Hepelū 1–6

Vakai Fakalūkufuá

Naʻe tafoki ha tokolahi ʻo e kau Kalisitiane Siú mei he Siasí koeʻuhí ko e mālohi ʻa e ngaahi faingataʻá, ʻo foki ki heʻenau ngaahi founga angamaheni ʻo e lotu faka-Siu ʻi he falelotu lahí. Naʻe loto ‘a Paula ke fakahā ki he kau Kalisitiane Siú ʻoku māʻolunga ange ʻa Sīsū ʻia Mōsese pea naʻe ʻomi ʻe Heʻene ngāue fakafaifekaú ha fuakava foʻou ne māʻolunga ange ʻi he fuakava motuʻa ʻi he malumalu ʻo e fono ʻa Mōsesé. Naʻe akoʻi ʻe Paula naʻe hāʻele hifo ʻa Sīsū Kalaisi mei Hono taloni fakalangí ke moʻui ko ha tangata fakamatelie ʻi he māmaní pea fakahoko ha Fakalelei taʻefakangatangata maʻatautolu. ʻI hono poupouʻi ʻe Paula e Kāingalotú ke tukuange e ngaahi tōʻonga taʻetuí, naʻá ne feinga ai ke tokoniʻi kinautolu ke nau toe foki ki he ngaahi fuakava kuo nau faí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Hepelū 1–10

Taumuʻa ʻo e lēsoní: ʻE lava ke tokoni e lēsoni ko ʻení ke fakamālohia e tui ʻa e kau akó ki he Fakamoʻuí ʻi heʻenau ako ki Hono mālohi ki he meʻa kotoa peé ʻaki hono ʻiloʻi mo ako ha niʻihi ʻo Hono ngaahi huafa fakaelakangá mo e ngaahi fatongiá.

Teuteu ʻa e tokotaha akó: Fakaafeʻi e kau akó ke kumi e ngaahi huafa ʻo Sīsū Kalaisí lolotonga ʻenau ako folofola fakatāutahá pe fakafāmilí pea haʻu mateuteu ki he kalasí ke vahevahe e ngaahi huafa ne nau maʻú.

Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ha fakatātā ʻo Sīsū Kalaisi pea fakaʻaongaʻi polokalama fetalanoaʻakí ke fakaʻatā e kau akó ke hiki e ngaahi huafa mo e ngaahi fatongia ʻo Kalaisi ʻoku nau ʻilo ʻi he tohi Hepeluú. ʻE lava foki ke tuku hake ʻe he kau akó ʻa e huafa fakaelakanga pe fatongia ne nau fili ke akó. ʻE lava ke tokoni ʻeni ke ʻiloʻi ʻa e huafa fakaelakanga pe fatongia naʻe ako ʻe he tokolahi taha ʻo e kau akó. ʻE lava leva ke vahevahe ʻe he kau akó ʻa e ʻuhinga ʻoku nau pehē naʻe hoko ai e huafa fakaelakanga pe fatongia ko iá ko e meʻa naʻe ako lahi tahá pe ko e ʻuhinga ʻe mahuʻingamālie ai ki he toʻu tupú.

Hepelū 2–4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke fakatupulaki ʻa e loto-falala ʻa e kau akó ʻe lava ke tokoniʻi kinautolu ʻe Sīsū Kalaisi ʻi he taimi ʻo e faingataʻá.

Teuteu ʻa e tokotaha akó: Fakaafeʻi e kau akó ke nau toe vakaiʻi ʻa e potufolofola fakataukei fakatokāteline ʻAlamā 7:11–13 pea haʻu mateuteu ki he kalasí ke vahevahe ʻa e ʻuhinga ʻoku nau ongoʻi ai ko ha potufolofola mahuʻinga ʻeni ke mahino kiate kinautolú.

Meʻa ke fakaʻaliʻali atú: Ko e saati ke fakafonu ʻe he kau akó

Fokotuʻu ki hono akoʻi ʻi he konifelenisi vitioó: Ki he ʻekitivitī ʻo e sātí, fakakaukau ke fakaʻaongaʻi ʻa e palakipoé pe ko ha spreadsheet ʻi he ʻinitanetí ke faʻu ʻaki e sātí pea vahevahe ia mo e kalasí. Fakaafeʻi e kau akó ke nau fakafonu e saati ʻi he komipiutá ʻaki e meʻa ʻoku nau maʻú, makehe mei hono fakakakato ia ʻi heʻenau tohinoa akó.

