Mataio 19:1–12

O Le Faaipoipoga ua Faauuina e le Atua

Sa tali e Iesu Keriso fesili ma aoao atu upumoni e uiga i le faaipoipoga ma le tatalaina o faaipoipoga. E mafai ona fesoasoani lenei lesona e te malamalama ai pe na faapefea ona saunia e le Tama Faalelagi ma Iesu Keriso se auala mo oe e maua ai se faaipoipoga fiafia e faavavau i lou lumanai.

Iloaina o au tagata aoga. A oo ina e iloatino au tagata aoga taitasi, o le a sili atu ona e saunia lelei e feutagai atu mai i latou taitoatasi. Ia fuafua mamao po o a faamatalaga po o autu e ono le logolelei mo nisi o tagata aoga. A o e aoao atu aoaoga faavae moni, taumafai e aoao atu ma le alofa ma le popole alofa mo tagata aoga taitoatasi.

Sauniuniga a le tagata aoga: Valaaulia tagata aoga e mafaufau e uiga i mea e mafai ona latou faia i le taimi nei e saunia ai mo se faaipoipoga fiafia. Uunaia i latou e saili fautuaga mai se tasi latou te iloa o loo i ai se faaipoipoga fiafia, ma amiotonu.

Gaoioiga E Mafai Ona Aoao Mai Ai

O le faaipoipoga o se vaega o le fuafuaga a le Atua

Aumai se uili o se uila i le vasega, pe faaali atu se ata o se uili, ma fai atu le fesili lenei. (Soo se mea lava e i ai se ogatotonu e alagatatau i lona faaaogaaga e mafai ona faaaogaina.)

• O le a le mea e tupu i lenei uili uila pe afai e aveese lona auau (ogatotonu o le uili)?

Faitau le parakalafa muamua o le “ O Le Aiga: O Se Folafolaga i le Lalolagi ” (ChurchofJesusChrist.org), ma vaavaai mo le mea e totonugalemu iai le fuafuaga o le faaolataga a le Tama Faalelagi.

O i matou, o le Au Peresitene Sili ma le Aufono a Aposetolo e Toasefululua O Le Ekalesia a Iesu Keriso o le Au Paia o Aso e Gata Ai, matou te ta’utino atu ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o le fuafuaga a Le Foafoa, mo le taunuuga e faavavau o Lana fanau.

(“ O Le Aiga: O Se Folafolaga i le Lalolagi,” ChurchofJesusChrist.org)

• E mafai faapefea ona faatusatusa le matafaioi a aiga i le fuafuaga a le Atua i le auau tutotonu o se uili?

• O le a sou manatu i le uiga e faapea o le faaipoipoga ua “faauuina e le Atua”?

• O le fea o mea nei e faamatalaina ai ou lagona i le taimi nei e uiga i le faaipoipoga? (Filifili tali uma ua talafeagai.)

Mafaufau e faaali filifiliga nei pe faaaoga se suesuega i luga o upega tafailagi mo tagata aoga e filifili ai a latou tali.

• Fiafia—“Ou te tulimatai atu i ai pe a sao le taimi.”

• Atuatuvale—“Pe ou te maua ea se soa e faavavau?”

• Popole—“Ua ou vaai i le tele naua o faaipoipoga le fiafia ma faaipoipoga tatala/tete’a.”

• Le mautonu—“E tele naua manatu eseese e uiga i faaipoipoga.”

Tuu atu se taimi mo tagata aoga e faasoa mai ai o latou manatu ma lagona e uiga i faaipoipoga. O le iloa o o latou lagona e mafai ona taitai atu ai i se fetuunaiga sili ona lelei o le lesona.

O le faaipoipoga e faamoemoe e faavavau

I taimi o le Feagaiga Fou, sa finau nisi o tagata faapea o le tulafono a Mose na tauamiotonuina ai le tatalaina o faaipoipoga e oo lava i mafuaaga laiti pe manatu faapito. Na aoao atu e le Faaola upumoni taua e uiga i le faaipoipoga e tali atu ai i fesili a le au Faresaio e uiga i le tatalaina o faaipoipoga. A o e suesue i Ana aoaoga, mafaufau loloto pe mafai faapefea ona e faatuatuaina mea o loo aoao mai e le Faaola e uiga i le faaipoipoga e tusa lava pe ese mai mea o loo aoao mai e le lalolagi.

