o le upumoni lenei: Ona e alofa Iesu Keriso ia i tatou, o le a Ia fesoasoani mai ia tatou iloa mea tatou te le maua i a tatou taumafaiga e mulimuli ia te Ia.

Matau le Mareko 10:21 e le taua ai na faaleo e le Faaola Lona alofa. Peitai na tusia e Mareko e faapea “ua silasila atu Iesu ia te ia, ua alofa ia te ia.” Faaalu sina taimi e mafaufau loloto ai i le silasila a Iesu Keriso ia te oe ma le alofa o loo Ia lagonaina mo oe.

Mafaufau e faaali le fesili muamua o fesili nei ma tuu atu i tagata aoga se taimi e mafaufau loloto ai a o lei tali mai.

Aisea e taua ai le iloa e alofa Iesu Keriso ia i latou o e o mai ia te Ia mo le faasaoga?
E faapefea ona avea valaaulia a le Faaola ia faaleleia o se faailoga o Lona alofa?
O le a le mea o loo aoao mai e Eteru 12:27 e uiga i le auala e mafai ai e le Alii ona fesoasoani ia te oe?

Faitau le Mareko 10:22 e vaai po o le a le mea na filifili le alii talavou e fai.

Na faamatala mai e Elder Bruce R. McConkie (1915–1985) o le Korama a Aposetolo e Toasefululua ni taunuuga na ono mafai ona i ai o le filifiliga a le alii talavou.

Ua tuua i tatou e tau mafaufau po o a ni tulaga vavalalata [a le alii talavou mauoa] atonu na ia faasoa atu i le Alo o le Atua, pe o le a le faaaumeaga atonu na ia fiafia ai faatasi ma aposetolo, pe o a faaaliga ma vaaiga atonu na ia mauaina, pe afai na mafai e ia ona ola ai i le tulafono o se malo selesitila. E pei ona i ai, e tumau pea o ia e leai sona igoa; e pei ona sa ono i ai, semanu e manatua pea lona suafa i totonu o le au paia e faavavau.

(Bruce R. McConkie, “Obedience, Consecration, and Sacrifice,” Ensign, Me 1975, 51)

Saili ni auala e faataga ai tagata aoga uma e tali mai i le fesili lenei. E mafai ona latou tali atu e ala i le faatinoina o tala po o le tusitusi foi ia latou api faamaumau suesuega. O le tuuina atu o avanoa mo tagata aoga e faamatala ai pe aisea e tatau ai ona tatou mulimuli i le Faaola e mafai ona fesoasoani e faalolotoina lo latou lava avea ma soo.

Afai e mafai ona e toe foi i tua ma talanoa i lenei alii talavou a o lei filifili e savali ese mai le valaaulia a le Faaola, o le a sau tala e fai atu ia te ia?

Pe ua e naunau ea e fesili atu ma usitai?

Moeiini ou mata ma taumafai e vaai faalemafaufau o loo silasila mai le Faaola ia te oe i lena lava alofa e tasi sa ia te Ia mo le alii talavou i lenei tala.

Na tuuina mai e Elder Larry R. Lawrence o le Fitugafulu le valaaulia ma le folafolaga lenei.

Ou te fia fautuaina ia taitasi outou ma auai i se faatinoga faaleagaga i se taimi vave mai, atonu o nanei a o faia a outou tatalo. Ia fesili atu ma le agaga maualalo i le Alii le fesili lenei: “O le a le mea o loo taofia a’u mai le alualu i luma?” I nisi upu: “Se a se mea o toe ou te lei faia?” Ona faatalitali lea ma le filemu mo se tali. Afai e te faamaoni, o le a vave ona manino le tali. O le a avea ma faaaliga e faamoemoeina mo na o oe lava.

(Larry H. Lawrence, “Se A se Mea o toe Ou Te Lei Faia?” Ensign po o le Liahona, Nov. 2015, 35)

O le a sou manatu o le a se aafiaga o le taliaina o le fautuaga a Elder Lawrence i lou olaga? O le a se aafiaga e ono i ai i le le taliaina?
O le a se aafiaga o se malamalama i le alofa o Keriso mo oe i lou naunau e fai atu lenei fesili?

E ono aoga mo tagata aoga le tali o fesili nei i totonu o a latou api faamaumau suesuega.

Faaalu sina taimi i le taimi nei e fesili atu ai i le Atua po o le a se mea e finagalo o Ia e te suia i lou olaga. Atonu o se mea e tatau ona e taofi le faia, amata ona fai, pe ese ona fai. Ona mamanatu lea i lou olaga ma tusi i lalo manatu ma lagona e oo mai ia te oe. (Afai e le vave oo mai lau tali, ia faaauau pea ona fesili i le gasologa o le taimi ma se naunautaiga e usitai i le tali pe a e mauaina. O le a tali mai le Atua i le taimi tonu ma i le auala sili mo oe.)