Hepelū 3–4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ikunaʻi ʻa e taʻetuí kae lava ke nau maʻu e ngaahi tāpuaki kuo talaʻofa mai ʻe he Fakamoʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi ʻuhinga ʻoku nau tui ai kia Sīsū Kalaisí mo e founga ʻoku tāpuekina ai kinautolu ʻi heʻenau tui kiate Iá.

Fokotuʻu ki hono akoʻi ʻi he konifelenisi vitioó: ʻI hono vahevahe e fakamatala fekauʻaki mo e fānau ʻo ʻIsilelí, ʻe ala tokoni ke vahevahe ha screen mo e ngaahi ʻīmisi ʻo Mōsese mo e fānau ʻo ʻIsilelí ʻi he feituʻu maomaonganoá.

Hepelū 7–10

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke fakamālohia e tui ʻa e kau akó kia Sīsū Kalaisi ko honau Fakamoʻui mo e Huhuʻí ʻaki hono tokoniʻi kinautolu ke mahino kiate kinautolu e ngaahi fakataipe fakakuongamuʻa ʻi he fono ʻa Mōsesé.

Fakatokangaʻi ange: ʻOku fakamatala ʻa e lēsoni ko ʻení ki he lēsoni ʻoku ʻikai fakakau ʻi he uike ko ʻení fakatatau ki he Haʻu, ʻo Muimui ʻIate Aú. Ke ʻoange ha ngaahi faingamālie ke fakamatalaʻi ai e fakataukei fakatokāteliné mo e ngaahi meʻa mahuʻinga kehe ʻi he uike hono hoko ʻo e Haʻu, ʻo Muimui ʻIate Aú, naʻe hiki ʻa e lēsoni ko ʻení ki heni. ʻE lava ke ako ʻe he kau akó e lēsoni ko ʻení ʻi he lolotonga ʻo e uiké.

Teuteu ʻa e tokotaha akó: Fakaafeʻi e kau akó ke ʻomi ha meʻa ki he kalasí pea fakamatalaʻi e founga ʻoku fakamoʻoniʻi pe fakamanatu ange ai [ʻe he meʻa ko iá] kiate kinautolu ʻa Sīsū Kalaisí. Hangē ko ʻení, ʻe lava ke ʻomi ʻe ha tokotaha ako ha foʻi lapa pea fakamatalaʻi ange ʻokú ne fakamanatu kiate kinautolu ʻa Sīsū Kalaisi koeʻuhí he te Ne lava ʻo lapaʻi, pe fakamolemoleʻi ʻetau ngaahi angahalá.

Fokotuʻu ki hono akoʻi ʻi he konifelenisi vitioó: Fakakaukau ke faʻu ha PowerPoint pe ko ha ako fakavitiō kehe ʻa ia ʻe lava ke fakaʻaliʻali ai e ngaahi ʻīmisi mo e fakaʻuhinga ʻo e ngaahi leá ʻi he taimi totonu ʻi he lēsoní.

Toe Vakaiʻi Hono 22 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke ako maʻuloto ha niʻihi ʻo e ngaahi fakamoʻoni fakafolofola mo e ngaahi kupuʻi lea fakafolofola mahuʻinga ʻo e potufolofola fakataukei fakatokāteline ʻo e Fuakava Foʻoú.

Teuteu ʻa e tokotaha akó: Fakaafeʻi e kau akó ke nau talanoa mo ha mēmipa ʻo e fāmilí pe kaungāmeʻa fekauʻaki mo e founga kuo ueʻi fakalaumālie ai ʻe hono ako maʻuloto ʻo e folofolá ʻa e mēmipa ʻo e fāmilí pe kaungāmeʻá pe tokoniʻi kinautolu ke nau ofi ange ki he Fakamoʻuí.

Ngaahi Naunaú: Ko ha laʻipepa mo ha naunau faitohi maʻá e tokotaha ako takitaha

Fokotuʻu ki hono akoʻi ʻi he konifelenisi vitioó: Fakakaukau ke fakaʻatā e kau akó ke nau tā ha ngaahi fakatātā ʻo fakaʻaongaʻi ʻa e founga annotate [annotate function]. ʻE lava ke taufetongi e kau akó ʻi hono tā ha fanga kiʻi tokoni mo mateʻi ʻa e potufolofola fakataukei fakatokāteliné.