Toe Vakaiʻi ʻo e Fakataukei Fakatokāteline 8
Ako Maʻuloto ʻa e Ngaahi Fakamoʻoni Fakafolofolá mo e Ngaahi Kupuʻi Lea Mahuʻinga he Folofolá
ʻE lava ke tokoniʻi koe ʻi ha ngaahi founga lahi ʻi hono ako maʻuloto ʻa e ngaahi potufolofolá mo e ngaahi moʻoni ʻoku nau akoʻí. ʻI he lolotonga ʻo e taʻú, ʻe poupouʻi koe ke ke ako maʻuloto ʻa e ngaahi fakamoʻoni fakafolofolá mo e ngaahi kupuʻi lea mahuʻinga ʻi he folofolá ki he ngaahi potufolofola fakataukei fakatokāteline takitaha ʻe 24 ʻo e Fuakava Foʻoú. ʻOku fakataumuʻa ʻa e lēsoni ko ʻení ke tokoniʻi koe ke ke ako maʻuloto ha niʻihi ʻo e ngaahi fakamoʻoni fakafolofolá mo e ngaahi kupuʻi lea mahuʻinga ʻi he folofolá mei he ʻuluaki ngaahi potufolofola fakataukei fakatokāteline ʻe 11 ʻi he Fuakava Foʻoú.
Teuteu ʻa e tokotaha akó: Fakaafeʻi e kau akó ke nau ʻomi ha tatau ʻo e ngaahi makasini motuʻa ʻa e Siasí te nau lava ʻo kosi ke faʻu ha meʻa ke vakai ki ai ke maʻuloto ai e ngaahi fakataukei fakatokāteline ʻi he folofolá.
Ngaahi ‘Ekitivitī Ako ʻE Ala Fakahokó
Mahalo ʻe fie maʻu ke akoʻi ha lēsoni fakataukei fakatokāteline ʻo e potufolofolá ʻo fetongi ʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe fakavahelahi pe kouʻotineitá ke fakapapauʻi ʻe akoʻi e lēsoni fakataukei fakatokāteline ʻo e potufolofola takitaha lolotonga e fakahoko ʻa e seminelí.
ʻOmi e ngaahi meʻá ni ki he kalasí ke fakahoko ʻaki e ʻekitivitī ʻo e lēsoni ko ʻení: ngaahi tatau ʻo e ngaahi makasini motuʻa kuo paaki ʻe he Siasí, ʻū helekosi, kulū, pepa lanu kehekehe, ʻū peni fakaʻilonga, mo e ʻū kala. ʻE lava foki ke fakaʻaongaʻi ʻe he kau akó ʻenau ngaahi meʻangāue fakaʻilekitulōnika (tablets, smartphones) pē ʻanautolú ke fekumi ʻi he laipeli mītia ʻa e Siasí ki ha ngaahi ʻīmisi pe ngaahi fakatātā.
Fakaʻaongaʻi ʻo e ngaahi fakatātaá ke tokoni ʻi he ako maʻulotó
Fakakaukau ke fakaʻaongaʻi ha lēsoni fakataumuʻa ke tokoni ʻi hono fakatātaaʻi e ngaahi lelei ʻo hono fakaʻaongaʻi ʻo e ngaahi fakatātaá ke tokoni ki he ako maʻulotó.
Ko e founga ʻe taha ke fai ai ʻení ko hono fakamatalaʻi ha tūkunga pe lisi ha ngaahi meʻa pea kole leva ki he kau akó ke nau toe talaatu ʻa e ngaahi fakaikiikí. Hili iá pea fakaʻaongaʻi ha fakatātā, hangē ko ha ngaahi laʻitā pe ngaahi tā fakatātā, ke fakamatalaʻi ha tūkunga kehe pe lisi ha ngaahi meʻa kehekehe, pea kole ki he kau akó ke nau toe talaatu ʻa e ngaahi fakaikiiki ko iá. ʻEke ki he kau akó pe ko e fē ʻi he ongo foungá ni naʻá ne ʻai ke faingofua ange ʻenau manatuʻi e ngaahi fakaikiikí.
ʻE lava ke tokoni hono ako maʻuloto e ngaahi potufolofola fakataukei fakatokāteliné ke ke manatuʻi e folofola ʻa e Fakamoʻuí pea manatuʻi kinautolu ʻi he ngaahi taimi ʻo e faingataʻá. ʻOku lahi ha ngaahi founga kehekehe te ke lava ʻo fakaʻaongaʻi ke tokoniʻi koe ke ke ako maʻuloto ʻa e folofolá. ʻE nofotaha ʻa e lēsoni ko ʻení ʻi hono fakaʻaongaʻi ʻo e ngaahi fakatātaá ke tokoni ke fakamālohia hoʻo ako maʻuloto ʻo ha ngaahi kupuʻi lea mahuʻinga pau mei he ngaahi potufolofola fakataukei fakatokāteline ʻo e Fuakava Foʻoú.
Ko ha lisi ʻeni ʻo e ʻuluaki potufolofola fakataukei fakatokāteline ʻe 11 ʻo e Fuakava Foʻoú. Fakakaukau ke fakaʻilongaʻi ʻa e ngaahi potufolofola ko ʻení fakataha mo ʻenau ngaahi kupuʻi lea fakafolofola mahuʻingá kapau kuo teʻeki ke ke fai ia.
