Галат 5
“Сүнсээр яв”
Танд уруу таталтад бууж өгөх, зөв шударга амьдрахын тулд Ариун Сүнсний өдөөлтийг дагах гэсэн хоёр хүслийн хооронд сонголт хийж чадахгүй байсан цаг үе байгаа юу? Төлөөлөгч Паул бидний мөнх бус, төгс төгөлдөр биш бие махбодын хүсэл, биднийг сайныг үйлдэхэд ятгадаг Бурханы Сүнс хоёрын хооронд өрнөж болох тэмцлийн талаар тайлбарлажээ. Энэ хичээл танд “Сүнсээр илүү бүрэн дүүрэн явах” ( Галат 5:16) арга замуудыг тодорхойлох боломжийг олгох замаар Есүс Христтэй илүү адил болоход туслах зорилготой.
Аюулгүй суралцах орчныг бүрдүүл. Хайр, хүндэтгэл, зорилго бүхий орчныг бүрдүүлэхийн тулд анхаарч, хүчин чармайлт гарга. Семинарын хичээлээр айж эмээх хэрэггүйг болон өөрсдийг нь хүндэлж, үнэлж байгааг мэдрүүлэхэд туслахын тулд таны гаргаж байгаа хүчин чармайлт суралцагчдад Ариун Сүнсийг илүү их мэдэрч, утга учиртай туршлага олж авахад тусална.
Суралцагчийн бэлтгэл: Суралцагчдыг Мозая 3:19 -ийг судлаад, өөрсдийн унасан мөн чанар буюу “эгэл хүн[ээ]” ялан дийлэхийн тулд Аврагчаас тусламж авахад туслах сургаалыг тодорхойлоход урь. Мөн суралцагчдыг төгс эзэмших сургаалын судрын энэ хэсгийг цээжлэхэд урих нь тустай байж болох юм.
Боломжит суралцах үйл ажиллагаа
Олс татах тэмцээн
Дараах зургийг үзүүл эсвэл самбарт зур. Мөн суралцагчдыг үүнтэй ижил төстэй зургийг судлах тэмдэглэлдээ хурдан хуулж зурахад урих талаар бодож үз.
-
Итгэл юугаараа олс татах тоглоомтой адилхан бэ?
Төлөөлөгч Паул галатчуудад бичсэн захидалдаа, биднийг хоёр өөр зүг рүү татаж болох хоёр сөрөг хүчний талаар тайлбарлажээ. Галат 5:16–17 -г уншаад, эдгээр хүчний талаар өгсөн Паулын зөвлөгөөг олж мэд.
-
Та эдгээр шүлгээс ямар сөрөг хүчнүүдийг тодорхойлсон бэ?
Олс татах тэмцээний зургийн тэг дундуур босоо шугам зурахыг бод. Дараа нь олс татах тэмцээний зургийн нэг талын дээд хэсэгт Сүнсээр явах, нөгөө талын дээд хэсэгт Махан биеийн хүслээ гүйцэлдүүлэх гэж бич. Судлах тэмдэглэлдээ зураг хуулж зурсан суралцагчдыг эдгээрийг бас нэмж зурахад урь.
“Махан биеийн хүсэл” ( 16-р шүлэг) гэдэг нь бидэнд тулгардаг уруу таталтууд юм.
-
Залуучуудад бие махбодын ямар уруу таталтууд (махан биеийн хүсэл) тулгардаг вэ?
Хариултуудаа Галат 5:19–21 дээрх Паулын гаргасан жагсаалттай харьцуул.
-
Танд ямар нэгэн мэдэхгүй үг байна уу?
Библийн зүүлт тайлбар эсвэл толь бичиг дээрх эх сурвалжуудыг ашиглах замаар 19–21 -р шүлэг дээрх мэдэхгүй аливаа үгээ ойлгоход нь суралцагчдад туслахад бэлэн бай.
