Sivisivi’i Hoʻo Akó 4

Mātiu 14-20; Maʻake 6-10; Luke 10; 12; 14–18; Sione 5–11

ʻĪmisi

Newport Beach Seminary

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki fakafoʻituitui kuó ke aʻusia lolotonga hoʻo ako e Fuakava Foʻoú.

Lotua e kau akó. Ke tokanga taha ange ki he kau akó fakafoʻituitui, lotua kinautolu ʻaki honau hingoá. Kole ki he tokoni ʻa e Tamai Hēvaní ke mahino ʻa e ngaahi fiemaʻu ʻa e kau akó pea ʻi hono ʻiloʻi pe ko e fē ʻa e ngaahi founga fakafaiako ke fakaʻaongaʻi ke tokoni ki hono feau ʻo e ngaahi fiemaʻu ko iá. Fakafanongo ki ha ngaahi ueʻi fakalaumālie fekauʻaki mo e founga ke tokoniʻi ai e tokotaha ako takitaha.

Teuteu ʻa e tokotaha akó: Fakaafeʻi e kau akó ke nau fakakaukau ki he tupulaki fakalaumālie kuo nau aʻusia lolotonga ʻenau ako e Fuakava Foʻoú. ʻOku tokoni nai ʻenau ako ʻi he Fuakava Foʻoú ke nau ʻiloʻi, ʻofa, mo tauhi ki he Tamai Hēvaní mo Sīsū Kalaisi? Ko e hā e ngaahi aʻusia mahuʻingamālie kuo nau maʻú?

Ngaahi ʻEkitivitī Ako ʻE Ala Fakahokó

ʻOku fakataumuʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú, ʻenau malava ke fakamatalaʻi e ngaahi akonaki ʻi he Fuakava Foʻoú, pe founga ʻoku liliu ai honau ʻulungāngá, holí, mo ʻenau malava ke moʻui ʻaki e ongoongoleleí. Ko hono ako ʻe he kalasí ʻa e Mātiu 14–20; Maʻake 6–10; Luke 10; 12; 14–18; mo e Sione 5–11 mahalo naʻe fakamamafaʻi ai e ngaahi moʻoni makehe meiate kinautolu ʻi he ngaahi ʻekitivitī ko ʻení. Kapau ko ia, ʻe lava ke fulihi e ngaahi ʻekitivitií ke fakakau ai e ngaahi moʻoni ko iá.

Haʻu kia Sīsū Kalaisi pea hoko ko ʻEne ākonga

Tuku ha taimi ke ke fakakaukau ai ki he founga ʻokú ke tupulaki ai ʻi hoʻo hoko ko ha ākonga ʻa Sīsū Kalaisí mo feinga ke haʻu kakato ange kiate Ia ʻi hoʻo ako ʻa e Fuakava Foʻoú. Ko e niʻihi ʻo e ngaahi founga kuo poupouʻi koe ke ke fai ai ʻení, ko hoʻo malava ko ia ke maʻu mo muimui ki he fakahā fakatāutahá pea fakamatalaʻi ha niʻihi ʻo e ngaahi fatongia mo e ngaahi huafa ʻo Sīsū Kalaisí pea ʻi hoʻo feinga ke fekumi ki he melinó ʻi he moʻui ko ʻení ʻo fakafou ʻia Sīsū Kalaisí. Fekumi ke ke ʻilo mei hoʻo Tamai Hēvaní ʻa e founga ʻokú ke tupulaki mo fakalakalaka ai ʻi he ngaahi founga ko ʻení pea pehē ki ha faʻahinga ngāue pē ʻoku totonu ke ke fakahoko pe liliu kae lava ke hokohoko atu hono fakaloloto hoʻo tuʻunga fakaākonga kia Sīsū Kalaisí.

Fakatupulaki hoʻo malava ke maʻu ha fakahaá

Kamata e kalasí ʻaki hano tā leʻosiʻi ʻaupito ha foʻi hiva angamaheni. ʻOku totonu ke fakalongolongo feʻunga pē ke longoaʻa feʻunga ʻa e kau akó, mahalo he ʻikai fanongo ʻa kinautolu ʻoku ofi taha ki he feituʻu ʻo e ongó ki he fasí. Kole ki he kau akó ke nau talaatu ʻa e foʻi hiva ʻoku taá.

Tuku ha kiʻi taimi ke ke fanongo ai ki he ngaahi ongo ʻokú ne ʻākilotoa koé.

Ko e hā ha ngaahi ongo te ke toki lava pē ʻo fanongo ki ai ʻi he taimi ʻokú ke fakafanongo fakalelei aí?
Ko e hā te ke lava ʻo fai ʻi he taimi ʻokú ke fanongo vaivai ai ki ha meʻa pea ʻokú ke fie ʻilo pe ko e hā ia?