Faitau Mataio 19:3–8 . Faailoga upu po o fasifuaitau e faaalia ai finagalo o le Alii i faaipoipoga. Ia matau o le “tuu ese” i nei fuaiupu o lona uiga o le tatalaina o faaipoipoga, o le “vavae ese” o lona uiga o le tuueseeseina, ma e “mai le amataga” o lona uiga na faavaeina e le Atua i le foafoaina o le lalolagi.

• O a upumoni na aoao mai e Iesu Keriso e uiga i faaipoipoga ma le tatalaina o faaipoipoga e te moomoo ia malamalama atili i ai tagata i le lalolagi? Aisea?

• O a fasifuaitau patino i lenei fuaitau e fesoasoani ia te oe e malamalama ai i mea na aoao atu e Iesu?

• Afai e mafai ona e fai atu i le Faaola ni fesili e uiga i le faaipoipoga ma le aiga e pei ona faia e tagata i le Mataio 19, o le a se mea e te fia iloa?

Mafaufau e tusi i luga o le laupapa nisi o fesili a tagata aoga.

O se tasi o upumoni e mafai ona tatou aoao mai aoaoga a le Faaola e faapea o le faaipoipoga i le va o se alii ma se tamaitai o se sootaga paia ua faatuina e le Atua ma ua faamoemoe e tumau e faavavau.

• E mafai faapefea e lenei upumoni ona fesoasoani e tali nisi o au fesili po o fesili a isi tagata i le lalolagi e uiga i le faaipoipoga?

E finagalo le Tama Faalelagi ia tumau e faavavau le faaipoipoga. A o taatele le tatalaina o faaipoipoga i le lalolagi i aso nei, na aoao maiPeresitene Dallin H. Oaks, “O le tele o faafitauli i faaipoipoga, o le fofo e le o le tatalaina o faaipoipoga ae o le salamo” (“Tatalaina o Faaipoipoga,” Ensign po o le Liahona, Me 2007, 71). Ua faia e lo tatou Tama Faalelagi ia mafai ona faavavau faaipoipoga ma ia fiafia ma faamalieina taitoalua a o latou taumafai e tausia a latou feagaiga, ia ola i aoaoga a le Faaola, ma faaaoga e le aunoa le mataupu faavae o le salamo. Ae paga lea, o nisi taimi e tatau ai ona tatalaina faaipoipoga. E pei ona faamatalaina e Peresitene Gordon B. Hinckley (1910–2008), “Atonu o loo i ai pea lava pea se mafuaaga tatau mo le tatalaina o faaipoipoga” (“What God Hath Joined Together,” Ensign, Me 1991, 74). E ui e tatau ona tatou aloese mai le faamasinoina o faaiuga ua faia e isi, e mafai e i tatou taitoatasi ona saunia lelei i tatou lava mo se faaipoipoga i le lumanai o le a tumau e faavavau e ala i le faalagolago i le Tama Faalelagi ma Lona Alo ma aoao e mulimuli ia i Laua ma o tatou loto atoa.

• O le a se mea ua e aoaoina e uiga i le Tama Faalelagi e ala i le iloaina e finagalo o Ia ia tumau e faavavau faaipoipoga?

Filifili po o fea o gaoioiga o totoe e sili ona aoga i tagata aoga i le taimi avanoa.

Faaaoga nisi o punaoa nei e saili ai mo upumoni faaopoopo e fesoasoani e tali ai fesili atonu o ia te oe po o isi e uiga i le faaipoipoga. Mafaufau loloto pe faapefea ona fesoasoani lou malamalama i le fuafuaga o le faaolataga i le taliina o nisi o fesili. Ia sauniuni e faasoa atu mea na e aoaoina.

Mafaufau e tuuina atu i tagata aoga nisi o punaoa faaopoopo o loo maua i le vaega o le “Tala ma Faamatalaga o Talaaga” o le lesona. E mafai e tagata aoga ona galulue ma se paga po o se vaega toalaiti mo lenei gaoioiga.

