Seminelí
Mātiu 19–20; Maʻake 10; Luke 18

Mātiu 19–20; Maʻake 10; Luke 18

Vakai Fakalūkufuá

Naʻe tali ʻe Sīsū Kalaisi ʻa e ngaahi fehuʻi mo akoʻi ʻa e moʻoni fekauʻaki mo e malí mo e vete malí. Naʻá Ne fakaafeʻi ʻi he ʻofa ha talavou tuʻumālie ke fakatau atu ʻene koloá pea muimui kiate Ia. Naʻá Ne vahevahe foki ʻa e talanoa fakatātā ʻo e kau ngāue ʻi he ngoue vainé, ʻa ia ʻokú ne fakahaaʻi ʻa e ʻofa mo e ʻaloʻofa ʻokú Ne maʻu mo e Tamai Hēvaní maʻatautolu kotoa pē.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 19:1–12

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e founga kuo ʻomi ai ʻe he Tamai Hēvaní mo Sīsū Kalaisi ha founga ke nau maʻu ai ha nofo-mali fiefia mo taʻengata ʻi honau kahaʻú.

  • Teuteu ʻa e tokotaha akó: Fakaafeʻi e kau akó ke nau fakakaukau ki he meʻa te nau lava ʻo fai he taimí ni ke teuteu ai ki ha nofo-mali fiefiá. Poupouʻi kinautolu ke nau kumi faleʻi ki ha taha ʻoku nau ʻilo ʻoku fiefia mo angatonu ʻene nofo-malí.

  • Meʻa: Ko ha veʻeteka pasikala pe ko ha veʻeteka kehe ʻoku ʻi ai hano konga ʻi lotomālie (central hub)

  • Tokotaha fakaafe ke lea: Fakakaukau ke fakaafeʻi ha ongomeʻa mali mei ha uooti, kolo, siteiki, pe vahefonua fakalotofonua ke na haʻu ki he kalasí pea fakamatalaʻi ʻa e fiefia ʻoku ʻomi ʻe he nofo-malí kiate kinaua mo e founga kuo tokoniʻi ai kinaua ʻe he Fakamoʻuí ʻi heʻena nofo-malí. Fakapapauʻi ke maʻu ha ngofua mei he taki lakanga fakataulaʻeiki fakalotofonuá mo e kouʻotineita ʻo e S&I kimuʻa pea toki fakaafeʻi kinaua.

  • Vitiō: “Ko e Ngaahi Tāpuaki Taʻengata ʻo e Malí” (15:02; mamataʻi mei he taimi 6:23 ki he 8:40)

  • Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ha meʻangāue savea ʻi he ʻinitanetí maʻá e kau akó ke nau fakahaaʻi ʻo ʻikai fakahā honau hingoá ʻenau ongoʻi fekauʻaki mo e nofo-malí ʻi he ofi ki he kamataʻanga ʻo e lēsoní.

Mātiu 19:16–30; Maʻake 10:17–31

Taumuʻa ʻo e lēsoní: ʻE poupouʻi ʻe he lēsoni ko ʻení ʻa e kau akó ke nau ako mei he Fakamoʻuí ʻa e meʻa ʻokú Ne finangalo ke nau fai ʻi heʻenau feinga ke muimui lelei ange kiate Iá.

  • Teuteu ʻa e tokotaha akó: Fakaafeʻi e kau akó ke nau fakamanatu ha taimi ne nau houngaʻia ai ʻi hano fakatonutonu kinautolu ʻe ha taha. ʻE lava fēfē ke tokoniʻi kitautolu ʻi heʻetau ʻiloʻi ʻa e meʻa te tau lava ʻo fakaleleiʻí ke hoko ko ha fakaʻilonga ʻo e ʻofá?

  • Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e fakakaukau ʻi he konga ʻo e “Ngaahi ʻEkitivitī Tokoni Ki he Akó” ʻi he tohi lēsoni ʻa e faiakó ʻoku ui ko e “Ke maʻu ʻa e moʻui taʻengatá, kuo pau ke tau loto-fiemālie ke tukuange ha meʻa pē ʻoku finangalo ʻe he ʻEikí meiate kitautolu.” ʻOku kau ai ha ngaahi sīpinga ʻo kinautolu naʻa nau tali e fakaafe ʻa e Fakamoʻuí ke fai ha ngaahi liliú naʻa mo e feilaulau maʻongoʻongá.

Mātiu 20:1–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e ʻamanaki lelei ki hono maʻu e ngaahi tāpuaki ʻoku ʻomi ʻe Sīsū Kalaisi ʻo fakafou ʻi Heʻene Fakaleleí.