Mahalo ʻe tali ʻe he kau akó ʻoku nau ʻunu ke ofi ange ki he tupuʻanga ʻo e ongó, feinga ke tuʻu maʻu mo fakalongolongo, tukutaha ʻenau fakakaukaú ʻi he fakafanongó, pe taʻofi e ngaahi longoaʻa mei muí. Fakakaukau ke hiki ʻa e ngaahi tali ʻa e kau akó ʻi he palakipoé pea kole ange leva ki he kau akó ke nau fakaʻaongaʻi ʻa e ngaahi founga ko iá ke feinga ke ʻiloʻi ʻa e foʻi hiva ʻoku taá.

ʻOku tatau fēfē ʻa e ʻekitivitī ko ʻení mo hono maʻu ʻo e fakahā mei he Laumālie Māʻoniʻoní?

Ko ha taumuʻa mahuʻinga ʻi he seminelí ke tokoniʻi koe ke fakatupulaki hoʻo malava ke maʻu ha fakahā fakataautaha mei he Laumālie Māʻoniʻoní.

Fakakaukau ki he ngaahi fiemaʻu ʻa e kau akó pe ʻe ʻaonga kiate kinautolu ʻa e fakamatala ʻi he palakalafi ko ʻení.

ʻI he Tohi ʻa Molomoná, naʻe fakamatalaʻi ʻe Nīfai ʻa e Laumālie Māʻoniʻoní ko ha “kihiʻi leʻo-siʻi” ʻoku lahi ange ʻetau ongoʻí ʻi heʻetau fanongo ki aí ( 1 Nīfai 17:45). Te tau lava ʻo fakaleleiʻi ʻetau malava ke fanongo pe ongoʻi ʻa e Laumālie Māʻoniʻoní ʻi hotau lotó ʻi ha ngaahi founga ʻoku faitatau mo kinautolu ʻoku tau fakaʻaongaʻi ke fakafanongo ki ha ongo leʻo siʻí. Ko e founga lelei kotoa pē ke fakatupulaki ai ʻetau malava ke fakatokangaʻi e fanafana ʻa e Laumālie Māʻoniʻoní ko ʻetau ʻunu ke ofi fakalaumālie ange ki he ʻOtuá, fakatauʻatāinaʻi e fakakaukaú, tukutaha ʻetau fakakaukaú, mo taʻofi e longoaʻa ʻokú ne ʻākilotoa kitautolú.

Tuku ha taimi ke ke fakakaukau ai ki he ngaahi aʻusia kimuí ni mai kuó ke maʻu ʻi hono maʻu ha fakahā fakataautaha mei he Laumālie Māʻoniʻoní. Te ke lava ʻo toe vakaiʻi ha ngaahi fakamatala kuó ke hiki ʻi hoʻo folofolá pe tohinoa akó. Te ke lava foki ʻo kole ki he Tamai Hēvaní ke tokoni atu ke ke ʻiloʻi pe manatuʻi ʻa e fakahā fakataautaha kuó ke maʻú. Hili iá peá ke lekooti leva ʻa e ngaahi fakakaukau mo e ngaahi ongo ʻoku haʻu ki ho ʻatamaí mo e lotó.

Ko e hā ha ngaahi aʻusia kimuí ni kuó ke maʻu ki hono maʻu ʻo e fakahā fakatāutahá? Naʻá ke fakatokangaʻi fēfē ʻa e ngaahi aʻusia ko ʻení ko e haʻu mei he ʻOtuá?
Ko e hā kuó ke ako ʻi hoʻo ako ʻa e Fuakava Foʻoú ʻe lava ʻo tokoni atu ke ke fakatokangaʻi ʻa e Laumālie Māʻoniʻoní?
Ko e hā ha ngaahi fakakaukau te ke lava ʻo vahevahe mo ha taha ʻoku fāifeinga ke ʻiloʻi ʻa e Laumālié?

Ko e taha ʻo e ngaahi tefitoʻi fatongia ʻo e Laumālie Māʻoniʻoní ko e fakamoʻoni ki he Tamaí mo e ʻAló (vakai, Mātiu 16:17 ; Sione 15:26 ; 3 Nīfai 11:32).

Ko e hā e meʻa kuo tokoni atu ai e Laumālié ke mahino kiate koe pe te ke ongoʻi fekauʻaki mo e Tamai Hēvaní mo Sīsū Kalaisí?
ʻOku hoko fēfē ʻa e meʻa-foaki ʻo e Laumālie Māʻoniʻoní mo e faingamālie ki he fakahā fakatāutahá ko ha fakamoʻoni ʻo e ʻofa ʻa e ʻOtuá kiate koé?