• “ O Le Aiga: O se Folafolaga i le Lalolagi ”

• O fuaitau o le atamai i aoaoga faavae nei: Kenese 2:24 ; 1 Korinito 11:11 ; Alema 39:9 ; Mataupu Faavae ma Feagaiga 49:15–17 ; 131:1–4

• O lauga o konafesi aoao po o vitio a le Ekalesia o loo aoao mai ai e uiga i faaipoipoga (saili i luga o le ChurchofJesusChrist.org po o le faasino autu o lomiga o konafesi aoao o le Liahona)

• E mafai ona e faafesootaia se tagata e te faatuatuaina ma alofaina ua faaipoipo fiafia i le taimi o le lesona

A uma ona maua se taimi o tagata aoga e suesue ai, valaaulia i latou e faasoa mai mea sa latou aoaoina i se auala e mafai ai ona latou faalogo i le tele o upumoni. Mo se faataitaiga, e mafai e tagata aoga ona feoai solo i le potu, faasoa mea na latou aoaoina i le tele o tagata aoga e mafai ai i se taimi atofaina.

Aoao mai faataitaiga amiotonu

Sa faasino atu e Paulo le alofa o le Faaola mo le Ekalesia o se faataitaiga o le alofa e tatau ona i ai i se faaipoipoga. Faitau i le Efeso 5:25, ma vaai faalemafaufau pe faapei foliga o se faaipoipoga pe afai e tausia e le tane ma le ava le tasi ma le isi i le ala e tausia ai e le Faaola tagata o Lana Ekalesia.

Taulai atu i faataitaiga a i latou e i ai faaipoipoga amiotonu e mafai ona faamalosia ai lo tatou faatuatua o le a tuuina mai e le Atua lenei faamanuiaga ia i latou uma o e saili ma le faamaoni, e tusa lava pe manaomia e nisi ona faatali se ia uma o latou olaga faaletino mo lenei faamanuiaga.

Mafaufau e valaaulia se ulugalii faaipoipo mai le siteki e fesoasoani e aoao atu lenei lesona, tali fesili, pe molimau atu i le olioli e oo mai e ala i le mulimuli i aoaoga a Iesu Keriso i le la faaipoipoga.

Atonu e te manao e matamata i le vitio “Expressions of Love” (3:26), e maua i le ChurchofJesusChrist.org, ma vaavaai mo le olioli e mafai ona oo mai e ala i se faaipoipoga alofa, ma amiotonu.

Expressions of Love

• O ai na avea ma se faataitaiga ia te oe o le fausia o se faaipoipoga fiafia, ma amiotonu? O a uiga faaKeriso ua fesoasoani ia i latou e atiina ae ai le faaipoipoga latou te olioli ai?

• Aisea e taua ai mo oe le saunia nei mo lau faaipoipoga i le lumanai?

Mafaufau e faasoa atu faataitaiga o faaipoipoga fiafia ma valaaulia tagata aoga e faasoa mai mea sa latou aoaoina e ala i le valaaulia i tapenaga a le tagata o le vasega mo lenei lesona.

Mafaufau loloto i mea ua e aoaoina i lenei lesona e uiga i le matafaioi o le faaipoipoga i le fuafuaga a le Atua ma ou lagona a o e tulimatai atu i lou lumanai.

• O le a se mea e mafai ona e faia i le taimi nei e saunia ai oe lava ia e faatulaga se faaipoipoga e faavavau?

• O le a se mea e mafai ona e faia e maua ai le fesoasoani mai le Faaola e saunia ai?

Tala ma Faamatalaga o Talaaga

O le a le mea e tupu i tagata faamaoni e le maua le avanoa mo le faaipoipoga e faavavau i lenei olaga?

Na saunoa Elder D. Todd Christofferson o le Korama a Aposetolo e Toasefululua:

O nisi o outou e le o maua faamanuiaga o le faaipoipoga ona o ni mafuaaga e aofia ai le leai o se vaai i le lumanai, tosina atu i le itupa tutusa, faaletonu o le tino po o le mafaufau, pe na o le fefe foi lava nei toilalo faapea, mo na o lea taimi pe ā, ua lamatia ai le faatuatua. …

… Faatasi ai ma le mautinoa matou te molimau atu o le Togiola a Iesu Keriso ua faamoemoeina, ma, i le iuga, o le a tauia ai mea uma na le’i mauaina, ma le toilalo o i latou na liliu atu ia te Ia. E leai se tasi na muai fuafuaina faapea e itiiti mea na te maua nai lo mea uma o i le Tama mo Ana fanau.

