A e pyet veten ndonjëherë nëse përpjekjet e tua për ta jetuar ungjillin e Jezu Krishtit do të çojnë drejt synimeve të përjetshme? Pali u shkroi shenjtorëve në Galati për t’i ndihmuar ata të dallonin se mënyra se si ne e jetojmë çdo ditë jetën tonë ndikon në faktin nëse Shpëtimtari do të na bekojë me “jetë të përjetshme” ( Galatasve 6:8). Ky mësim mund të të ndihmojë të dallosh veprimet që duhet të ndërmarrësh për të realizuar synimet e tua të përjetshme.
Nxitja e zbatimit. Qëllimi i mësimdhënies së ungjillit është të ndihmojë nxënësit t’i zbatojnë doktrinën dhe parimet që gjenden në shkrimet e shenjta. Pyetjet dhe veprimtaritë që nxitin zbatimin mund t’i ndihmojnë nxënësit të kuptojnë se si ta zbatojnë doktrinën dhe parimet në jetën e tyre.
Përgatitja e nxënësve: Ftojini nxënësit të lexojnë vargjet te Galatasve 6:7–9 dhe të vijnë të përgatitur për të treguar se si mendojnë se mësimet në këto vargje mund të ndikojnë në vendimet e tyre të përditshme.
Veprimtari të Mundshme të të Mësuarit
Synimet e përjetshme
Thënia vijuese nga Plaku Kuentin L. Kuk mund të përdoret për t’i ndihmuar nxënësit të fillojnë të mendojnë për ndikimin që vendimet tona të përditshme kanë në rezultatet që do të marrim. Një ide alternative për mënyrën se si ta filloni mësimin mund të gjendet te veprimtaria “Galatasve 6:7–8. Mbjellja dhe korrja e farave”, që gjendet te pjesa “Veprimtari Plotësuese të të Mësuarit”.
Plaku Kuentin L. Kuk, i Kuorumit të Dymbëdhjetë Apostujve, tregoi një bisedë të paharrueshme që pati dikur me një të ri.
Shiko materialin filmik “Zgjidhni me Mençuri”, në dispozicion në ChurchofJesusChrist.org, nga kodi kohor 03:03 deri në 04:52 ose lexo thënien vijuese. Kërko synimet që kishte ky i ri dhe keqkuptimet që mund të ketë pasur për arritjen e tyre.
Pamja
Official portrait of Elder Quentin L. Cook. Called to the Quorum of the Twelve Apostles on 6 October 2007.
“Kohët e fundit takova një të ri adoleshent të hijshëm. Synimet e tij ishin të shkonte në mision, të merrte arsimim, të martohej në tempull dhe të kishte një familje besnike e të lumtur. Isha shumë i kënaqur me synimet e tij. Por gjatë bisedës së mëtejshme, u bë e qartë se sjellja e tij dhe zgjedhjet që po bënte, nuk ishin në përputhje me synimet e tij. Ndjeva se ai sinqerisht donte të shkonte në mision dhe po shmangte shkelje të rënda që do ta ndalonin nga një mision, por sjellja e tij ditë pas dite nuk po e përgatiste për sfidat fizike, emocionale, shoqërore, intelektuale dhe shpirtërore që ai do të haste. Ai nuk kishte mësuar të punonte fort. Ai nuk ishte serioz me shkollën apo seminarin. Ai merrte pjesë në kishë, por nuk e kishte lexuar Librin e Mormonit. Ai po harxhonte një sasi të madhe kohe me videolojëra dhe mjete të komunikimit shoqëror. Dukej se mendonte që thjesht të shkuarit në mision do të mjaftonte.”
(Kuentin L. Kuk, “Zgjidhni me Mençuri”, Ensign ose Liahona, nëntor 2014, f. 47)
Çfarë mund të ketë keqkuptuar ky i ri lidhur me arritjen e synimeve të tij?
Në ditarin tënd të studimit, bëj një listë të shkurtër të synimeve që ke që do t’i konsideroje me rëndësi të përjetshme. Mendo se përse ti dëshiron t’i arrish këto synime. Përsiat se si sjellja jote ditë pas dite mund të të drejtojë drejt ose larg nga këto synime me rëndësi të përjetshme. Ndërsa studion, kërko të vërteta që mund të të ndihmojnë t’i përputhësh më mirë veprimet e tua të përditshme me rezultatet me rëndësi të përjetshme që dëshiron.
Ligji i të korrave
Shenjtorët në Galati ishin ekspozuar ndaj mësimeve të rreme që bënë që shumë vetë të udhëhiqeshin shtrembër (shih te Galatasve 1:6–9). Disa besuan dhe dhanë mësim doktrinën e rreme që johebrenjtë e kthyer në besim duhej të rrethpriteshin që të shpëtoheshin (shih te Galatasve 6:12 ; Veprat e apostujve 15:1). Të tjerët besonin në mënyrë të rreme se hiri i Krishtit u dha atyre liri për të mëkatuar (shih te Galatasve 5:13). Pasi i trajtoi këto bindje të rreme dhe i nxiti shenjtorët t’i ndihmonin ata që kishin humbur rrugën shpirtërore, Pali dha mësim një të vërtetë të rëndësishme për t’i ndihmuar njerëzit të kuptonin ndikimin e veprimeve të tyre.