Сүнс, махан биеийн хүсэл хоёрын хооронд болж буй олс татах тэмцээн таны амьдралд өрнөж байж болох талаар дотроо эргэцүүлэн бодоход хэдэн хором зарцуул. Махан биеийн хүсэлтэй холбоотой ямар ямар асуудал танд байж болох вэ? Та Сүнсний удирдамжийг дагаснаар хэрхэн адислагдсан бэ? Та үргэлжлүүлэн суралцахдаа, тулгарч буй уруу таталтуудыг ялан дийлэхэд тус болох өөрийн зүгээс хийж чадах аливаа өөрчлөлтийг олж мэдэхэд тань туслах сүнслэг өдөөлтүүдэд анхаарлаа хандуул.
Махан биеийн үйлээс зайлсхийх
Дараах заах зөвлөмж нь суралцагчдад Галат 5 дээрх Паулын сургаалыг илүү сайн ойлгож, амьдралдаа хэрэгжүүлэхэд туслах нэг арга замыг өгдөг.
Хэрэв суралцагчдад илүү энгийн бүтэцтэй арга замыг тустай гэж үзвэл, тэдэнд Галат 5:16–23 , Мозая 3:19 , Сургаал ба Гэрээ 11:12 -ын хамт ахлагч Дэвид А.Бэднарын 2013 оны 4-р сарын Ерөнхий чуулган дээр хэлсэн “Бид ариун явдалд итгэдэг” хэмээх үгийг бие даан судлах цаг гаргаж өгөхийг бодож үз (2013 оны 4-р сарын Ерөнхий чуулган, 50–53). Мөн бусад холбогдох эх сурвалжийг суралцагчдад өгч судлуулж болох юм. Тэднийг ойлгосон зүйлээ тайлагнахад мөн сурч мэдсэн болон үүний дараах хэлэлцүүлгийн үеэр хүлээн авсан аливаа сүнслэг өдөөлтөө бичиж тэмдэглэхэд урьж болно.
Утга учир бүхий туршлага хуримтлуулахад нь суралцагчдад туслах хамгийн шилдэг арга замыг олж мэдэхийн тулд Ариун Сүнсний өдөөлтийг дага.
Галат 5:21 -ийг уншаад, махан биеийн хүслээс зайлсхийх нь яагаад чухал болохыг олж мэд.
-
Бид эдгээр үйлдлээс яагаад зайлсхийвэл зохих талаар та юу олж мэдсэн бэ?
-
Буруу гэдгийг нь мэдсэн хэрнээ махан биеийн хүслээс зайлсхийхэд юу саад болдог вэ?
Арван хоёр төлөөлөгчийн чуулгын ахлагч Дэвид А.Бэднар ийн заасан.
Бурханы охид, хөвгүүдийн хувьд бид Түүнээс бурханлаг чадваруудыг өвлөн авсан. Гэвч бид одоо унасан дэлхийд амьдарч байна. Бидний бие махбодыг бүтээсэн элементүүд унасан дэлхийгээс бүрдсэн бөгөөд нүгэл, ялзрал, үхлээс ангид байж чаддаггүй. Тиймээс Адамын уналт ба үүний сүнслэг болон зуурдын үр дагаврууд бидний бие махбодоор дамжин бидэнд шууд нөлөөлдөг. …
Бие махбод нь Эцэгийн аз жаргалын төлөвлөгөөний болон бидний сүнслэг өсөлтийн гол төв учраас Люсифер биднийг биеэ зохисгүй байдлаар буруугаар ашиглахад уруу татаж, бидний өсөлт хөгжлийг хясахыг эрэлхийлдэг. Мөнх оршихуйн үндсэн егөөдлүүдийн нэг бол бие махбодгүйн учир үнэхээр зовлонт болох тэр, биеэ зохисгүй ашиглах олиггүй муу бүхэнд биднийг урин дуудаж, хорхойсуулах дайсан билээ. Өөрт нь байхгүй тэр багаж ийн биднийг сүнслэг байдлын хувьд сүйрүүлэх гэсэн оролдлогынх нь гол бай болсон юм.
(Дэвид А.Бэднар, “Бид ариун явдалд итгэдэг,” 2013 оны 4-р сарын Ерөнхий чуулган, 52)
-
Энэ мэдэгдлийн ямар үг, хэллэг та нарт онцгой санагдсан бэ? Яагаад?
Сүнсээр явахыг сонгох
Галат 5:16 -г дахин уншаад, бид махан биеийнхээ уруу таталтыг хэрхэн ялан дийлэх тухай Паулын сургаалыг олж мэд.
