Mātiu 21–23; Maʻake 11; Luke 19–20; Sione 12

Vakai Fakalūkufuá

Naʻe fakahoko ʻe Sīsū Kalaisi ʻEne hāʻele lāngilangiʻia ki Selusalemá ke kamata ʻaki e uike fakaʻosi ʻo ʻEne ngāue fakafaifekau ʻi he māmaní. Naʻe fakamaʻa ʻe he Fakamoʻuí ʻa e temipalé pea fakamoʻui ʻa kinautolu naʻe haʻu kiate Ia ʻi he temipalé. Naʻá Ne akoʻi ʻa e ongo fekau lalahí pea fakahalaiaʻi ʻa e mālualoi ʻa e kau tangata tohí mo e kau Fālesí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 21:1–11; Sione 12:27–36

Taumuʻa ʻo e lēsoní: ʻE tokoni ʻa e lēsoni ko ʻení ke ongoʻi ʻe he kau akó ha fakaʻapaʻapa mo ha ʻapasia lahi ange kia Sīsū Kalaisi mo Hono misiona ke fakahaofi kitautolú.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe fekauʻaki mo ha taimi naʻa nau fie maʻu ai ha tokoni ʻa ha taha kehe ke mavahe mei ha tūkunga faingataʻa. Ke vakai ki ha sīpinga ʻo e faʻahinga tūkunga ko ʻení, te nau lava ʻo mamataʻi e “Feluteni ai e Fakamaau Totonú, ʻOfá , mo e ʻAloʻofá,” ʻoku maʻu ʻi he ChurchofJesusChrist.org, mei he taimi 0:00 ki he 5:01.
Meʻa ke fakaʻaliʻalí: Fakamatala fakakalafi ʻoku fakakau ʻi he lēsoní; ngaahi ʻīmisi ʻo e ngaahi meʻa fakaʻosi naʻe hoko ʻi he moʻui ʻa e Fakamoʻuí

Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama vahevahe ʻo e screen ke fakaʻaliʻali ʻa e fakamatala fakakalafí. ʻE lava leva ke fakaʻaongaʻi ʻe he kau akó ʻa e fepōtalanoaʻakí ke vahevahe ʻa e ngaahi fehuʻi ʻoku nau fie maʻu ke talí pe vahevahe ʻa e meʻa ʻoku nau fie ako lahi ange ki aí.

Mātiu 21:12–16

Taumuʻa ʻo e lēsoní: ʻE tokoni ʻa e lēsoni ko ʻení ke ongoʻi ʻe he kau akó ha holi lahi ange ke tauhi ʻa e temipalé ko ha feituʻu toputapu pea ke maʻu ʻa e mālohi faifakamoʻui ʻo e Fakamoʻuí ʻaki hono fakahoko e ngāue fakatemipalé.

Teuteu ʻa e tokotaha akó: Fakaafeʻi e kau akó ke fakalaulauloto ki heʻenau ʻaʻahi fakamuimui taha ki he temipalé. Kapau kuo teʻeki ai ke nau ʻalu ki he temipalé, fakaafeʻi kinautolu ke nau fakalaulauloto pe naʻe mei fēfē nai haʻanau ō ki he temipalé.
Meʻa ke fakaʻaliʻalí: Ngaahi ʻata ʻo e temipalé, kau ai e ngaahi ʻīmisi ʻo ha ngaahi loki kehekehe ʻi loto he temipalé

Fokotuʻu ki hono akoʻi ʻi he konifelenisi vitioó: Fakakaukau ke faʻu ha fakamatala ʻoku kau ai ʻa e ngaahi ʻīmisi ʻo e ngaahi loki kehekehe ʻi he temipalé, ko e ngaahi lea ʻa Palesiteni Nalesoni mo ʻEletā Lenilaní, mo ha ngaahi fehuʻi siʻi ki he fealēleaʻaki fakakalasí.

Mātiu 22:34–40

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó e founga ke moʻui ʻaki e ongo fekau lalahí.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe fekauʻaki mo ha taha ʻoku nau ʻilo kuó ne fakahaaʻi ʻoku nau ʻofa moʻoni ki he ʻOtuá mo e niʻihi kehé.

Ngaahi sīpinga mo e aʻusia fakatāutahá: Teuteu ke vahevahe ha ngaahi aʻusia fakataautaha mo ha ngaahi sīpinga kehe ʻo ha kakai ʻoku nau fakahaaʻi ʻi he lea mo e ngāué ʻoku nau ʻofa ki he ʻOtuá mo honau ngaahi kaungāʻapí.

Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi e kau akó ke nau fakakaukau ki ha taha kuó ne fakahaaʻi ʻoku ʻofa ki he ʻOtuá mo e niʻihi kehé. Fakaafeʻi e kau akó, kapau ʻe lava, ke aleaʻi mo e tokotaha ko ʻení e founga kuó ne fakahaaʻi ai ʻene ʻofa ki he ʻOtuá mo e niʻihi kehé. ʻAi ke haʻu mateuteu e kau akó ki he kalasí ke vahevahe.

Fakataukei Fakatokāteliné: Mātiu 22:36–39

Taumuʻa ʻo e lēsoní: ʻE tokoni atu e lēsoni ko ʻení ke ke akoako fakaʻaongaʻi e tokāteline ʻoku akoʻi ʻi he potufolofola ko ʻení mo e ngaahi tefitoʻi moʻoni ʻo hono maʻu e ʻilo fakalaumālié ke mahino e founga ke talangofua fakatouʻosi ai ki he ongo fekaú ke ʻofa ki he ʻOtuá mo ʻofa ki ho kaungāʻapí.

Teuteu ʻa e tokotaha akó: Fakaafeʻi e kau akó ke toe vakaiʻi e ngaahi fakamoʻoni fakafolofola ʻo e fakataukei fakatokāteliné mo e ngaahi kupuʻi lea fakafolofola mahuʻinga ʻi ʻapí ʻaki hono kole ki ha taha ke siviʻi kinautolu pe fakaʻaongaʻi e polokalama Doctrinal Mastery (Fakataukei Fakatokāteliné). ʻE lava foki ke fakaafeʻi ʻa e kau akó ke nau ngāueʻi ʻenau palani ke tauhi ʻa e ongo fekau lalahí.

Fokotuʻu ki hono akoʻi ʻi he konifelenisi vitioó: Lolotonga e konga akoako fakahoko ʻo e lēsoní, fakamoʻui ke lava ʻo fakaʻaongaʻi ʻa e palakipoe hinehiná mo e vahevahe ʻo e screen maʻá e kau akó. Vahe ʻa e kau akó ki ha ngaahi kulupu iiki, pea vahe ki ai ha taki. ʻE lava ke vahevahe ʻe he takí ʻenau palakipoe hinehiná mo e kulupú, pea ʻe lava ke faʻu ʻe he kulupú ʻa e tūkungá pea hiki ʻenau ngaahi fakakaukaú ʻi he palakipoé ʻi he kotoa ʻo e lēsoní. ʻE lava ke vahevahe ʻe he taki fakakulupu takitaha ha ʻata ʻo e ola fakaʻosi ʻo e palakipoe hinehina ʻa ʻenau kulupú pea fakamatalaʻi nounou ʻa e meʻa naʻe tohi ʻe heʻenau kulupú.

Mātiu 23

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke fakaʻehiʻehi mei he mālualoí pea hoko ko ha kau muimui moʻoni ʻo Sīsū Kalaisi.

Teuteu ʻa e tokotaha akó: Fakaafeʻi e kau akó ke nau fakakaukau ki ha kakai ʻoku nau feinga ke muimui ki he Fakamoʻuí ʻi he loto-fakamātoato mo e loto-moʻoni ʻi heʻenau tokoniʻi e niʻihi kehé.

Meʻa ke fakaʻaliʻalí: Ko e fakatātā ʻo ha tangata Siu ʻokú ne tui ha failaketeli

Fokotuʻu ki hono akoʻi ʻi he konifelenisi vitioó: Fakaʻaongaʻi ʻa e polokalama ʻo e palakipoe hinehiná ke lisi ʻa e ngaahi tefitoʻi moʻoni naʻe ʻiloʻi ʻe he kau akó lolotonga e lēsoní. ʻOange ha taimi ki he kau akó ke nau hiki ha lea [ʻa ha taha] fekauʻaki mo ha taha ʻo e ngaahi tefitoʻi moʻoni ko ʻení. Fakakaukau ke tā ha fasi mei mui lolotonga ʻenau tohí. ʻI he ʻosi ʻenau tohí, fakaafeʻi e kau ako ʻoku loto-fiemālié ke nau vahevahe ha niʻihi ʻo ʻenau ngaahi fakakaukaú mo e kalasí.