  • Teuteu ʻa e tokotaha akó: Fakaafeʻi e kau akó ke nau faʻu ha lisi ʻo e ngaahi tāpuaki ne nau maʻu mei he ʻEikí koeʻuhí kuo akoʻi kiate kinautolu ʻa e ongoongoleleí ʻi heʻenau kei siʻí. Ko e founga ʻe tahá, te nau lava ʻo faʻu ha lisi ʻo ha ngaahi faingamālie ʻe ala mole mei he kakaí kapau he ʻikai akoʻi kiate kinautolu ʻa e ongoongoleleí kae ʻoua kuo aʻu ki he konga kimui ʻo ʻenau moʻuí. Kole ki he kau akó ke nau fakakaukau ki he meʻa te nau lava ʻo ako mei he lisi naʻa nau faʻú.

  • Fokotuʻu ki hono akoʻi ʻi he konifelenisi vitioó: ʻE lava ke tuku hono lau ʻe he kau akó ʻa e lea ʻa ʻEletā Sefilī R. Hōlaní, kae fakakaukau ke vahevahe e konga vitiō “Ko e Kau Ngāue ʻi he Ngoue Vainé” ʻoku ʻi ai e fakamatalá.

Toe Vakaiʻi ʻo e Fakataukei Fakatokāteline 8

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke ako maʻuloto ha niʻihi ʻo e ngaahi fakamoʻoni fakafolofolá mo e ngaahi kupuʻi lea fakafolofola mahuʻinga mei he ngaahi fuofua potufolofola fakataukei fakatokāteline ʻe 11 ʻi he Fuakava Foʻoú.Fakatokangaʻi ange: Mahalo ʻe fie maʻu ke akoʻi ha lēsoni fakataukei fakatokāteline ʻo e potufolofolá ʻo fetongi ʻaki e lēsoni toe vakaiʻi ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá lolotonga e fakahoko ʻa e seminelí.

  • Teuteu ʻa e tokotaha akó: Fakaafeʻi e kau akó ke nau ʻomi ha ngaahi tatau ʻo e ngaahi naunau motuʻa ʻa e Siasí te nau lava ʻo kosiʻi mei ai ha ngaahi meʻa ke nau faʻu ha meʻa ke nau sio ki ai ke nau ako maʻuloto ai ʻa e ngaahi potufolofola fakataukei fakatokāteliné.

  • Laʻipepa Tufá: Ko e lisi ʻo e ngaahi potufolofola fakataukei fakatokāteliné mo e ngaahi kupuʻi lea fakafolofola mahuʻinga ʻoku fekauʻaki mo kinautolú

  • Ngaahi Naunaú: Ngaahi naunau ki he tohi, pepa, pea kapau ʻe lava, helekosi, kulū, mo e ngaahi makasini motuʻa ʻa e Siasí pe ʻū tohi lēsoni ʻoku ʻi ai ha ngaahi fakatātā

  • Fokotuʻu ki hono akoʻi ʻi he konifelenisi vitioó:ʻE lava ke faʻu ʻe he kau akó ha tā fakatahatahaʻi fakaʻilekitulōnika. ʻI heʻenau ʻosí, te nau lava ʻo vahevahe ʻenau screen ke fakaʻaliʻali ʻenau tā fakatahatahaʻí ki he kalasí.

Sivisiviʻi Hoʻo Akó 4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi ʻa e ngaahi taumuʻa kuo nau fokotuʻú pea mo e tupulaki fakaako mo e fakataautaha kuo nau aʻusia lolotonga ʻenau ako e Fuakava Foʻoú.

  • Teuteu ʻa e tokotaha akó: Fakaafeʻi e kau akó ke nau fakakaukau ki he tupulaki fakalaumālie kuo nau aʻusia lolotonga ʻenau ako e Fuakava Foʻoú. ʻOku tokoni nai ʻenau ako ʻa e Fuakava Foʻoú ke nau ʻiloʻi, ʻofa, mo tauhi ki he Tamai Hēvaní mo Sīsū Kalaisi? Ko e hā ha ngaahi aʻusia mahuʻingamālie kuo nau aʻusiá?

  • Ngaahi ʻAtá: Ngaahi ʻīmisi ʻo e maá mo e fanga sipí

  • Ngaahi naunau ki he ʻaatí: Pepa mo e ngaahi peni vahevahe fakalanulanu, ngaahi peni fakaʻilonga, pe ʻū kala

  • Fokotuʻu ki hono akoʻi ʻi he konifelenisi vitioó: Fakaafeʻi e kau akó ke vahevahe ʻenau kaati fakamāloó pe fakamatala ʻi he mītia fakasōsialé ʻi he meʻafaitaá.

Paaki