Галат 5:16 -аас бид Сүнсээр явснаар махан биеийн уруу таталтыг илүү сайн ялан дийлж чадна гэсэн нэг зарчмыг сурч мэдэж болох юм.
-
“Сүнсээр явах” гэдэг нь юу гэсэн утгатай гэж та нар бодож байна вэ?
Шаардлагатай бол, Сүнсээр явна гэдэгт Ариун Сүнсний удирдамж хүлээн авахыг эрэлхийлж мөн дагах нь багтдаг гэдгийг ойлгоход суралцагчдад тусал.
-
Сүнсээр явах нь хэрхэн махан биеийн уруу таталтыг ялан дийлэхэд тусална гэж та бодож байна вэ?
Мозая 3:19 , Сургаал ба Гэрээ 11:12 -ыг уншаад, Сүнсээр явахын ач холбогдлыг илүү сайн ойлгоход туслах сургаалуудыг олж мэд.
-
Эдгээр шүлгийг судалж байхад танд ямар бодол, мэдрэмж эсвэл сэтгэгдэл төрсөн бэ?
-
Танд тулгарах уруу таталтыг даван гарахад Есүс Христ хэрхэн туслах талаар та юу олж мэдсэн бэ?
-
Сүнс тантай хамт илүү бүрэн дүүрэн байгааг батлахын тулд та ямар ямар тодорхой зүйл хийж чадах вэ?
Ангийнханд дараах асуултыг тавихаасаа өмнө, үүнтэй холбоотой хувийнхаа жишээг хуваалцахыг бодож үз.
-
Сүнс уруу таталтыг даван гарахад тань тусалж байсан ямар ямар туршлага танд байдаг вэ? (Хэт хувийн чанартай туршлагаа хуваалцахгүй байхад анхаар.)
Сүнсний үр жимс
Биднийг Ариун Сүнсийг сонсож, дагах үед амьдралд маань тохиолдож болох олон адислалыг Паул тодорхойлсон. Тэр эдгээр адислалыг “Сүнсний үр жимс” ( Галат 5:22) гэж нэрлэсэн байдаг.
Галат 5:22–23 -ыг уншаад, Паулын тодорхойлсон Сүнсний үр жимсийг олж мэд.
-
Та амьдралдаа Сүнснээс ирдэг эдгээр адислал эсвэл мэдрэмжийн алийг нь мэдэрч байсан бэ?
-
Эдгээр адислал нь Тэнгэрлэг Эцэг, Есүс Христ хоёрын талаар юуг ойлгоход танд тусалдаг вэ? (Шаардлагатай бол Дуулал 25:8–10 ; Мозая 2:41 -ийг үзнэ үү.)
Сурч мэдсэн зүйлсээ хэрэгжүүлэх
Есүс Христ үргэлж Тэнгэрлэг Эцэгийн тааллын дагуу үйлддэг байсан ( 3 Нифай 27:13 -ыг үзнэ үү) бөгөөд гэм нүгэл үйлдэх уруу таталтыг даван гарч чадахуйц амьдарч байсны төгс төгөлдөр жишээ юм. Хэдийгээр Тэр махан биеийн төрөл бүрийн уруу таталттай нүүр тулж байсан ч ( Еврей 4:15 ; Алма 7:11 -ийг үзнэ үү), “тэдгээрт анхаарал тавьсан нь үгүй” ( Сургаал ба Гэрээ 20:22).
Та Есүс Христийн үлгэр жишээг дагаж, өнөөдөр судалсан үнэнүүдээ амьдралдаа хэрэгжүүлэхийг хэрхэн хичээх талаар эргэцүүлэн бодоход хэдэн хором зарцуул. Аль хэдийн хүлээн авсан аливаа өдөөлтийнхөө талаар бодож, Сүнсээр илүү бүрэн дүүрэн явж, уруу таталтыг эсэргүүцэхийн тулд хийх зүйлийнхээ төлөвлөгөөг гарга. Төлөвлөгөөгөө судлах тэмдэглэлдээ бичиж тэмдэглэ.
Тайлбар ба нөхцөл байдлын талаарх мэдээлэл
Ариун Сүнсийг дагах нь уруу таталтыг эсэргүүцэж, даван гарахад надад хэрхэн туслах вэ?