(D. Todd Christofferson, “Aisea e Faaipoipo Ai, Aisea e Fai ai se Aiga,” Ensign po o le Liahona, Me 2015, 52)

O le a se mea na aoao mai e le Alii e uiga i le faatulafonoina o faaipoipoga a itupa tutusa?

Na aoao mai Peresitene Russell M. Nelson:

I le avea ai ma tagata o le Ekalesia, tatou te faaaloalo i tulafono o le laueleele, e aofia ai faaipoipoga faalemalo. E ui o lea, o le mea moni, i le amataga—i le amataga—o le faaipoipoga na faauuina e le Atua! Ma e oo mai i lenei aso o Lana faauigaga ua na o le va o se alii ma se tamaitai. E lei suia e le Atua Lana faauigaga o le faaipoipoga.

(Russell M. Nelson, “The Love and Laws of God” [Brigham Young University devotional, Sete. 17, 2019], speeches.byu.edu)

O le a se mea e mafai ona ou faia nei e fesoasoani ai ia te au ia maua se toalua lelei pe a talafeagai le taimi?

Sa faasoa mai e Peresitene Tad R. Callister, sa avea muamua ma Peresitene Aoao o le Aoga Sa, se tasi o auala e mafai ona taliina ai lenei fesili i se mea na aoao atu e lona tina ia te ia ina ua tusa ma le 17 ona tausaga:

Sa ia fai mai, “Tad, o e ole atu i le Alii e fesoasoani ia te oe ia maua se avā lelei?”

… Sa ou tali atu, “Leai,” lea sa ia tali mai ai, “Ia, e tatau, Atalii; o le a avea ma se faaiuga sili ona taua o le a e faia.” Sa goto ifo na upu i le ta’ele o lo’u loto, ma o lea mo le isi ono tausaga sa ou tatalo ai ina ia fesoasoani mai le Atua ia te au ia maua se avā lelei. Ioe, e maeu naua Lona tali mai i lena tatalo.

(Tad R. Callister, “O Matua: O Uluai Faiaoga o le Talalelei mo a Latou Fanau,” Ensign po o le Liahona, Nov. 2014, 33)

Mataio 19:9 . Pe e lelei le toe faaipoipo pe a uma ona tatalaina le faaipoipoga?

Na saunoa mai Peresitene Dallin H. Oaks o le Au Peresitene Sili:

O le ituaiga faaipoipoga e manaomia mo le faaeaga—e faavavau le umi ma e uiga faaleatua—e le mafaufau i le tatalaina o faaipoipoga. … [Ae peitai] talu ai “le maaa o [tatou] loto” [ Mataio 19:8 ], ua le o faamalosia ai e le Alii i le taimi nei ia taunuuga o le tulaga faaselesitila. Ua Ia faatagaina tagata ua tatalaina faaipoipoga e toe faaipoipo e aunoa ma le pisipisia i le le mama o loo faamaoti mai i le tulafono maualuga atu.

(Dallin H. Oaks, “Molimau,” Ensign po o le Liahona, Me 2007, 70)

E mafai faapefea e lo’u faatuatua i le Faaola ona fesoasoani ia te au a o ou vaavaai mo se soa e faavavau?

Na aoao mai Elder Jeffrey R. Holland o le Korama a Aposetolo e Toasefululua:

Ia talitonu o lou faatuatua o loo i ai mea uma e faia i lou alofa faamemelo, aua o lena lava. E lamatia oe i le tuueseeseina o le tafao faamasani mai le avea ma soo. Pe, i se faaupuga e sili atu ona mautinoa, o Iesu Keriso, le Malamalama o le Lalolagi, ua na o le pau lea o le lamepa e mafai ai ona e iloa atu ma le manuia le ala o le alofa ma le fiafia mo oe ma mo lau manamea.

(Jeffrey R. Holland, “How Do I Love Thee?” [Faigalotu a le Iunivesite o Polika Iaga, 15 Fep. 2000], speeches.byu.edu)