Lexo te Galatasve 6:7–8 . Kërko një të vërtetë që Pali e dha mësim që mund të ndikojë në veprimet tona të përditshme. Vër re fjalët mbjellja dhe korrja që përmenden në këto vargje.
Si do t’i shpjegoje mësimet e Palit me fjalët e tua?
Një e vërtetë që mund të mësojmë nga Galatasve 6:7 është se çfarëdo të mbjellë një person, atë edhe do të korrë. Kjo ide zakonisht i referohet ligjit të të korrave.
Çfarë shembujsh të kësaj të vërtete ke parë në jetën tënde ose në jetën e të tjerëve?
Si mund të ndikojë të kuptuarit e kësaj të vërtete në vendimet që ti merr në jetën tënde?
Mësimet e Almës për birin e tij, Koriantonin, te Libri i Mormonit mund të na ndihmojnë t’i kuptojmë më mirë nënkuptimet e përjetshme të ligjit të të korrave ose atij që Alma iu referua si “plani i rivendosjes”. Lexo tek Alma 41:3–6, 10–15 , duke kërkuar të vërteta që e përmirësojnë kuptueshmërinë tënde rreth mësimeve të Palit.
Cilat fjalë ose fraza t’u dukën domethënëse nga këto vargje? Përse?
Pasi e shqyrtove atë që Alma i mësoi Koriantonit, si zbatohet ky mësim në fjalët e Palit që “ç’të mbjellë njeriu, atë edhe do të korrë”? ( Galatasve 6:7 .)
Çfarë të ndihmojnë të kuptosh mësimet që ke studiuar deri më sot për Atin Qiellor dhe Jezu Krishtin?
Ftesa e Palit drejtuar galatasve
Pali i përmbylli mësimet e tij për ligjin e të korrave me një ftesë. Lexo te Galatasve 6:9–10 , duke kërkuar atë që Pali i ftoi shenjtorët të bënin.
Merreni parasysh t’i paraqitni pyetjet vijuese dhe t’i ftoni nxënësit t’i diskutojnë ato në dyshe ose grupe të vogla. Më pas u kërkoni disa vullnetarëve t’ia tregojnë përgjigjet e tyre klasës.
Si mendon, çfarë do të thotë “të mos lodhemi duke bërë të mirën”? ( Galatasve 6:9 .)
Në ç’mënyrë është Jezu Krishti shembulli i përsosur i kësaj?
Si mendon, çfarë nënkuptoi Pali kur tha se ne do të korrim “në kohën e vet” ( Galatasve 6:9) ndërsa përpiqemi t’u bëjmë mirë të tjerëve? Përse është e rëndësishme kjo për t’u kuptuar?
Zbatimi i asaj që mësove
Presidenti Dallin H. Ouks, i Presidencës së Parë, na nxiti të mendojmë se ku do të na drejtojë secila prej zgjedhjeve tona (shih “Ku do të na Çojë Kjo?”, Ensign ose Liahona, maj 2019, f. 60–62).
Për ta zbatuar këtë këshillë nga Presidenti Ouks, kryej veprimtarinë vijuese.
Krijo një tabelë të ngjashme me sa vijon:
Çfarë po mbjell (veprimet që kryen rregullisht)
Çfarë po korr ose mund të presësh të korrësh në të ardhmen (ku të çojnë këto veprime)
Në anën e majtë bëj një listë të disa prej gjërave që harxhon pjesën më të madhe të kohës tënde duke i bërë ose do të doje të filloje t’i bëje rregullisht.
Në anën e djathtë, shkruaj se cilat ndien se do të jenë rezultatet e bërjes së atyre gjërave rregullisht. Mendo për rezultatet që mund të presësh po t’i përsëritje këto veprime rregullisht për një javë, një muaj, një vit, pesë vite ose edhe për gjithë jetën tënde.
Përsiat për çdo nxitje që ke marrë nga Fryma e Shenjtë teksa studiove sot. Poshtë tabelës tënde shkruaj çdo rregullim që je ndierë i nxitur të bësh në jetën tënde që do të të ndihmojë të kualifikohesh më mirë për të marrë bekimet që dëshiron. Perëndia do të të ndihmojë ndërsa bën përpjekjet e tua më të mira (shih te Doktrina e Besëlidhje 123:17).
Komente dhe Informacion për Rrethanat
Galatasve 6:8 . Çfarë do të thotë nëse një person “mbjell për Frymë” ose “mbjell për mish të tij”?
Plaku Ulises Soares, i Kuorumit të Dymbëdhjetë Apostujve, dha mësim:
Pamja
Elder Ulisses Soares, Quorum of the Twelve Apostles official portrait.