Poupouʻi e kau akó ke hokohoko atu ʻenau fekumi ki ha fakahā fakatāutahá neongo kapau ʻoku nau ongoʻi ʻoku faingataʻa ke fakatokangaʻi e ngaahi ueʻi mei he Laumālie Māʻoniʻoní.

Fakamatalaʻi ‘a e ngaahi fatongia mo e ngaahi huafa ʻo Sīsū Kalaisí

Fakaʻaliʻali e ngaahi fakatātā ko ʻeni ʻo e mā mo ha sipí. Fehuʻi ki he kau akó pe te nau lava ʻo fakamatalaʻi ʻa e founga naʻe fakaʻaongaʻi ai ʻe he Fakamoʻuí ʻa e ngaahi fakataipe ko ʻení ke akoʻi fekauʻaki mo Iá.

ʻĪmisi

Making Bread

ʻĪmisi

Photographic illustration of Jesus Christ holding a white lamb in his arms.

Naʻe fakaʻaongaʻi fēfē ʻe he Fakamoʻuí ʻa e maá mo e sipí ke akoʻi fekauʻaki mo Iá?

Mahalo te ke manatuʻi e akonaki ʻa e Fakamoʻuí ʻi he ngaahi lea fakatātā hangē ko e “Ko au ko e mā ʻo e moʻuí” (vakai, Sione 6:35, 41, 48, 51), “Ko au ko e tauhi [sipi] leleí” ( Sione 10:11), mo e “Ko au ko e toetuʻú, mo e moʻuí” ( Sione 11:25).

Ko e hā ʻoku akoʻi ʻe he ngaahi huafa ko ʻení ʻo kau ki he ʻulungaanga ʻa e Fakamoʻuí mo e ngaahi fatongia te Ne lava ʻo fakahoko ʻi hoʻo moʻuí?
ʻOku tokoniʻi fēfē koe ʻe he mahino ki Hono ʻulungāngá mo e ngaahi fatongiá ke ke ʻofa lahi ange kiate Iá?

ʻI hoʻo ako ʻa e Fuakava Foʻoú, mahalo naʻá ke tauhi ha lisi ʻi hoʻo tohinoa akó ʻo e ngaahi fatongia mo e ngaahi huafa ʻo Sīsū Kalaisí. Kapau ʻokú ke maʻu ʻa e lisi ko ʻení, fakaʻaongaʻi ha ngaahi miniti siʻi ke toe vakaiʻi ia. Tānaki atu ha faʻahinga huafa pe fatongia naʻe ʻikai ke ke maʻu. Kapau ʻoku teʻeki ke ke faʻu e lisi ko iá, mahalo te ke fie kamata ia he taimí ni, ʻo lisi ha ngaahi fatongia pe huafa te ke lava ʻo fakakaukau ki aí. Kapau ʻoku ʻikai te ke lava ʻo fakakaukau ki ha taha, fakakaukau ke toe vakaiʻi ʻa e “ Ko e Kalaisi Moʻuí: Ko e Fakamoʻoni ʻa e Kau ʻAposetoló ” (ChurchofJesusChrist.org) pe “Sīsū Kalaisi” ʻi he Fakahinohino ki he Ngaahi Folofolá .

Mahalo ʻe fiefia ʻa e kau akó ke fakahoko ʻa e ʻekitivitī ko ʻení mo hanau hoa pe ʻi ha fanga kiʻi kulupu iiki. Fakaafeʻi e kau akó ke vahevahe mo e kalasí e meʻa ne nau faʻú.

Hiki ha kaati fakamālō ki he Fakamoʻuí, ʻo tokanga taha ki ha taha pe lahi ange ʻo Hono ngaahi fatongiá pe huafá. Fakakau ha ngaahi meʻa kuó ke aʻusia ʻi hoʻo fakatokangaʻi Ia ʻi hono fakahoko e fatongia ko iá ʻi hoʻo moʻuí, pea fakahaaʻi hoʻo houngaʻiá.

Kapau naʻe faʻu ʻe he kau akó ha tā fakatahatahaʻi (collage) ʻi he lēsoni kimuʻá, fakakaukau ke hiki fakalaka mei he ʻekitivitī hoko ʻoku fokotuʻu atú.