Fakaʻaliʻali ʻa e laʻipepa tufa ko ʻení ke lava e kau akó ʻo vakai ki ai kae ʻoua kuo ʻosi ʻenau faʻu ʻenau fakatātaá lolotonga e ʻekitivitī hokó.
|
Fakamoʻoni Fakafolofolá |
Tefitoʻi Kupuʻi Lea Fakafolofolá |
|
“He kuo ʻaloʻi kiate kimoutolu ʻi he ʻaho ni, ʻi he kolo ʻo Tēvitá, ʻa e Fakamoʻui, ʻa ia ko Kalaisi ko e ʻEikí.” | |
|
“Kapau ʻe ʻikai fanauʻi ʻa e tangatá ʻi he vaí pea mo e Laumālié, ʻe ʻikai ʻaupito faʻa hū ia ki he puleʻanga ʻo e ʻOtuá.” | |
|
“He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú.” | |
|
“Tuku ke ulo pehē hoʻomou māmá ʻi he ʻao ʻo e kakaí.” | |
|
“Haʻu kiate au ʻa kimoutolu kotoa pē ʻoku feinga mo mafasia, pea te u foaki ʻa e fiemālié kiate kimoutolu.” | |
|
Naʻe folofola ʻa Sīsū, “Te u ʻatu kiate koe ʻa e [ngaahi] kī ʻo e puleʻangá.” | |
|
“Pea ko ia ia ʻe fai ki hono finangaló, te ne ʻilo ʻa e akonakí.” | |
|
“Ke ke ʻofa [ki he ʻEiki] ko ho ʻOtuá. … Ke ke ʻofa ki ho kaungāʻapí.” | |
|
Naʻe fekau ʻe Sīsū Kalaisi, ke maʻu ʻa e sākalamēnití “ʻi he fakamanatu kiate au.” | |
|
“Pea ko ʻeni ʻa e moʻui taʻengatá, ko ʻenau ʻilo koe ko e ʻOtua moʻoni pē taha, mo Sīsū Kalaisi.” | |
|
“He ʻoku ʻikai kakano mo hui ha laumālie, ʻo hangē ko ia ʻoku mou ʻiló ni ʻiate aú.” |
Faʻu ha meʻa ke sio ki ai
Fakatatau mo e tokolahi ʻo e kalasí, ʻe lava ke fakahoko fakafoʻituitui, tauhoa, pe ʻi ha fanga kiʻi kulupu iiki ʻa e ʻekitivitī ko ʻení. Kapau ʻe lava, ʻomi ha ngaahi tatau motuʻa ʻo e ngaahi makasini ʻa e Siasí ki he kalasí ke fakaʻaongaʻi ʻe he kau akó. Kapau ʻoku ʻikai maʻu ʻa e ngaahi fakatātā kuo pākí, kole ki he kau akó ke tā haʻanau fakatātā pē ʻanautolu ʻi ha laʻipepa. Fakakaukau ke faʻu ha fakatātā fakataha mo e kau akó. Fakaafeʻi e kau akó ke vahevahe ʻenau ngaahi fakatātaá ʻi he fakaʻosinga ʻo e ʻekitivitī ko ʻení.
Kumi pe tā ha ngaahi fakatātā ʻe lava ʻo tokoni atu ke ke manatuʻi ʻa e fakamoʻoni fakafolofolá mo e tefitoʻi kupuʻi lea fakafolofolá mei he taha ʻo e ngaahi ʻuluaki potufolofola fakataukei fakatokāteline ʻe 11 ʻo e Fuakava Foʻoú. ʻE lava ke kau ʻi he meʻa naʻá ke faʻú ha fakatātā ʻe taha pe ua ʻe tokoni ke ke manatuʻi ai ha tefitoʻi kupuʻi lea fakafolofola kakato, pe ʻe lava ke ʻi ai ha ngaahi fakatātā kehekehe ki he foʻi lea takitaha ʻi he tefitoʻi kupuʻi lea fakafolofolá. ʻI hoʻo ngāue ki he meʻa ʻokú ke faʻú, fakakaukau ki he founga ʻoku fekauʻaki ai ʻa e potufolofola ʻokú ke tokanga taha ki aí kia Sīsū Kalaisi mo ʻEne ongoongoleleí.
ʻI he ʻosi e ngāue ʻa e kau akó, fakaafeʻi kinautolu ke vahevahe ʻenau fakatātaá mo e niʻihi kehe ʻi he kalasí.
Kapau ʻoku kei taimi, ʻe lava ke teuteuʻi ʻe he kau akó ha lēsoni nounou fekauʻaki mo e potufolofola ne nau filí ʻa ia ʻe lava ke fakaʻaongaʻi ʻi he efiafi fakafāmili ʻi ʻapí pe ako folofola fakafāmilí. Fakaafeʻi e kau akó ke nau kumi ha founga ke fakaʻaongaʻi ai e fakatātā naʻa nau faʻú ko ha konga ʻo ʻenau lēsoní. ʻE lava ke tataki ʻe he ngaahi fehuʻi ko ʻení ʻa e kau akó ʻi heʻenau teuteu ʻenau lēsoní:
-
Ko e hā ʻoku tokoni mai ʻa e potufolofola ko ʻení ke mahino kiate kitautolu fekauʻaki mo Sīsū Kalaisi mo ʻEne ongoongoleleí?
-
ʻE tokoniʻi fēfē hoʻo moʻuí ʻe he ngaahi moʻoni mei he potufolofola ko ʻení?
-
Ko e hā ha ngaahi aʻusia kuó ke maʻu ʻoku fekauʻaki mo e ngaahi moʻoni naʻe akoʻi ʻi he potufolofola ko ʻení?
Fakakaukau ke poupouʻi e kau akó ke nau ako maʻuloto e ngaahi fakamoʻoni fakafolofolá mo e ngaahi tefitoʻi kupuʻi lea fakafolofolá ʻiate kinautolu pē. Mahalo te nau fakakaukau ke fili ha niʻihi ʻo e ngaahi potufolofolá kakato ke ako maʻuloto.