“Të mbjellësh në Frymë do të thotë se të gjitha mendimet, fjalët dhe veprimet tona duhet të na ngrenë në nivelin e hyjnueshmërisë së prindërve tanë qiellorë. Megjithatë, shkrimet e shenjta i referohen mishit si natyra fizike apo trupore e njeriut të natyrshëm, që i lejon njerëzit të ndikohen nga pasioni, dëshirat, orekset dhe shtytjet e mishit, në vend të kërkimit për frymëzim nga Fryma e Shenjtë. Nëse nuk jemi të kujdesshëm, ato ndikime të ndërthurura me presionin e së keqes në botë, mund të na nxisin të praktikojmë sjellje të vrazhdë dhe të pamatur, që mund të bëhet pjesë e karakterit tonë. Në mënyrë që t’i shmangim ato ndikime të pahijshme, ne duhet të ndjekim atë për të cilën Zoti e udhëzoi Profetin Jozef Smith rreth mbjelljes vazhdimisht në Frymë: ‘Prandaj, mos u lodhni së bëri mirë, sepse ju po ngrini themelin e një vepre të madhe. Dhe nga gjëra të vogla vjen ajo që është e madhe’ ( Doktrina e Besëlidhje 64:33).”
(Ulises Soares, “Qëndroni në Territorin e Zotit!”, Ensign ose Liahona, maj 2012, f. 39)
Presidenti Dallin H. Ouks, i Presidencës së Parë, dha mësim:
Pamja
Official Portrait of President Dallin H. Oaks taken March 2018.
“Nëse kënaqemi me drogë ose pornografi apo ligësi të tjera që Apostulli [Pal] i quajti mbjellje për mishin, ligji i përjetshëm dikton që do të korrim prishje në vend të jetës së përjetshme. Kjo është drejtësia e Perëndisë dhe mëshira nuk mund ta grabitë drejtësinë. Nëse shkelet një ligj i përjetshëm, duhet vuajtur dënimi i parashikuar në atë ligj. Një pjesë e kësaj mund të shfajësohet me anë të Shlyerjes së Shpëtimtarit, por pastrimi i mëshirshëm i një mëkatari të ndotur vjen vetëm pas pendimit (shih tek Alma 42:22–25), që për disa mëkate është një proces i zgjatur dhe i dhembshëm.”
(Dallin H. Oaks, “Be Not Deceived”, Ensign ose Liahona, nëntor 2004, f. 45)
Si mund ta ndryshojnë përpjekjet e vogla jetën time dhe jetën e të tjerëve?
Ftojini nxënësit të mendojnë për mënyrën se si Shpëtimtari iu përgjigj atyre që po jetonin në mëkat. Kërkojuni nxënësve të lexojnë te Galatasve 6:1–2 dhe të kërkojnë mënyrën se si Pali na ftoi të ndjekim shembullin e Shpëtimtarit në mënyrën se si u përgjigjemi mëkatarëve. Merreni parasysh të jepni përkufizimet vijuese për nxënësit ndërsa studiojnë:
Të “bie[sh] në ndonjë faj”: kjo do të thotë të kapesh në mëkat.
“Lartësojeni”: fjala origjinale në greqisht katartizete “do të thotë të bashkosh në nyjë, për shembull një kockë e dalë nga vendi; në të njëjtën mënyrë ne duhet të përpiqemi t’i rivendosim sërish ata së bashku”, ose, me fjalë të tjera “t’i kthejmë [ata] në detyrën e tyre” (Matthew Henry’s Commentary on the Whole Bible: Volume VI–II—First Corinthians–Second Timothy [2018], f. 168).
“Ki kujdes veten tënde”: kjo do të thotë të jesh i vetëdijshëm për veten dhe të kujdesesh për veten.
Ftojini nxënësit të tregojnë atë që ndiejnë se Pali donte që galatasit të kuptonin. Merreni parasysh të bëni pyetje si ato në vijim:
Si mund t’i lartësojmë të tjerët te Krishti pa rënë në tundim bashkë me ta?
Si mundet mbajtja e barrëve të të tjerëve të ndihmojë që ata të lartësohen te Krishti?
Si mund të na ndihmojë ndjekja e këshillës së Palit që të bëhemi më të ngjashëm me Shpëtimtarin? (Shih Mosia 18:8–10 .)
Paraqitni disa fara të një frute ose perimeje që nxënësit do ta njohin lehtësisht. Kërkojuni atyre të përcaktojnë se çfarë lloj farash janë ato.
Çfarë mund të prisni [të mbijë] nëse i mbillni këto fara? Ftojeni një nxënës të lexojë me zë të lartë vargjet te Galatasve 6:7–8 . Vëreni klasën ta ndjekë, duke kërkuar atë që Pali dha mësim rreth asaj që ne mund të presim [të mbijë] kur mbjellim fara.