Faʻu ha fakatātā ʻokú ne fakamatalaʻi e ngaahi fatongia pe huafa ʻo e Fakamoʻuí. Fakakau ai ha ngaahi fakamoʻoni fakafolofola ʻoku ʻaongá pea mo e ʻuhinga ʻoku mahuʻingamālie ai kiate koe ʻa e ngaahi fatongia pe huafa ko ʻení. Fakakaukau ke vahevahe ia ʻi he mītia fakasōsialé ʻi he taimi te ke ʻosi aí.
Hiki ha kiʻi lea nounou pe teuteu ha lēsoni nounou fekauʻaki mo ha fatongia pe huafa ʻe taha pe lahi ange ʻo e Fakamoʻuí te ke lava ʻo akoʻi ʻi ha fakataha lotu semineli, ʻi ha lēsoni efiafi ʻi ʻapi, pe ʻi ha kalasi ʻi he lotú. Fakakau e ʻuhinga ʻo e fatongiá pe huafá pea mo ha faʻahinga meʻa kuó ke aʻusia ʻi Heʻene fakahoko e fatongia ko iá ʻi hoʻo moʻuí.

Ongoʻi ha holi lahi ange ke fekumi ki he melinó ʻia Kalaisi

Kapau naʻe fakaʻaongaʻi ʻa e ngaahi naunau ke sio ki aí ʻi he ngaahi lēsoni ʻoku fakamatala ki ai ʻi he palakalafi ko ʻení, fakakaukau ke fakaʻaliʻali ʻa e ngaahi naunau tatau ko iá ke tokoni ki he kau akó ke nau fakamanatu ʻa e ngaahi lēsoni ko iá. Fakakaukau ke ʻoua te ke lau e palakalafí, ka ke fehuʻi ki he kau akó pe ko e hā ʻoku nau manatuʻi mei he ngaahi lēsoni ko iá.

ʻI hoʻo ako e Fuakava Foʻoú, mahalo kuó ke maʻu ha ngaahi faingamālie ke ako mo fakakaukau ai ki he nonga ʻe lava ke maʻu meia Sīsū Kalaisí. Hangē ko ʻení, mahalo te ke manatuʻi e fakaafe ʻa e Fakamoʻuí ke tau haʻu kiate Ia ʻi he taimi ʻoku tau ongoʻi mafasia aí (vakai, Mātiu 11:28–30)) pe ko e hāʻele ʻa Sīsū ʻi he fukahi vaí mo tokoni ke hiki hake ʻa Pita ʻi he kamata ke ne ngoto hifo (vakai,, Mātiu 14:26–33). Mahalo naʻá ke maʻu ha faingamālie ke tā ha fakatātā ʻi hoʻo tohinoa akó ko ha konga ʻo e lēsoni ʻi he Maʻake 4:35–41 naʻe aleaʻi ai hono lolomi ʻe Sīsū Kalaisi ʻa e matangi mālohí ʻi he Tahi Kālelí. Kapau ʻoku ʻi ai haʻo fakamatala ʻi hoʻo tohinoa akó mei he ngaahi lēsoni ko ʻení, fakakaukau ke toe vakaiʻi kinautolu.

Fakalaulauloto pea tali ʻa e ngaahi fehuʻi ko ʻení ʻi hoʻo tohinoa akó koeʻuhí ke ke lava ʻo muimuiʻi hoʻo fakalakalaka fakalaumālié.

Kuo liliu fēfē hoʻo ngaahi holi ke maʻu ha nonga ʻia Kalaisí ʻi hoʻo ako ʻEne moʻuí mo e ngāué?
Kuó ke ongoʻi nai ha tupulaki pe hōloa ʻo e melino ʻia Kalaisí ʻi he ngaahi uike siʻi kuohilí? Kapau ko ia, ʻokú ke pehē ko e hā e meʻa naʻe tokoni ki he liliu ko ʻení?
ʻOkú ke pehē ko e hā ʻoku hoko ai ʻa Sīsū Kalaisi ko e maʻuʻanga ʻo e melinó?
ʻOkú ke pehē ko e hā ʻoku finangalo ai e Fakamoʻuí ke ʻoatu ʻEne melinó?

Fakaafeʻi e kau akó ke nau loto-fiemālie ke vahevahe ha niʻihi ʻo ʻenau ngaahi fakakaukaú, ongó, pe ngaahi fehuʻí. Tuku ki he kau akó ke nau “lea totonu ʻaki [ʻenau] ngaahi fehuʻí ʻo hangē ko ia ʻoku fie maʻu ke [nau] faí” pea poupouʻi foki kinautolu ke ʻoua te nau “tuku e veiveiua ko iá ke ne taʻofi hono fakahoko ʻe he tuí ʻa e maná” (Jeffrey R. Holland, “ʻEiki, ʻOku ou Tui,” Ensign pe Liahona, Mē 2013, 94).

Fakakaukau ke fai hoʻo fakamoʻoní ki he founga ʻoku fakatupulaki ai e tuí ʻi hono ako e moʻui mo e ngaahi akonaki ʻa Sīsū Kalaisi ʻi he Fuakava Foʻoú. Mahalo ʻe tokoni ke vahevahe ha talanoa fakataautaha mo ha fakamoʻoni.