Faasoa atu se aafiaga patino ia te oe, pe valaaulia tagata aoga e faasoa mai e uiga i se taimi na latou faafetai ai mo faasaoga alofa i o latou olaga. Mafaufau e faasino atu auala e mafai ona oo mai ai faasaoga mai le Atua (e ala i se tagata o le aiga, e ala i se taitai o le Ekalesia, e ala i le faitauina o tusitusiga paia, e ala i musumusuga mai le Agaga Paia, ma isi).

Tala ma Faamatalaga o Talaaga

E faapefea ona avea valaaulia a le Faaola e salamo ma faailoga o Lona alofa?

Na aoao mai Elder S. Mark Palmer o le Fitugafulu:

A tatou lotomaualalo, o le a tatou talia valaaulia a le Alii ia salamo, ia ositaulaga, ma ia auauna atu o se faamaoniga o Lona alofa atoatoa mo i tatou. Aua, o se valaaulia e salamo o se valaaulia foi ia maua le meaalofa sili o le faamagaloga ma le filemu.

(S. Mark Palmer, “Ua Silasila Atu Iesu ia te Ia, ua Alofa Atu ia te Ia,” Ensign po o le Liahona, Me 2017, 116)

Pe lelei le popole pea i o tatou vaivaiga?

Na faasoa mai e Elder Dale G. Renlund o le Korama a Aposetolo e Toasefululua:

Pe o lava mea o o’u faia? O a nisi mea e ao ona ou faia? O le faatinoga tatou te faia e tali atu ai i nei fesili e totonugalemu i lo tatou fiafia i le olaga nei ma i le faavavau. …

Ae o le taimi lava foi lea, e le finagalo ai lo tatou Tama Faalelagi ma Iesu Keriso e taofia i tatou e ala i le le mautinoa faifai pea i la tatou malaga i le olaga nei, ma tau manatunatu pe ua lava mea o tatou faia e laveaiina ma faaeaina ai.

(Dale G. Renlund, “Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo,” Ensign po o le Liahona, Nov. 2020, 111)

Mareko 10:25 . O le a le uiga o “se kamela e ui atu i le pu o le nila”?

E i ai nisi ua i ai se talitonuga faapea o le mata o le nila o se faitotoa laitiiti lea i le pa o le aai o Ierusalema, e manaomia ai ona aveese le avega a se kamela ina ia mafai ai ona ulu atu ai. E leai se faamaoniga faapea na i ai se faitotoa faapena. Fai mai isi o le fesuiai o se mataitusi se tasi i le tusiga faa-Eleni, o le a suia ai le mau o lona uiga o se maea, ae le o se kamela, e tatau ona ui atu i le mata o se nila. Peitai, ina ua faasino atu e Iesu Keriso le ui atu o se kamela i le mata o se nila, sa na o se faataitaiga o le faatalaula, o se faatelega ua faamoemoeina e aoao atu ai “e faigata [ma faafaigata] ona sao atu o le mauoa i le malo o le lagi” ( Mataio 19:23).

(New Testament Student Manual [Tusi Taiala a le Ofisa o Aoga a le Ekalesia, 2014], 63)

Mareko 10:23–27 . Pe e faigata pe e le mafai ea ona ulu atu se tagata mauoa i le lagi?

Ua faaopoopo mai le Faaliliuga a Iosefa Samita o Mareko 10:27 o loo faitau, “O tagata e faatuatua i oa, e le mafai; ae e le o se mea e le mafaia e tagata o e faatuatua i le Atua ma tuua mea uma ona o au, aua o i latou faapena o mea uma nei e mafai ona fai” (Faaliliuga a Iosefa Samita, Mareko 10:26 [i le Mareko 10:27, vaefaamatalaga a]).

Gaoioiga Faaopoopo e Aoao Ai

//media.ldscdn.org/webvtt/general-conference/october-2015-general-conference/2015-10-1050-elder-larry-r-lawrence-eng.vtt

O le telona ma le Faresaio

Valaaulia tagata aoga e faatusatusa uiga i le tatalo a alii e toalua o loo faaalia i le Luka 18:9–14 ma talanoaina fesili e pei o nei:

E mafai faapefea e o tatou uiga faaalia ona aafia ai o tatou manao e saili fautuaga ma faasaoga?
E mafai faapefea ona aafia ai lo tatou naunautai e talia ma faatino fautuaga tatou te maua mai le Alii, taitai o Lana Ekalesia, o tatou matua, ma isi?

Ina ia maua le ola e faavavau, e tatau ona tatou naunau e lafoai soo se mea e manaomia mai e le Alii ia i tatou

Faatusatusa le tali a le alii talavou i totonu o le Mareko 10:21–22 i isi na talosagaina e faia ni osigataulaga faapena. O nisi o faataitaiga e aofia ai Liae (tagai i 1 Nifae 2:2–4); Peteru, Iakopo, Ioane, ma Aneterea (tagai i Mataio 4:18–22); Mataio, o loo igoa foi ia Levi (tagai i Luka 5:27–29); Mose (tagai Eperu 11:24–27); ma tagata faatuatua o aso nei.

O a ni auala e faataunuuina ai e le Faaola le folafolaga na Ia faia e pei ona tusia i le Mataio 19:29 ia i latou o e naunau e ositaulagaina mea uma Na te manaomia mai ia i latou?