Арван хоёр төлөөлөгчийн чуулгын ерөнхийлөгч Боид К.Пакэр (1924–2015) ийн заасан.
Та нараас амьдралыг ямар ч алдаа гаргахгүйгээр туул гэж хүсэж хүлээдэггүй, гэхдээ Ариун Сүнсний өдөөлтөөр эхэлж сэрэмжлүүлэгдэхгүйгээр та нар том алдаа гаргахгүй. Энэхүү амлалтыг Сүмийн бүх гишүүнд өгсөн юм. …
Хэрэв та оролцох ёсгүй зүйлд оролцож байгаа бол эсвэл та нарыг буруу чигт татах хүмүүстэй холбоотой байгаа бол бие даасан байдал, сонгох эрх чөлөөгөө хэрэгжүүлэх цаг болсон байна шүү. Сүнсний дуу хоолойг сонс, тэгвэл та нар төөрөхгүй.
Өнөөдрийн залуу үеийнхэн ёс суртахууны чанар доройтож байгаа дайсны нутагт өсөж торниж байгааг би дахин хэлье. Гэвч хэрэв та нар Ариун Сүнснээс ирэх өдөөлтийг сонсож дагах юм бол дайсны довтолгоонуудаас хамгаалагдаж, хуяглагдах болно гэдгийг би Их Эзэний үйлчлэгчийн хувьд амлаж байна.
(Боид К.Пакэр, “Залуучуудад зөвлөх нь,”2011 оны 10-р сарын Ерөнхий чуулган, 20)
Махан биеийн хүсэл, Сүнсээр явах хүслийн аль алиных нь үр дүнг хэрхэн дүрслэн харуулсныг харахын тулд ChurchofJesusChrist.org дээрх “LDS Донтолтоос ангижруулах хөтөлбөр: Сидрестэй уулз” (3:06) видеог үзнэ үү.
Нэмэлт суралцах үйл ажиллагаа
Паулын сургаал ба Лихайн зүүд
Галат 5:16–23 -т Паул Сүнсээр явахын адислалыг махан биеийн хүслийг гүйцэлдүүлэхийн үр дагавартай харьцуулжээ. Энэхүү харьцуулалтыг амьдралын модны тухай Лихайн үзэгдэлд хэрхэн дүрсэлснийг бодох замаар төсөөлөн бодох нь суралцагчдад тустай байж болно.
Дагалдах зургийг үзүүлээд, уг зургийн аль хэсэг нь Сүнсээр явах талаарх Паулын сургаалыг илэрхийлж, харин аль нь махан биеийн хүслээ гүйцэлдүүлэх талаарх сургаалыг нь төлөөлж байгааг суралцагчдаас асуух тухай бодож үз. Паулын сургаалын хэсгүүд Лихайн зүүдэнд хэрхэн тусгагдсаныг 1 Нифай 8:10–12 , 19–34 -өөс олж харахад суралцагчдыг урих нь тустай байж болно.
Галат 5:22–23 . Сүнсний үр жимс
Галат 5:22–23 -т жагсаасан Сүнсний үр жимсний талаар илүү дэлгэрэнгүй хэлэлцүүлэг өрнүүлэхийг бодож үз. Ийн үйлдэх нэг арга зам бол самбарт жимсний мод зурах эсвэл цаасан дээрх жимсийг төлөөлж буй хэсгийг хайчилж авах явдал байж болох юм. Дараа нь суралцагчид Галат 5:22–23 -аас олж мэдсэн Сүнсний үр жимснүүдийг нэг бүрчлэн нэрлэж болно. Үүний дараа эдгээр үг хэллэгийн утга агуулга, Сүнснээс эдгээр мэдрэмжийг мэдэрч байсан туршлага, амьдрал нь сүнсний аль нэгэн жимсийг үлгэрлэн харуулж байсан таньдаг хүмүүсийнхээ талаар ярилцахыг бодоорой (“9-р сарын 25-аас 10-р сарын 1. Галат: ‘Сүнсээр яв’” Ирээд, Намайг дага—Хувь хүн, гэр бүлүүдэд зориулав: Шинэ Гэрээ 2023-аас авав).